2 රාජාවලිය 16–25

අපගෙන් බොහෝ දෙනෙකුට අපගේ ඇදහිල්ල අභියෝගයට ලක් කරන අත්දැකීම් තිබෙනවා. ඇසිරියානු හමුදාව යෙරුසලමට ළඟා වූ විට, හෙසකියාට සහ ඔහුගේ සෙනඟට එම අභියෝගවලින් එකක් ඇතිවුණා. ඔබ 2 රාජාවලිය 18–19 කියවන විට, ඔබ මේ කාලය තුළ යෙරුසලමේ ජීවත් වූ බව සිතන්න. උදාහරණයක් වශයෙන්, 2 රාජාවලිය 18:28–37; 19:10–13 තුළ ඇසිරියානුවන්ගේ නින්දා කිරීම් ඇසීමෙන් ඔබට කෙසේ හැඟෙන්නට තිබුණාද? ඔබ කුමක් කරන්නට තිබුණාද? ඉශ්‍රායෙල්වරුන් ස්වාමින්වහන්සේව විශ්වාස නොකිරීමට ඇසිරියානුවන් දැක්වූ හේතු, අද අපගේ ඇදහිල්ල සැක කිරීමට සාතන් ලබාදෙන හේතු සමඟ සසඳන්න. ඔබ ස්වාමින්වහන්සේ කෙරෙහි විශ්වාසය තැබීමට ඔබට ඇති හේතු සමඟ ඇසිරියානුවන්ගේ හේතු සන්සන්දනය කරන්න ඔබට පුළුවන්.

මෙම තත්වය තුළ හෙසකියාගේ ක්‍රියාවලින් ඔබ ඉගෙනගන්නේ කුමක්ද? (බලන්න 2 රාජාවලිය 19:1–7, 14–19). ස්වාමින්වහන්සේ ප්‍රතිචාරය දැක්වූයේ කෙසේද? (බලන්න 2 රාජාවලිය 19:35–37). ඔබ සිතන ආකාරයට හෙසකියා ඇදහිලිවන්තව සිටියේ ඇයි? (බලන්න 2 රාජාවලිය 18:5–7). අභියෝගාත්මක කාලවලදී ස්වාමින්වහන්සේ ඔබට උපකාර කළ ආකාරය ගැන මෙනෙහි කරන්න. ඔබට පෙළඹවීමක් දැනෙන්නේ උන්වහන්සේ කෙරෙහි ඔබේ විශ්වාසය වැඩි කර ගැනීමට කුමක් කරන්නටද?

සභාපති ජෙෆ්‍රි ආර්. හොලන්ඩ්ගේ “භය නොවන්න: ඇදහිල්ලෙන්ම සිටින්න!” (ලියහෝනා, මැයි 2022, 34–36) යන පණීවිඩයේ බිය හෝ සැකය ඇතිවන අවස්ථාවන් සඳහා ප්‍රයෝජනවත් උපදෙස් ලබාදී තිබෙනවා. මෙම සම්පත් වලින් ඔබ සොයා ගන්නා ඔබට උපකාරී වන දේවල් මොනවාද?

තවත් බලන්න 2 ලේකම් 31–32; 3 නෙපී 3–4; ජෝර්ජ් ක්ලෙබින්ගට්, “පසුදවස්වල නිර්භීත අනුගාමිකත්වය,” ලියහෝනා, මැයි 2022, 107–10.

ඇසිරියාවේ රජු වූ සෙනකෙරිබ්ට තම හමුදාව යෙරුසලම යටත් කරගනු ඇතැයි විශ්වාස කිරීමට හොඳ හේතු තිබුණා (බලන්න 2 රාජාවලිය 17; 18:33–34; 19:11–13). නමුත් සෙනකෙරිබ් ගැන අනාගතවක්තෘ යෙසායාගේ මාර්ගයෙන් දෙන ලද පණිවිඩයක් ස්වාමින්වහන්සේට තිබුණා. එය 2 රාජාවලිය 19:20–34 හි වාර්තා කර තිබෙනවා. ස්වාමින්වහන්සේගේ පණිවිඩයෙන් ඔබ සොයා ගන්නා, උන්වහන්සේ කෙරෙහි සහ උන්වහන්සේගේ සැලැස්ම කෙරෙහි ඇදහිල්ල තැබීමට ඔබට උපකාර වන සත්‍යයන් මොනවාද?

ඔබට අධ්‍යාත්මික වශයෙන් යම් අඩුපාඩුවක් ඇති බව ඔබට කවදා හෝ දැනී තිබෙනවාද? සමහරවිට දෙවියන්වහන්සේ සමඟ තියෙන බැඳීම තවත් ශක්තිමත් වෙන්න අවශ්‍ය බව ඔබට හිතෙන්නට ඇති. උන්වහන්සේ වෙත ආපසු හැරීමට ඔබට උපකාරී වූයේ මොනවාද? මනස්සේ රජු යටතේ යුදා රාජ්‍යය ස්වාමින්වහන්සේගෙන් ගිලිහී ගිය ආකාරය (බලන්න 2 රාජාවලිය 21) සහ යොෂියා රජු සෙනඟට ආපසු උන්වහන්සේ දෙසට හැරීමට උපකාර කළ ආකාරය (බලන්න 2 රාජාවලිය 22–23) විස්තර කරන 2 රාජාවලිය 21–23 කියවන විට මෙම ප්‍රශ්න ගැන මෙනෙහි කරන්න. යොෂියා සහ ඔහුගේ සෙනඟ වෙනස් වූයේ කෙසේද සහ ඒ ඇයි? (බලන්න 2 රාජාවලිය 22:8–11; 23:1–6, 21, 24).

සභාපති ස්පෙන්සර් ඩබ්. කිම්බල් යොෂියා රජුගේ කතාව “සියලුම ශුද්ධලියවිලිවල ඇති හොඳම කථා වලින් එකක්” ලෙස හැඳින්වූවා (Teachings of Presidents of the Church: Spencer W. Kimball [2006], 62). යොෂියා රජු ගැන සභාපති කිම්බල්ගේ වචන කියවන්න (පිටු 62–64). ශුද්ධලියවිල්ලේ ඡේදයක් ඔබ තුළ “ශක්තිමත් ලෙස ක්‍රියා කළ” අත්දැකීමක් ගැන ඔබට සිතන්න පුළුවන්. තවත් එවැනි අත්දැකීම් ලබාගැනීමට ඔබට කළ හැකි දේවල් මොනවාද?

12:25

2 රාජාවලිය 23:3 තුළ යොෂියා ඇති කරගත් ගිවිසුම ගැන ඔබේ සිත් ඇදගන්නේ මොනවාද? ඔබ දිගටම 23 වෙනි පරිච්ඡේදය කියවන විට, යොෂියා ස්වාමින්වහන්සේට තම කැපවීම පෙන්වීමට කළ දේවල් සැලකිල්ලට ගන්න (මෙම දළ සටහනේ අවසානයේ ඇති පින්තූරයද බලන්න). ඔබට උන්වහන්සේ කෙරෙහි ඔබේ කැපවීම පෙන්විය හැක්කේ කෙසේද?

• 2 රාජාවලිය 18:3, 5–6 තුළ, හෙසකියාව හොඳ රජෙකු බවට පත් කළේ කුමක් දැයි සොයා ගැනීමට ඔබේ දරුවන්ට උදව් කරන්න. ඉන්පසු ඔබ එකට එකතු වී 2 රාජාවලිය 19:14–19 කියවන විට, ඔහු ස්වාමින්වහන්සේව විශ්වාස කරන බව පෙන්වූ ආකාරය ඔවුන්ට සොයාගන්න පුළුවන්. ඔබට යේසුස්වහන්සේගේ පින්තූරයක් දෙස බලා අපට උන්වහන්සේව විශ්වාස කළ හැක්කේ මන්දැයි කතා කරන්න පුළුවන්. අපි දෙවියන්වහන්සේව විශ්වාස කරන බව අපට පෙන්වන්න පුළුවන් කොහොමද?

• 2 රාජාවලිය 22:1 තුළ, යොෂියා රජ වන විට ඔහුගේ වයස කොපමණ දැයි සොයා ගැනීමට ඔබේ දරුවන්ට උදව් කරන්න. 2 වෙනි පදයේ යොෂියා ගැන අප ඉගෙන ගන්නේ මොනවාද? ස්වාමින්වහන්සේව අනුගමනය කිරීම සහ “දකුණු දෙසට හෝ වමට” නොහැරීම නිදර්ශනය කළ හැකි ක්‍රියාකාරකමක් සලකා බලන්න.

• 2 රාජාවලිය 22:3–7 තුළ විස්තර කර ඇති සේවකයන් “විශ්වාස ලෙස කටයුතු කළ බැවින්” දේවමාළිගාව නැවත ගොඩනැගීමට මුදල් සමඟ ඔවුන්ව විශ්වාස කරනු ලැබුවා (7 වෙනි පදය). මෙම පද කියවීමෙන් පසු, ඔබට සහ ඔබේ දරුවන්ට ඔබ කෙරෙහි විශ්වාස තබා ඇති දේවල් ගැන කතා කරන්න පුළුවන්. මෙම පදවල සිටින සේවකයන් මෙන් අපට විශ්වාසවන්ත විය හැක්කේ කෙසේද?

• 2 රාජාවලිය 22–23 තුළ ඇති යොෂියා රජුගේ කතාව හඳුන්වා දීමට, ඔබට ශුද්ධලියවිලිවල පිටපතක් කාමරයේ කොතැනක හෝ සඟවන්න පුළුවන්. එය සොයා ගැනීමට ඔබේ දරුවන්ට ආරාධනා කරන්න. ඉන්පසු යොෂියාගේ පූජකයෙකු දේවමාළිගාවේ දී ශුද්ධලියවිලි සොයාගත් විට සිදු වූ දෙය ඔබට බෙදාගන්න පුළුවන් (බලන්න 2 රාජාවලිය 22:8–11). අපට ශුද්ධලියවිලි නොතිබුණා නම් අපට කුමක් සිදු වෙයිද? අද අප සතුව ශුද්ධලියවිලි තිබීම ගැන ඔබ සතුටු වන්නේ මන්දැයි එකිනෙකා සමඟ බෙදාගන්න.

  

  1:36

• 2 රාජාවලිය 23:2–3 කියවීමෙන් පසු, ඔබට සහ ඔබේ දරුවන්ට “ස්වාමින්වහන්සේ අනුව ගමන් කිරීමට” (3 වෙනි පදය) ඔබව පෙලඹවූ ශුද්ධලියවිලි ගැන කතා කරන්න පුළුවන්. ඔබට ශුද්ධලියවිලි ගැන ගීතයක් වුවත් ගායනා කරන්න පුළුවන්.

• යොෂියා සහ ඔහුගේ සෙනඟ දෙවියන්වහන්සේගේ ආඥා ඉගෙනගත් විට, ඔවුන් ඒවා අනුව ජීවත් වීමට ගිවිසුමක් ඇති කර ගත්තා. ඔබේ දරුවන් සමඟ 2 රාජාවලිය 23:1–3 තුළ මේ ගැන කියවා, ස්වාමින්වහන්සේගේ ආඥා ගැන මිනිසුන්ට හැඟුණු ආකාරය පෙන්වන වචන හෝ වාක්‍ය ඛණ්ඩ සොයා ගැනීමට ඔවුන්ට උදවු කරන්න. සමහරවිට ඔබේ දරුවන්ට නැගිට “ගිවිසුම් [ඉෂ්ට කිරීම]” යන්නෙන් අදහස් කරන්නේ කුමක්ද කියා ගැන කතා කරන්න පුළුවන්. එවිට ඔවුන්ට එම ස්ථානයේ ඇවිද ගොස් “ස්වාමින්වහන්සේ අනුව ගමන් කිරීම” යන්නෙන් අදහස් කරන්නේ කුමක්ද කියා කතා කරන්න පුළුවන්. ඉන්පසු, ඔවුන්ට ඔවුන්ගේ හදවත් මත අත් තබා, අපගේ ගිවිසුම් “[අපිට] මුළු හදවතින්ම” තබා ගත හැකි ක්‍රම යෝජනා කරන්න පුළුවන්.