“Sulai 13–19. ‘E Koapworopworki Kauno Koht en Israel’: 2 Nanmwarki kan 16–25,” Kohdo, Idawehn Ie—Ong nan Ihmw oh Mwomwohdiso: Kadehde Mering 2026 (2026)

“Sulai 13–19. ‘E Koapworopworki Kauno Koht en Israel,’” Kohdo, Idawehn Ie: Kadehde Mering 2026

Tang Dowi en Kalapwuhs kan, sang James Jacques Joseph Tissot oh mehteikan

Sulai 13–19: “E Koapworopworiki Kauno Koht en Israel”

2 Nanmwarki kan 16–25

Menda en soukohp Elaisa doadoahk manamano, aramas en Wehin Paliepeng en Israel sohte koluhla. Ni imwilahu, wehin Asiria kalowehdier oh kamwerepesengier keinek eisek en Israelo. Nan ansouo, Wehin Palieir en Suda sohte mwahusang: pwongih sansal kipehdi wasahu.

Nan ansoun mehlahn palingehn wet, pwuhk sarawi kan koasoaia nanmwarki en Suda riemen me, ong ansou ieu, kapwurelahng neirail aramas kan rehn Kauno. Emen iei Esekaia. Erein ah kakaun, mehn Asiria kan kalowehdier pali lauden Suda. Ahpw Esekaia oh nah aramas kan kasalehdahr pwoson Kauno, me kapitalahr Serusalem ni manaman kopwuriamwei ehu. Mwuhr, mwurin ehu ansoun pwupwiahu, Sosaia wiahla nanmwarki. Kamarainda ni pali sang dierekdahn Pwuken kosonned en Moses, Sosaia wadohr wekidekla kan me kamouradahr mour sarawi en nah aramas akan.

Duwehte Israel oh Suhda, kitail koaros kin wiahda koaros pilipil mwahu oh suwed kan. Ansou kitail pehm me atail mour kan anahne soangen wekidekla kei, kitail kak ale kakehlail sang ansou marain riau nan sounpar rotorot akan nan poadoapoad en Suda. Mwein karasaras akan en Esekaia oh Sosaia kak kamarainih kitail en “koapworopworki Kauno atail Koht ” (2 Nanmwarki kan 18:22).

Madamadau kan en kasukuhl Nan Ihmw oh Mwomwohdiso

2 Nanmwarki kan 18–19

I kak mehmehleliongete Kauno ansou me ahi pwoson lelohng kasongosong.

Pali tohtohn kitail ahniki ekspihriens kan me kin kasongosong atail pwoson. Ong Esekaia oh nah aramas akan, ehu soangen kasongsongo kohdo ansou me karis en sounpei en Asiriaho kohdo Serusalemo. Ni ahmw wadek 2 Nanmwarki kan 18–19, medewe me ke miher nan Serusalem nan ansouo. Ia mwomwen ahmw pahn pepehm, ni karasepe, rongorong en mehn Asiria kan kapailok kan nan 2 Nanmwarki kan 18:28–37; 19:10–13? Dahme ke kak wia ansouo? Koampehr en mehn Asiria kahrepe kan ong mehn Israel kan en sohte koapwoaroapwoarki Kauno ong kahrepe kan me Sehdan kihda pwe kitail en peikasalki atail pwoson rahnwet. Ke pil kak kilang wekpeseng kan en mehn Asiria arail kahrepe kan ong kahrepen ahmw wie koapworopworki Kauno.

Dahme ke esehsang en Esekaia wiewia kan nan irair wet? (kilang 2 Nanmwarki kan 19:1–7, 14–19). Ia mwomwen Kauno ah sapeng? (kilang 2 Nanmwarki kan 19:35–37). Ia ahmw lamalam me Esekaia kolokolkihte ah pwoson? (kilang 2 Nanmwarki kan 18:5–7). Medewe mwahu mwomwen Kauno Ah ketin seweseiukadahr nan ansoun kasongosong kan. Dahme ke pepehm en wia pwehn kalaudehla ahmw likih Ih?

En Preseden Jeffrey R. Holland padahk “Fear Not: Believe Only!” (Liahona, Mei 2022, 34–36) ahniki kaweid kaselel kan ong ansou kan en masopwehk de peikasal. Ehu koul en sarawi soangen “Kitail en Nantihong” (Koul en Sarawi kan, nempe 10) kak ahniki padahk en sawas kan. Dahme ke diar Nan mehn sawas pwukat me sewese iuk?

Pil kilang 2 Kronikel 31–32; 3 Nihpai 3–4; Jorg Kleingat, “Valiant Discipleship in the Latter Days,” Liahona, Mei 2022, 107–10.

Doadoahngki Sawaspen Onopiki Pwuhk Sarawi. Mwomwohdiso kin kihda mehn sawas tohto pwehn sewese iuk wehwehki pwuhk sarawi kan. Ni karasepe, nan Laipreri en Rongamwahu ke kak diar Mehn Kaweid ong Pwuhk Sarawi kan, Oaralap oh Kalelapak kan, oh makasihn kan en Mwomwohdiso. Pwehn kapatahieng, ni ahmw wadek Kadehde Mering, ke kak diar irair oh koahiek me kak sawas akan nan ardikel en “Iren Ketemen kan” nan Kohdo, Idawehn Ie. Ardikelo kahdanki “Sises Pahn Mahsanihong Israel Pwon, ‘Kohdo Nhmwo’” kak sewese ahmw onopki 2 Nanmwarki kan 16–25.

2 Nanmwarki Kan 19:20–37

Soahng koaros mih nan limen Kauno kan.

Senakerip, Nanmwarki en Asiria, ahniki kahrepe mwahu en kamehlele me nah Karis en Sounpei kan kak kalowehdier Serusalem (kilang 2 Nanmwarki kan 17; 18:33–34, 19:11–13). Ahpw mie sapwellimen Kauno padahk me pid Senakerip, me kohsang soukohp Aiseia. E kileldier nan 2 Nanmwarki kan 19:20–34. Mehnia mehlel kan ke diar Nan sapwellimen Kauno padahk me sewese iuk ahniki pwoson Ih oh Sapwellime pilahn?

2 Nanmwarki kan 21 23

Pwuhk sarawi kan kak wekidalahng ahi mohngiong ong Kauno.

Mie pak ke pehm me mie mehkot ke anahne ni palingehn? Mwein ke ahniki pepehm me ahmw ehuong Koht kak kehlailla. Dahme sewese iuk en sohpeilahng Ih? Medewe kalelapak pwukat ni ahmw wadek 2 Nanmwarki kan 21–23, me kasalehda mwomwen Wehin Suhda ah pwupwisangehr ehn Kauno pahn Nanmwarki Manasa (kilang 2 Nanmwarki kan 21) oh mwomwen Nanmwarki Sosaia ah sewesedahr aramas akan en sohpeillahng Ih (kilang 2 Nanmwarki kan 22 23). Ia mwomwen oh dahme kahrehda Sosaia oh nah aramas akan wekidek kihla? (kilang 2 Nanmwarki kan 22:8–11; 23:1–6, 21, 24).

Preseden Spencer W. Kimball kahdaniki soai en Nanmwarki Sosaia “ehu soai iang keiou mwahu nan pwuhk sarawi kan koaros” (Teachings of Presidents of the Church: Spencer W. Kimball [2006], 62). Wadek en Preseden Kimball koasoai kan duwen Nanmwarki Sosaia (tehn kan 62–64). Mwein ke kak medewehda ehu ekspihriens me ehu iren pwuhk sarawi “doadoahk[ehr] kehlail” loalomw. Dahme ke kak wia pwehn alehdi pil ekei ekspihriens duwehte mwo?

Pil kilang Alma 31:5; “Josiah and the Book of the Law” (kasdo), Laipreri en Rongamwahu.

2 Nanmwarki kan 23:1–25

Inou sarawi wia ahl riau en inou me wiawihda nanpwungen ngehi oh Kauno.

Dahme ke kapaiahki mwomwen inou me Sosaia wiadahr nan 2 Nanmwarki kan 23:3? Ni ahmw doulahte wadek iralaud 23 , kilang dahme Sosaia wiahier pwehn kasalehda ah poadidiong Kauno (pil kilang kilel mih ni imwin audlain wet). Ia mwomwen ahmw kak kasalehda ahmw loaloapwot ong Ih?

Ong pil ekei, kilang pwuhk en sounpwunget ong makasihn en Liahona oh Ong Kakehlepen me Pwulopwul.

Madamadau kan ong Kasukuhlih Seri kan

2 Nanmwarki kan 18:3–6; 19:14–19

I kak likih Sahm Nanleng oh Sises Krais.

Nan 2 Nanmwarki kan 18:3, 56–, sewese noumw seri kan rapahkihda dahme wiahda Esekaia nanmwarki mwahu men. Oh ni amwail pahn wadek pene 2 Nanmwarki kan 19:14–19, irail kak rapahkihda mwomwen ah kasalehda me e likih Kauno. Kumwail kak kilang ehu kilel en Sises oh koasoaia dahme kitail kak likihki Ih. Ia mwomwen atail pahn kasalehda me kitail likih Kauno?

2 Nanmwarki kan 22:1–7

Sahm Nanleng oh Sises Krais kak likih ie.

Nan 2 Nanmwarki kan 22:1, sewese noumw seri kan en rapahkihda Sosaia sounpar depe ansou e wiahla nanmwarki men. Dahme kitail esehla duwen Sosaia nan ire tikitik 2 ? Medewehda ehu kemwekid me kak kasalehda ideidawehn Kauno oh sohte “pwupwisang pohn ahl me pwungo.”
Tohn doadoahk kan me kasaledahr nan 2 Nanmwarki kan 22:3–7 ohl akan me wie apwahpwalih doadoahko me likilik mehlel “kahrehda sohte anahnepen aramas en dawih mwohni ko me re aleire 7). Mwurin wadek ire pwukat, kowe oh noumw seri kan kak koasoaia duwen soahng kan me ke pwukoahki. Ia mwomwen atail kak warohng likilik duwehte tohn doadoahk kan nan ire pwukat?

sounnting rehn Nanmwarki Sosaia — Emen soun nting wouwahdo ehu sikrohl en Pwuhk Sarawi rehn Nanmwarki Sosaia; kilel sang Robert T. Barrett

2 Nanmwarki kan 22:8–11; 23:2–3

Pwuhk sarawi kan kin padahkihong Ie en idawehn Sises Krais.

Pwehn kapehse soai en Nanmwarki Sosaia nan 2 Nanmwarki kan 22–23, ke kak ekihla ehu koapi en Pwuhk Sarawi kan wasahkis nan perehu. Luke noumw seri kan en rapahkihda. Mwuhr ke kak ehukihda dahme wiawiher ansou me emen Nein Sosaia samworo kan diarehr pwuhk sarawi kan Nan tehnpas sarawio (kilang 2–Nanmwarki kan 22:8–11; pil kilang “Nanmwarki Sosaia” nan Soai kan Nan Kadehde Mering, 148–49). Dahme kakete wiawi ong kitail ma sohte pwuhk sarawi kan? Ehukipene dahme kumwail perenki kitail nainiki Pwuhk sarawi kan rahnwet.

1:36
King Josiah
Mwurin wadek 2 Nanmwarki kan 23:2–3, kowe oh noumw seri kan kak koasoaia duwen pwuhk sarawi kan me kamarainih iukadahr ken “idawehn Kauno” (ire tikitik 3 ). Kumwail pil kak kouliki ehu koul duwen pwuhk sarawi kan, soangen “Search, Ponder, and Pray” (Children’s Songbook, 109).

2 Nanmwarki kan 23:1–3

I pahn kolokol ahi inou kan ong Koht.

Ansou me Sosaia oh nah aramas akan esehda kosonned akan en Koht, irail wiadahr ehu inou en momouriki. Iangahki noumw seri kan wadek duwen met nan 2 Nanmwarki kan 23:1–3, oh sewese irail rapahkihda lokaia kan de kahs kan me kasalehda mwomwen pepehm en aramas akan duwen sapwellimen Kauno kosonned akan. Mwein noumw seri kan kak uhda oh koasoaia dahme e kakete wehwehki en “[kesihker] ong inou sarawio.” Mwuhr irail kak alialu wasahkis oh koasoaia duwen dahme e kak wehwehki en “alu mwurin Kauno.” Mwuhr, irail kak kihong pehrail pohn arail mohngiong kan oh koasoaia mwohmw akan irail kak kolokolete arail inou sarawi kan “sang [arail] mohngiong unsek.”

Ong pil ekei, kilang pwuken sounpwunget nan makasaihn en Kempoakepah.

aramas doadoahngki sahl wawaikedi sansal takai ehu — Nein Sosaia aramas kan kihkihsang sansal takai kan nan kahnihmwo, kilel sang William Hole

Praimeri akdipidi peit: Pwuhk sarawi kan kin kasukuhlih kin ie ien Idawehn Sises Krais. — Nein Sosaia aramas kan kihkihsang sansal takai kan nan kahnihmwo, kilel sang William Hole