“Sulai 6–12. ‘Mie emen Soukohp nan Israel’: 2 Nanmwarki kan 2–7,” Kohdo, Idawehn Ie—Ong Nan Ihmw oh Mwomwohdiso: Kadehde Mering 2026 (2026)

“Sulai 6–12. ‘Mie emen Soukohp nan Israel,’” Kohdo, Idawehn Ie: Kadehde Mering 2026

Ni Keilen Pillap, sang Annie Henrie Nader

Sulai 6–12: “Mie emen Soukohp nan Israel”

2 Nanmwarki kan 2–7

En soukohp misin keiou kesempwal iei en padahk oh kadehdehki Sounkomour Sises Krais. Neitail rekohd en soukohp Elaisa, me wiksang, sohte iangahki tohtohn ah padapadahkih de kadkadehde. Dahme rekohdo iangahki iei mwekid kopwuriamwei kan me Elaisa wiadahr akan, me iangahki kamourada seri men sang mehla (kilang 2 Nanmwarki kan 4:18–37), kamwongehda pokon ehu ki sin mwenge tikitik kan (kilang 2 Nanmwarki kan 4:42–44, oh kamwahuihala tokitok men (kilang 2 Nanmwarki kan 5:1–14). Eri pwehki kitail sohte nainiki en Elaisa mahsen kan duwen Krais, kitail nainiki en Elaisa doadoahk oh mwekid kopwuriamwei kan, me kadehdehki Krais. Irail wia kasalepe kehlail kei duwen sapwellimen Kauno manaman me kak kihwei-mour, kakehlaka, oh kamwahuihala. Mwekid kopwuriamwei kan kin wiawi oak tohto nan atail mour kan sang atail kak kilangada. Pwe kitail en kilang mepwukat, kitail anahne rapahki pwoson Elaisa ahnikiher ansou e weliandier nah ladu pwulopwulo masapwekadahro oh kapakapehr o, “Maing kaun, Komw ketin kapehdpeseng mese pwe en kilang” (2 Nanmwarki kan 6:17).

Ong pil ekei rohng duwen 2 Nanmwarki kan, kilang “Nanmwarki kan, pwuhk kan en” nan Dikseneri en Pwuhk Sarawi.

Madamadau kan ong kasukuhl nan Ihmw oh Mwomwohdiso

2 Nanmwarki kan 2–6

Koht kak ketin wia mwekid kopwuriamwei kan nan ahi mour.

Mwekid kopwuriamwei kan kin kasalehda sapwellimen Koht manaman. Mepwukat kak sewese kitail powehdi kahpwal akan en mour—duwehte sahpw tehn ehu me anahne pihl mwakelekel (kilang 2 Nanmwarki kan 2:19–22 de ehu sile salongahr me anahne rependa (kilang 2 Nanmwarki kan 6:4–7). Ahpw me keiou kesempwal, mwekid kopwuriamwei kan kak kasohpai kitaillahng Kauno. Ni ahmw wadek 2 Nanmwarki kan 2–6, medewe ntingihdi mwekid kopwuriamwei kan ke diarada, oh medewe mwahu mehn kasukuhl en palingehn akan ke esehla sang ehu ehu.

Ke kak pil karasapene mwekid kopwuriamwei kan Elaisa wiadahr ong me Sises Krais ketin wiadahr (kilang 2 Nanmwarki kan 4:8–37 oh Luk 7:11–16; 2 Nanmwarki kan 4:42–44 oh Sohn 6:1–13; 2 Nanmwarki kan 5:1–15 oh Luk 17:11–19). Dahme mwekid kopwuriamwei pwukat padahkihong uhk duwen Sounkomouro oh Sapwellime soukohp akan?

Pil kilang 2 Nihpai 26:12–13; 27:23;Moronai 7:35–37; seksino “Rapahki oh Kasik Manaman Kopwuriamwei kan” nan en Russell M. Nelson, “manaman en Mwekid en Palingehno,” Liahona, Mei 2022, 99–100.

Elaisa kapwkapwourada seri men sang mehla — Elaisa Kapwkapwourada Nein Olen Shunamite men Pwutak, sang Frederic Leighton

2 Nanmwarki kan 4:8–17; 7:1–16

Kauno pahn kin kapwaiada Sapwellime mahsen akan me kohsang Sapwellime soukohp akan.

Kauno ketin kamaraindahr Elaisa en kohpadahr soahng kan pahn kohdo—pak tohto, soahng kan me mwomwen sohte kin wiawi. Ni ahmw wadek 2 Nanmwarki kan 4:8–17; 7:1–16, medewe duwen ahmw pahn sapeng mahsen en Kauno sang Sapwellime soukohp akan rahnwet. Mehnia padahk kan, kokohp kan, oh inou kan me ke rongehr sang soukohp ieias akan? Dahme ke wihwia pwehn mwekidikid pwoson arail mahsen akan?

Pil kilang 3 Nihpai 29:6; Doctrine and Covenants 1:37–38; “Teachings of Presidents” koleksin, Laiprehri en Rongamwahu.

2 Nanmwarki kan 5

Ni ahi ahniki karakarahk oh peik, Sises Krais kak kamwahuihiehla.

Ni ahmw wadek 2 Nanmwarki kan 5, song karasapeneen Nahman tokitok Ong ehu kahpwal en palingehn ke sohsohpai.

Me emen me duwehte “kisin liduo” nan ahmw mour, kangkangoange iuk en rapahki kaweidpen ahmw kahpwal sang sapwellimen Kauno soukohp akan? (kilang ire tikitik kan 2–3, 13).

Dahme Kauno ketin lukulukei iuk en wia me mwomwen nohnla mengei—me duwehte “duhdu, oh en mwakelekella”? (ire tikitik 13). Dahme kak kolokol uhkasang alehda Sapwellime luhk kan?

Ia mwomwen ahmw kak kasalehda karakarahk duwehte Nahman?

Kilang mwomwen en Nahman ekspihriens ah sair ah pwoson Koht en Israelo (kilang ire tikitik 15). Dahme ke kak esehsang met?

Pil kilang Luk 4:27; 1 Piter 5:5–7; Alma 37:3–7; Ether 12:27; L. Whitney Clayton, “Whatsoever He SAith unto You, DO It,”Liahona, Mei 2017, 97–99; “Nahman oh Elaisa” (kasdo), Laipreri en Rongamwahu.

Karasa Iren Pwuhk Sarawi ong Ahmw Mour. Ekei pak e kin mengei en diar mehkot me mie wehwe ong pein kowe nan pwuhk sarawi kan ansou ke karasapene soahng kan ke kak kilang oh soahng kan en palingehn nan ahmw mour. Ni karasepe, ni ahmw onopiki 2 Nanmwarki kan 2–7, ke kak karasapene irair kan Nan ahmw mour Ong soahng kan duwehte tokitok, ehu sile pekpekida, Pillap en Sordan, de ehu karis en sounpei kalaimwun me kohdohn pei. Soangen lesen dah me Kauno ahniki ong uhk nan soai pwukat?

2 Nanmwarki kan 6:8–23

Iangata kan tohtohsang irail.”

Ni ahmw soangen Idawehn Sises Krais, mie pak ke ahniki pepehm duwehte nein Elaisa liduo pwulopwulo—re nohn tohto oh kamasopwehk? Medewe me ke mih nan dowehu ni ahmw wadek 2 Nanmwarki kan 6:8–23. Ia mwomwen soai wet ah wekidala mwomwen ahmw kin medewe oh pepehm duwen ahmw kasongosong kan, ahmw pwukoah kan, de ahmw nanantihong momourki rongamwahuet?

Ni ahmw medmedewe mwahu, taman en Preseden Henry B. Eyring ah mahsen kan: “Duwehte Nein Elaisa liduo, tohto me iang uhk sang irail kan ke kilang me uhwong uhk. Ekei me ieiang uhk pahn sohte sansal ong pein mesemw kan. Kauno pahn pwokuhkada oh pahn Nan Ansou kan wia sang ni kihong ekei mehn sewese iuk” (“O Ye That Embark,” Liahona, Nohpempe 2008, 58).

Medewe wiahda ehu lisd en “[iangata] kan” (ire tikitik 16)—aramas me Koht ketkihong Nan ahmw mour pwehn utung uhk. Ke kak idek Reh en sewese ik kilang irailda sang ni kihpeseng mesomw en palingehn akan. Mwein mie pak E pil ketkihong uhkehr nan en ekei mour pwehn sewese irail. Ia mwomwen amwa kak alehdi kakehlailih oh utuht sang emen emen?

Ansou da ke pehmehr utuht me Kauno kasalehda Nan Doctrine and Covenants 84:88?

Ke pil kak onopiki en Sister Michelle D. Craig padahk “Mese Mehn Kilang” (Liahona, Nohpempe 2020, 15–17). Pein idek rehmw, “Dahme Koht ketin kupwurki ien kilang?”

Koskosoia soaio nan 2 Nanmwarki kan 6:8–23, Elder Ronald A. Rasband inda, “Kitail mwein sohte iang ahneki mehn dakadak en kisinieio me pekederdo pwe en kihsang atail masepwehk oh powehdi atail Pali suwed akan, ahpw padahk wet inenen sansal mehlel. Kauno ieiang kitail, medemedewe kitail oh kapakapai kitail da nan ahl ekei me Ih kelehpw kak wia. Kapakap kak likwerihdo kakehlail oh kaudiahl me kitail anahne pwehn poahsoane atail lamalam akan pohn Sises Krais oh Sapwellime tomwpen dihp. Kauno ketin mwahngih me mie ansou kan kitail pahn pehm masopwehk. I iangehr mih mwo oh pil duwehte kowe. … Nan Mwomwohdiso wet kitail kak malaulau sang mwomwen sampah ah kin wadek --, ahpw ansou kitail kihpeseng masatail en palingehnakan, ‘pwe iangala kan tohtohsang irail’ [2 Nanmwarki kan 6:16]” (“Be Not Troubled,” Liahona, Nohpempe 2018, 18, 19). Ia mwomwen ahmw kak doadoahngki lepin lokaia pwukat pwehn sewese emen me pehm saloh de masopwehk?

Pil kilang “Dearest Children, God is Near You,” Koul en Sarawi kan, Nempe 96.

Ong pil ekei, kilang pwuken sounpwunget nan makasaihn en Liahona oh Ong Kakehlepen Me Pwulopwul.

Madamadau kan ong Kasukuhlih Seri kan

2 Nanmwarki kan 4

Koht kak ketin wiahda mwekid kopwuriamwei kan nan ahi mour.

Mwurin ahmw sewese noumw seri kan wehwehki dahieu mwekid kopwuriamwei, luke irail en ntingihedi wen tohto karasaras en mwekid kopwuriamwei kan me irail kak. Kilel kan nan Gospel Art Book de KOhdo, Idawehn Ie kak sawas. Mwuri irail kak rapahki mwekid kopwiroamwei kan Nan 2 Nanmwarki kan 4:1–7, 14–17, 32–35, 38–44. Dahme mwekid kopwuriamwei pwukat padahngki duwen Sahm Nanleng?
Kowe oh noumw seri kan kak koasoaia duwen mwomwen Koht ah kasalehda Sapwellime limpoak sang mwekid kopwuriamwei kan. Kumwail kak koulkipene ehu koul soangen “God’s Gracious Love” (Gospel Laipreri).

Kisin lidu pwulopwul en Israel men kadehdeiong en Nahman pwoud — Uhkihda wia emen Soun kadehde, sang Kwani Povi Winder

2 Nanmwarki kan 5:1–15

I kak pilada wia dahme Koht ketin kehkehliki sang Sapwellime soukohp.

Sewese noumw seri kan esehla Soai wet nan 2 Nanmwarki kan 5:1–3, 9–14. Medewe doadoahngki kilel kan en “Elaisa Kamwahuihala Nahman” (nan Soai kan en Kadehde Mering, 134–37) de kilelen Nahman nan audlain en wihket. Dahme Nahman sohte men duhduhki nan Pillap en Sordan o, mendahte Elaisa indahier me met pahn kamwahuihala? Ia mwomwen Nahman ah kapaidahr ansou e indawehn en Elaisa kaweid koa? Kumwail kak ehukipene nanpwungamwail ekspihriens kan ansou ke peikiongehr Kauno, mendahte ahmw sohte ese ma ke men wia.

1:52
Elisha Heals Naaman
Ke pil kak kasalehda kesempwalpen 2 Nanmwarki kan 5:13, wasa Nein Nahman lidu kan sewese medewehda en peikiong soukohp Elaisa. Noumw seri kan kak uhd koasoaia mwohmw akan irail kak sewese kempoakepahrail kan de tohn arail peneinei kan rong oh peikiong soukohpo.

2 Nanmwarki kan 6:8–17

I sohte kelehpw.

Kowe oh noumw seri kan kak medewe me mie karis en sounpei ehu me kol kedlahs kan, dake oahs akan, oh kurumwa kan kapil kumwail penehier. Ia mwomwen ahmw pahn pepehm? Dahme ke pahn wia? Noumw seri kan kak kihpene masarail kan ni ansou ke wie wadawad 2 Nanmwarki kan 6:16–17 ong irail. (Pil kilang “Elaisa oh sapwellimen Kauno Karis en Sounpei kan,” nan Soai kan en Kadehde Mering, 138–39, de kilel ni imwin audlain wet.) Ansou ke lel lepin lokaia pwukat “kapehdpeseng mese kan” (ire tikitik 17), indahng seri kan en pehdpeseng. Koasoaia dahme liduo kilangehr. Ehukihong noumw seri kan mwohmw akan ke pehmehr me Kauno ieiang uhk nan ahmw kahpwal akan, pil ansou likamwete ke kelehpw.

1:9
Elisha and the Lord’s Army

Ong pil ekei, kilang pwuken sounpwunget ong makasaihn en Kempoakepah.

Elaisa oh ohl pwulopwul men kilkilang werenansapw kei me lulul — Elisha sapengki, “Ke dehr masak: pwe iangata kan tohtohsang irail,” sang Stacy Minch

Praimeri akdipidi peit: I kak pilada wia dahme Koht kehkehliki sang Sapwellime soukohp. — Elisha sapengki, “Ke dehr masak: pwe iangata kan tohtohsang irail,” sang Stacy Minch