“Iren Ketemen kan: ‘Sises Pahn Mahseniong Mehn Israel Koaros, “Kohdo Nihmwo,”’” Kohdo, Idawehn Ie—Ong Nan Ihmw oh Mwommwohdiso: Kadehde Mering 2026 (2026)
“Iren Ketemen kan: ‘Sies Pahn Mahseniong Mehn Israel Koaros, “Kohdo Nihmwo,”’” Kohdo, Idawehn Ie: Kadehde Mering 2026
Iren Ketemen kan
“Sises Pahn Mahsanihong Mehn Israel Koaros, ‘Kohdo Rehi’”
Nan sapwtehn en Sainai, Moses kihpenehr seri kan en Israel ni tepin nahna ehu. Wasahu Kauno mahsaniher me E ketin kupwurki wekidala pwihn en lidu pwukat en wiahla aramas lapalap ekei. “Kumwail eri pahn wiahla,” E mahsaniher, “wehi ehu me papah ie duwen samworo, pwihnen aramas ehu me kasarawihong iehte” (Eksodus 19:6). E ketin inoukiher me irail pahn keirda oh pweida, menda ma arail imwintihti kehlail kan kapil irailpene.
Soahng kat koaros pahn wiawi kaidehn pwehki mehn Israel kan me tohto de kehlail de koahiek. E pahn wiawi, Kauno kawehwehda, ma irail pahn “peikiong [Sapwellime] ngihl, oh (Eksodus 19:5). Sapwellimen Koht manaman, kaidehn pein arail, pahn wiahiong irail en lapalapala.
Ahpw mehn Israel kan sohte kin kalapw peikiong sapwellimen Koht ngihl, oh ni ansou eh douer powe irail solahr kolokol Sapwellime inou sarawi. Tohto kaudekiongehr koht teikan oh aledahr wiewiahkan en tiahk kan me mih limwarail kan. Irail soikalahr mehkot me wiahng irail en wia wehi tohrohr ehu—arail inou en ehuong Kauno. Ma sohte sapwellimen Koht manaman me perperei irail, sohte mehkot kak kauhdi arail imwintihti kan.
Mwarahkpesengo
Pak tohto kei nanpwungen 735 oh 720 BC, mehn Assyria kan pidelongehr Nan Northern Kingdom en Israel, en keinek eisek ahr wasahn kousoan, oh wahsangehr mehn Israel kid samwa kei walahng nan wasa tohto kei nan Wehin Assyria. Mehn Israel pwukat kahdankihla “keinek salongala koa,” pwehki irail kemwekid sangehr Nan pein sapwarail oh mwarahkpesengehr rehn wehi teikan. Ahpw irail pil salongalahr ni arail wehwehki mehkot kesempwal: ni ansou ah doupowe irail sehsehlahr ihs irail ni arail wia sapwellimen Koht aramas en inou.
Ni ansou ah douer powe tohto aramas nan Southern Kingdom en Suda pil sohpeilahngehr Kauno. Mehn Assyria kan pil peiongehr oh kalowehdier pali lauden wehio; Serusalem the me ni kopwuriamwei mihmihte. Mwuhr, nanpwungen 597 oh 580 BC, mehn Babylon kan kauwelahr Serusalem, iangahki tehnpas sarawio, oh wahsangehr aramas tohto nan kalidu. Mwein sounpar 70 mwuri, ekei tohn keinek en Suda mweimweiong en pwuralahng Serusalem oh pwurehng kauwada tehnpas sarawio. Ahpw, tohto, mihlahr nan Babylon.
Kamwomwalahn Serusalem sang Nebuzar-adan, sang William Brassey Hole, © ProvidenceCollection/licensed sang goodsalt.com
Ni ansou ah douer powe, mehn Israel kan sang keinek kan koaros “mwarahkpeseng … kisiniengo pwe re en kousoanlanan sapwen mehn liki kan” (Sekaraia 7:14). Ekei Kauno kahreirail lahngehr ekei sahpw tohrohr. Ekei kohkohsangehr Israel pwehn tangasang kolkoldi de kahrepe kan en palien koapwerment de epwelpen mwohni.
Kitail kahdaniki kemwekid pwukat mwerpeseng en Israel. Oh e kesempwal en ese duwen mwarahkpeseng wet ong kahrepe kei. Ong soahng ehu, e wia iralaud kesempwal ehu nan Kadehde Mering—tohto soukohp en Kadehde Mering wia sounkadehde duwen pwupwilahn palingehn me elehda mwarahkpesengo. Irail kilangadahr mwowe oh kaparkiher duwehu. Ekei irail pil mourier loale. E sawas en taman ansou ke wadek pwuhk kan en Aiseia, Seramaia, Eimos, oh soukohp teikan nan pali imwilahn Kadehde Mering. Ni ahmw medemedewe irair wet, ansoukei wadek arail kokohp akan duwen Assyria oh Babylon, sarawihong sansal akan oh kolkoldi, kauwehla oh pwurehng wiahda, ke pahn ese dahme irail koaskoasoia.
Wehwehki mwarahkpeseng en Israel pahn sewese iuk pil wehwehki Pwuken Mormon mwahu, pwehki Pwuken Mormon wia ehu rekohd duwen rah en Israel me mwarahkpeseng ehu. Rekohdo tepikihda en Lihai peneineiaht tangasang Serusalem nan 600 BC, mwohnte mehn Babylon kan ahr kodohr peiong tohn wasahu. Lihai wia emen Soukohp koa me kohpadahr duwen mwarahkpeseng en Israelo. Oh ah peneinei sawasehr kapwaiada kokohpo, wahda arail peneinei en Israel oh poadokedi ni elep sampah, nan Amerika kan.
Kapokonpenehu
Mwarahkpeseng en Israelo, ei, iei elep en soaio. Kauno sohte kin ketin moanokehla Sapwellime aramas, E sohte pil kin keseirailla, mendahte ansou irail kesehla Ih. Kokohp tohto kan me Koht pahn ketin kihpeseng Israel iangahki tohto inou kan me ehu rahn E pahn ketin kapwure irailpene.
Rahno iei rahnet—atail rahnet. Kapwurpwurpenehu tepidahr. Nan pahr 1836, sounpar kid kei mwurin Moses ah kihpenehr seri kan en Israel ni tepin Nahna Sainai, e ketin pwaradahr nan Tehnpas Sarawi en Kirtland pwehn kiheng Sosep Smith “kih kan en kapwurepene Israel sang keimw pahieu en sampah” (Doctrine and Covenants 110:11). Met, sang kaweidpen aramas me kolokol Kih kan, keinek kan en Israel wie kohkohpene sang wehi koaros wasa me sapwellimen Kauno ladu kan kak lela Ie.
Moses, Elias, oh Elaisa Pwarada Nan Tehnpas SArawi en Kirtland, sang Gary E. Smith
Preseden Russell M. Nelson kahdanikiher kihpene wet “mehkot keiou kesemwal me wihwiawi pohn sampah rahnwet. Sohte mehkot me kak karasahieng uwen laud, sohte mehkot kak karasahieng uwen kesempwal, sohte mehkot kak karasahieng uwen lapalap. Oh ma komwi pilada, ma ke men wia, ke kak wia kisehn laud ehu.”
Ia mwomwen atail kak sawas? Ia wehwehn en kihpene Israel? E wehwehki kapwurepene keinek eisek riauo ong sahpw me mahsen irail kin kousoan iehu? Ni mehlel, e wehwehki mehkot me inenen laudsang, daulihala poatoapoat. Ni Preseden Nelson ah kawehwehda:
“Ni ansou me kitail kin koasoia duwen kapokonpeneo, kitail koaskoasoia duwen tepin padahk mehlel wet: koaros sapwellimen Samatail Nanleng seri kan, pali koaros koaros en kahdengo, ahniki mweimwei en rong padahk en rongamwahu kopwurpwurdo en Sises Krais. …
“Ansou ehu ke wia mehkot sohte lipilipil me kak sewese aramas emen—pali koaros en kahdengo—ale kahk ehu ong wiahda inou ong Koht oh alehdi arail pepdais oh tiahk sarawi kan en tehnpas sarawi me anahn, ke kin iang sawas kapwurepene Israel. E mengei duwehte mwo.”
Met kin wiawi, ni Aiseia ah indahier, “wad emen” (Aiseia 27:12 de, duwehte me Seremaia kohpadahr, “emen kumwail sang ehuehu kahnihmw, oh riemen sang ehuehu peneinei” (Seremaia 3:14).
Kihpene Israel wehwehki wapene seri kan pwurodohng Ih. E wehwehki kapwure irailahng arail inou sarawi ehuong Ih. E wehwehki pwurehng kauwada “wehi sarawi” E kupwurki kauwada mahso (Eksodus 19:6).
Kohdo Nihmwo
Ni ahmw wia emen me inou iongehr Koht, ke wia kisehn peneinei en Israel. Kumwail kohpenehr, oh ke wia emen sounrikpene. Soai en aramas en inou kan me reireiki-sounpar epwiki wie kohkohda ni wasa keiou kesempwalo, oh ke wia emen tohn doadoahk kesempwal. Met Ie ansou me “Sises pahn mahseniong Israel koaros, ‘Kohdo rehi.’”
Met iei padahk en soun kapokonpene kan: Kohdo rehi ong inou sarawio. Kohdo rehi nan Saion. Kohdo nihmwo rehn Sises Krais, Me Sarawio en Israel, oh E pahn waiukodo nihmwo rehn Koht, ahmw Pahpa.