2 Kings 16–25

Napengeni kich sia fen weri mettoch mi sotuni ach nuku. Ren Hezekiah me noun aramas, eu me nein ekkei weires a fis nupwen ekkewe sounfiun Chon Assyria ra feito Jerusalem. Nupwen ka anneani 2 Kings 18–19, ekieki pwe ka nom non Jerusalem atun ei fansoun. Ita ifa usun kopwe mefi, ren awewe, om rong an ekkewe Chon Assyria kapsen epwis non 2 Kings 18:28–37; 19:10–13? Ita met kopwe fori? Anonnou an ekkewe Chon Assyria popun ren ekkewe Chon Israel ar resap nuku ewe Samon ngeni ewe popun Setan a fang ngeni kich ach sipwe tipemwaramwarei ach nuku ikenai. Ka pwan tongeni asokofeseni an ekkewe Chon Assyria popun ngeni om popun pwata en ka nuku ewe Samon.

Met ka kaeo seni an Hezekiah foffor non ei napanap? (Nengeni 2 Kings 19:1–7, 14–19). Ifa usun ewe Samon a ponuweni? (nengeni 2 Kings 19:35–37). Pwata ka ekieki Hezekiah a chok nukuchar? (nengeni 2 Kings 18:5–7). Ekipwichi ifa usun ewe Samon a anisuk non fansoun aweires. Met pesepes ka mefi kopwe fori ne anapano om nuku non I?

An preseten Jeffrey R. Holland porous “Kosap Nuokus: Kopwe Chok Nuku!” (Liahona, May 2022, 34–36) mi wor non aninisochun ourour ren fansoun nuokus are tipemwaramwar. Eu kon mi fel usun “Sipwe Nikitu” (Kon mi Fel, no 10) a pwan tongeni wor porousen pesepes non. Met ka kuna non ekkei pekin aninis minne mi anisuk?

Nengeni pwan 2 Chronicles 31–32; 3 Nifai 3–4; Jörg Klebingat, “Valiant Discipleship in the Latter Days,” Liahona, May 2022, 107–10.

Sennacherib, ewe kingen Assyria, a wor an ochun popun ne nuku pwe noun mwichen sounfiu epwe okkufu Jerusalem (nengeni 2 King 17; 18:33–34; 19:11–13). Nge ewe Samon a wor an porous usun Sennacherib, a kawor me ren ewe soufos Isaiah. Mi rekot non 2 Kings 19:20–34. Met ennet ka kuna me non an ewe Samon porous minne mi anisuk epwe wor om nuku non I me non An kokkot?

En mi mwo mefi pwe ese wor reom och mettochun ngun? Meni ke mefi pwe nefinom me Kot mi tongeni epwe fen nap pochokunan? Met a anisuk kopwe kun sefan ngeni I? Ekipwichi ekkei kapaseis nupwen ka anneani 2 Kings 21–23, minne a awewei ifa usun ewe Muun Judah a rikino seni ewe Samon fan muun King Manasseh (nengeni 2 Kings 21) me ifa usun King Josiah a anisi ekkewe aramas repwe kun sefan ngeni I (nengeni 2 Kings 22–23). Ifa usun me pwata Josiah me noun kewe aramas ra siwin? (nengeni 2 Kings 22:8–11; 23:1–6, 21, 24).

Preseten Spencer W. Kimball a eita ewe porousen King Josiah pwe “eu me nein ekkewe murinon porous me non meinisin pukefel” (Teachings of Presidents of the Church: Spencer W. Kimball [2006], 62). Anneani an Preseten Kimball kapas usun King Josiah (peich 62–64). Meni ka tongeni ekieki usun eu fansoun nupwen eu uwokisin non pukefel a “nap angangan non en. Ita met kopwe fori om kopwe angei pwan ekkoch memef usun ena?

Nengeni pwan Alma 31:5; “Josiah and the Book of the Law” (video), Gospel Library.

12:25

Met a amwasangok usun ewe pwon mi pin Josiah a fori non 2 Kings 23:3? Nupwen ka soposopono ne anneani sopwun 23, apareni met Josiah a fori ne pwarano an nikitu ngeni ewe Samon (nengeni pwan ewe sasing nesoponon ei mak). Ifa usun om kopwe tongeni pwari om nukitu ngeni I?

• Non 2 Kings 18:3, 5–6, anisi noum kewe semirit repwe kuna met a efisi Hezekiah an epwe emon king mi och. Mwirin nupwen oua annea fengen 2 Kings 19:14–19, ra tongeni kuna ifa usun i a pwari pwe i a nuku ewe Samon. Ka tongeni nenengeni echo sasingin Jises me kapas usun pwata sia tongeni nuku I. Ifa usun sia tongeni pwari pwe sia nuku ewe Samon?

• Non 2 Kings 22:1, anisi noum kewe semirit repwe kuna fite ierin Josiah nupwen a winiti emon king. Met sia kaeo usun Josiah non uwokisin 2? Ekieki eu urumot minne mi tongeni pwarano ach tapweno mwirin ewe Samon nge esap kunnuno “ewe epek ngeni ewe peniemwan pau ika ngeni ewe peniefefin.”

• Ekkewe chon angang mi awewetiw non 2 Kings 22:3–7 kewe ir mi epinukunukur ren ewe moni ar repwe aueta ewe tempel “pokiten ra angang non nukuchar” (uwokisin 7). Mwirin om anneani ekkei uwokisin, en me noum kewe semirit oua tongeni porous fengen usun mettoch emon a epinukunukuk ren. Ifa usun sia tongeni sipwe wenechar usun ekkewe chon angang non ekkei uwokisin?

• Om kopwe oporousa ewe porousen King Josiah non 2 Kings 22–23, ka tongeni opano eu kapin ekkewe pukefel ekis non ewe rum. Tingorei noum kewe semirit repwe kutta. Mwirin ka tongeni aporousa met a fis nupwen emon nein noun Josiah kewe prist a kuna ekkewe pukefel me non ewe tempel (nengeni 2 Kings 22:8–11; nengeni pwan “King Josiah” non Testamen Noom, 148–49). Met ita epwe fis ngeni kich ika ese wor rech ekkewe pukefel? Aporousa ngeni emon me emon pwata ka pwapwa pwe mi wor rech pukefel ikenai?

  

  1:36

• Mwirin om anneani 2 Kings 23:2–3, en me noum kewe semirit oua tongeni porous fengen usun ekkewe pukefel minne ra fen peseok ne “fetan mwirin ewe Samon” (uwokisin 3). Ka pwan tongeni konu eu kon usun ekkewe pukefel, usun ren “Search, Ponder, and Pray” (Noun Semirit kon mi fel, 109).

• Nupwen Josiah me noun kewe aramas ra kaeo ekkewe annukun Kot, ra fori eu pwon mi pin ar repwe manauenir. Anneani usun ei fiti noum kewe semirit non 2 Kings 23:1–3, me anisir ne kutta kapas ika foun kapas minne mi pwari ifa usun ekkewe aramas ra mefi usun an ewe Samon kewe annuk. Meni noum kewe semirit ra tongeni uta me kapas usun met ita wewen ne “[uta] ngeni ewe pwon mi pin.” Mwirin ra tongeni fetan non nenin me kapas usun ita epwe met wewen ach “fetan mwirin ewe Samon.” Mwirin, ra tongeni wata pour won ngasangaser me apasa ekkoch anen ach sipwe apwonueta ach kewe pwon mi pin “ren unusen netipach.”