“Kokkot Sipwe Onomu non Ekiek: ‘Jises Epwe Apasa ngeni Unusen Israel, “Feito Neimw”’” Feito, Tapweto Mwiri—Ren Imw me Mwichefen: Testamen Noom 2026 (2026)
“Kokkot Sipwe Onomu non Ekiek: ‘Jises Epwe Apasa ngeni Unusen Israel, “Feito Neimw,”’” Feito, Tapweto Mwiri: Testamen Noom 2026
Kokkot Sipwe Onomu non Ekiek
“Jises Epwe Apasa ngeni Unusen Israel, “Feito Neimw’”
Non ewe fonu pon Sinai, Moses a ionfengeni ekkewe aramasen Israel nemonun eu chuk. Ikewe ewe Samon a affata pwe I a mochen siwini ei mwichen slave ra keran ngaseno ngeni eu aramas napanap. Ami ngeniei, A apasa, oupwe “eu muun prist, me eu muu mi pin” (Exodus 19:6). A pwonei pwe repwe marino me feiochuno, pwan mwo nupwen ra rokopwanino me ren watten, pochokunen chon koum.
Meinisin ekkei epwe fis esap pokiten ekkewe Chon Israel ra chommong ika pochokun ika angangoch. Epwe fis, ewe Samon a awewei, ika repwe “aneasochisi ennetin [An] mongungu, me apwonueta [An] pwon mi pin” (Exodus 19:5). An Kot manaman, esap ar pwisin, epwe forir repwe napanap.
Nge ekkewe Chon Israel rese chok soun aneasochisi mongungun Kot, me feiton fansoun ra kouno ne apwonueta An pwon mi pin. Chommong ra pin ngeni ekkoch kot me etiwa ekkewe mwokutukutun oreni mi rokopwanireno. Rese etiwa ewe ennetin mettoch a forir repwe eu muu mi sokkono—ar pwon mi pin ren nefiner me ewe Samon. Me nukun an Kot manaman a eppetir, ese wor mettoch epwe okounoi chon koum ngenir.
Ewe Paras fetan
Chommong fansoun nefinen 735 me 720 Mwen Kraist, ekkewe Chon Assyria ra maunei ewe Ennefenin Muun Israel, imwen engon me nein ekkewe engon me ruu einang, me ra angei fite ngorou ekkewe Chon Israel repwe fotek non chommongun kinikinin ewe Muun Assyria. Ekkei Chon Israel ra winiti usun “ekkewe einang mi morukono,” ekis popun pokiten ra katou seni fonuer me paras fetan nein ekkoch muu. Nge ra pwan mwonuchono non eu anonnonun napanap: non fansoun mi fefeino a turusenir ar sinei wesewesen ir ion usun noun Kot aramas pwon.
Omuchunon chommong aramas non ewe Eorun Muun Judah a pwan kunnuno seni ewe Samon. Ekkewe Chon Assyria ra maunei me okkufu napengeni unusan ena pwan muu; amwararan pwe Jerusalem chok a tumun. Mwirinon, nefinen 597 me 580 Mwen Kraist, ekkewe Chon Babylon ra atano Jerusalem, mi pachenong ewe tempel, me angeiano chommong aramas non fotek. Arapakan 70 ier mwirin, och nusun Judah a mumuta an epwe niwin ngeni Jerusalem me aueta sefani ewe tempel. Nge, chommong, ra nomwetiw non Babylon.
The Destruction of Jerusalem by Nebuzar-adan [Ewe Tanon Jerusalem ren Nebuzar-adan], by William Brassey Hole, © Providence Collection/licensed from goodsalt.com
Nupwen fansoun a feino, Chon Israel seni meinisin ekkewe einang ra “paras fetan … ren eu ewuniar nein muu meinisin ewe rese sisinei” (Zechariah 7:14). Ekkoch ewe Samon a emwenireno ngeni ekkoch fonu. Ekkoch ra no seni Israel ar repwe suseni ar resap ono ika fan iten mwokutukutun government ika popun moni.
Sia eita ngeni meinisin ekkei mettoch a fis ewe paras fetanin Israel. Me mi auchea sipwe sinei usun ewe paras fetan ren ekkoch popun. Ren eu popun, a eu watten itenapen ewe Testamen Noom—chommong soufosun Testamen Noom ir chon pwarata usun ewe turutiwen pekin ngun ewe a efisata ewe paras fetan. Ra osini me esinesin usun. Pwan mwo ekkoch ir mi manau fansoun we. Ena a aninisoch ne chechemeni nupwen ka aneani ekkewe puken Isaiah, Jeremiah, Amos, me ekkoch soufos nesoponon kinikinin ewe Testamen Noom. Ren ei nikinik non ekiek, nupwen ka aneani ar osini usun Assyria me Babylon, anu muan me fotek, tatakis me nesoponon niwinsefanito, kopwe sinei met ra kapas usun.
Weweiti ewe paras fetanin Israel epwe anisuk ne weweochuti pwan ewe Puken Mormon, pokiten ewe Puken Mormon eu uruon eu kinikinin Israel mi paras fetan. Ei uruo a poputa ren an Liai famini a suseni Jerusalem arap ngeni 600 Mwen Kraist, me mwen chok ekkewe Chon Babylon ra maunei. Liai i emon ekkena soufos ewe a osini usun ewe paras fetanin Israel. Me an famini a anisi ne apwonueta ena osini, ar angei ar pranchin Israel me fotuki won epek ewe fonufan, non ewe fonuen Merika.
Ewe Ioifengen
Nge, ewe paras fetanin Israel, mi chok nesopun ewe porous. Ewe Samon ese monnukano Noun aramas, I ese pwan nikitireno, pwan mwo nupwen ra nikitano I. Ekkewe chommong osini pwe Kot epwe aparasa Israel ir mi fiti chommong pwon pwe eu ran I epwe ionfengenir.
Ikenai ina ena ran—ach fansoun. Ewe ionfengenin a fen poputa. Non 1836, ngoroun ier mwirin Moses a ionfengeni ekkewe aramasen Israel me nemonun chukun Mount Sinai, i a pwato non ewe Kirtland Tempel an epwe ngeni Joseph Smith “ekkewe kiien ewe ionfengenin Israel seni ekkewe ruanu kinikinin ewe fonufan”(Doctrine and Covenants 110:11). Iei, ren ewe emwenin aramas mi omwochu ekkei kii, ekkewe einangen Israel ra ioifengen seni meinisin muu ikewe noun ewe Samon kewe chon angang ir mi tufichin no ie.
Moses, Elias, and Elijah Appear in the Kirtland Temple [Moses, Elias, me Elijah Ra Pwato non ewe Kirtland Tempel], by Gary E. Smith
Preseten Russell M. Nelson a eita ngeni ei ioifengen “ewe mettoch a kon auchea a fis won fonufan ikenai. Ese pwan wor met mi nonno watten, ese pwan wor met mi nonno auchean, ese pwan wor met mi nonno ningan. Me ika ka finata, ika ka mochen, ka tongeni winiti eu watten pekin.”
Ifa usun sia tongeni aninis? Met wewen ne ionfengeni Israel? A wewen pwe niwinsefaniton ekkewe engon me ru einang ngeni ewe fonu ra akkom fonueni? Ennetin, a wewen och mettoch mi nap, a nap esemuch. Usun Preseten Nelson a awewei:
“Nupwen sia foos usun ewe ioifengen, sia chok foos usun ei nongonong ennet: pwe meinisin noun Semach won Nang semirit, won ir me ruepek ewe minen epet, a namwot repwe rongorong ewe porausen ewe kapas allimen Jises Kraist mi niwinsefanito. …
“Inet chok ka fori och mettoch mi anisi emon—won eu me nein epek ewe eppet—angei eu ipwen mwom ngeni ekkewe pwon mi pin ngeni Kot me angei auchean angangepinen papatais me tempel, ka aninis ne ionfengeni Israel. A chok ina usun mecheres.”
Ei a fis, nupwen Isaiah a apasa, “eu me eu” (Isaiah 27:12) ika, nupwen Jeremiah a osini, “emon seni eu me eu teninimw, me ruemon seni eu me eu famini” (Jeremiah 3:14).
Ionfengeni Israel wewen wato sefan noun Kot semirit ngeni I. A wewen eniwinsefanireto ngeni ar pwonen nefiner mi pin ngeni I. A wewen forsefani ewe “muu mi pin” I a apasa epwe forata me nom (Exodus 19:6).
Feito Neimw
Usun emon mi fori eu pwon mi pin ren Kot, en kinikinin ewe imwen Israel. Ka fen ioifengen, me en emon chon ionfengeni. Ewe amwararen porousen fansoun nom usun ekkewe aramas pwon epwene pwonuta, me en auchean pekin. Iei ewe fansoun nupwen “Jises epwe apasa ngeni Unusen Israel, ‘Feito Neimw.’”
Iei ewe porousen ekkewe chon ionfengeni: Feito neimw ngeni ewe pwon mi pin. Feito neimw ngeni Saion. Feito neimw ngeni Jises Kraist, ewe Emon mi Fel re Israel, me I epwe uweiukeno neimw ngeni Kot, Sememi we.