2 Mbretërve 16–25

Shumica prej nesh e kanë përjetuar atë sfidë të besimit tonë. Për Ezekian dhe popullin e tij, njëra prej atyre sfidave erdhi kur ushtria asiriane iu afrua Jerusalemit. Ndërsa lexoni te 2 Mbretërve 18–19, përfytyroni sikur po jetonit në Jerusalem gjatë kësaj kohe. Si mund të ishit ndier, për shembull, kur dëgjuat talljet e asirianëve te 2 Mbretërve 18:28–37 dhe 19:10–13? Çfarë do të kishit bërë? Krahasojini arsyet e asirianëve që izraelitët të mos i mirëbesonin Zotit me arsyet që jep Satani sot që ne të kemi dyshim te besimi ynë. Gjithashtu mund të krahasoni arsyet e asirianëve me arsyet përse ju vërtet i mirëbesoni Zotit.

Çfarë mësoni nga veprimet e Ezekias në këtë situatë? (Shihni te 2 Mbretërve 19:1–7, 14–19.) Si u përgjigj Zoti? (Shihni te 2 Mbretërve 19:35–37.) Si mendoni, përse Ezekia qëndroi besnik? (Shihni te 2 Mbretërve 18:5–7.) Përsiatni se si ju ka mbështetur Zoti në kohë sfiduese. Çfarë ndiheni të frymëzuar të bëni për ta rritur mirëbesimin tuaj tek Ai?

Mesazhi i Presidentit Xhefri R. Holland “Mos Druaj; Ti Vetëm Beso!” (Liahona, maj 2022, f. 34–36) ka këshilla të dobishme për kohët e frikës apo dyshimit. Edhe një himn si “Punës Le t’i Vihemi” (Himne, nr. 154) mund të ketë mesazhe inkurajuese. Çfarë gjeni te këto burime që ju ndihmojnë?

Shihni edhe te 2 Kronikave 31–32; 3 Nefi 3–4; Jorg Klebingati, “Dishepullimi i Guximshëm në Ditët e Mëvonshme”, Liahona, maj 2022, f. 107–110.

Senasheribi, mbreti i Asirisë, kishte arsye të mira për të besuar se ushtria e tij do ta pushtonte Jerusalemin (shihni te 2 Mbretërve 17; 18:33–34; 19:11–13). Por Zoti pati një mesazh për Senasheribin, të dhënë nëpërmjet profetit Isaia. Është shënuar te 2 Mbretërve 19:20–34. Cilat të vërteta gjeni në mesazhin e Zotit që ju ndihmojnë të keni besim tek Ai dhe plani i Tij?

A keni ndier ndonjëherë se ju mungonte diçka shpirtërore? Ndoshta ndiet se marrëdhënia juaj me Perëndinë mund të ishte më e fortë. Çfarë ju ndihmoi të ktheheshit tek Ai? Përsiatini këto pyetje teksa lexoni te 2 Mbretërve 21–23, që përshkruan mënyrën se si Mbretëria e Judës u largua nga Zoti nën mbretin Manas (shihni te 2 Mbretërve 21) dhe se si mbreti Josia i ndihmoi njerëzit të ktheheshin përsëri tek Ai (shihni te 2 Mbretërve 22–23). Si dhe përse ndryshuan Josia dhe populli i tij? (Shihni te 2 Mbretërve 22:8–11; 23:1–6, 21, 24.)

Presidenti Spenser W. Kimball e quajti historinë për mbretin Josia “një nga historitë më të bukura në të gjitha shkrimet e shenjta” (Teachings of Presidents of the Church: Spencer W. Kimball [2006], f. 62). Lexojini fjalët e Presidentit Kimball rreth mbretit Josia (faqet 62–64). Ndoshta mund të mendoni për një përvojë kur një fragment i shkrimit të shenjtë “vepro[i] fuqishëm” brenda jush. Çfarë mund të bëni për të marrë më shumë përvoja si ajo?

Shihni edhe tek Alma 31:5; “Josiah and the Book of the Law” [“Josia dhe Libri i Ligjit”] (material filmik), Gospel Library [Biblioteka e Ungjillit].

12:25

Çfarë ju bën përshtypje nga besëlidhja që bëri Josia te 2 Mbretërve 23:3? Ndërsa vazhdoni të lexoni kapitullin 23, vini re si e tregoi Josia zotimin e tij ndaj Zotit (shihni edhe figurën në fund të këtij përvijimi). Si mund ta tregoni zotimin tuaj ndaj Tij?

• Te 2 Mbretërve 18:3, 5–6 ndihmojini fëmijët tuaj që të zbulojnë atë që e bëri Ezekian një mbret të mirë. Pastaj ndërsa lexoni së bashku te 2 Mbretërve 19:14–19, ata mund të zbulojnë se si ai e tregoi se i mirëbesonte Zotit. Mund të shihni një figurë të Jezusit dhe të flisni rreth arsyeve përse mund t’i mirëbesojmë Atij. Si mund të tregojmë se i mirëbesojmë Zotit?

• Te 2 Mbretërve 22:1 ndihmojini fëmijët tuaj që të zbulojnë sa vjeç ishte Josia kur u bë mbret. Çfarë mësojmë rreth Josias te vargu 2? Merreni parasysh një veprimtari që mund të ilustrojë ndjekjen e Zotit dhe mosdevijimin “as [n]ë të djathtë as [n]ë të majtë”.

• Punëtorëve të përshkruar te 2 Mbretërve 22:3–7 iu mirëbesuan para për të rindërtuar tempullin “sepse ata vepr[uan] me ndershmëri” (vargu 7). Pasi t’i lexoni këto vargje, ju dhe fëmijët tuaj mund të flisni rreth gjërave që ju janë mirëbesuar. Si mund të jemi të besueshëm ashtu si punëtorët në këto vargje?

• Për të paraqitur historinë e mbretit Josia te 2 Mbretërve 22–23, mund të fshihni një kopje të shkrimeve të shenjta diku në dhomë. Ftojini fëmijët tuaj që ta gjejnë atë. Më pas mund të tregoni se çfarë ndodhi kur njëri nga priftërinjtë e Josias gjeti shkrimet e shenjta në tempull (shihni te 2 Mbretërve 22:8–11; shihni edhe mësimin “Mbreti Josia” tek Tregime nga Dhiata e Vjetër, f. 148–149). Çfarë mund të na ndodhte po të mos i kishim shkrimet e shenjta? Tregojini njëri‑tjetrit përse jeni të lumtur që i kemi shkrimet e shenjta sot.

  

  1:36

• Pas leximit te 2 Mbretërve 23:2–3, ju dhe fëmijët tuaj mund të flisni rreth shkrimeve të shenjta që ju kanë frymëzuar të “zot[oheni] të ndiq[ni] Zotin” (vargu 3). Gjithashtu mund të këndoni një këngë rreth shkrimeve të shenjta, të tillë si “Kërko, Përsiat dhe Lutu” (Libri i Këngëve të Fëmijëve, f. 66).

• Kur Josia dhe populli i tij i mësuan urdhërimet e Perëndisë, ata bënë një besëlidhje për t’i jetuar ato. Lexoni për këtë me fëmijët tuaj te 2 Mbretërve 23:1–3 dhe ndihmojini të gjejnë fjalë ose fraza që tregojnë se si u ndien njerëzit rreth urdhërimeve të Zotit. Ndoshta fëmijët tuaj mund të ngrihen në këmbë e të flasin se çfarë do të thotë ta “prano[sh] besëlidhjen”. Pastaj mund të ecin aty ku janë dhe të flasin se çfarë mund të nënkuptojë fraza “të nd[jekësh] Zotin”. Në vijim, mund t’i vendosin duart në zemër dhe të sugjerojnë mënyra se si mund t’i mbajmë besëlidhjet tona “me gjithë zemër”.