2 Te Mau Ari’i 2–7

Tē fa’a’ite nei te mau temeio i te mana o te Atua. E nehenehe te reira e tauturu ia tātou ’ia upo’oti’a i te mau tāfifira’a i te tāhuti nei—mai te hō’ē fenua māehe e tītauhia te pape mā (hi’o 2 Te Mau Ari’i 2:19–22) ’aore rā te hō’ē ’ōpahi mo’e e ti’i mai (hi’o 2 Te Mau Ari’i 6:4–7). Te mea faufa’a roa atu rā, e nehenehe te mau temeio e fa’afāriu ia tātou i te Fatu ra. ’Ia tai’o ’oe i te 2 Te Mau Ari’i 2–6, e nehenehe e tāpura i te mau temeio tā ’oe e ’ite ’e e feruri i te mau ha’api’ira’a pae vārua tā ’oe e ’apo mai mai roto mai i te temeio tāta’itahi.

E nehenehe ato’a ’oe e fa’aau i te mau temeio tā Elisaia i rave ’e te mau temeio tā Iesu Mesia i rave (hi’o 2 Te Mau Ari’i 4:8–37 ’e Luka 7:11–16 ; 2 Te Mau Ari’i 4:42–44 ’e Ioane 6:1–13 ; 2 Te Mau Ari’i 5:1–15 ’e Luka 17:11–19). E aha tā teie mau temeio e ha’api’i nei ia tātou nō ni’a i te Fa’aora ’e tāna mau peropheta ?

Hi’o ato’a 2 Nephi 26:12–13 ; 27:23 ; Moroni 7:35–37 ; te tuha’a « ’A ’imi ’e ’a tīa’i i te mau temeio » i roto Russell M. Nelson, « Te mana o te haerera’a i mua i te pae vārua », Liahona, Mē 2022, 99–100.

’Ua fa’auru te Fatu ia Elisaia ’ia tohu i te mau mea e tae mai—i te rahira’a taime, e mau mea e mahere i te ’ore e tupu mai. ’Ia tai’o ’oe i te 2 Te Mau Ari’i 4:8–17; 7:1–16, ’a feruri tē nāhea ra ’oe i te pāhono i te parau a te Fatu e nā roto mai i tāna mau peropheta i teie mahana. E aha te mau ha’api’ira’a, te mau parau tohu ’e te mau parau fafau tā ’oe i fa’aro’o mai roto mai i te mau peropheta ora ? E aha tā ’oe e rave nei nō te rave ma te fa’aro’o i tā rātou mau parau ?

Hi’o ato’a 3 Nephi 29:6 ; Te Ha’api’ira’a Tumu ’e te mau Fafaura’a 1:37–38 ; te ha’aputura’a nō te mau « Ha’api’ira’a a te mau Peresideni », Vaira’a buka ’evanelia.

’Ia tai’o ’oe i te 2 Te Mau Ari’i 5, e nehenehe e fa’aau i te lēpera a Naamana i te hō’ē fifi pae vārua tā ’oe e fa’aruru nei.

Tē vai ra ānei te tahi ta’ata mai te « tītī » i roto i tō ’oe orara’a, tē fa’aitoito nei ia ’oe ’ia ’imi i te arata’ira’a mai roto mai i te mau peropheta a te Fatu nō tō ’oe mau fifi » (hi’o mau ’īrava 2–3, 13).

E aha tā te Fatu e ani nei ia ’oe ’ia rave e au ē e mea ’ōhie roa—mai te « hopu, ’a mā atu ai » ? (’īrava 13). E aha ra te mea e tāpe’a nei ia ’oe ’ia fa’ari’i i tāna mau anira’a ’ōhie ?

Nāhea ’oe e fa’a’ite ai i te ha’eha’a mai ia Naamana ?

’A hi’o nāhea te ’ohipa i tupu nō Naamana i te tauira’a i tōna fa’aro’o i te Atua o ’Īserā’ela (hi’o ’īrava 15). E aha te ha’api’ira’a tā ’oe e nehenehe e ’apo mai i reira ?

Hi’o ato’a Luka 4:27 ; 1 Petero 5:5–7 ; Alama 37:3–7 ; Etera 12:27 ; L. Whitney Clayton, « Tāna e fa’aue mai ia ’outou na, e nā reira ’outou », Liahona, Mē 2017, 97–99 ; « Naaman and Elisha [Naamana ’e Elisaia] » (video), Gospel Library.

14:30

’A tāmata ai ’oe i te pe’e i te Mesia, ’aita a’enei i tupu tō ’oe mana’o mai tō te tāvini ’āpī ra o Elisaia—’aita i nava’i ’e e mea mata’u roa ? ’A feruri na ’o ’oe terā, ’ia tai’o ’oe i te 2 Te Mau Ari’i 6:8–23. E aha te tauira’a tā teie ’ā’amu e fa’atupu nei i ni’a i tā ’oe huru ferurira’a ’e tō ’oe mana’o nō ni’a i tō ’oe mau fifi, tā ’oe mau hōpoi’a ’aore rā tā ’oe mau tauto’ora’a nō te ora i te ’evanelia ?

’A feruri ai ’oe i te reira, ’a feruri ato’a i te mau parau a te peresideni Henry B. Eyring : « Mai taua tāvini o Elisaia, e rahi a’e tō pīha’i iho ia ’outou i tō pīha’i iho i te pāto’i mai ia ’outou. Te tahi pae i pīha’i iho ia ’outou ’aita ïa e ’itehia i tō ’outou mata tāhuti nei. E pāturu te Fatu ia ’outou, te tahi mau taime, nā roto i te pi’ira’a i te tahi atu ’ia turu mai ia ’outou » (« ’O ’outou ’o tē ha’amata i te rave », Liahona, Novema 2008, 58).

E nehenehe e hāmani i te hō’ē tāpura nō te feiā « e rahi tō [’oe] » (’īrava 16)—te mau ta’ata tā te Atua i tu’u i roto i tō ’oe orara’a nō te turu ia ’oe. E nehenehe ’oe e ani iāna ’ia tauturu mai ’ia ’ite ’o vai rātou, maoti te fa’a’ara’arara’a i tō ’oe mata pae vārua. E riro ’oe i te tu’u-ato’a-hia i roto i tō te ta’ata orara’a nō te tauturu ia rātou. Nāhea ’outou e noa’a ai te pūai ’e te pāturura’a mai roto mai i te tahi ’e te tahi ?

E aha te taime ’ua putapū ’oe i te pāturura’a tā te Fatu i parau i roto i Te Ha’api’ira’a Tumu ’e te mau Fafaura’a 84:88 ?

E nehenehe ato’a ’oe e tai’o i te a’ora’a a te tuahine Michelle D. Craig « E mata nō te hi’o » (Liahona, Novema 2020, 15–17). ’A ui ia ’oe iho : « E aha tā te Atua e hina’aro nei iā’u ’ia ’ite ? »

’A fa’ahiti ai ’oia i te ’ā’amu i roto i te 2 Te Mau Ari’i 6:8–23, ’ua nā ’ō Elder Ronald A. Rasband : « E tonohia mai paha te mau pere’o’o auahi ’e ’aore rā, ’aita, nō te tāmarū i tō tātou mau mata’u ’e nō te aro i tō tātou mau demoni, terā rā, e mea māramarama roa te ha’api’ira’a. Tei pīha’i iho te Fatu ia tātou, ’ua ’ite ’oia ē tē vai nei tātou ’e te ha’amaita’i nei ’oia ia tātou i roto i te hō’ē noa rāve’a e nehenehe iāna ’ia rave. E nehenehe te pure e ti’aoro ’ia ha’ama’irihia mai te pūai ’e te heheura’a tā tātou e hina’aro nō te fa’atumu i tō tātou mau mana’o i ni’a ia Iesu Mesia ’e i tāna tusia tāra’ehara. ’Ua ’ite te Fatu ē, e mata’u tātou i te tahi taime. ’Ua nā reira mai au, ’oia ato’a ’outou […] I roto i teie ’Ēkālesia e iti paha tō tātou nūmera ’ia au i te tai’ora’a a tō te ao nei, ia ’ara’ara rā tātou i tō tātou mata vārua, ‘e rahi tō tātou, e iti tō rātou’ [2 Te Mau Ari’i 6:16] » (« ’Eiaha ’ia pe’ape’a », Liahona, Novema 2018, 18, 19). E nāhea ’oe ’ia fa’a’ohipa i teie mau parau nō te tauturu i te hō’ē ta’ata e mana’o taiā ’aore rā e mana’o mata’u ?

Hi’o ato’a « E te tamari’i here ē », Te mau hīmene, N°48.

• I muri a’e i te tauturura’a i tā ’oe mau tamari’i ’ia māramarama e aha te hō’ē temeio, ’a ani ia rātou ’ia tāpura mai i te mau hi’ora’a e rave rahi tē haere ia rātou. E nehenehe te mau hōho’a i roto i te Buka hōho’a nō te ’evanelia ’aore rā te Mai, pe’e mai e tauturu. I muri mai e nehenehe rātou e hi’o mai e aha te mau temeio i roto i te 2 Te Mau Ari’i 4:1–7, 14–17, 32–35, 38–44. E aha tā teie mau temeio e ha’api’i nei nō ni’a i te Metua i te ao ra ?

• E nehenehe ’oe ’e tā ’oe mau tamari’i e paraparau e mea nāhea tō te Atua fa’a’itera’a i tōna here nā roto i te mau temeio. E nehenehe ato’a ’outou e hīmene i te hō’ē hīmene mai te hīmene « God’s Gracious Love [Te aroha maita’i rahi o te Atua] » (Gospel Library).

• ’A tauturu ia tā ’oe mau tamari’i ’ia ’ite i te ’ā’amu i roto i te 2 Te Mau Ari’i 5:1–3, 9–14. E nehenehe e fa’a’ohipa i te ’ā’amu « ’Ua fa’aora Elisaia ia Naamana » (i roto Te mau ’ā’amu o te Faufa’a Tahito, 134–37) ’aore rā te hōho’a nō Naamana i roto i te arata’i ha’api’ira’a nō teie hepetoma. Nō te aha ’aita ’o Naamana i hina’aro e horoi iāna i roto i te ’ānāvai Ioridana, ’ua parau ho’i Elisaia i fa’aora te reira i tōna ma’i ? ’Ua nāhea Naamana i te ha’amaita’ira’ahia i te pe’era’a ’oia i te parau a Elisaia ? E nehenehe ’outou e fa’a’ite i te tahi ’e te tahi i te mau ’ohipa i tupu nō ’outou ’a ha’apa’o ai i te parau a te Fatu, noa atu ē ’aita i pāpū ia ’outou ’o terā iho ā tā ’outou i hina’aro.

  

  1:52

• E nehenehe ato’a e tūra’i i te parau nō te 2 Te Mau Ari’i 5:13, i reira tō te tāvini o Naamana i te tauturura’a iāna ’ia fa’aoti e ha’apa’o i te parau a te peropheta Elisaia. I muri iho e nehenehe tā ’oe mau tamari’i e paraparau i te mau rāve’a nō rātou nō te tauturu i tō rātou mau hoa ’e te mau melo o te ’utuāfare ’ia fa’aro’o ’e ’ia ha’apa’o i te parau a te peropheta.

• E nehenehe ’oe ’e tā ’oe mau tamari’i e feruri ē, ’ua hā’atihia ’outou e te hō’ē nu’u ma te ’o’e, te pua’ahorofenua ’e te pere’o’o huti. E aha te mana’o e tupu mai ? E aha tā ’outou e rave ? ’Ei reira e nehenehe tā ’oe mau tamari’i e tāpiri i tō rātou mata ’a tai’o ai ’oe i te 2 Te Mau Ari’i 6:16–17 ia rātou ra. (Hi’o ato’a « Elisaia ’e te nu’u a te Fatu », i roto Te mau ’ā’amu o te Faufa’a Tahito, 138–39, ’aore rā te hōho’a i te hope’a o teie arata’i ha’api’ira’a.) ’Ia tae ana’e ’oe i ni’a i terā parau « e fa’a’ara’ara ’oe i tōna mata » (’īrava 17), ’a ani i te mau tamari’i ’ia ’ara’ara i tō rātou mata. ’A paraparau nō te mea tā te tāvini i ’ite. ’A fa’a’ite i tā ’oe mau tamari’i i te huru ’oe i te putapūra’a ē tei ia ’oe ra te Fatu i roto i tō ’oe mau fifi, noa atu ē ’ia hi’ohia, ’o ’oe ana’e iho.

  

  1:9