Kam, Bihainim Mi
Sampela Toktok bilong Tingting: “Jisas Bai Tokim Ol Israel, ‘Yupela Kam Bek Long Graun Bilong Yupela’”

“Sampela Toktok bilong Tingting: ‘Jisas Bai Tokim Ol Israel, “Yupela Kam Bek Long Graun Bilong Yupela”’” Kam, Bihainim Mi—Bilong Haus na Sios: Olpela Testamen 2026 (2026)

“Sampela Toktok bilong Tingting: ‘Jisas Bai Tokim Ol Israel, “Yupela Kam Bek Long Graun Bilong Yupela”’” Kam, Bihainim Mi: Olpela Testamen 2026

mak bilong ol sampela tingting bilong tingim

Sampela Toktok bilong Tingting

“Jisas Bai Tokim Ol Israel, ‘Yupela Kam Bek Long Graun Bilong Yupela’”

Long ples drai bilong Sainai, Moses i bungim ol pikinini bilong Israel aninit long wanpela maunten. Long dispela hap, Bikpela i tok aut olsem Em laik mekim ol dispela lain, ol bin stap olsem ol wokman tasol ol i lusim, i kamap wanpela strongpela lain. Em i tok, “Bai yupela i stap lain manmeri i save mekim wok bilong mi olsem ol pris. Na bai yupela i stap ol manmeri tru bilong mi” (Kisim Bek 19:6). Bikpela i promis olsem ol bai kamap bikpela lain tru, na ol bai gat planti samting tru, maski sapos ol birua i gat bikpela strong i raunim ol.

Dispela bai i no inap kamap long strong, namba, o save bilong ol Israel. Bikpela i tok, dispela bai kamap taim ol “holim strong kontrak bilong [Em] na bihainim tok bilong [Em]” (Kisim Bek 19:5). Pawa bilong God tasol bai mekim ol kamap strong. I no pawa bilong ol yet.

Tasol ol lain bilong Israel i no save harim na bihainim tok bilong God olgeta taim, na sampela taim i go pinis na ol i no holim kontrak bilong God moa. Planti bilong ol i lotuim ol god bilong ol narapela lain, na bihainim pasin bilong ol kantri i stap raunim ol. Ol givim baksait long dispela samting i mekim ol narakain long olgeta kantri—dispela kontrak bilong ol wantaim God. Taim strong bilong God i no banisim ol moa, i nogat wanpela samting moa bilong banisim ol long ol birua bilong ol.

Go Nabaut Bilong Ol Israel

Planti taim namel long yia 735 na 720 BC, ol Asiria bin kam pait na ol kisim Kingdom bilong Israel long hap not, na ol kisim planti bilong ol lain bilong Israel go kalabus long kainkain hap long kingdom bilong ol Asiria. Israel bin stap olsem ples bilong 10-pela bilong ol 12-pela lain manmeri bilong Israel. Ol bin kolim ol dispela lain bilong Israel olsem “ol lain manmeri i lus pinis”, long wanem, ol birua bin rausim ol long graun bilong ol na ol go stap nabaut long ol narapela kantri. Tasol, i gat narapela as bilong ol i lus: ol i lusim tingting olsem ol mekim kontrak wantaim God, na ol manmeri bilong God.

Bihain, planti manmeri long Kingdom bilong Juda long hap saut tu bin givim baksait long Bikpela. Ol Asiria kam pait wantaim ol na kisim graun bilong ol tu; Jerusalem tasol bin stap gut. Bihain, namel long yia 597 na 580 BC, ol Babilon bin kam bagarapim tru Jerusalem, wantaim tempel, na ol kisim planti manmeri go kalabus long ples bilong ol. Long 70-pela yia bihain, wanpela liklik lain bilong ol Juda i kisim tok orait long go bek long Jerusalem na sanapim gen tempel. Tasol planti bilong ol bin stap bek long Babilon.

Paia i kukim Jerusalem

The Destruction of Jerusalem by Nebuzar-adan, William Brassey Hole i mekim, © Providence Collection/laisens i kam long goodsalt.com

Long ol taim i bin kam i go, ol lain Israel bilong olgeta 12-pela lain manmeri “i [raus] … i go i stap long ol arapela kantri olsem bikpela win i save rausim ol samting” (Sekaraia 7:14). Bikpela i kisim sampela go long narapela hap. Sampela i lusim Israel long ronowei long ol birua o long ol narapela as.

Dispela yumi kolim ol Israel i go nabaut. I gat sampela as bilong yumi mas save long dispela samting. Wanpela samting, em wanpela bikpela toktok insait long Olpela Testamen—planti ol profet bilong Olpela Testamen i lukim ol manmeri givim baksait long God, na dispela em as bilong Israel i go nabaut. Ol i lukim pinis na ol givim tok lukaut long ol manmeri. Sampela bilong ol i stap long taim dispela i kamap tu. Em gutpela long tingim dispela taim yu ritim buk bilong Aisaia, Jeremaia, Amos, na ol narapela profet long klostu bilong pinis bilong Olpela Testamen. Taim yu tingim dispela long taim yu ritim ol tok profet bilong ol long Asiria na Babilon, pasin bilong lotuim ol giaman god na taim bilong kalabus, bagarap bilong ol na taim ol bai kamap gen, yu bai save long wanem samting ol toktok long en.

Taim yumi save long go nabaut bilong Israel, bai yumi save gut moa long Buk bilong Momon, long wanem, Buk bilong Momon em stori bilong wanpela hap lain bilong ol lain Israel i go nabaut. Dispela stori i stat long taim Lihai na famili bilong em ronowei long Jerusalem long yia 600 BC, bipo long ol Babilon kam bagarapim Jerusalem. Lihai em wanpela bilong ol profet husat i tok olsem ol Israel bai go nabaut. Na famili bilong em i helpim long mekim dispela tok profet kamap tru. Ol kisim wanpela hap bilong ol lain Israel na go planim long narapela hap bilong ples graun, long graun bilong Amerika.

Bung Gen bilong ol Israel

Go nabaut bilong ol Israel em liklik hap bilong stori. Bikpela i no save lusim tingting long ol manmeri bilong Em, na Em i no save givim baksait long ol, long taim ol givim baksait long Em. I gat planti tok profet olsem God bai mekim na ol Israel bai go nabaut, tasol bihain long dispela i gat ol promis olsem Em bai bungim ol gen wanpela taim.

Dispela taim em nau—taim bilong yumi nau. Wok bilong bungim gen Israel i stat pinis. Long yia 1836, planti yia bihain long Moses bungim ol pikinini bilong Israel aninit long Maunten Sainai, em kamap long Josep Smit insait long tempel long Kirtland long givim “ki bilong bungim gen ol lain bilong Israel i stap fopela hap bilong dispela graun” (Doktrin na ol Kavanen 110:11). Long nau, taim ol man i holim ol dispela ki i go pas long dispela wok, wok bilong bungim gen Israel i wok long kamap long olgeta kantri we ol wokman bilong Bikpela i go long en.

Moses kamap long Josep Smit na Oliva Kauderi insait long Kirtland Tempel

Moses, Elias, and Elijah Appear in the Kirtland Temple, Gary E. Smith i mekim

Presiden Russell M. Nelson i kolim dispela wok bilong bungim gen olsem “nambawan samting i kamap long dispela graun tude. Nogat narapela samting i bikpela tru na i dia tumas. Na sapos yu laik, yu tu ken stap insait long dispela wok.”

Bai yumi helpim olsem wanem? Wanem as bilong bungim gen Israel? Dispela em wok bilong kisim ol dispela 12-pela lain manmeri go bek long graun ol bin stap bipo, o nogat? As bilong dispela wok em bikpela tru, na bai stap oltaim. Olsem Presiden Nelson i tok:

“Taim yumi toktok long wok bilong bungim gen Israel, yumi wok long toktok long dispela nambawan tok tru: olgeta pikinini bilong Papa long Heven, long dispela graun ol long ples bilong ol spirit, i mas harim toktok bilong gutnius bilong Jisas Krais. …

“Taim yu mekim wanpela samting bilong helpim wanpela—long dispela graun o long ples bilong ol spirit—i mekim kontrak wantaim God na kisim baptais na ol wok bilong tempel, yu wok long helpim long bungim gen Israel. Em i isi olsem tasol.”

Dispela bai kamap, olsem Aisaia i tok, long “ol wan wan” (Aisaia 27:12) o, olsem Jeremaia i tok, “wanwan bilong [ol] … long ol taun, na long ol lain wanblut” (Jeremaia 3:14).

Taim yumi bungim gen Israel, yumi kisim ol pikinini bilong God go bek long Em. Dispela em yumi helpim ol long stap klostu long Bikpela, insait long dispela kontrak ol i mekim wantaim Em. Dispela em yumi mekim “[ol] stap manmeri tru bilong [Bikpela],” kain olsem Bikpela i laik mekim longtaim i go (Exodus 19:6).

Kam Bek Long Graun Bilong Yu

Yu stap wanpela hap bilong lain bilong Israel, long wanem, yu mekim pinis kontrak wantaim God. Ol i bungim yu gen pinis, na nau yu stap olsem man bilong bungim gen ol narapela. Dispela stori bilong ol manmeri bilong dispela kontrak i wok long kam long arere bilong em, na yu gat bikpela wok long mekim. Nau em taim bilong “Jisas bai tokim ol Israel, ‘Yupela kam bek long graun bilong yupela.’”

Dispela em toktok bilong ol lain i mekim dispela wok bilong bungim gen Israel: Kam bek long dispela kontrak. Kam bek long Saion. Kam bek long Jisas Krais, dispela Man bilong mekim gutpela na stretpela pasin olgeta, na em bai kisim yu go bek long God, Papa bilong yu.

Ol sampela liklik toktok

  1. Lukim Lo 28:1–14.

  2. Lukim 2 King 17:6–7; 2 Stori 36:12–20.

  3. Lukim 2 King 17:1–7. Ol Asiria bin kisim ol dispela 10-pela lain manmeri: Ruben, Simeon, Isakar, Sebulun, Dan, Naptali, Gat, Aser, Efraim, na Manase. Ol lain bilong Livai i tilim ol yet na ol i stap insait long graun bilong ol 10-pela ol lain manmeri long mekim wok pris bilong ol.

  4. Lukim 2 King 19; Aisaia 10:12–13.

  5. Lukim 2 King 24–25; 2 Stori 36; Jeremaia 39; 52.

  6. Lukim Esra 1; 7; Nehemia 2.

  7. Lukim 2 Nifai 1:1–5; Omnai 1:15–16.

  8. Lukim 2 King 25:22–26; Jeremaia 42:13–19; 43:1–7.

  9. Long yia 70 AD, ol Rom bin kam bagarapim gen Jerusalem wantaim tempel bilong em, na ol Juda i stap long dispela taim bin go nabaut long ol planti kantri.

  10. Lukim Jeremaia 29:18; Esekiel 22:15; Hosea 9:17; Amos 9:9; 1 Nifai 1:13.

  11. Lukim 2 Nifai 15:12.

  12. Lukim 1 Nifai 1:13, 18–20; 10:12–14.

  13. Lukim Aisaia 5:26; 27:12; 54; Jeremaia 16:14–15; 29:14; 31:10; Esekiel 11:17; 34:12; 37:21–28; Sekaraia 10:8; 1 Nifai 10:14; 22:25; 3 Nifai 16:1–5; 17:4.

  14. Russell M. Nelson, “Hope of Israel” (worldwide youth devotional, Jun 3, 2018), Gospel Library.

  15. Russell M. Nelson, “Hope of Israel.”

  16. Lukim 2 Nifai 30:2.

  17. “Now Let Us Rejoice,” Hymns, no. 3.