2 Samuela 11–12 ; 1 Te Mau Ari’i 3 ; 6–9 ; 11

I te tahi taime, tē hi’o nei tātou i te mau ta’ata e au ra e mea pūai i roto i tō rātou fa’aro’o, ’e ’ua mana’o atu ra ïa tātou ē, ’aita rātou e ha’ape’ape’ahia nei e te fa’ahemara’a. Tē fa’a’ite pāpū nei te mau mā’itira’a ’oto rahi a Davida i roto i te 2 Samuela 11 ē, e ’ere roa atu. ’A feruri i te ha’api’ira’a tē nehenehe e ’apo mai i roto i teie mau ’ohipa i tupu nōna. E nehenehe te mau uira’a mai teie e tauturu ia ’oe ’ia tai’o māite i te 2 Samuela 11–12 :

• E aha te mau mā’itira’a tā Davida i rave tei fa’ahaere roa iāna i ni’a i te ’ē’a tē rahi noa atu ra te hara ? E aha te mau mā’itira’a parauti’a nāna ’o tē nehenehe e mono i te reira ? (Hi’o ato’a i te video « To Look Upon », Gospel Library.)

  

  4:15

  Fa’a’ohipa i te mau video. E nehenehe te mau video e tauturu ia ’oe ’ia hi’o i te mau ’ā’amu nō roto mai i te mau pāpa’ira’a mo’a ’e ’ia feruri e nāhea te reira i te tano ia ’oe. ’A feruri e nāhea ’oe e fa’a’ohipa ai i te reira nō te ha’amaita’i atu ā i te ha’api’ira’a ’e te ’apora’a. ’Ei hi’ora’a, ’a māta’ita’i ai i te video « To Look Upon » (Gospel Library), e nehenehe e tāpe’a i te video i te tahi mau taime nō te feruri ’aore rā nō te ’āparau i te tahi mau uira’a i tu’uhia i roto i teie ’ohipa e rave.

• Tē nāhea ra te ’enemi i te tāmata i te arata’i roa ia ’oe i ni’a i te ’ē’a nō te hara ? E aha te mau mā’itira’a tā ’oe e nehenehe e rave i teienei nō te vai ataata ’ore i te pae vārua ?

• ’A hi’o na i te huru o Davida i mua i te ’ā’amu a Natana i roto i te 2 Samuela 12:1–6. I tōna huru i mua i te reira, e aha tē nehenehe e parau nō ni’a i tā Davida huru hi’ora’a iāna iho ? E aha tā te Fatu i rave nō te tauturu ia ’oe ’ia hi’o pāpū a’e ia ’oe ?

• Nāhea ’oe i te parau ha’apoto i te mau ’ohipa i tupu i roto i te 2 Samuela 11–12 ’ei hō’ē noa parau fa’aara ?

Pēnei a’e nā roto i te mau mā’itira’a ’ino a Davida e ’apo mai ’oe i te huru ataatara’a o te hōho’a faufau ’e te hara pae mōrare. Te hō’ē mātēria maita’i nō te reira ’o te Nō te pūai o te feiā ’āpī : E arata’i nō te rave i te mau mā’itira’a, te mau tuha’a iho ā rā « E aha tē rave i terā taime » ’e « E mea mo’a tō ’oe tino » (mau ’api 21–28). Pēnei a’e e nehenehe ’oe e hi’o i roto i te reira mātēria i te parau a’o ’o tē nehenehe e tauturu ia Davida ’ia rave i te mau mā’itira’a maita’i a’e, ’āhani ’ua tai’o ’oia i te reira. ’Aore rā e nehenehe ’oe e tai’o i te tuha’a « E tauturu Iesu Mesia ia ’oe » (mau ’api 6–9), ma te ’imi i te hō’ē mea e tauturu ia Davida ’ia ho’i i te Fatu ra, ’āhani ’ua tai’o ’oia i te reira.

E nehenehe e hīmene i te hō’ē hīmene mai te hīmene « Hina’aro vau ia ’oe » (Te mau hīmene, N°50) ma te feruri ’ua nāhea te Fa’aora i te ha’apūaira’a ia ’oe ’a fa’aruru ai ’oe i te fa’ahemara’a.

Hi’o ato’a 2 Nephi 28:20–24 ; Ulisses Soares, « ’Imi i te Mesia i tō mau mana’o ato’a na », Liahona, Novema 2020, 82–85 ; « Taking Charge of Technology », Gospel Library ; « Watch Your Step » (video), Gospel Library.

2:36

’Āhani i parau te Fatu ia ’oe : « ’A ani mai i tā’u e hōro’a atu nā ’oe ra » (1 Ari’i 3:5), e aha tā ’oe e ani atu ? E aha te mea tā ’oe e fa’ahiahia nei i te anira’a a Solomona ? ’A feruri nō te aha te « ’ā’au ’ite » nō te « ’ite… i te maita’i ’e te ’ino » (’īrava 9) i te tao’a hōro’a faufa’a rahi. E aha tā ’oe e nehenehe e rave nō te ’imi i teie hōro’a ?

Hi’o ato’a Moroni 7:12–19.

I roto i te 1 Te Mau Ari’i 6–7 e ’ite mai ’oe i te hu’ahu’ara’a ha’amāramaramara’a nō te fare mo’a tā Solomona i patu nō te Fatu. E ’ere paha teie hu’ahu’ara’a ha’amāramaramara’a i te mea faufa’a nō ’oe mai te ’āti ’Īserā’ela i tahito ra. Terā rā, e nehenehe te tai’ora’a i teie mau pene e fa’a’ite ri’i ia ’oe i te faufa’a rahi nō rātou ’ia fāna’o i te hō’ē fare o te Fatu. Nō te aha e mea faufa’a ai te reira nō ’oe ?

E nehenehe e feruri e aha te tāpa’o nō te mau tuha’a ta’a ’ē o te hiero a Solomona. ’Ei hi’ora’a, e aha tā te kerubi, te mau tumu rā’au ’e te mau tiare i roto i te 1 Te Mau Ari’i 6:35 e fa’ahōho’a ra. (Hi’o ato’a Genese 3:24.)

’Ua pāpa’ihia i roto i te pene 8 i te pure a Solomona i te otira’a te hiero (hi’o mau ’īrava 22–61). E nehenehe e hāmani i te hō’ē tāpura nō te mau ha’amaita’ira’a tā Solomona i ani. E aha tā ’oe e fa’ahiahia i teie mau anira’a ? (’A hi’o ato’a i te mau parau fafau a te Fatu i roto i te 1 Te Mau Ari’i 6:11–13 ; 9:1–9.) Mai te mea ’ua haere ’oe i te fare o te Fatu, ’a feruri i te mau ’ohipa i tupu i tō ’oe ha’amorira’a i reira. ’Ua nāhea te ha’apa’ora’a i te mau fafaura’a o te hiero i te tauturura’a ia ’oe ’ia fāna’o i te mau ha’amaita’ira’a a te Fatu ?

Hi’o ato’a Te Ha’api’ira’a Tumu ’e te mau Fafaura’a 109 ; Henry B. Eyring, « E mea au nā’u ’ia hi’o i te hiero », Liahona, Mē 2021, 28–31.

E aha te aura’a o te parau ra, « e [ha’amaita’i roa] ho’i i tō ’outou ’ā’au i tō tātou Atua ia Iehova » ? (1 Te Mau Ari’i 8:61). E mea ta’a ’ē ānei ïa i te ha’amaita’i-roa-ra’a i tā tātou mau ’ohipa ? Nāhea ? ’A tai’o i te 1 Te Mau Ari’i 11:1–11, ’e ’a hi’o e aha tā te Fatu i parau nō ni’a i te ’ā’au o Solomona. E nehenehe e feruri ē, e mau fa’aurura’a ānei i roto i tō ’oe orara’a ’o tē nehenehe e fāriu ’ē atu i tō ’oe ’ā’au i te Fatu, i ni’a i « te mau atua ’e’ē. »

• E nehenehe « Te ari’i Davida » i roto i Te mau ’ā’amu o te Faufa’a Tahito, 117–20, e tauturu ia ’oe ’ia fa’ati’a i tā ’oe mau tamari’i i te ’ā’amu i roto i te 2 Samuel 11. E nehenehe e ani i tā ’oe mau tamari’i ’ia ’imi e aha te mau mā’itira’a hape tā Davida i rave ’e ’ia hōro’a mai i te mau mā’itira’a maita’i tāna e nehenehe mono i te reira. E aha te tahi mau mea tā tātou e nehenehe e rave ’ia fa’ahema-ana’e-hia tātou, ’o tē tauturu ia tātou ’ia mā’iti i te maita’i ?

  

  2:11

• E taime tano paha te tai’ora’a nō ni’a i te mau hara ’oto rahi a Davida nō te ’āparau i te ataatara’a o te hōho’a faufau. E mau mana’o tauturu i roto i te video « What Should I Do When I See Pornography ? [E aha tē rave ’ia ’ite vau i te hōho’a faufau ?] » (Gospel Library). E tauturu i tā ’oe mau tamari’i ’ia fa’aineine i te fa’anahora’a nō te mea e rave ’ia tae rātou i mua i te hōho’a faufau.

  

  5:46

• ’A ha’api’i ai ’outou tā ’oe mau tamari’i nō ni’a i te ha’amo’ara’a o te hiero i roto i te 1 Te Mau Ari’i 8, e nehenehe e hi’o i te mau hōho’a o te mau hiero i roto i te arata’i ha’api’ira’a nō teie hepetoma. ’Ia parau mai tā ’oe mau tamari’i i te mau mea iti tā rātou e ’ite i ni’a i te mau hōho’a. E nehenehe e tūra’i i te parau nō te mau ’īrava 57–58. E aha te aura’a o te parau e « ha’apa’o […] i tāna ao’a ra mau haere’a » ? (1 Te Mau Ari’i 8:58). Pēnei a’e e nehenehe tā ’oe mau tamari’i e tu’u i te hō’ē ’āvae i mua nō te pāhonora’a tāta’itahi tā rātou e hōro’a.

• ’A parau i tā ’oe mau tamari’i e nāhea te ha’apa’ora’a i te mau fafaura’a ’o tā ’oe e rave i roto i te hiero i te tauturu ia ’oe ’ia ha’apa’o i te mau haere’a a te Fatu. E nehenehe e parau ia rātou e aha teie mau fafaura’a (hi’o Buka arata’i rahi, 27.2, Buka arata’i rahi). E nehenehe ato’a ’outou e hīmene ’āmui i te hō’ē hīmene mai te hīmene « ’Ia hi’o vau i te hiero » (Children’s Songbook, 95).

• E nehenehe te tai’ora’a nō ni’a i te huru te mau vahine a Solomona i fa’auru iāna e arata’i i te ’āparaura’a nō ni’a i te tahi hi’ora’a nō « te mau atua ’e’ē »—’oia ho’i te mau mea tā te ta’ata e ha’amori ’e e here ’ei mono nō te Fatu. Nāhea tātou i te fa’a’ite ē, e rahi atu tō tātou here iāna i te tahi noa atu mea ’ē o tō tātou orara’a ?