1 Samuela 8–10 ; 13 ; 15–16

Tē fa’ati’a nei te 1 Samuela 8 i te hō’ē ’ohipa ’o tē taui a muri noa atu i te hope’ara’a o te ’āti ’Īserā’ela. Nō te pārurura’a ia rātou i tō rātou mau ’enemi, ’ua hina’aro te ’āti ’Īserā’ela mai ia verā mā—e ari’i nō te fa’atere ia rātou. ’A tai’o ai ’oe nō ni’a i tā rātou anira’a ’e te pāhonora’a a te Fatu, ’a feruri ’o vai tā ’oe e hi’o nei nō te pārurura’a ’e te arata’ira’a. ’A feruri e aha te aura’a ’ia vaiiho i te Fatu ’ia riro « ’ei ari’i i ni’a iho ia [’oe] » (1 Samuela 8:7).

I te mau hepetoma i muri nei, e tai’o ’oe nō ni’a i te tahi mau ari’i tei pi’ihia nō te fa’atere ia ’Īserā’ela. ’A ha’api’i mai ai ’oe nō ni’a i te reira, ’a feruri i te mau uira’a i muri nei :

• ’Ua nāhea te mau fa’aarara’a a te Fatu i te tupura’a i roto i te 1 Samuela 8:10–18 ?

• E aha te fa’ahope’ara’a i ni’a i te mau tamari’i a ’Īserā’ela nō tā rātou mā’itira’a i te hō’ē ari’i tāhuti nei ?

• E aha te ta’a-’ē-ra’a o Iesu ’e te mau ari’i tāhuti nei ? ’A feruri i te mau ’umera’a o te ao nei e tītauhia ’ia tātara mai roto atu i tō ’oe orara’a ’ia ti’a i te Mesia ’ia riro ’ei Ari’i nō ’oe.

Hi’o ato’a « ’A ’oa’oa na, e Ari’i te Fatu ! », Te mau hīmene, N°29.

Tai’o ’ua nāhea te Atua i te mā’itira’a i te mau ari’i nō ’Īserā’ela i roto i te 1 Samuela 9–10 ’e te 16 (hi’o ta’a ’ē i te 9:15–17 ; 10:1–12 ; 16:1–13). ’A ’imi i te mau ’īrava ’o tē tauturu ia ’oe ’ia māramarama i te aura’a o te parau « mā’itihia e te Atua nā roto i te tohu » i roto i te ’Ēkālesia a te Fatu i teie mahana (Hīro’a fa’aro’o 1:5). E nehenehe e feruri ia ’oe iho ’o te ta’ata fa’atere e tu’u i te pi’ira’a (Samuela), ’o te ta’ata e pi’ihia (Saula ’e David), ’e ’o te ta’ata tei pi’ihia rātou ’ia tāvini (te ’āti ’Īserā’ela). E aha te ha’api’ira’a tā ’oe e ’apo nei i roto i tā rātou mau parau ’e tā rātou mau ’ohipa i roto i teie mau pene ?

’A feruri na i te mamahu o Saula i roto i te 1 Samuela 10, e mea māere ’ia tai’o nō ni’a i tōna « fa’aro’o ’ore » ’e « te mārō » i muri a’e i te rirora’a ’ei ari’i (1 Samuela 15:23). I tō ’oe mana’o, nō te aha te reira i tupu ai ? I roto i te 1 Samuela 13:5–14, e aha te huru ’e te peu tā ’oe e ’ite ra tei arata’i atu i tōna topara’a ?

I roto i te 1 Samuela 15, e tai’o ’oe nō ni’a i te hō’ē fa’auera’a a te Fatu tā Saula i ’ore i ha’apa’o, nō te mea ’ua mana’o ’oia ē, e tumu maita’i tāna nō te ’ore e ha’apa’o. Nō te ’apo i te ha’api’ira’a mai roto mai i te mau mā’itira’a paruparu a Saula, ’a hi’o i te ’īrava 22 ’e ’a mono i te mau parau « tūsia » ’e « te tō’āhua māmoe oni » i te mau mea e hi’ohia nei e mea maita’i, e ’ere rā i te mea faufa’a a’e i te fa’aro’ora’a ’e te ha’apa’ora’a i te parau a te Fatu. E aha te mau ha’amaita’ira’a tā ’oe i fa’ari’i i te tu’ura’a i te hina’aro o te Fatu nā mua roa i roto i tō ’oe orara’a ?

’Ua rave a’enei ānei ’oe i te hō’ē fa’aotira’a nā ni’a i « te huru i rāpae » o te hō’ē mea ’aore rā o te hō’ē ta’ata, ē i te hope’a ’ua ’ite mai ’oe ē ’ua hape roa ? Pēnei a’e ’ua ’amu ’oe i te hō’ē mā’a e ’ere i te mea au mai tā ’oe i hi’o atu. ’Aore rā ’ua hape ’oe i te fa’a’inora’a i te hō’ē ta’ata.

I tō Samuela ’imira’a i te ari’i ’āpī nō ’Īserā’ela, ’ua ha’api’i te Fatu iāna i te hō’ē rāve’a maita’i a’e. ’A tai’o i te reira i roto i te 1 Samuela 16:6–7, ’e e nehenehe e hāmani i te hō’ē tāpura nō te tumu te ta’ata e fa’a’ino ai ia vetahi ’ē nā ni’a i « te huru i rāpae. » E nehenehe e ’ite mai i te tahi mau hi’ora’a i roto i te a’ora’a a Elder Christophe G. Giraud-Carrier « E mau tamari’i tātou nāna » (Liahona, Novema 2023, 114–16). E aha te aura’a o te parau e hi’o « i te ’ā’au », mai tā te Fatu e rave nei ? (1 Samuela 16:7). E nehenehe ato’a ’oe e ’ite mai i te mau hi’ora’a nō te reira i roto i te a’ora’a a Elder Giraud-Carrier. Pēnei a’e e nehenehe ’oe e feruri i te tahi atu taime ’aita te Fa’aora i hi’o i te huru i rāpae o te hō’ē ta’ata. (Hi’o, ’ei hi’ora’a, Mareko 12:41–44 ; Luka 5:1–11 ; 19:1–9 ; Ioane 4:5–30 ; Mose 6:31–36.) E aha te ha’api’ira’a tā ’oe e ’apo nei mai roto mai i teie mau hi’ora’a ?

Nāhea ’oe e pe’e ai i te hi’ora’a o te Fa’aora nō te hi’o ia vetahi ’ē—’e ia ’oe iho ? E aha ra ïa te maita’i o te reira i ni’a i tā ’oe ha’ara’a ’e te ta’ata ? E nehenehe e parau i te ta’ata i te maita’i tā ’oe e ’ite ra i roto i tō rātou ’ā’au.

Hi’o ato’a Ulisses Soares, « E mau taea’e ’e e mau tuahine i roto i te Mesia », Liahona, Novema 2023, 70–73.

• ’A tai’o ai ’oe i te 1 Samuela 8 ’e tā ’oe mau tamari’i, ’a tauturu ia rātou ’ia ’imi mai i te mau tumu i parau ai Samuela i te ’āti ’Īserā’ela ē, e ’ere i te mana’o maita’i ’ia vai te hō’ē ari’i. Nō te aha e mea maita’i ai ’o Iesu Mesia tō tātou ari’i ? Pēnei a’e e nehenehe ’oe e hāmani ’āmui i te hō’ē torōna pāpie ’e e fa’a’ohu nō te tu’u i te reira i ni’a i te upo’o ma te parau i te hō’ē mea tā tātou e nehenehe e rave ’ei fa’a’itera’a ē, ’ua hina’aro tātou ia Iesu ’ei Ari’i nō tātou. (Hi’o ato’a Ieremia 23:5 ; Te Ha’api’ira’a Tumu ’e te mau Fafaura’a 45:59.)

• E nehenehe te mau fa’ati’ara’a nō te mā’itira’a te Atua ia Saula ’e ia Davida ’ei ari’i, e tauturu i tā ’oe mau tamari’i ’ia māramarama e nāhea te ta’ata i te pi’ihia ’ia tāvini i roto i te ’Ēkālesia i teie mahana, nā roto i te heheura’a. Nō te ha’api’i ia rātou i teie nā ’ā’amu, e nehenehe e pāpa’i i te mau ’ohipa i tupu i roto i te mau ’ā’amu i ni’a i te tahi ’api parau, ’e e nehenehe tā ’oe mau tamari’i e ’āpapa tano i te reira ’a tai’o ’āmui ai i te mau ’īrava pāpa’ira’a mo’a (hi’o ato’a « Te taure’are’a Davida » i roto i Te mau ’ā’amu o te Faufa’a Tahito, 110–11). I muri iho e nehenehe e fa’ahiti i te mau taime ’ua ha’amaita’i te Atua ia ’oe i te mana pae vārua nō te rave fa’aoti i te hō’ē fa’auera’a ’ohipa ’aore rā te hō’ē pi’ira’a (hi’o 1 Samuela 10:9–10).

  

  1:16

• E taime maita’i ato’a paha te reira nō te ha’api’i i tā ’oe mau tamari’i i te hīro’a fa’aro’o pae. ’A fa’ati’a ia rātou ’ua nāhea ’oe i te fa’ari’ira’a i tō ’oe pi’ira’a i roto i te ’Ēkālesia. Nāhea ’oe i te ’ite ē, ’ua pi’ihia ’oe e te Atua ?

• E nehenehe te hō’ē ha’api’ira’a tao’a e tauturu i tā ’oe mau tamari’i ’ia māramarama i te parau tumu i roto i te 1 Samuela 16:7. ’Ei hi’ora’a, e nehenehe ’oe e fa’a’ite ia rātou i te tahi mau mā’a, ’aore rā, i te hō’ē buka tei pū’ohuhia i te hō’ē pū’ohu ’aita e tū’ati i te mau mea i roto. E aha tā te 1 Samuela 16:7 ’e tā teie ha’api’ira’a tao’a e parau nei nō ni’a i te huru e hi’o ia tātou iho ’e i te tahi atu mau ta’ata ? E hīmene i te hō’ē hīmene nō ni’a i teie parau tumu, mai te hīmene « ’A here ’outou » (Children’s Songbook, 136).

  Fa’a’ohipa i te mau ha’api’ira’a tao’a. Mai te peu e mea tā tā ’oe mau tamari’i e hi’o ’e e tāpe’a, ’o tē tū’ati i te hō’ē parau tumu nō te ’evanelia, e ha’amana’o maita’i a’e rātou i te reira. ’Ei hi’ora’a, ’a tai’o ai ’outou i te 1 Samuela 16:7, e nehenehe e vaiiho ia rātou ’ia tauturu ia ’oe ’ia ’imi mai i tahi hi’ora’a nō te hōho’a vare ’ei fa’ahōho’ara’a i te parau ē, e mea tano ’ia tāmata i te hi’o atu mai tā te Fatu e hi’o nei—i te hi’ora’a « i te ’ā’au »—’eiaha rā te fa’a’inora’a nā ni’a i « te huru i rāpae. »

• E nehenehe ’oe ’e tā ’oe mau tamari’i e fa’a’ite i te mau taime ’ua ’apo mai ’outou i te tumu e mea tano a’e ’ia hi’o « i te ’ā’au », ’eiaha pa’i te « huru [noa] i rāpae » (īrava 7). E nehenehe ato’a ’outou e fa’a’ohu nō te parau i te tahi ’e te tahi te mau mea maitata’i tā ’outou ’ite ra i roto i tō te tahi ’e tō te tahi ’ā’au.