1 Samuela 17–18 ; 24–26 ; 2 Samuela 5–7

Te ’ā’amu nō Davida ’e ’o Golia ’o te hō’ē ïa o te mau ’ā’amu mātau-roa-hia i roto i te mau pāpa’ira’a mo’a. ’Oia mau, ’ua mātau tātou i te rōtahi i ni’a ia Davida. I teie rā taime, ’ia ’imi ’oe i te 1 Samuela 17, ’a feruri ato’a na i te mau parau a te tahi atu mau ta’ata i roto i teie pene (hi’o i te tāpura i raro nei). E aha tā ’oe e ’apo nei nō ni’a ia rātou ’e tō rātou mana’o pūai ? E aha tā ’oe e ’apo nei nō ni’a ia Davida ? E aha te mea ta’a ’ē iāna ?

• Golia : mau ’īrava 8–10, 43–44

• Eliaba : ’īrava 28

• Saula : ’īrava 33

• Davida : mau ’īrava 26, 32, 34–37, 39, 45–47

Pāpū roa ē tō ’oe ’ā’amu, noa atu e ’ere i te mea tu’iro’o mai tō Davida, e mau fifi ato’a ïa mai ia Golia e tano ’ia upo’oti’a ’e e mau rāve’a nō te fa’a’ohipa i te fa’aro’o i te Fatu. E aha tā te hi’ora’a o Davida e ha’api’i nei ia ’oe nō ni’a i te fa’arurura’a i te ’ati i roto i tō ’oe ’ā’amu ? E nehenehe ato’a ’oe e tai’o i te a’ora’a a te peresideni Camille N. Johnson « ’A ani i te Mesia ’ia riro ’ei Tumu nō tō ’oe ’ā’amu » (Liahona, Novema 2021, 80–82) ma te tahi fifi nō ’oe i te ferurira’a. ’A ’imi i te pāhonora’a i te mau uira’a mai teie : Nāhea te Fatu i te hina’aro iā’u ’ia hi’o i tō’u mau fifi ? ’Ua nāhea ’oia i te tauturura’a iā’u nā mua a’e ? Nāhea vau e fa’a’ite ai ē, tē ti’aturi nei au iāna nō te pāpa’i i tō’u ’ā’amu ?

’Ua ’ite a’ena paha ’oe ē, e mau pene ’oto rahi i muri mai i roto i te ’ā’amu o Davida (hi’o, ’ei hi’ora’a, 2 Samuela 11). ’Āhiri i fāna’o ’oe i te hōro’ara’a ia Davida i te tahi parau a’o i muri a’e i tōna ’arora’a ia Golia, e aha ïa tā ’oe e parau atu ? Nāhea teie parau a’o e tano ai i tō ’oe orara’a ?

Hi’o ato’a « The Lord Will Deliver Me » (video), Gospel Library.

3:24

Ta’a ’ē noa atu tō tātou iho mau fifi, tē fa’aruru nei tātou i te mau fifi rarahi ’e te ’ātitirau e ha’amāuiui nei i te ao tā’āto’a nei. ’Ia « ope [te mau pūai o te ’ino i te] mau pupu i te tama’i » i mua i te mau pūai o te maita’i (1 Samuela 17:1), e uiui paha tō tātou mana’o ē, nāhea pa’i tā tātou tauto’ora’a ta’ata hō’ē e fa’atupu ai i te tahi vāhi ta’a ’ē. E aha tā ’oe e ’ite ra i roto i te ’ā’amu o Davida ’o tē fa’atupu i tō ’oe tīa’i ?

Hi’o ato’a « Ara mai tātou », Te mau hīmene, N°148.

’A tai’o ai ’oe i te 1 Samuela 18, e nehenehe e hi’o ta’a ’ē ia Saula ’e tāna tamaiti Ionatana (’e ’āhani ’aita ’o Davida, ’o ’oia paha te ari’i i muri iho). ’Ua nāhea ’o Saula ’e ’o Ionatana i te hi’ora’a i te manuiara’a o Davida ? E aha te ha’api’ira’a tā ’oe e nehenehe e ’apo mai i roto i teie ’ohipa ?

E aha tā ’oe e ’ite ra i roto i te huru ’e te ’ohipa a Ionatana ’o tē fa’aha’amana’o ia ’oe ia Iesu Mesia ?

I roto i te 1 Samuela 24–26, ’a ’imi i te mau ha’api’ira’a nō ni’a i te te’ote’o, te fa’a’orera’a hara ’e te ha’avīra’a iāna iho. E nehenehe ato’a e tai’o i te a’ora’a a Elder Mark A. Bragg « Te fāino mai tō te Mesia » i roto i tā ’oe tai’ora’a (Liahona, Mē 2023, 60–63). ’Ua nāhea Davida, Abigila ’e te tahi atu mau ta’ata, i te fa’a’itera’a—’aore rā i te ’orera’a i fa’a’ite—i te fāinora’a mai tō te Mesia i roto i teie mau pene ? E aha te mau rāve’a nō ’oe nō te fa’a’ite i te fāino mai tō te Mesia ?

E nehenehe te a’ora’a a te tuahine Kristen Yee « Te ’una’una o te mau rehu auahi : Te ’ē’a fa’aora o te fa’a’orera’a hara » (Liahona, Novema 2022, 36–39) e tauturu ia ’oe ’ia tai’o māite i te 1 Samuela 25. E aha te tū’atira’a i roto ia Abigila ’e ’o Iesu Mesia ?

Noa atu ’ua upo’oti’a Davida i ni’a ia Golia, ’aita tōna mau fifi ’e te philiseti i oti. ’A tai’o ai ’oe i te 2 Samuela 5:17–25, ’a feruri nāhea te hi’ora’a o Davida e tauturu ai ia ’oe i roto i te mau fifi tā ’oe e fa’aruru nei (hi’o ato’a 1 Samuela 23:2, 10–11 ; 30:8 ; 2 Samuela 2:1). E aha te mau ha’amaita’ira’a nā ’oe maoti tō ’oe ha’ara’a i ni’a i te heheura’a tā ’oe e fa’ari’i ?

I te pūpūra’a Davida e patu i te hō’ē fare nō te Fatu, ’oia ho’i te hō’ē hiero, (hi’o 2 Samuela 7:1–3), ’ua pāhono mai te Fatu ē, nā te tamaiti a Davida e patu i te reira (hi’o mau ’īrava 12–15 ; hi’o ato’a 1 Paraleipomeno 17:1–15). ’Ua parau ato’a te Fatu ē, e patu ’oia i te hō’ē « fare », ’oia ho’i te hō’ē hua’ai, ’e e vai tōna terōno ē a muri noa atu (hi’o 2 Samuela 7:11, 16, 25–29 ; Salamo 89:3–4, 35–37). ’Ua tupu te reira nā roto ia Iesu Mesia, tō tātou Ari’i mure ’ore, e hua’ai ho’i nā Davida (hi’o Mataio 1:1 ; Luka 1:32–33 ; Ioane 18:33–37).

• E hina’aro paha ’oe e fa’a’ohipa i te « Davida ’e ’o Golia » i roto i Te mau ’ā’amu o te Faufa’a Tahito, 112–16, nō te tauturu i tā ’oe mau tamari’i ’ia mātau i te mea i tupu i roto i te 1 Samuela 17:20–54. I muri iho e nehenehe e vaiiho ia rātou ’ia fa’ati’a fa’ahou mai i te ’ā’amu ma te fa’a’ohipa i te mau hōho’a ’aore rā te mau rēni fa’ahōho’a i roto i teie arata’i ha’api’ira’a. E ani ia rātou i tō rātou mana’o e aha tā te Fatu e hina’aro ia rātou ’ia ’apo mai i roto i teie ’ā’amu.

  

  2:36

• E nehenehe ato’a ’oe ’e tā ’oe mau tamari’i e hāmani i te hō’ē tāpura nō te tahi mau fifi rahi e riro rātou i te fa’aruru i roto i tō rātou orara’a. I muri iho, e tauturu ia rātou ’ia ’imi i te mau mea tā Davida i parau ’o tē nehenehe e tauturu i roto i teie mau fifi (hi’o 1 Samuela 17:26, 32, 34–37, 45–47). ’A parau ’ua nāhea Iesu Mesia i te tauturura’a ia ’oe i roto i te mau fifi.

• E nehenehe tā ’oe mau tamari’i e hāhaere mai te huru ’o Davida rātou tē haere ra e ’aro ia Golia, ’a hīmene noa ai i te hō’ē hīmene nō ni’a i te itoito, mai te hīmene « E tāvini itoito vau » (Children’s Songbook, 162).

• Nāhea ’oe e tauturu ai i tā ’oe mau tamari’i ’ia ha’api’i i te parau nō te hoara’a o Ionatana ’e Davida ? Hō’ē rāve’a ’o te hōro’ara’a ïa i te tamari’i tāta’itahi e piti māfatu pāpie, hō’ē nō te fa’ahōho’a ia Davida ’e te tahi nō te fa’ahōho’a ia Ionatana. I muri iho, ’a tai’o i te mau tamari’i i te tahi mau pereota i roto i te 1 Samuela 18:1–4 ’o tē tūra’i i te parau nō te here o teie nā hoa nō te tahi ’e te tahi. I muri iho e nehenehe tā ’oe mau tamari’i e pāpa’i i te parau ’aore rā te hōho’a, i ni’a i tā rātou māfatu pāpie e nāhea rātou e fa’a’ite ai i te here i te hō’ē hoa.

• I roto i teie mau pene, ’ua riro mai Davida ’ei ari’i nō ’Īserā’ela. E ’ohipa ’ārearea paha nō tā ’oe mau tamari’i ’ia fa’ariro ia rātou ’ei ari’i ’aore rā ’ei ari’i vahine. E aha te mau ture tā rātou e tu’u ? I hea rātou e haere ai nō te tauturu ? E tauturu i tā ’oe mau tamari’i ’ia ’ite ē i te hina’arora’a Davida i te tauturu, ’ua « ui » ’oia, ’oia ho’i ’ua pure nō te pāhonora’a. ’Ei hi’ora’a, ’ia tai’o ’outou i te 2 Samuela 5:19, 23, ’a ani i te mau tamari’i ’ia fa’aro’o i te ta’o ra « ui » ’e ’ia tūfetu i tō rātou rima ’ia fa’aro’o ana’e rātou i te reira. Nō te aha Davida i hina’aro ai i te tauturu a te Fatu i roto i tōna ti’ara’a ’āpī ?

• ’A parau i te tahi ’e te tahi nō ni’a i te hō’ē taime ’ua pure ’outou i te Metua i te ao ra nō te tauturu. E aha te ta’a-’ē-ra’a i ’itehia nō te tauturura’a ’oia ’ia ’outou ?

• Te mau ari’i tā tātou e tai’o nei i roto i te Faufa’a Tahito, e mau hapehape ana’e tō rātou, ’e ’ua hope ana’e tō rātou mau bāsileia. ’O Iesu Mesia rā, e ari’i maita’i roa ïa ’e e fa’atere ari’i ’ioa ē a muri noa atu. E nehenehe ’oe e tauturu i tā ’oe mau tamari’i ’ia ’ite i te reira nā roto i te tai’ora’a ’āmui i te mea tā te peropheta Natana i parau i te ari’i Davida i roto i te 2 Samuela 7:16–17. Nāhea te bāsileia ’o Davida e nehenehe ai e ’aita e hope’ara’a ? ’A tauturu i tā ’oe mau tamari’i ’ia ’imi ’e ’ia tai’o i te mau ’īrava ’o tē ha’api’i nei ’o Iesu Mesia, te huā’ai o Davida, tō tātou Ari’i, mai te Luka 1:32–33 ; te Ioane 18:33–37 ; ’e te Apokalupo 19:16. E aha te ta’a-’ē-ra’a i roto ia Iesu ’e te mau ari’i i te tāhuti nei ? Nāhea tātou i te fa’atura ia Iesu Mesia ’ei ari’i mure ’ore nō tātou ?