2 Samuel 11–12; 1 Kiin̄ Ro 3; 6–9; 11

Jet iien jej kalimjōk armej ro me āinwōt n̄e rekajoor ilo tōmake eo aer, im jej kōtmāne ke rejjab iioon mennin kapo. Kāālet ko an Devid rekabūrom̧ōjm̧ōj kōmeļeļeik ilo 2 Samuel 11 ej kwaļo̧k ke ejjab jekjek eo in. Ļōmņak ta katak ko remaron̄ ekkatak jān en̄jake eo an. Kajjitōk rōt kein emaron̄ jipan̄ eok ekkatak 2 Samuel 11–12:

• Ta jokālet ko Devid ekar kōm̧m̧ani me ekar tōl e laļļo̧k n̄an juon iaļ eobrak kōn jerawiwi? Ta jokālet ko rejim̧we komaron̄ kar kōm̧m̧ane ijjeļo̧kin? (Bar lale pija eo “To Look Upon,” Gospel Library.)

  

  4:15

  Kōjerbal pijaan alooj ko. Pijaan alooj ko remaron̄ jipan̄ kalikkar bwebwenato ko jān jeje ko rekwojarjar im ļōmņak ewi wāween aer jerbal n̄an eok. Ļōmņake ewi wāween am̧ maron̄ kōjerbali n̄an kōkm̧anm̧anļo̧k katakin im ekkata. N̄an waanjon̄ak, ilo ami alooje “To Look Upon” (Gospel Library), ļōmņak in kōbōjrak pija eo n̄an lin̄uri ak kōnono kōn jet iaan kajjitōk ko litok ilo m̧akūtkūt in.

• Elmen an rikōjdat eo kajjieon̄ tōl eok n̄an iaļan jerawiwi ko? Ta kāālet ko kwoj kōm̧m̧ani kiiō n̄an dāpdep wōt ilo kōjpārok ilo jetōb?

• Lale m̧wilin Devid n̄an bwebwenato eo an Nathan ilo 2 Samuel 12:1–6. Ta eo m̧wilin ej kwaļo̧k kōn ekōjkan an Devid kalimjōke make. Ta eo Irooj ear kōm̧m̧an n̄an eok n̄an jipan̄ eok jim̧weļo̧k am̧ kalimjōk eok make.

• Elmen am̧ naaj kar kōm̧eļeļe ilo tukade men ko raar waļo̧k ilo 2 Samuel 11–12 ilo juon jantōj in kakōlkōl?

Riit kōn kāālet ko renana an Devid emaron̄ tōl eok n̄an ekkatak kōn kauwōtata ko an pija ko rettoon im jerawiwi in ļōn̄. Juon kein jipan̄ em̧m̧an n̄an menin ej N̄an Kōkajoorļo̧k Jodikdik Ro: Juon Tōl n̄an Kōm̧m̧ani Kālet Ko, eļaptata jekjōn eo me kar taitōl e“What to do in the moment” im “Ānbwinūm̧ ekwojarjar” (peij 21–28). Bōlen kwomaron̄ kappok kabilōk ilo kein jipan̄ eo me emaron̄ kar jipan̄ Devid kōm̧m̧ani kāālet ko rem̧m̧anļo̧k. Ak kwomaron̄ riiti “Jisōs Kraist enaaj jipan̄ kwe” (peij 6–9), kappukot juon men me emaron̄ kar jipan̄ Devid jepļaak n̄an Irooj.

Ļōmņak in al juon al āinwōt “Ij Aikuij Yuj Aolep Awa” (Al Ko Al In Ajri, no. 8) im ļōmņak ekōjkan an kar Rilo̧mo̧o̧r kōkajoor eok ke kwaar jelm̧ae mennin kapo.

Bar lale 2 Nipai 28:20–24; Ulisses Soares, “Pukōt Kraist ilo Men Otemjeļo̧k,” Liaona, Nob. 2020, 82–85; “Taking Charge of Technology,” Gospel Library; “Watch Your Step” (pija in alooj), Gospel Library.

2:36

Eļan̄n̄e Irooj ekar ba n̄an eok, “Kwōn kajjitōk ta Inaaj lewōj” (1 Kiin̄ Ro 3:5), Ta eo kwon kajjitōk kake? Ta eo ej im̧we eok kōn kajjitōk eo an Solomon? Kejōkļo̧kjeņ etke “bōro e jeļāļo̧kjeņ” n̄an “kile em̧m̧an im nana” (eoon 9) ej juon menin letok eaorōk. Ta eo komaron̄ kōm̧m̧ane n̄an kappukot menin letok in?

Bar lale Moronai 7:12–19.

Ilo 1 Kiin̄ Ro 6–7 kwonaaj loe juon kōmeļele kōn m̧weeo ekwojarjar Solomon eaar kalōk e n̄an Irooj. Kōmeļeļe ko remaron̄ jab aorōk n̄an kwe āinwōt aer kar aorōk n̄an ri Israel ro etto. Ak riiti jebta kein emaron̄ lewaj n̄an kwe juon en̄jake kōn jon̄an aorōkier n̄an er bwe en wōr ippāer juon m̧ōn Irooj. Etke eaorōk menin n̄an eok?

Kwomaron̄ ļōmņak ta m̧ōttan ko reoktak ilo tampeļ eo an Solomon me ewōr kakōļļeier. N̄an waanjon̄ak, ļōmņake ta ko cherubim eo, wōjke ko, im wūt ko ilo 1 Kings 6:35 rej pinej jenkwaer? (Bar lale Jenesis 3:24.)

Jebta 8 ej ļooke jar eo an Solomon ālkin an dedeļo̧k tampeļ eo (lale eoon 22–61). Ļōmņak in kōm̧m̧ane juon laajrak in kōjeraam̧m̧an ko Solomon ear kajjitōk kaki. Ta eo ej im̧we eok kōn kōjeraam̧m̧an kein? (Bar lale kallim̧ur ko an Irooj ilo 2 Kiin̄ Ro 6:11–13; 9:1–9.) N̄e em̧ōj am̧ pād ilo m̧weeo im̧ōn Anij, ļōmņake en̄jake ko am̧ ilo am̧ kabun̄jar ijo. Ilo wāween rōt kōjparok bujen tampeļ ko ej jipan̄ eok tōpar kōjeraam̧m̧an ko an Irooj?

Bar lale Katak im Bujen Ko 109; Henry B. Eyring, “Ij Mōņōņō in Lo Tampeļ eo,” Liaona, Māe 2021, 28–31.

Ta meļeļein n̄an “būruōmi ren … weeppān ippān Jeova”? (1 Kiin̄ Ro 8:61). Ej ke oktak jān m̧akūtkūt ko ad rōweppān? Ewi wāween? Riiti 1 Kiin̄ Ro 11:1–11, im lale ta eo Irooj ear ba kōn būruōn Solomon. Kwomaron̄ ļōmņak etke ewōr im̧we ko ilo mour eo am̧ me emaron̄ ukōtļo̧k būruōm̧ jān Irooj im m̧aanļo̧k n̄an “anij ko jet.”

• “Kiin̄ Devid” ilo Bwebwenato ko jān Kallim̧ur M̧okta, 117–20, emaron̄ jipan̄ eok jiron̄ ajri ro nejum̧ kōn bwebwenato eo ilo 2 Samuel 11. Kwomaron̄ kajjitōk ippān ajri ro nejum̧ bwe ren kwaļo̧k kāālet ko rebōd Devid eaar kōm̧m̧ani im leļo̧k kāālet ko rem̧m̧an emaron̄ kar kōm̧m̧ani. Ta men ko jemaron̄ kōm̧m̧ani me remaron̄ jipan̄ kōj kōm̧m̧ani kāālet ko rejim̧we n̄e ewōr mennin kapo?

  

  2:11

• Riit kōn jerawiwi eo ekabūrom̧ōjm̧ōj an Devid emaron̄ juon men em̧m̧an n̄an kōnono kōn kauwōtata ko an pija ko rettoon. Pijaan alooj eo “What Should I Do When I See Pornography?” (Gospel Library) ewōr ie tōl ko rejipan̄. Jipan̄ ajri ro kōm̧m̧ane juon karōk kōn ta eo renaaj kōm̧m̧ane n̄e rej iioon pija ko rettoon.

  

  5:46

• Ilo am̧ im ajri ro nejum̧ ekkatak kōn aje eo an tampeļ ilo 1 Kiin̄ Ro 8, kwomaron̄ lale juon pija in tampeļ ilo unin tōl eo an wiik in. Kōtļo̧k bwe ajri ro nejum̧ ren kōnono kōn meļeļe ko rej loi ilo pija ko. Kwomaron̄ kalikkarļo̧k eoon 57–58. Ta meļeļein n̄an “etetal ilo aolep iaļ ko an Irooj”? (1 Kiin̄ Ro 8:58). Bōlen ajri ro nejum̧ remaron̄ bōk juon ne n̄an kajjojo uwaak ko rej lewaj.

• Jiron̄ ajri ro nejum̧ elmen an kōjparok bujen ko kwar kōm̧m̧ane ilo tampeļ jipan̄ eok etetal ilo iaļ ko an Irooj. Kwomaron̄ bar kwaļo̧k bujen kein n̄an er (lale Bok in Bōk Meļeļe Eļap, 27.2, Gospel Library). Al ippān doon juon al āinwōt “I Love to See the Temple” (Children’s Songbook, 95).

• Riiti kōn im̧we ko an kōrā ro pāleen Solomon emaron̄ tōl n̄an juon ekkōnono kōn waanjon̄ak in “anij ko jet”—ak men ko me armej rej kabun̄ jar kaki im iakwi ijelo̧kin Irooj. Ekōjkan ad kwaļo̧k ad iakwe E eļap jān aolep men ilo mour eo ad?