Rut; 1 Samuel 1–7

Mour eaar pen n̄an kōrā ro emej pāleer ilo jabdewōt epepen. Ak ke eaar mej ļeo ippān Rut, jekjek eo an eaar pen. Ilo m̧anit eo an riIsrael ilo iien ko, juon kōrā ejjeļo̧k pāleen ak nejin em̧m̧aan ejjeļo̧k an jim̧we n̄an bwidej im jejjo̧ wōt wāween aer kōm̧m̧an jāān. Ilo am̧ riiti bwebwenato eo an Rut, kile wāween an Irooj ukōt men ko renana n̄an kōjeraam̧m̧an ko reļļap Ta eo kwoj lo kōn Rut me emaron̄ kar m̧ōj an kar jipan̄ e? Elmen an kar Boaz lo̧mo̧o̧ren Rut jān jekjek in aikuj eo an? (lale Rut 4:4–10). Ekōjkan an kar Rut im Boaz āinwōt Jisōs Kraist?

Bar lale “Be Still, My Soul,” Hymns, no. 124.

Bōlen kwar en̄jake kōn juon jerata eļap, āinwōt kar Ruth im Naomi (lale Ruth 1:1–5). Ak bōlen, āinwōt Hanna, eto am̧ kōttar kōjeraam̧m̧an ko me kwojjan̄in kar bōki (lale 1 Samuel 1:1–10). Elmen an kar kōrā rein kwaļo̧k aer tōmak ilo Anij? Ta eo kwoj ekkatak jān waanjon̄ak ko aer?

Em̧ool, ejjab aolep ro rej jar kōn nejier bwe en wōr nejier, im ejjab aolep ripālele eo emej pāleen enaaj bar m̧are. Ak aolep ro rej oktakļo̧k n̄an Rilo̧mo̧o̧r rej bōk jipan̄ im tōl eo An. Ļōmņak ewi wāween am̧ “itok im lōke” Irooj (Rut 2:12) ilo iien ko reppen n̄an kwe.

Bar lale Amy A. Wright, “Mour ilo Raan eo ilo Kraist,” Liaona, Nob. 2023, 9–11.

Ke rikōjdat ro aer raar kakure, riIsrael ro raar ļōmņak ke ark in bujen eo enaaj kōjpārok er n̄e epād ippaer. Ilo am̧ riiti 1 Samuel 4–6, ļōmņak kōn etke menin ear jab jerbal. (Bar kile m̧akūtkūt ko rejjab jim̧we an ļōmaro nejin Eli, eo ear pris ilo m̧ōn kōppād eo, ilo 1 Samuel 2:12–25.) Ta eo kwoj ļōmņak Irooj ear kajjieon̄ katakin armej ro An? Ta eo kwoj ekkatak jān ta eo ekar waļo̧k n̄an Philistine ālkin kar koote tōptōp eo (lale jebta 5–6) Ta eo kwoj ekkatak jān kijejeto eo an ri Israel ro bar bōk kōjpārok eo an Irooj ilo 1 Samuel 7?

Kwomaron̄ bar bōk im̧we n̄an riiti eoon in nebar eo an Hanna ilo 1 Samuel 2:1–10. Ta eo kwoj lo ilo naan ko an me emaron̄ kar jipan̄ ļōm̧aro nejin Eli im riIsrael ro?

Jet iien, kwomaron̄ en̄jake āinwōt Samuel, eo eaar ron̄ ainikien Irooj bōtaab eaar jab kile. Āinwōt kōj aolep, Samuel eaar aikuj ekkatak kile ainikien Irooj. Ilo am̧ ekkatak 1 Samuel 3, ta eo kwoj ekkatak jān ļaddik jidikdik in kōn ron̄jake im pokake ainikien Irooj? Kwomaron̄ bar etale eoon in kakkobaba kein im kōm̧m̧ane juon laajrak in unin tōl ko remaron̄ jipan̄ juon armej kile ainikien Irooj: 1 Kiin̄ 19:11–12; Luk 24:15–32; 3 Nipai 11:3–7; Katak im Bujen Ko 6:22–23; 8:2–3; 9:7–9.

IIen ko jet, kwomaron̄ en̄jake ke lan̄ ekilōk im Anij ejjab kōņaan kōnono ippam̧. Būreejtōn Russell M. Nelson eaar ba, “Anij ej ke kōņaan kōnono n̄an eok? Aaet!” (“Revelesōn n̄an Kabun̄ in, Revelesōn n̄an Mour ko ad,” Liaona, Māe 2018, 93– 96). Ilo am̧ ekkatak enaan eo an Būreejtōn Nelson, ta eo kwoj lo me ej im̧we eok n̄an ron̄jake im pokake ainikien Irooj? Ta eo Būreejtōn Nelson ej karuwanene eok n̄an kōm̧m̧ane, im ta kōjeraam̧m̧an ko ej kallim̧ur kaki? Komaron̄ bar lo karuwanene im kōjeraam̧m̧an ko kōn revelesōn ilo “Etetal ilo Meram an Anij” (N̄an Kōkajoorļo̧k Jodikdik Ro: Juon Tōl n̄an Kōm̧m̧ani Kālet Ko, 16–20). Ļōmņak in kāālet juon men kwomron̄ kōm̧m̧ane n̄an “kōļapļo̧k maron̄ in jetōb eo ami n̄an bōk revelesōn.”

• Ilo am̧ kwaļo̧k bwebwenato in Rut n̄an ajri ro nejum̧ (kwomaron̄ kōjerbal “Rut im Naomi” in Bwebwenato ko jān Kallim̧ur M̧okta, 100–103), karuwanene er n̄an kotak peier aolep iien n̄e rej ron̄ kōn juon jerbal in jouj ilo bwebwenato eo. Remaron̄ bar kwaļo̧k aer en̄jake n̄e ro jet rej jouj n̄an er, ak n̄e er rej jouj n̄an ro jet. Ewi wāween an Rilo̧mo̧o̧r jouj n̄an kōj? Elmen ad ļoor waanjon̄ak eo An? (lale “Kindness Begins with Me,” Children’s Songbook, 145).

  

  2:0

• Bwebwenato in Rut im Hanna remaron̄ un̄ūr ajri ro nejum̧ n̄an tiljek wōt ilo iien ko reppen. Ļōmņak in jipan̄ er ejaake juon jaat epidodo kōn taitōļ ko Mālejjon̄, M̧akūtkūt, Kōjeraam̧m̧an. Innem kom̧ maron̄ riit ippān doon Rut 1:3–5, 8, 16; 2:1–3, 8–12; 4:13–17; 1 Samuel 1:1–18 im je iumin taitōļ ko ta ko rej loi ilo eoon ko. Ewi wāween an Rut im Hanna kwaļo̧k aer tōmak ilo Irooj? Innem kwe im ajri ro nejum̧ maron̄ kwaļo̧k waanjon̄ak in ekōjkan an Irooj kar kōjeraam̧m̧an kom̧ lo iien ko reppen.

• N̄an ekkatak kōn Hanna, ajri ro remaron̄ riit 1 Samuel 1:1–18 ak “Hannah” ilo Bwebwenato ko jān Kallim̧ur M̧okta (104–5) ak alooje “Hannah’s Faith” (video, Gospel Library). Emaron̄ limo n̄an joļo̧k juon ball n̄an juon ajri im karuwanene er n̄an bwebwenato kōn jidik in bwebwenato eo m̧okta jān aer joļo̧k ball eo n̄an bar juon. Ta eo jej ekkatak kōn jar jān waanjon̄ak eo an Hanna?

  

  1:15

  

  3:9

• Bōlen juon tieta epidodo emaron̄ jipan̄ ajri ro nejum̧ ekkatak jān en̄jake eo an Samuel kōn revelesōn. Juon ajri emaron̄ arin Samuel, im juon emaron̄ arin Eli ilo ami riiti 1 Samuel 3:1–10 (bar lale “Rikanaan Samuel” ilo Bwebwenato ko jān Kallim̧ur M̧okta, 106–9, ak pija in alooj eo “Samuel and Eli,” Gospel Library). Ta eo jej ekkatak jān Samuel kōn wāween ron̄jake ainikien Irooj? Elmen ad kwaļo̧k bwe jej kōņaan ron̄ n̄e Irooj ej kōnono n̄an kōj?

  

  2:10

  

  1:58

• Kajjitōk ippān ajri ro elmen aer naaj kōmeļeļe n̄an juon armej wāween an Irooj kōnono ippaer. Komaron̄ jipan̄ er kappukot uwaak ko ilo Katak im Bujen Ko 6:22–23; 8:2–3; 9:7–9.