1 Samuel 8–10; 13; 15–16

1 Samuel 8 ej bwebwenato kōn juon iien me enaaj ukōt jibadbad eo an riIsrael ro n̄an indeeo. N̄an kōjparok er ņae rikōjdāt ro, riIsrael ro raar kōņaan men eo ewōr ippād ro rituruier—juon kiin̄ n̄an kakien er. Ilo am̧ riit kōn kajjitōk eo aer im uwaak eo an Irooj, ļōmņak kōn wōn ro kwoj reilo̧k n̄an er n̄an kōjpārok im tōl. Ļōmņak ta meļeļein n̄an kōtļo̧k we Irooj en “kiin̄ [ioem̧]” (1 Samuel 8:7).

Iumin wiik ko rej peddo tok, komaron̄ riit kōn jete kiin̄ kar kūr er n̄an tōl ri Israel ro. Ilo am̧ ekkatak kake er, ļōmņake kajjitōk kein laajraki:

• Ewi wāween an kar kakkōļ ko an Irooj kūrm̧ool ilo 1 Samuel 8:10–18?

• Ekōjkan an kāālet eo an ro nejin Israel n̄an bōk juon aer kiin̄ jelet er?

• Elmen an Jisōs Kraist oktak jān kiin̄ ro ilo laļin? Ļōmņak kōn ta im̧we eo an laļin kwomaron̄ aikuji jan jolok jān mour eo am̧ n̄an kōtļo̧k bwe Kraist en am̧ Kiin̄.

Bar lale “Rejoice, the Lord Is King!,” Hymns, no. 66.

Riit kōn wāween an kar Anij kāālet kiin̄ in Israel ilo 1 Samuel 9–10 im 16 (lale eļaptata 9:15–17; 10:1–12; 16:1–13). Kappukot naan ko remaron̄ jipan̄ eok meļeļe ta meļeļein “kūr jān Anij, jān kanaan” ilo Kabun̄ eo an Irooj rainin (Laajrak in Tōmak ko 1:5). Kwomaron̄ ļōmņak in likut eok make ilo jekjek eo an ritōl eo ej lewaj kūr eo (Samuel), armej eo kūri (Saul im Devid), im armej ro kar kūr er n̄an jerbal (ri Israel ro). Ta eo kwoj ekkatak jān naan im m̧akutkut ko ilo jepta kein?

Ļōmņak jon̄an an Saul kar mijak ilo 1 Samuel 10, ekailibōkbōk n̄an riit kōn an kar “kapata” im “bōt” ālkin an kar erom kiin̄ (1 Samuel 15:23). Etke kwoj ļōmņak menin ear waļo̧k? Ilo 1 Samuel 13:5–14, ta m̧wil im m̧akutkut ko kwoj lo ke rekar tōl n̄an wōtlo̧k eo an?

Ilo 1 Samuel 15, konaaj riit kōn juon kien jān Irooj me Saul eaar jab pokake kōnke ear ļōmņak ewōr an kar un em̧m̧an. N̄an ekkatak kōn kāālet eo enana an Saul, lale eoon 22 im pinej jenkwan naan ko “katok” im “grease an sip kom̧aan” ippān men ko me rem̧m̧an ak ejjab aorōkin wōt ron̄jake im pokake Irooj. Ilo wāween rōt kwoj jeraam̧m̧an ilo am̧ likūt ankilaan Irooj m̧oktata ilo mour eo am̧?

Em̧ōj ke am̧ kōm̧m̧ane juon kāālet eo ej pedped ioon “ālikin” juon men ak juon armej, im lo bwe kwaar bōd? Bōlen em̧ōj am̧ m̧ōn̄ā juon men me ejjab enno ak em̧m̧an kalimjōke. Ak bōlen kwar ekajet juon armej ilo bōd.

Ke Samuel ear kappukot juon kiin̄ kāāl an Israel, Irooj ear katakini juon wāween em̧m̧anļo̧k. Riit kake ilo 1 Samuel 16:6–7, im ļōmņak in kōm̧m̧ane juon laajrak in wāween ko armej rej ekajet e ro jet “pedped itulik.” Kwomaron̄ lo jet waanjon̄ak ilo enaan eo an Elder Christophe G. Giraud-Carrier “Jej Ajri ro Nejin” (Liaona, Nob. 2023, 114–16). Ta meļeļein n̄an “lale būruon,” āinwōt an Irooj kōm̧m̧ane? (1 Samuel 16:7). Kwomaron̄ lo waanjon̄ak ko an menin ilo bar enaan eo an Elder Giraud-Carrier. Bōlen kwomaron̄ ļōmņak kōn bar jet iien me Rilo̧mo̧o̧r ear jab kalimjōk wōt itulikin juon armej. (N̄an waanjon̄ak, lale , Mark 12:41–44; Luk 5:1–11; 19:1–9; Jon 4:5–30; Moses 6:31–36.) Ta eo kwoj ekkatak jān waanjon̄ak kein?

Ekōjkan am̧ ļoor waanjon̄ak eo an Rilo̧mo̧o̧r ilo wāween am̧ kalimjōk ro jet—im kwe make? Ekōjkan an kōm̧m̧ane menin jelet am̧ iiaio ippān ro jet? Ļōmņak in jiron̄ juon armej kōn em̧m̧an eo kwoj lo ilo būruer.

Bar lale Ulisses Soares, “Ro Jeiū im Jatū ilo Kraist,” Liaona, Nob. 2023, 70–73.

• Ilo am̧ riiti 1 Samuel 8 ippān ajri ro nejum̧, jipan̄ er kappukot un ko Samuel ear jiron̄ ri Israel ro ke ļōmņak eo bwe en wōr juon kiin̄ enana. Etke em̧m̧anļo̧k n̄e Jisōs Kraist en ad kiin̄? Bōlen komaron̄ kōm̧m̧ane juon kraun jān pepa im kajjojo kōņake im kwaļo̧k juon men me jemaron̄ kwaļo̧k ke jekōņaan bwe Jisōs en ad Kiin̄. (Bar lale Jeremaia 23:5; Katak im Bujen Ko 45:59.)

• Bwebwenato in an Anij kāālet Saul im Devid n̄an kiin̄ emaron̄ jipan̄ ajri ro meļeļe wāween an armej ro rej jerbal ilo Kabun̄ in kūr jān revelesōn. N̄an katakin er bwebwenato kein, kwomaron̄ je iien ko jān bwebwenato ko ilo peba jiddik, im ajri ro nejum remaron̄ karōk peba kein ilo jim̧we ilo am̧ riit eoon ko jān jeje ko rekwojarjar ippān doon (bar lale “Devid eo Edik” ilo Bwebwenato ko jān Kallim̧ur M̧okta, 110–11). Innām kwomaron̄ kōnono kōn iien ko me Anij eaar kōjeraam̧m̧an eok kōn kajoor in jetōb n̄an kakūrm̧ool eddo ak kūr eo am̧ (lale 1 Samuel 10:9–10)

  

  1:16

• Menin emaron̄ juon iien em̧m̧an n̄an katakin ajri ro nejum laajrak in tōmak kein kōļalem. Jiron̄ er elmen am̧ kar bōk kūr eo am̧ ilo Kabun̄ in. Elmen an jeļā bwe kwaar kūr jān Anij?

• Juon mennin katak emaron̄ jipan̄ ajri ro nejum̧ meļeļe pedped in ilo 1 Samuel 16:7. N̄an waanjon̄ak, kwomaron̄ kwaļo̧k n̄an er jet m̧ōn̄ā ak juon bok me em̧ōj kabare me eban jejjet kobban. Ta eo 1 Samuel 16:7 im kein katakin ej kwaļo̧k kōn wāween ad maron̄ lo kōjmake im ro jet? Al juon al n̄an kalikkar pedped in, āinwōt “Love One Another” (Children’s Songbook, 136).

  Kōjerbal kein katakin ko. N̄e elōn̄ men ajri ro nejum̧ rōkōņaan lale ak jibwe me ej pedped ilo juon pedped in gospel, renaaj em̧m̧anļo̧k aer keememeje. N̄an waanjon̄ak, ilo am riit 1 Samuel 16:7 ippāer, kwomaron̄ kōtļo̧k bwe ren jipan̄ eok kappukot waanjon̄ak in pija ko rej kapok mejād n̄an jitōn̄ļo̧k kōn n̄an men eo jej lale āinwōt an Irooj lale—ilo lale “būruon”—ijelo̧kin ad ekajet pedped ioon “tulikin armej.”

• Kwe im ajri ro nejum̧ maron̄ kwaļo̧k en̄jake ko me kom̧ kar ekkatak etke kom̧wij aikuj “lale būruon,” ejjab “tulik” wōt (eoon 7). Kom̧ maron̄ kajjojo jiron̄ doon kōn jinōkjej ko rem̧m̧an kom̧wij lo ibūruōn doon.