2 Xamuyees 11–12; 1 Vaj Ntxwv 3; 6–9; 11

Tej lub sij hawm peb ntsia lwm tus neeg uas zoo nkaus lawv txoj kev ntseeg muaj zog thiab peb xav tias lawv tsis raug kev ntxias. Tej yam tsis zoo uas Daviv tau xaiv nyob hauv 2 Xamuyees 11 qhia rau peb tias qhov no tsis muaj tseeb. Xav seb koj kawm tau dab tsi los ntawm nws lub neej. Tej zaum tej lus nug zoo li no pab tau koj kawm 2 Xamuyees 11–12:

• Daviv tau xaiv ua dab tsi es cia nws mus rau ib txoj kev uas nws xaiv kev txhaum loj zuj zus? Nws xaiv ua dab tsi uas ncaj ncees kom tsis txhob ua txhaum? (Kuj saib qhov vidi-aus “To Look Upon,” Txoj Moo Zoo cov Ntawv.)

  

  4:15

  Siv cov vidi-aus. Cov vidi-aus pab tau koj pom tej zaj lus nyob hauv cov vaj lug kub thiab xav seb tej zaj no pab tau koj li cas. Xav seb koj siv tau tej no li cas kom pab koj qhia thiab kawm zoo dua. Piv txwv hais tias, thaum koj saib “To Look Upon” (Txoj Moo Zoo cov Ntawv), xav seb puas nres qhov vidi-aus ob peb zaug kom xav los sis tham txog tej lus nug nyob hauv kev ntxim ua no.

• Tus yeeb ncuab ua dab tsi kom coj koj mus taug tej kev ua txhaum? Koj xaiv tau tej yam dab tsi kom pab koj sab ntsuj plig nyab xeeb?

• Nyeem seb Daviv xav li cas nyob hauv Nathas zaj dab neeg nyob hauv 2 Xamuyees 12:1–6. Nws txoj kev xav li ntawd hais li cas txog qhov uas nws xav li cas txog nws tus kheej? Tus Tswv tau ua dab tsi kom pab koj to taub tias koj zoo li cas tiag tiag?

• Koj yuav ua li cas kom siv ib kab lus xwb sau lub ntsiab ntawm 2 Xamuyees 11–12?

Qhov uas koj nyeem txog Daviv tej kev xaiv tsis zoo kuj pab tau koj kawm txog tej xwm txheej phem ntawm kev saib duab liab qab thiab kev ua txhaum kev cai coj dawb huv. Kawm ntxiv txog qhov no hauv phau ntawv Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv, qhov tseem ceeb saib nqe lus hus ua “Ua li cas thaum tib lub sij hawm ntawd” thiab “Koj lub cev dawb ceev” (phab ntawv 21–28). Tej zaum koj yuav xav nyeem phau ntawv ntawd nrhiav tej lus qhia uas tej zaum pab tau Daviv xaiv zoo me ntsis. Los sis koj nyeem tau “Yexus Khetos yuav pab koj” (phab ntawv 6–9), nrhiav dab tsi uas yuav pab Daviv rov qab tig mus rau tus Tswv.

Xav seb puas hu ib zaj nkauj qhuas Vajtswv “Tus Tswv Nyob Nrog Nraim Kuv” (Cov Nkauj Qhuas Vajtswv, zaj 36) thiab xav seb tus Cawm Seej tau ua li ca kom koj muaj zog thaum raug kev ntxias.

Kuj saib 2 Nifais 28:20–24; Ulisses Soares, “Nrhiav Khetos nrog Txhua txoj Kev Xav,” Liyahaunas, Kaum Ib Hlis Ntuj. 2020, 82–85; “Taking Charge of Technology,” Txoj Moo Zoo cov Ntawv; “Watch Your Step” (vidi-aus), Txoj Moo Zoo cov Ntawv.

2:36

Yog tus Tswv hais rau koj tias, “Koj xav kom kuv muab dab tsi rau koj” (1 Vaj Ntxwv 3:5), koj yuav xav tau dab tsi? Muaj dab tsi hauv Xalumoos tej lus thov uas tshoov koj lub siab? Xav seb vim li cas “muaj tswv yim” kom “paub qhov phem qhov zoo” (nqe 9) yog lub txiaj ntsim uas muaj nuj nqis heev. Koj ua tau dab tsi kom txais tau lub txiaj ntsim no?

(Kuj saib Maulaunais 7:12–19).

Nyob hauv 1 Vaj Ntxwv 6–7 koj yuav nyeem txog tej lus piav txog lub tsev dawb huv uas Xalumoos ua rau tus Tswv. Tej zaum tej lus piav ntawd tsis tshua tseem ceeb rau koj npaum li cov neeg Ixayees thaum ub. Tiam sis tej zaum kev nyeem tej tshooj no yuav pab koj to taub tias tseem ceeb npaum li cas rau lawv kom tau Vajtswv lub tsev. Vim li cas qhov no tseem ceeb rau koj?

Tej zaum koj yuav xav seb tej feem ntawm Xalumoos lub tuam tsev yog tej cim dab tsi. Piv txwv hais tias, xav seb qhelunpees, cov ntoo, thiab cov paj nyob hauv 1 Vaj Ntxwv 6:35 piv txog dab tsi. (Kuj saib Chiv Keeb 3:24).

Tshooj 8 qhia txog Xalumoos txoj kev thov Vajtswv tom qab ua lub tuam tsev tag (saib nqe 22–61). Xav seb koj puas sau ntawv txog cov koob hmoov uas Xalumoos tau thov kom tau. Koj xav li cas txog cov koob hmoov no? (Cia li nco qab Vajtswv tej lus cog tseg nyob hauv 1 Vaj Ntxwv 6:11–13; 9:1–9.) Yog koj tau mus rau tus Tswv lub tsev, xav txog tej lub sij hawm thaum koj tau teev tiam Vajtswv nyob ntawd. Kev ua raws li tej kev khi lus hauv lub tuam tsev tau pab koj li cas kom txais tau Vajtswv cov koob hmoov?

Kuj saib Lus Qhuab Qhia thiab Kev Khi Lus 109; Henry B. Eyring, “Kuv Nyiam Saib lub Tuam Tsev,” Liyahaunas, Tsib Hlis Ntuj 2021, 28–31.

Nqe “Cia li muab nej lub siab tag nrho npuab tus Tswv” txhais li cas? 1 Vaj Ntxwv 8:61. Qhov ntawd puas txawv qhov uas peb ua tej yam zoo tag nrho? Txawv li cas? Nyeem 1 Vaj Ntxwv 11:1–11, thiab saib seb tus Tswv hais li cas txog Xalumoos lub siab. Tej zaum koj yuav xav seb puas muaj tej yam hauv koj lub neej uas ua rau koj siab tig ntawm tus Tswv mus rau “lwm cov vaj tswv”

• “Vaj Ntxwv Daviv” nyob hauv Cov Dab Neeg hauv Phau Qub, 117–20, pab tau koj qhia koj cov me nyuam txog zaj dab neeg hauv 2 Xamuyees 11. Tej zaum koj yuav xav cia koj cov me nyuam qhia txog tej yam uas Daviv xaiv tsis yog thiab qhia tej yam tsim nyog uas nws xaiv tau. Peb muaj peev xwm ua dab tsi thaum peb raug kev ntxias kom pab peb xaiv qhov yog?

  

  2:11

• Tej zaum yog ib lub sij hawm zoo sib tham txog tej xwm txheej phem uas los ntawm kev saib duab liab qab thaum nyeem txog Daviv tej kev txhaum. Qhov vidi-aus “What Should I Do When I See Pornography?” (Txoj Moo Zoo cov Ntawv) muaj tej yam uas pab tau. Pab koj cov me nyuam npaj siab lawv yuav ua li cas thaum lawv pom tej duab liab qab.

  

  5:46

• Thaum koj thiab koj cov me nyuam kawm txog kev muab lub tuam tsev fij tseg nyob hauv 1 Vaj Ntxwv 8, tej zaum nej yuav xav saib cov duab txog lub tuam tsev nyob hauv lub lim tiam no tus txheej txheem qhia. Cia koj cov me nyuam tham txog tej yam lawv pom hauv cov duab. Tej zaum koj yuav xav qhia ntxiv txog nqe 57–58. Kev “ua lub neej raws li [tus Tswv] tej kev cai” txhais li cas? (1 Vaj Ntxwv 8:58. Tej zaum txhua zaus koj cov me nyuam teb ib lo lus nug ces lawv taug kev ib ruam los tau.

• Qhia koj cov me nyuam tias vim li cas qhov uas koj ua raws li tej kev khi lus koj khi hauv lub tuam tsev pab koj ua lub neej raws li tus Tswv tej kev cai. Tej zaum koj yuav xav qhia lawv tias tej kev khi lus no yog dab tsi (saib Phau Qhia Kev Coj lub Koom Txoos, 27.2, Txoj Moo Zoo cov Ntawv). Tej zaum nej yuav xav hu ib zaj nkauj ua ke xws li “I Love to See the Temple” (Children’s Songbook, 95).

• Tej zaum kev nyeem txog Xalumoos cov poj niam tej kev ntxias kom Xalumoos ua dab tsi yuav pab nej sib tham txog “lwm cov vaj tswv”—los sis lwm yam uas tib neeg teev tiam los sis hlub tshaj tus Tswv. Peb yuav ua li cas qhia tias peb hlub Nws tshaj lwm yam hauv peb lub neej?