Luv; 1 Xamuyees 1–7

Ib tug poj ntsuam lub neej yeej nyuaj tsis hais nyob lub caij nyoog twg los. Tiam sis thaum Luv tus txiv tuag, nws txoj kev xwm txheej haj yam nyuaj heev. Cov neeg Ixayees tej kab lig kev cai thaum lub sij hawm ntawd hais tias, ib tug poj niam uas tsis muaj tus txiv los sis tub tsis muaj cai tau tsev nyob thiab tsis tshua muaj hauj lwm ua. Thaum koj nyeem Luv zaj dab neeg, saib seb tus Tswv tau ua li cas kom muab tej yam txom nyem hloov los ua cov koob hmoov. Koj pom tias Luv tau dab tsi uas tej zaum tau pab nws? Npau-am txhiv Luv dim li cas ntawm Luv lub neej txom nyem? (saib Luv 4:4–10). Luv thiab Npau-am zoo li Yexus Khetos li cas?

Kuj saib “Be Still, My Soul,” Hymns, zaj 124.

Tej zaum, ib yam li Luv thiab Na-aumis, koj tau xiam ntau tus neeg thiab (saib Luv 1:1–5). Los sis, ib yam li Hanas, koj kuj xav tau ib txoj koob hmoov uas koj tsis tau txais (saib 1 Xamuyees 1:1–10). Cov poj niam no tau ua li cas kom qhia tias lawv ntseeg Vajtswv? Koj kawm dab tsi los ntawm lawv tus yam ntxwv?

Muaj tseeb tiag, tsis yog txhua tus uas thov kom tau ib tug me nyuam yuav tau, thiab tsis yog txhua tus uas muaj tus khub uas tuag lawm yuav rov qab sib yuav. Tiam sis txhua tus uas tig los rau tus Cawm Seej yuav txais Nws txoj kev pab thiab tej lus qhia. Xav seb koj tau uas li cas kom “los tso siab” rau tus Tswv (Luv 2:12) thaum koj muaj kev nyuaj siab.

Kuj saib Amy A. Wright, “Muaj Kev Cia Siab rau Yexus Khetos,” Liyahaunas, Kaum Ib Hlis Ntuj. 2023, 9–11.

Thaum cov yeeb ncuab tuaj tawm tsam, cov neeg Ixayees xav tias yog lawv tau lub phij xab rau kev khi lus, qhov ntawd yuav tiv thaiv lawv. Thaum koj nyeem 1 Xamuyees 4–6, xav seb vim li cas qhov ntawd tsis pab lawv. (Nyeem txog tej yam tsis ncaj ncees uas Elis cov tub ua, cov uas yog cov pov thawj hauv lub tuam tsev ntaub, nyob hauv 1 Xamuyees 2:12–25.) Koj xav tias tus Tswv xav qhia dab tsi rau Nws cov neeg? Koj kawm dab tsi los ntawm cov Neeg Filitees tom qab lawv tau lub phij xab rau kev khi lus? (saib tshooj 5–6). Koj kawm tau dab tsi los ntawm cov neeg Ixayees tej kev siv zog kom rov qab txais tau tus Tswv txoj kev saib xyuas nyob hauv 1 Xamuyees 7?

Tej zaum koj yuav txais kev tshoov siab thaum koj nyeem Hanas zaj lus qhuas Vajtswv nyob hauv 1 Xamuyees 2:1–10. Koj nrhiav tau dab tsi hauv nws tej lus uas tej zaum pab tau Elis cov tub thiab tag nrho cov neeg Ixayees?

Qee zaum, koj yuav zoo li Xamuyees, tus uas hnov tus Tswv lub suab tiam sis tsis paub yog dab tsi. Ib yam li peb txhua tus, Xamuyees yuav tsum kawm kom paub tus Tswv lub suab. Thaum koj kawm 1 Xamuyees 3, koj kawm dab tsi los ntawm tus tub hluas no txog kev mloog thiab ua raws li tus Tswv lub suab? Tej zaum koj kuj yuav xav nrhiav hauv tej nqe vaj lug kub no thiab sau ntawv txog tej lus qhia uas pab tau ib tug neeg paub tus Tswv lub suab: 1 Vaj Ntxwv 19:11–12; Lukas 24:15–32; 3 Nifais 11:3–7; Lus Qhuab Qhia thiab Kev Khi Lus 6:22–23; 8:2–3; 9:7–9.

Lwm lub sij hawm, tej zaum koj yuav xav tias lub ntuj kaw lawm thiab Vajtswv tsis xav nrog koj sib txuas lus. Thawj Tswj Hwm Russell M. Nelson hais tias: “Vajtswv puas xav nrog nej tham tiag? Yog mas!” (“Kev Tshwm Sim rau lub Koom Txoos, Kev Tshwm Sim rau Peb lub Neej,” Liyahaunas, Tsib Hlis Ntuj 2018, 93–96). Thaum koj kawm Thawj Tswj Hwm Nelson zaj lus, koj nrhiav tau dab tsi uas tshoov koj lub siab kom mloog thiab ua raws li Vajtswv lub suab? Thawj Tswj Hwm Nelson caw kom koj ua dab tsi, thiab nws cog lus tias koj yuav tau koob hmoov dab tsi? Koj nrhiav tau tej lus caw thiab tej koob hmoov uas tus Tswv cog lus txog kev tshwm sim nyob hauv “Taug kev hauv Vajtswv txoj kev kaj” (Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv, 16–20). Xav seb puas xaiv ib yam dab tsi uas koj ua tau kom koj “sab ntsuj plig yuav haj yam muaj cuab kav txais kev tshwm sim.”

• Thaum koj qhia zaj dab neeg txog Luv rau koj cov me nyuam (koj siv tau zaj “Luv thiab Na-aumis” nyob hauv Cov Dab Neeg hauv Phau Qub, 100–103), caw lawv tsa lawv txhais tes txhua zaus ib tug neeg ua siab zoo nyob hauv zaj dab neeg. Lawv kuj qhia tau txog ib lub sij hawm thaum lwm tus tau ua siab zoo rau lawv, los sis thaum lawv ua siab zoo rau lwm tus. Tus Cawm Seej tau ua siab zoo rau peb li cas? Peb yuav ua li cas kom coj raws li nws tus yam ntxwv? (saib “Kindness Begins with Me,” Children’s Songbook, 145).

  

  2:0

• Tej zaj dab neeg txog Luv thiab Hanas pab tau koj cov me nyuam kom muaj kev ntseeg thaum raug xwm txheej nyuaj. Tej zaum koj yuav xav pab lawv kos ib daim phiaj ua muaj ob los lus sau hais tias Tej Kev Sim Siab, Tej Yam Koj Ua, Tej Koob Hmoov. Ces nej nyeem Luv 1:3–5, 8, 16; 2:1–3, 8–12; 4:13–17; 1 Xamuyees 1:1–18 ua ke thiab sau tej yam uas lawv nrhiav nyob hauv tej nqe no hauv qab tej lus no. Luv thiab Hanas tau ua dab tsi kom qhia tias nkawd muaj kev ntseeg Vajtswv? Koj thiab koj cov me nyuam kuj qhia tau tej lub sij hawm thaum tus Tswv tau foom koob hmoov rau nej thaum raug xwm txheej nyuaj.

• Kom kawm txog Hanas, koj cov me nyuam nyeem tau 1 Xamuyees 1:1–18 los sis “Hanas” nyob hauv Cov Dab Neeg hauv Phau Qub (104–5) los sis saib “Hannah’s Faith” (vidi-aus, Txoj Moo Zoo cov Ntawv). Tej zaum yuav lom zem yog koj pov ib lub pob rau ib tug me nyuam thiab caw nws qhia zaj dab neeg me ntsis ua ntej pov lub pob rau lwm tus. Peb kawm dab tsi txog kev thov Vajtswv los ntawm Hanas tus yam ntxwv?

  

  1:15

  

  3:9

• Tej zaum kev ua yeeb yam yuav pab koj cov me nyuam kawm txog Xamuyees txoj kev txais kev tshwm sim. Ib tug me nyuam ua tau yeeb yam tias nws yog Xamuyees, thiab ib tug ua tau yeeb yam tias nws yog Elis thaum koj nyeem 1 Xamuyees 3:1–10 (kuj saib “Xamuyees tus Yaj Saub” nyob hauv Cov Dab Neeg hauv Phau Qub, 106–9, los sis qhov vidi-aus “Samuel and Eli,” Txoj Moo Zoo cov Ntawv). Peb kawm dab tsi los ntawm Xamuyees txog kev mloog tus Tswv lub suab? Peb yuav ua dab tsi kom qhia tias peb xav mloog thaum tus Tswv hais lus rau peb?

  

  2:10

  

  1:58

• Nug koj cov me nyuam seb lawv yuav hais li cas kom piav rau ib tug neeg tias tus Tswv hais lus rau lawv. Koj pab tau lawv nrhiav tej lus teb nyob hauv Lus Qhuab Qhia thiab Kev Khi Lus 6:22–23; 8:2–3; 9:7–9.