“Rau Hli Ntuj 8–14. ‘Tus Tswv Saib Neeg lub Siab’: 1 Xamuyees 8–10; 13; 15–16,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)
“Rau Hli Ntuj 8–14. ‘Tus Tswv Saib Neeg lub Siab,’” Los, Nrog Kuv Mus: Phau Qub 2026
Nyob ntawm cov Dej Tus, los ntawm Simon Dewey
Rau Hli Ntuj 8–14: “Tus Tswv Saib Neeg lub Siab”
1 Xamuyees 8–10; 13; 15–16
Xa-ules yog neeg yug zag. Txawm tias nws siab thiab zoo nraug los, nws xav tias “[nws] tsis tseem ceeb dab tsi li” thiab paub hais tias nws tsev neeg yeej tsis nto moo (saib 1 Xamuyees 9:2–3, 21; 15:17). Hnub uas lawv yuav tsa nws los ua haiv neeg Ixayees tus vaj ntxwv, nws twb tsis tuaj tshwm; nws txhawj heev nws thiaj li “mus khiav nkaum” (1 Xamuyees 10:21–22). Thaum xav txog Xa-ules, tej zaum koj yuav tsis xav tias nws yuav coj haiv neeg Ixayees mus kov yeej lawv tej yeeb ncuab—los yog hais tias yav tom ntej nws yuav pib muaj hlob thiab ntxeev siab tawm tsam tus Tswv.
Daviv yog ib tug neeg yug yaj. Nws lub cev yeej tsis loj muaj zog li nws xya tus tij laug. Hnub uas Xamuyees tuaj xaiv ib tug vaj ntxwv tshiab rau haiv neeg Ixayees, yeej tsis tsim nyog muab Daviv coj los ua ib tug uas yuav xaiv los, ces thiaj li cia nws nyob tom teb yug cov yaj xwb. Thaum xav txog Daviv, tej zaum koj yuav tsis xav tias nws yuav muaj kev ntseeg loj heev thiab ua siab loj mus tawm tsam tus neeg loj siab thiab los ua tus vaj ntxwv zoo tshaj plaws rau haiv neeg Ixayees.
Tiam sis tus Tswv yeej tsis saib peb tej npe, los yog peb lub cev zoo li cas, los yog peb tej kev poob siab. Tiam sis, Nws yeej saib, “neeg lub siab” (1 Xamuyees 16:7). Thiab thaum twg peb lub siab tsis tshua zoo, yog tias peb kam ces, Nws yuav muab ib “lub siab dua tshiab” rau peb (1 Xamuyees 10:9).
Tej Tswv Yim Pab Qhia hauv Tsev thiab lub Koom Txoos
1 Xamuyees 8
Yexus Khetos yog kuv tus Vaj Ntxwv.
1 Xamuyees 8 qhia txog ib qho uas hloov tag nrho haiv neeg Ixayees zaj keeb kwm. Kom tau kev tiv thaiv los ntawm lawv cov yeeb ncuab, haiv neeg Ixayees xav tau tib yam uas lawv cov neeg zej zog muaj—uas yog ib tug vaj ntxwv coj kav lawv. Thaum koj nyeem txog lawv txoj kev thov thiab tus Tswv teb li cas, sim xav seb koj nrhiav kev pab thiab kev coj qhia los ntawm leej twg. Sim xav seb lo lus uas hais tias cia tus Tswv kav koj txhais tau li cas (1 Xamuyees 8:7).
Hauv ob peb lim piam tom ntej, koj yuav nyeem txog coob tug vaj ntxwv uas raug hu los coj kav haiv neeg Ixayees. Thaum koj tab tom kawm txog lawv, sim xav txog tej lus nug no:
-
Twb tau ua li cas kom muaj raws li tus Tswv tej lub ceeb toom nyob rau hauv 1 Xamuyees 8:10–18?
-
Haiv neeg Ixayees txoj kev xaiv los yuav ib tug vaj ntxwv hauv ntiaj teb no tau ua li cas rau lawv lub neej?
-
Yexus Khetos txawv cov vaj ntxwv hauv ntiaj teb no li cas? Sim xav seb koj yuav tau tshem tej yam twg hauv ntiaj teb no uas yuav cia Khetos los ua koj tus Vaj Ntxwv.
Kuj saib “Zoo Siab, tus Tswv Tswj Kav!,” Cov Nkauj Qhuas Vajtswv, zaj 19.
1 Xamuyees 9–10; 16:1–13
Vajtswv siv txoj kev qhia tej uas yuav muaj los tom ntej thaum hu neeg los ua hauj lwm hauv Nws lub nceeg vaj.
Nyeem seb Vajtswv ua li cas thiaj xaiv tau haiv neeg Ixayees cov vaj ntxwv li cas nyob rau hauv 1 Xamuyees 9–10 thiab 16 (qhov tseem ceeb saib hauv 9:15–17; 10:1–12; 16:1–13). Nrhiav tej nqe lus uas pab koj to taub tias “Vajtswv yuav tsum hu ib tug neeg, los ntawm kev qhia tej uas yuav muaj los yav tom ntej” txhais tau li cas niaj hnub no hauv tus Tswv lub Koom Txoos (Tej Nqe Kev Ntseeg 1:5). Tej zaum koj yuav xav seb yuav ua li cas yog tias koj yog tus thawj coj uas hu (Xamuyees) los ua txoj hauj lwm, los yog tus uas raug hu los (Xa-ules thiab Daviv), thiab ua cov neeg uas lawv raug hu los coj kav (cov neeg Ixayees). Koj kawm tau dab tsi los ntawm lawv tej lus thiab tej yam lawv ua hauv tej tshooj no?
Ib daim duab txog thaum Xamuyees pleev roj rau Xa-ules, los ntawm P. Mann, © Lifeway Collection/tau lais xeem los ntawm goodsalt.com
1 Xamuyees 13:5–14; 15
“Mloog tus Tswv lus zoo dua qhov uas muab tej yaj zoo nkauj tua fij rau nws.”
Thaum xav txog qhov uas Xa-ules ntshai heev hauv 1 Xamuyees 10, yus xav tsis thoob thaum nyeem txog nws txoj kev “ntxeev siab” thiab kev ua “tawv ncauj” tom qab nws sawv los ua vaj ntxwv (1 Xamuyees 15:23). Koj xav tias vim li cas thiaj muaj li no? Nyob hauv 1 Xamuyees 13:5–14, koj pom tej yam dab tsi thiab tej cwj pwm twg uas ua rau nws poob qab?
Nyob hauv 1 Xamuyees 15, koj yuav nyeem txog ib zaug uas Xa-ules tsis kam ua raws li tus Tswv lo lus txib vim nws xav tias nws muaj ib lub ntsiab zoo. Yog xav kawm los ntawm Xa-ules tej kev xaiv tsis zoo, saib hauv nqe 22 thiab muab lo lus “muab tsiaj tua fij” pauv rau tej yam zoo tiam sis yeej tsis tseem ceeb npaum li txoj kev hnov thiab ua raws li tus Tswv hais. Hauv koj lub neej koj tau txais koob hmoov li cas vim koj xub ua raws li tus Tswv lub siab nyiam?
1 Xamuyees 16:6–12
“Tus Tswv saib neeg lub siab.”
Puas muaj ib zaug uas koj txiav txim txog ib yam dab tsi los sis ib tug neeg nyob ntawm lawv “lub cev ntaj ntsug”, ces koj txawm kawm paub hais tias koj xav yuam kev lawm? Tej zaum koj noj ib yam dab tsi uas ntxim qab heev tiam sis nws tsis qab li. Los yog koj txiav txim tsis ncaj rau ib tug neeg.
Thaum Xamuyees tab tom nrhiav tus vaj ntxwv tshiab rau Ixayees, tus Tswv qhia nws ib txoj kev uas zoo dua. Nyeem txog qhov no hauv 1 Xamuyees 16:6–7, thiab sim seb puas tsim nyog sau ib daim ntawv txog tej kev uas tib neeg txiav txim txog lwm tus neeg “lub cev ntaj ntsug.” Koj nrhiav tau ib co piv txwv txog qhov no hauv Txwj Laug Elder Christophe G. Giraud-Carrier zaj lus “Peb Yog Nws cov Me Nyuam” (Liyahaunas, Kaum Ib Hlis Ntuj 2023, 114–16). Qhov uas hais tias “saib neeg lub siab,” ib yam li tus Tswv saib txhais tau li cas? (1 Xamuyees 16:7). Koj kuj nrhiav tau tej qhov piv txwv txog qhov no hauv Txwj Laug Elder Giraud-Carrier zaj xov. Tej zaum koj xav tau txog tej lub sij hawm uas tus Cawm Seej tsis saib tib neeg lub cev zoo li cas. (Piv xam hais tias, saib, Malakaus 12:41–44; Lukas 5:1–11; 19:1–9; Yauhas 4:5–30; Mauxes 6:31–36.) Koj kawm tau dab tsi los ntawm cov zaj lus piv txwv no?
Koj yuav ua li cas thiaj ua raws li tus Cawm Seej tus yam ntxwv thaum koj saib lwm tus neeg—thiab koj tus kheej? Qhov no yuav ua rau koj nrog lwm tus neeg sib raug zoo li cas? Sim seb puas tsim nyog qhia lwm tus neeg txog tej yam zoo uas koj pom hauv lawv lub siab.
Kuj saib Ulisses Soares, “Cov Kwv Tij thiab Muam uas Koom Nrog Khetos,” Liyahaunas, Kaum Ib Hlis Ntuj 2023, 70–73.
Yog xav tau ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hli no.
Tej Tswv Yim Pab Qhia cov Me Nyuam
1 Xamuyees 8
Yexus Khetos yog kuv tus Vaj Ntxwv.
-
Thaum koj nyeem 1 Xamuyees 8 nrog koj cov me nyuam, pab lawv nrhiav tej ntsiab lus seb vim li cas Xamuyees qhia haiv neeg Ixayees tias txoj kev muaj ib tug vaj ntxwv yog ib qho tswv yim tsis zoo. Vim li cas thiaj zoo dua yog Yexus Khetos ua peb tus vaj ntxwv? Tej zaum nej mam li ua vaj ntxwv ib lub kaus mom ntawv thiab sib pauv looj lub kaus mom thiab qhia ib yam dab tsi peb ua tau uas qhia tias peb xav kom Yexus yuav ua peb tus Vaj Ntxwv. (Kuj saib Yelemis 23:5; Lus Qhuab Qhia thiab Kev Khi Lus 45:59.)
1 Xamuyees 8:6; 9:15–17; 10:1–24; 16:1–13
Cov neeg uas ua hauj lwm hauv lub Koom Txoos yeej yog Vajtswv hu lawv los ua li ntawd.
-
Tej dab neeg txog thaum Vajtswv xaiv Xa-ules thiab Daviv yuav pab koj cov me nyuam to taub seb niaj hnub no lawv ua li cas thiaj tau kev tshwm sim yuav hu tib neeg los ua hauj lwm hauv lub Koom Txoos. Kom qhia tau lawv txog tej dab neeg no, koj mam li sau ntawv hauv tej daim ntawv, ces koj cov me nyuam mam li kho cov ntawv kom qhia tau zaj dab neeg ntawd raws sij hawm thaum uas nej nyeem tej nqe vaj lug kub ua ke (kuj saib “Daviv Thaum Hluas” hauv Cov Dab Neeg hauv Phau Qub, 110–11). Ces koj mam li qhia txog tej lub sij hawm uas Vajtswv foom koob hmoov rau koj es ua rau koj muaj dag zog ntawm sab ntsuj plig koj thiaj ua tau ib txoj hauj lwm hauv lub koom txoos (saib 1 Xamuyees 10:9–10).
1:16Young David
-
Tej zaum tas sim no tsim nyog koj qhia koj cov me nyuam txog nqe kev ntseeg thib tsib. Qhia lawv tias koj ua li cas thiaj tau txoj hauj lwm no hauv lub Koom Txoos. Koj ua li cas thiaj paub tias yog Vajtswv hu koj ua txoj hauj lwm no?
Tus Yaj Saub Xamuyees Pleev Roj rau Daviv Sawv Los Ua Vaj Ntxwv rau Ixayees hauv lub Zos Npelehees, los ntawm Balage Balogh
1 Xamuyees 16:1–13
Tus Tswv saib neeg lub siab.
-
Ib yam khoom qhia tau koj cov me nyuam kom lawv haj yam to taub txoj ntsiab cai nyob rau hauv 1 Xamuyees 16:7. Piv xam hais tias, koj mam li muab zaub mov los sis ib phau ntawv rau lawv saib uas muaj ib daim plhaub uas qhia tsis tseeb seb yam khoom ntawd yog dab tsi tiag tiag. Zaj hauv 1 Xamuyees 16:7 thiab yam khoom ntawd qhia tau dab tsi seb peb yuav tsum saib peb tus kheej thiab lwm tus neeg li cas? Hu ib zaj nkauj uas qhia txog zaj ntsiab cai no, ib yam li “Love One Another” (Children’s Songbook, 136).
Siv ib yam khoom kom qhia. Thaum koj cov me nyuam muaj ib yam dab tsi uas lawv saib thiab kov tau uas piav txog txoj moo zoo ib txoj ntsiab cai, lawv haj yam yuav nco qab qhov ntawd. Piv txwv hais tias, thaum koj nyeem 1 Xamuyees 16:7 nrog lawv, koj mam li cia lawv nrhiav tej qhov piv txwv txog tej duab txawv qhia tias peb yuav tsum sim saib neeg ib yam li tus Tswv saib—thaum uas peb “saib neeg lub siab”—es tsis txhob txiav txim rau qhov uas pom “lub cev ntaj ntsug.”
-
Koj thiab koj cov me nyuam mam li sib qhia txog tej yam uas nej tau kawm txog kev “saib neeg lub siab,” tsis yog qhov yus pom “lub cev ntaj ntsug” (nqe 7). Tej zaum nej yuav xav sib pauv los qhia txog tej yam zoo uas nej pom tau ntawm sawv daws lub siab.
Yog xav tau ntxiv, saib phau xov xwm Phooj Ywg rau lub hli no.