1 Xamuyees 17–18; 24–26; 2 Xamuyees 5–7

Zaj dab neeg txog Daviv thiab Nkauli-am yeej yog ib zaj uas tib neeg coob paub tshaj hauv cov vaj lug kub. Muaj tseeb tiag, ntau lub sij hawm peb tsom ntsoov rau Daviv. Tiam sis lub sij hawm no, thaum koj kawm 1 Xamuyees 17, cia li xav txog tej lus uas lwm tus hais nyob hauv tshooj no (saib tej yam uas sau nram qab no). Koj kawm dab tsi txog lawv thiab lawv tej kev xav? Koj kawm dab tsi txog Daviv? Nws txawv li cas?

• Nkauli-am: nqe 8–10, 43–44

• Eli-as: nqe 28

• Xa-ules: nqe 33

• Daviv: nqe 26, 32, 34–37, 39, 45–47

Txawm yog tib neeg tsis paub txog koj zaj dab neeg zoo npaum li lawv paub Daviv zaj los, nyaj koj yuav tsum kov yeej tej teeb meem uas loj npaum li Nkauli-am thiab muaj cib fim muab siab rau ntseeg tus Tswv. Daviv tus yam ntxwv qhia koj dab tsi txog kev ntxhov siab nyob hauv koj zaj dab neeg? Tej zaum koj kuj yuav xav nyeem Thawj Tswj Hwm Camille N. Johnson zaj lus “Caw Khetos Los Sau Nej zaj Dab Neeg” (Liyahaunas, Kaum Ib Hlis Ntuj 2021, 80–82) thaum koj xav txog koj ib qho teeb meem. Nrhiav tej lus teb rau tej lus nug zoo li no: Tus Tswv xav kom kuv saib kuv tej teeb meem li cas? Nws tau ua li cas dhau los kom pab kuv? Kuv yuav ua li cas kom qhia tias kuv tso siab rau Nws sau kuv zaj dab neeg?

Tej zaum koj paub lawm tias muaj tej tshooj hauv Daviv zaj dab neeg uas muaj kev nyuaj siab heev (saib, ua piv txwv, 2 Xamuyees 11). Yog tias koj muaj cib fim muab tswv yim rau Daviv tom qab nws muab Nkauli-am tua tuag, koj yuav hais li cas? Lub tswv yim no yuav pab koj lub neej li cas thiab?

Kuj saib “The Lord Will Deliver Me” (vidi-aus), Txoj Moo Zoo cov Ntawv.

3:24

Ntxiv rau tej teeb meem uas peb txhua tus muaj, peb kuj raug tej teeb meem loj kawg li uas tag nrho lub ntiaj teb no raug. Thaum tej kev phem koom ua ke tawm tsam tej yam zoo (saib 1 Xamuyees 17:1), tej zaum peb yuav xav paub seb tej yam uas peb ua puas pab tau tiag tiag. Muaj dab tsi nyob hauv Daviv zaj lus uav ua rau koj muaj kev cia siab?

Kuj saib “Cia Peb Sawv Daws Sib Zog Ua Vajtswv Tes Num,” Cov Nkauj Qhuas Vajtswv, zaj 113.

Thaum koj nyeem 1 Xamuyees 18, xav seb puas muab Xa-ules piv rau nws tus tub Yaunathas (tus uas yuav los ua vaj ntxwv yog tias tsis muaj Daviv). Xa-ules thiab Yaunathas tau xav li cas txog Daviv txoj kev vam meej? Koj kawm dab tsi los ntawm qhov no?

Koj pom dab tsi los ntawm tej yam uas Yaunathas hais thiab ua uas ua rau koj xav txog Yexus Khetos?

Nyob hauv 1 Xamuyees 24–26, nrhiav tej lus qhia txog kev muab hlob, kev zam txim, thiab kev tswj koj tus kheej. Tej zaum koj kuj yuav xav nyeem Txwj Laug Mark A. Bragg zaj lus “Kev Ua Siab Tus Yees Zoo Li Yexus Khetos” thaum koj kawm (Liyahaunas, Tsib Hlis Ntuj 2023, 60–63). Daviv, Anpinkayis, thiab lwm tus tau ua li cas kom qhia tias lawv ua siab tus yees zoo li Yexus Khetos—los sis tsis qhia—nyob hauv tej tshooj no? Koj muaj tej lub cib fim twg kom qhia tias koj ua siab tus yees zoo li Yexus Khetos?

Muam Kristen Yee zaj lus “Muab Kev Zoo Nkauj Pauj Tshauv: Kev Kho Mob Los ntawm Kev Zam Txim” (Liyahaunas, Kaum Ib Hlis Ntuj 2022, 36–39) pab tau koj kawm 1 Xamuyees 25. Anpinkayis zoo li Yexus Khetos li cas?

Tom qab Daviv kov yeej Nkauli-am, nws tej teeb meem nrog cov Neeg Filitees tsis tau tiav. Thaum koj nyeem 2 Xamuyees 5:17–25, xav seb Daviv tus yam ntxwv yuav ua li cas pab koj kov yeej tej teeb meem uas koj raug (kuj saib 1 Xamuyees 23:2, 10–11; 30:8; 2 Xamuyees 2:1). Koj tau koob hmoov twg los ntawm kev tshwm sim uas koj tau txais?

Thaum Daviv hais tias nws yuav ua ib lub tuam tsev rau tus Tswv (saib 2 Xamuyees 7:1–3), tus Tswv teb tias Daviv tus tub mam li ua (saib nqe 12–15; kuj saib 1 Xwm Txheej Vaj Ntxwv 17:1–15). Tus Tswv kuj hais tias Nws yuav ua rau Daviv cov xeeb ntxwv huam vam coob heev, thiab pub Daviv lub teb chaws nyob ruaj khov mus ib txhis (saib 2 Xamuyees 7:11, 16, 25–29; Phau Ntawv Nkauj 89:3–4, 35–37). Twb tau muaj raws li kev cog lus no dhau los ntawm Yexus Khetos, peb tus Vaj Ntxwv Mus Ib Txhis Li, uas yog Daviv ib tug xeeb ntxwv (saib Mathais 1:1; Lukas 1:32–33; Yauhas 18:33–37).

• Tej zaum koj yuav xav siv “Daviv thiab Nkauli-am” nyob hauv Cov Dab Neeg hauv Phau Qub, 112–16, kom pab koj cov me nyuam kawm tias muaj dab tsi nyob hauv 1 Xamuyees 17:20–54. Ces koj hais tau kom lawv rov qab hais zaj dab neeg thaum lawv siv cov duab hauv tus txheej txheem qhia no. Cia li nug lawv seb lawv xav tias tus Tswv xav kom lawv kawm dab tsi los ntawm zaj dab neeg no.

  

  2:36

• Koj thiab koj cov me nyuam kuj sau tau tej yam nyuaj heev uas lawv raug hauv lub neej no. Ces pab lawv nrhiav tau tej yam uas Daviv hais uas pab tau lawv kov yeej tej teeb meem no (saib 1 Xamuyees 17:26, 32, 34–37, 45–47). Cia li qhia lawv tias Yexus Khetos tau pab koj li cas thaum muaj teeb meem.

• Tej zaum koj cov me nyuam yuav xav taug kev li cov tub rog ib yam li Daviv mus tua Nkauli-am thaum lawv hu ib zaj nkauj txog kev ua siab loj, xws li “I Will Be Valiant” (Children’s Songbook, 162).

• Koj yuav pab koj cov me nyuam li cas kom kawm los ntawm Yaunathas thiab Daviv txoj kev ua phooj ywg? Ib txoj kev yog kom muab ib tug me nyuam ob lub siab ntawv, ib lub piv txog Daviv thiab ib lub piv txog Yaunathas. Ces cia li nyeem ob peb kab lus los ntawm 1 Xamuyees 18:1–4 ua ke uas qhia tias ob tug phooj ywg no ib leeg hlub ib leeg zoo li cas. Tej zaum koj cov me nyuam yuav xav sau los sis kos duab rau lawv tej lub siab ntawv txog qhov uas lawv yuav ua li cas kom qhia ib tug phooj ywg tias lawv hlub nws.

• Nyob hauv tej tshooj no, Daviv tau los ua Ixayees tus vaj ntxwv. Tej zaum yuav lom zem rau koj cov me nyuam ua yeeb yam zoo li lawv yog ib tug vaj ntxwv los sis niam vaj ntxwv. Lawv yuav tsim tej kev cai twg? Lawv yuav thov leej twg pab lawv? Pab koj cov me nyuam kawm tias thaum Daviv xav tau kev pab, nws “thov” Vajtswv kom txais kev teb. Ua piv txwv hais tias, thaum koj nyeem 2 Xamuyees 5:19, 23, caw cov me nyuam mloog seb txhua zaus lawv hnov lo lus “thov” ces puab tes thaum lawv hnov. Vim li cas Daviv yuav xav tau tus Tswv txoj kev pab ua nws ntiag tug hauj lwm tshiab?

• Sib tham txog tej lub sij hawm thaum nej tau thov Vajtswv kom Leej Txiv Saum Ntuj Ceeb Tsheej pab. Qhov uas Nws tau pab koj tau hloov koj lub neej zoo li cas?

• Cov vaj ntxwv uas peb nyeem txog hauv Phau Qub txhua tus muaj tej yam uas lawv ua tsis yog, es lawv tej nceeg vaj twb tiav lawm. Tiam sis Yexus Khetos yog ib tug Vaj Ntxwv zoo tag nrho thiab yuav kav mus ib txhis li. Koj pab tau koj cov me nyuam kawm qhov no thaum nej nyeem ua ke txog qhov uas tus yaj saub Nathas qhia tus Vaj Ntxwv Daviv nyob hauv 2 Xamuyees 7:16–17. Vim li cas Daviv lub nceeg vaj yuav tsis paub kawg? Pab koj cov me nyuam nrhiav thiab nyeem tej nqe vaj lug kub uas qhia tias Yexus Khetos, Daviv ib tug xeeb ntxwv, yog peb tus Vaj Ntxwv, xws li Lukas 1:32–33; Yauhas 18:33–37; thiab Tshwm Sim 19:16. Yexus Khetos txawv cov vaj ntxwv hauv ntiaj teb no li cas? Peb ua li cas kom hwm Yexus Khetos uas yog peb tus Vaj Ntxwv Mus Ib Txhis?