2 Samuela 11–12; 1 Tui 3; 6–9; 11

Ena so na gauna eda dau raici ira na tamata era vaka mera kaukauwa tu ena nodra vakabauta, ka da nanuma ni ra sega ni vakaleqai ena veitemaki. Na digidigi rerevaki nei Tevita e vakamacalataki ena 2 Samuela 11 e vakaraitaka vakamatata ni sega ni dau vakakina. Vakasamataka na lesoni cava o rawa ni vulica mai na veika a sotava o koya. Na taro eso vakaoqo ena rawa ni vukei iko mo vulica na 2 Samuela 11–12:

• Na digidigi cava a cakava o Tevita ka a kauti koya sobu ena dua na sala a levu cake tikoga kina na ivalavala ca? Na digidigi dodonu cava e a rawa ni a cakava o koya? (Raica talega na vidio “To Look Upon,” Valenivola Kosipeli.)

  

  4:15

  Vakayagataki ni vidio. Na vidio e rawa ni vukei iko mo raitayaloyalotaka na itukutuku mai na ivolanikalou ka vakasamataka na kena yaga vei iko. Vakasamataka na sala mo vakayagataka kina mo vakavinakataka cake na veivakavulici kei na vuli. Me kena ivakaraitaki, ni saravi tiko na vidio “To Look Upon” (Valenivola ni Kosipeli), navuca mo cegu mada ena veigauna eso mo vakasamataka se veivosakitaka eso na taro e vakaturi tiko kina.

• E saga tiko vakacava na meca me liutaki iko sobu ena sala ca? Na digidigi cava o rawa ni cakava ena gauna oqo mo taqomaki tikoga kina vakayalo?

• Raica na ka a cakava o Tevita ki na italanoa nei Necani ena 2 Samuela 12:1–6. Na cava e tukuna oqori me baleta na nona raici koya vakai koya o Tevita? Na cava sa cakava na Turaga me vukei iko mo raici iko vakavinaka cake?

• O na vakalekalekataka vakacava na veika a yaco ena 2 Samuela 11–12 ena dua ga na iyatuvosa ni ivakasala?

Na wiliki ni digidigi ca nei Tevita ena rawa ni vakavuna mo vulica na rerevaki ni iyaloyalo vakasisila kei na ivalavala ca ni veiyacovi. E dua na ivurevure vinaka ni ka oqo oya na Me iSakisaki ni iTabagone: iDusidusi ni Vakayaco Digidigi, vakabibi na iwasewase ka kena ulutaga “Na cava mo na cakava ena gauna oya” kei na “Sa ka tabu na yagomu” (tabana e 21–28). De dua e rawa ni o raica na ivurevure oya me baleta na ivakasala ka a rawa beka ni vukei Tevita me digidigi vinaka cake kina. Se e rawa ni o wilika “Ena vukei iko o Jisu Karisito” (tabana e 6–9), ka vaqara e dua na ka e a rawa beka ni vukei Tevita me lesu tale vua na Turaga.

Vakasamataka mo lagata e dua na serenilotu me vaka na “Au Rai Vei Kemuni” (Sere ni Lotu, naba 51) ka vakasamataka vakatitobu na sala sa vaqaqacotaki iko kina na iVakabula ni o sa sotava na veitemaki.

Raica talega na 2 Nifai 28:20–24; Ulisses Soares, “Vakasaqarai Karisito ena Vakasama Taucoko,” Liaona, Nove. 2020, 82–85; “Vakayagataki ni Tekinolaji,” Valenivola ni Kosipeli; “Watch Your Step” (vidio), Valenivola ni Kosipeli.

2:36

Kevaka e kaya vei iko na Turaga, “Mo kerea mada na ka me’u solia vei iko” (1 tui 3:5), na cava o na kerea? Na cava e vakauqeti iko me baleta na kerekere nei Solomoni? Vakasamataka vakatitobu na cava na vuna e dua kina na isolisoli yaga sara “na yalo sa vuku” me “kila na ka vinaka kei na ka ca” (tikina e 9). Na cava o rawa ni cakava mo vakasaqara kina na isolisoli oqo?

Raica talega na Moronai 7:12–19.

Ena 1 Tui 6–7 o na raica kina e dua na ivakamacala matailalai ni vale tabu a tara o Solomoni me baleta na Turaga. Ena rairai sega beka ni bibi vei iko na veika matailalai me vaka a vakakina vei ira na Isireli makawa. Ia na wiliki ni wase oqo ena rawa ni solia vei iko e dua na vakasama me baleta na kena bibi vei ira me dua na nodra vale ni Turaga. Na cava e bibi kina vei iko?

O na rairai vakasamataka beka na cava ena rawa ni vakatakarakarataka na veitikina duidui eso ni valetabu i Solomoni. Me kena ivakaraitaki, vakasamataka mada na ka e rawa ni vakatakarakarataka na jerupimi, vunikau, kei na senikau ena 1 Tui 6:35 . (Raica talega na Nai Vakatekivu 3:24.)

Na Wase 8 e volai tu kina na masu nei Solomoni ni sa vakacavari na valetabu (raica na tikina e 22–61). Vakasamataka mo vola na veivakalougatataki eso a kerea o Solomoni. Na cava e vakauqeti iko ena veivakalougatataki eso oqo? (Raica talega na yalayala ni Turaga ena 2 Tui 6:11–13; 9:1–9.) Kevaka o sa lako oti ki na vale ni Turaga, vakasamataka na veika o a sotava ena sokalou e kea. Sa vukei iko vakacava na maroroi ni veiyalayalati ni valetabu mo rawata na veivakalougatataki ni Turaga?

Raica talega na Vunau kei na Veiyalayalati 109; Henry B. Eyring, “Au Taleitaka Me’u Raica na Valetabu,” Liaona, Me 2021, 28–31.

Na cava na kena ibalebale “me dodonu na lomamuni vei Jiova”? (1 Tui 8:61). E duidui beka oqori mai na noda ivalavala e uasivi sara? E duidui vakacava? Wilika na 1 Tui 11:1–11, ka raica na ka a kaya na Turaga me baleta na yaloi Solomoni. O na rairai vakasamataka kevaka e tiko na veivakauqeti ena nomu bula ka rawa ni vagolea tani na yalomu mai vua na Turaga ka torova na “kalou tani.”

• Na “Tui ko Tevita” ena iTalanoa eso mai na Veiyalayalati Makawa, 117–20, e rawa ni vukei iko mo tukuna vei ira na luvemu na italanoa ena 2 Samuela 11. E rawa ni o kerei ira na luvemu mera raica na digidigi cala eso a cakava o Tevita ka vakatura na digidigi vinaka a rawa ni cakava o koya. Na cava eso na ka eda rawa ni cakava ni da sa temaki ka rawa ni vukei keda meda digitaka kina na dodonu?

  

  2:11

• Na wiliki ni ivalavala ca veivakaleqai nei Tevita e rawa ni dua na madigi vinaka me veivosakitaki kina na rerevaki ni iyaloyalo vakasisila. Na vidio “What Should I Do When I See Pornography?” (“Na cava Meu Cakava Niu Raica Na iYaloyalo Vakasisila?”) (Valenivola ni Kosipeli) e rawa ni veivuke ena veidusimaki. Vukei ira na luvemu mera tuvanaka na veika era na cakava ni ra sotava na iyaloyalo vakasisila.

  

  5:46

• Ni o vulica kei ira na luvemu na vakatabui ni valetabu ena 1 Tui 8, sa rawa mo raica na iyaloyalo eso ni valetabu ena ituvatuva ni macawa oqo. Mera tukuna na luvemu na veika matailalai era raica ena iyaloyalo oqori. O na rairai vakabibitaka beka na tikina e 57–58. Na cava na kena ibalebale mo “lako kina ena nona sala kecega”? (1 Tui 8:58). De dua e rawa ni ra taura na luvemu e dua na ikalawa me baleta na isaunitaro yadua era solia.

• Tukuna vei ira na luvemu na sala e vukei iko kina mo lako ena sala ni Turaga na nomu maroroya na veiyalayalati o cakava ena valetabu. O na rairai tukuna beka vei ira na veiyalayalati cava so oqori (raica na iVoladusidusi Raraba, 27.2, Valenivola ni Kosipeli). E rawa talega ni o lagata vata e dua na sere me vaka na “Raica na Valetabu” (iVolanisere ni Gonelalai, 99).

• Na wiliki ni sala era a vakauqeti Solomoni kina na watina ena rawa ni veimuataki ki na dua na veivosaki me baleta na ivakaraitaki ni “kalou tani”—se veika era dau qarava se lomana na tamata ka sega ni Turaga. Eda na vakaraitaka vakacava ni da lomani Koya vakalevu cake mai na veika kece sara ena noda bula?