1 Samuel 17–18; 24–26; 2 Samuel 5–7

David na Goliath hɔn asɛm no nye nsɛm a wonyim no papaapa wɔ kyerɛwsɛm mu no mu kor. Nokwar, yɛtaa tsim wɔ David no do. Naaso mber yi dze, ber a isũa 1 Samuel 17 no, dwendwen binom so hɔn nsɛm ho wɔ estir yi mu (hwɛ dza wɔakyerɛw wɔ ase no). Ebɛnadze na isũa fa hɔn ho na hɔn botae ho? Ebɛnadze na isũa fa David ho? Osi dɛn yɛ soronko?

• Goliath: nyiyimu 8–10, 43–44

• Eliab: nyiyimu 28

• Saul: nyiyimu 33

• David: nyiyimu 26, 32, 34–37, 39, 45–47

W’asɛm, sɛ kaansa wonnyim no yie dɛ David dze no a, ɔyɛ nokwar dɛ nsɔhwɛ akɛse dɛ Goliath a ɔwɔ dɛ idzi do konyim na akwanhorow dɛ edze gyedzi bedzi dwuma wɔ Ewuradze mu kã ho. Ebɛnadze na David ne fasusu kyerɛkyerɛ wo fa irihyia abɛbrɛsɛ wɔ w’asɛm no mu ho? Ibotum so akenkan President Camille N. Johnson n’asɛm “Invite Christ to Author Your Story” (Liahona, Ɔberɛfɛw 2021, 80–82) a wo nsɔhwɛ no kor da w’adwen do. Hwehwɛ nyiano ma nsɛmbisa tse dɛ iyinom: Ewuradze pɛ dɛ misi dɛn hwɛ mo nsɔhwɛ horow no? Oesi dɛn aboa me wɔ mber a woetwa mu kɔ no? Mibesi dɛn botum akyerɛ dɛ megye No dzi dɛ ɔbɛkyerɛw m’asɛm?

Bia na inyim dada dɛ esian nsɛm etsir binom wɔ mu ekyir yi wɔ David n’asɛm mu (hwɛ, mfatoho, 2 Samuel 11). Sɛ ewɔ kwan dɛ ema David afotu wɔ ɔnye Goliath hɔn akõdzi ekyir no a, nkyɛ, ebɛn asɛm na ebɛkã? Afotu yi besi dɛn afa w’abrabɔ ho?

Hwɛ “The Lord Will Deliver Me” (video), Asɛmpa Nwoma Korabea so.

3:24

Dza ɔkã ankorankor nsɔhwɛ ho no, yɛsan so hyia haw akɛse huhuuhu a onya nsusuando wɔ wiadze nyina do. Sɛ bɔn nhyɛdo “boaboa ano … dɛ wɔrobɔkõ’’ dze etsia papa nhyɛdo a (1 Samuel 17:1), yebotum adwendwen mbrɛ hɛn ankorankor mbɔdzembɔ no botum dze nsesa aba yie ho. Ebɛnadze na ihu no wɔ David n’asɛm mu a ɔma wo enyidado?

Hwɛ “Hom Mma Yɛnkɔ Do,” Asɔr na Mobfra Ndwom,’’ nkanee 10 so.

Ber a ekenkan 1 Samuel 18 no, hwɛ dɛ edze Saul bɔtoto ne babanyin Jonathan ho (ɔno a, sɛ nnyɛ David a, nkyɛ obotum abɛyɛ ɔhen a odzi do no). Saul na Jonathan kyerɛɛ ebɛn ndzeyɛɛ wɔ David no nkonyimdzi ho? Ebɛnadze na isũa fi sũahu yi mu?

Ebɛnadze na ihu no wɔ Jonathan no suban na ndzeyɛɛ mu a ɔbɔ wo Jesus Christ ho nkaa?

1 Samuel 24–26 mu no, hwehwɛ adzesũadze fa ahantan, bɔnfakyɛ, na ahohyɛdo ho. Bia ibotum so ahwɛ dɛ ebɛkenkan Elder Mark A. Bragg n’asɛm “Christlike Poise” akã w’adzesũa ho (Liahona, Esusow Aketseaba 2023, 60–63). David, Abigail, na binom sii dɛn kyerɛe— anaa wɔannkyerɛ—Chrsit-su ahohyɛdo wɔ etsir yinom mu? Ebɛn akwan horow na ewɔ dze kyerɛ Christ-su ahohyɛdo?

Akyerɛbaa Kristen Yee n’asɛm “Beauty for Ashes: The Healing Path of Forgiveness” (Liahona, Ɔberɛfɛw 2022, 36–39) botum aboa wo ma esũa 1 Samuel 25. Abigail si dɛn tse dɛ Jesus Christ?

Mpo dɛ David dzii Goliath do konyim no, nna ɔnye Philistiafo hɔn ntokwaa no do nntwae. Ber a ekenkan 2 Samuel 5:17–25, hwɛ mbrɛ David ne fasusu besi botum aboa wo wɔ nsɔhwɛ a ihyia no mu (hwɛ 1 Samuel 23:2, 10–11; 30:8; 2 Samuel 2:1 so). Edze nyikyerɛ a inya ridzi dwuma esi dɛn ehyira wo?

Mber a David gyee too no do dɛ obesi fie no, n’asekyerɛ temple, ama Ewuradze no (hwɛ 2 Samuel 7:1–3), Ewuradze buaa David dɛ ne babanyin na obesi (hwɛ nyiyimu 12–15; hwɛ 1 Mbermunsɛm 17:1–15 so). Ewuradze kãa so dɛ Ɔno so besi “fie” ama David, a ɔkyerɛ n’asefo, na n’ahendzi rommbɔ adze da (hwɛ 2 Samuel 7:11, 16, 25–29; Ndwom 89:3–4, 35–37). Anohoba yi hyɛɛ mã wɔ Jesus Christ mu, hɛn Onnyiewiei Hen a nna ɔyɛ David n’asenyi (hwɛ Matthew 1:1; Luke 1:32–33; John 18:33–37).

• Epɛ a ibotum dze “David and Goliath” wɔ Old Testament Stories, 112-16 mu no edzi dwuma, dze aboa wo mbofra no ma woeehu dza osii wɔ 1 Samuel 17:20–54 mu. Nkyii ibotum ama wɔasan akã asɛm no bio a wɔdze mfonyin anaa kyerɛpɛn adorɔw wɔ n’apɔwdo yi mu bedzi dwuma. Bisa hɔn adze a wɔdwen ho a Ewuradze pɛ dɛ wosũa fi asɛm yi mu.

  

  2:36

• Ɔwo na wo mbofra no botum so akyerɛw nsɔhwɛ dzendzen bi a wobotum ehyia wɔ hɔn abrabɔ mu no nkorkor. Nkyii boa hɔn ma wɔnhwehwɛ ndzɛmba a David kãe a obotum ayɛ mboa ama nsɔhwɛ yinom (hwɛ 1 Samuel 17:26, 32, 34–37, 45–47). Kyɛ mbrɛ Jesus Christ esi aboa wo wɔ nsɔhwɛ ber mu.

• Wo mbofra no botum atow santsen tse dɛ David a ɔnye Goliath rokɔkõ ber a wɔrotow ndwom a ɔfa akokodur ho, tse dɛ “I Will Be Valiant’’ (Children’s Songbook, 162).

• Ibesi dɛn botum aboa wo mbofra no ma woesũa efi David na Jonathan hɔn anyɛnkoyɛ mu? Kwan kor nye dɛ ebɛma abofra kor biara nkrataa akoma ebien, kor gyina hɔ ma David na kor no so gyina hɔ ma Jonathan. Nkyii wɔmbɔ mu nkenkan nsɛnsin kakra mfi 1 Samuel 18:1–4 mu a otsĩ ɔdɔ a anyɛnkofo beenu yinom tsee maa hɔnho no mu. Nkyii wo mbofra no botum akyerɛw anaa wɔadorɔw mbrɛ wobesi akyerɛ dɔ ama nyɛnko bi wɔ hɔn nkrataa no do.

• Etsir yinom mu no, David bɛyɛɛ Israel hen. Ɔbɛyɛ enyigye dɛ wo mbofra no bepetuw ayɛ dɛ hen anaa ɔhembaa. Ebɛn mbra na wɔbɛhyɛ? Henfa na wɔbɔkɔ akɛgye mboa? Boa wo mbofra no ma wonhu dɛ mber a nna David hia mboa no, “obisae,’’ anaa ɔbɔɔ mpaa, nyaa nyiano. Mfatoho, ber a ekenkan 2 Samuel 5:19, 23 no, to nsa frɛ mbofra no ma wontsie kasafua “bisaa’’ na sɛ wɔtse a nna wɔabobɔw hɔn abasa. Ebɛnadze ntsi na David behia Ewuradze no mboa wɔ n’asɛdze fofor yi mu?

• Wɔnkã mber dodow a wɔabɔ mpaa dze agye Ɔsor Egya no mboa nkyerɛkyerɛ hɔnho. Ebɛn nsonsonee na ɔyɛe dɛ ema Ɔboaa wo?

• Ahemfo a yɛkenkan hɔn ho nsɛm wɔ Ahyɛmu Dadaw mu nyinara no nna wɔwɔ mfom, na hɔn ahenman no nyinara baa ewiei. Naaso Jesus Christ nye Ɔhen a odzi mu na obedzi hen afebɔɔ. Ibotum aboa wo mbofra ma woehu iyi ber a wɔbɔ mu kenkan dza nkɔnhyɛnyi Nathan kãa kyerɛɛ David wɔ 2 Samuel 7:16–17 mu no. Obesi dɛn na David n’ahenman no nnkɛba ewiei? Boa wo mbofra no ma wɔnhwehwɛ na wɔnkenkan kyerɛwsɛm nsɛnsin a wɔkyerɛkyerɛ dɛ Jesus Christ, David n’asenyi no, nye hɛn Hen, tse dɛ Luke 1:32–33; John 18:33–37; na Nyikyerɛ 19:16. Jesus si dɛn yɛ soronko fi asaase ahemfo ho? Yesi dɛn dzi Jesus Christ nyi dɛ hɛn Onnyiewiei Hen?