Ruth; 1 Samuel 1–7

Abrabɔ yɛ dzen ma okunafo wɔ mber biara mu. Naaso mber a Ruth no kun wui no, ne gyinabew yɛɛ dzen soronko. Israel kusum dɛm mber no, ɔbaa a nna onnyi kun anaa mbabanyin no mmfata egyapadze biara na akwan kakrabaa na ɔwɔ hɔ a obotum afa do edzidzi. Ber a ekenkan Ruth n’asɛm no, hwɛ mbrɛ Ewuradze sii daan esian yɛɛ no nhyira akɛse. Ebɛnadze na ihu fa Ruth ho a bia otumii boaa no? Boaz sii dɛn gyee Ruth fii n’atseetsee gyinabew no mu? (hwɛ Ruth 4:4-10). Ruth na Boaz beenu no si dɛn yɛɛ tse dɛ Jesus Christ?

Hwɛ “Be Still, My Soul,’’ Asɔr ndwom, nkanee 124 so.

Bia ahwer adze kɛse, dɛ mbrɛ Ruth na Naomi hweree no (hwɛ Ruth 1:1–5). Anaa ebia, tse dɛ Hannah no, erohwehwɛ nhyira a wo nsa nnyae nnkae (hwɛ 1 Samuel 1:1–10). Mbaa yinom sii dɛn kyerɛɛ hɔn gyedzi wɔ Nyankopɔn mu? Ebɛnadze na isũa fi hɔn fasusu mu?

Nokwar, nnyɛ obiara a ɔbɔ mpaa hwehwɛ ba no na onya bi, na nnyɛ obiara a no kun wu na ɔsan war bio. Mbom obiara a ɔdan kɔ Agyenkwa hɔ no nya No mboa na akwankyerɛ. Hwɛ mbrɛ esi “abɔtwer’’ Ewuradze (Ruth 2:12) wɔ wo nkõdzen ber mu.

Hwɛ Amy A. Wright, “Abide the Day in Christ,” Liahona, Ɔberɛfɛw 2023, 9–11 so.

Mber a hɔn atamfo tseew hɔn do etua no, nna ɔda edzi pefee dɛ Israelfo no dween dɛ wɔwɔ ahyɛmu adaka no wɔ hɔn nkyɛn no ara bɔbɔ hɔnho ban. Ber a ekenkan 1 Samuel 4–6 no, dwen siantsir a dɛm no annyɛ edwuma ho. (Hyɛ Eli ne mbambanyin no, a wɔsom dɛ asɔfo wɔ ntamadan mu no hɔn ndzeyɛe a ɔnntsen no so nsew, wɔ 1 Samuel 2:12–25.) Ebɛnadze na nna Ewuradze robɔ mbɔdzen dɛ Ɔdze bɛkyerɛkyerɛ No nkorɔfo no? Ebɛnadze na isũa fi dza osii Philistiafo do mu ber a wɔfaa adaka no ekyir no? (hwɛ etsir 5-6). Ebɛnadze na isũa fi Israelfo hɔn mbɔdzembɔ mu dɛ wɔbɛsan enya Ewuradze ne bambɔ no wɔ 1 Samuel 7 mu?

Ibotum enya nkenyan ber a ekenkan Hannah n’ayɛyi awensɛm wɔ 1 Samuel 2:1–10 mu. Ebɛnadze na ihu no wɔ ne nsɛm mu a nkyɛ obotum aboa Eli ne mbambanyin na Israelfo nkaa no?

Ɔto mber bi a, ebɛtse dɛ ayɛ dɛ Samuel, a ɔtsee Ewuradze ne ndze naaso woennhu. Tse dɛ hɛn nyinara no, nna Samuel wɔ dɛ osũa mbrɛ obesi bohu Ewuradze ne ndze. Ber a isũa 1 Samuel 3 no, ebɛnadze na isũa fi aberantsɛba yi hɔ fa iritsie Ewuradze na ayɛ setsie ama ne ndze ho? Ibotum so ahwehwɛ kyerɛwsɛm a ɔkekã ho yinom mu na akyerɛw akwankyerɛ a obotum aboa nyimpa ma oehu Ewuradze ne ndze: 1 Ahemfo 19:11–12; Luke 24:15–32; 3 Nephi 11:3–7; Nkyerɛkyerɛ na Ahyɛmudzi 6:22–23; 8:2–3; 9:7–9.

Mber bi so no, ibotum atse nkã dɛ wɔatow ɔsor mu na Nyankopɔn mmpɛ dɛ Ɔnye wo ny nkitahodzi. President Russell M. Nelson kãa dɛ, “Ana Nyankopɔn pɛ dɛ Ɔnye wo kasa a ampaara? Nyew!’’ (“Revelation for the Church, Revelation for Our Lives,’’ Liahona, Esusow Aketseaba 2018, 93–96. Ber a isũa President Nelson n’asɛm no, ebɛnadze na ihu a okenyan wo ma itsie Ewuradze na eyɛ setsie ma ne ndze? Ebɛnadze na President Nelson to nsa frɛ wo dɛ yɛ, na ebɛn nhyira na ɔdze bɔ anohoba? Ibotum so ehu nsato na anohoba nhyira fa nyikyerɛ ho wɔ “Walk in God’s light” mu (For the Strength of Youth: A Guide for Making Choices, 16–20). Hwɛ dɛ ebɛsan mu eyi adze kor a ibotum ayɛ “dze etu wo sunsum mu ahom mpon dze enya nyikyerɛ.’’

• Ber a enye wo mbofra kyɛ Ruth n’asɛm no (ibotum dze “Ruth and Naomi” wɔ Old Testament Stories mu edzi dwuma, 100–103), to nsa frɛ hɔn ma wɔmma hɔn nsa do ber biara a wɔbɛtse ayamuyie ndzeyɛɛ wɔ asɛm no mu no. Wobotum so akyɛ nkã a wɔtse sɛ binom yɛ ayamuyie ma hɔn, anaa sɛ wɔyɛ ayamuyie ma binom no a. Agyenkwa no esi dɛn ayɛ ayamuyie ama hɛn? Yebesi dɛn bedzi Ne fasusu do? (hwɛ “Kindness Begins with Me,” Children’s Songbook, 145).

  

  2:0

• Ruth na Hannah hɔn nsɛm no botum ekenyan wo mbofra no ma wɔayɛ anokwafo wɔ mber a ɔyɛ dzen mu. Hwɛ dɛ ebɔboa hɔn ma wɔayɛ nhyehyɛɛ a ɔnnyɛ dzen a wɔdze etsir Nsɔhwɛ, Ndzeyɛɛ, Nhyira. Nkyii hom botum abɔ mu akenkan Ruth 1:3–5, 8, 16; 2:1–3, 8–12; 4:13–17; 1 Samuel 1:1–18 na wɔakyerɛ dza wohu no wɔ nyiyimu yinom mu wɔ etsir n’ase. Ruth na Hannah sii dɛn kyerɛɛ hɔn gyedzi wɔ Ewuradze mu? Nkyii ɔwo anaa wo mbofra no botum akyɛ mfatoho fa mbrɛ Ewuradze esi aboa hɔn wɔ mber a ɔyɛ dzen mu ho.

• Ama woeesũa Hannah ho asɛm no, wo mbofra no botum akenkan 1 Samuel 1:1–18 anaa “Hannah” wɔ Old Testament Stories mu (104–5) anaa wɔahwɛ “Hannah’s Faith” (video, Asɛmpa Nwoma Korabea). Obotum ayɛ enyika dɛ ebɔtow bɔɔl ama abofra bi na ato nsa afrɛ no ma wɔakã asɛm ne fã ansaana wɔatow bɔɔl no ama obi so. Ebɛnadze na yesũa fa mpaabɔ ho fi Hannah no fasusu mu?

  

  1:15

  

  3:9

• Bia ɔyɛkyerɛ a ɔnnyɛ dzen botum aboa wo mbofra ma woesũa efi Samuel no sũahu fa nyikyerɛ mu ho. Abofra kor botum epetuw ayɛ dɛ Samuel, na kor so botum epetuw ayɛ dɛ Eli ber a ekenkan 1 Samuel 3:1–10 (san so hwɛ “Samuel the Prophet” wɔ Old Testament Stories mu, 106–9, anaa video no “Samuel and Eli,” Asɛmpa Nwoma Korabea). Ebɛnadze na yesũa fi Samuel hɔ fa mbrɛ yebesi bɛtse Ewuradze ne ndze ho? Yesi dɛn kyerɛ dɛ yɛwɔ pɛ dɛ yɛbɛtsie sɛ Ewuradze kasa kyerɛ hɛn a?

  

  2:10

  

  1:58

• Bisa wo mbofra no mbrɛ wobesi bɛkyerɛkyerɛ mu akyerɛ obi mbrɛ Ewuradze si kasa kyerɛ hɔn no. Ibotum aboa hɔn ma wɔahwehwɛ nyiano no wɔ Nkyerɛkyerɛ na Ahyɛmudzi 6:22–23; 8:2–3; 9:7–9 mu.