1 Samuel 8–10; 13; 15–16

1 Samuel 8 kã dza osii a ɔbɛsesa Israelfo hɔn hyɛbea afebɔɔ. Ama woeenya bambɔ dze etsia hɔn atamfo no, nna Israelfo no pɛ dza nna hɔn fipamfo wɔ—ɔhen ma oedzi hɔn do. Ber a ekenkan hɔn ebisadze na Ewuradze no mbuae ho asɛm no, dwen nyia a ehwɛ no nya bambɔ na akwankyerɛ ho. Hwɛ dza n’ase kyerɛ dɛ ebɛma Ewuradze “edzi [wo] do hen” (1 Samuel 8:7).

Adapɛn a ɔreba no, ebɛkenkan ahemfo dodow a wɔfrɛɛ hɔn dɛ wombedzi Isarel enyim ho asɛm. Ber a esũa hɔnho asɛm no, dwen nsɛmbisa a odzidzi do no ho:

• Ewuradze no kɔkɔbɔ no sii dɛn hyɛɛ mã wɔ 1 Samuel 8:10–18 mu?

• Israelmba hɔn nsanmuyi dɛ wɔpɛ asaase do hen no sii dɛn nyaa nsunsuando wɔ hɔn do?

• Jesus Christ si dɛn yɛ soronko fi asaase ahemfo ho? Hwɛ wiadze nhyɛdo horow a ibehia dɛ iyiyi fi w’abrabɔ mu ama Christ aayɛ wo Hen.

San so hwɛ “Rejoice, the Lord Is King!,” Asɔr Ndwom, nkanee 66.

Kenkan mbrɛ Nyankopɔn sii yii Israel n‘ahemfo wɔ 1 Samuel 9–10 na 16 mu (hwɛ nkanka 9:15–17; 10:1–12; 16:1–13). Hwehwɛ nsɛnsin a ɔboa wo ma etse dza “Nyankopɔn nam nkɔnhyɛsɛm do frɛ” n’ase kyerɛ wɔ Ewuradze n’Asɔr mu ndɛ (Gyedzi ho Nsɛmpɔw 1:5). Ibotum ahwɛ dɛ edze woho bɛhyɛ banodzinyi bi a ɔrema ɔfrɛ n’ananmu (Samuel), nyimpa a wɔrefrɛ no (Saul na David), na nkorɔfo a wɔafrɛ hɔn dɛ wɔnsom hɔn (Israelfo no). Ebɛnadze na isũa fi hɔn nsɛm na hɔn ndzeyɛɛ mu wɔ etsir yinom mu?

Ehwɛ mbrɛ nna Saul si yɛ ohufo wɔ 1 Samuel 10 mu a, ɔyɛ ahobow dɛ ebɛkenkan “n’etuatsew” na “asoɔdzen” wɔ ɔbɛyɛɛ ɔhen ekyir no ho asɛm (1 Samuel 15:23). Edwen ho a ebɛnadze ntsi na iyi sii? 1 Samuel 13:5–14 mu no, ebɛn su na suban na ihu a ɔmaa ɔhwee ase?

1 Samuel 15 mu no, ebɛkenkan afa mbrasɛm ho fi Ewuradze hɔ a Saul enndzi do osiandɛ ɔdween dɛ nna ɔwɔ siantsir papa bi. Ama eesũa eefi Saul ne nsanmuyi horow bɔn mu no, hwɛ nyiyimu 22 na fa ndzɛmba a ɔyɛ dɛ oye naaso ho nnhia dɛ Ewuradze ne ndze ne ntsiei no fahyɛ nkasafua “afɔrbɔ” na “ndwanyin seradze” ananmu. Esi dɛn enya nhyira ber a edze Ewuradze ne pɛ edzi kan wɔ w’abrabɔ mu?

Ana esi gyinae bi a nna ogyina “dza opue [w’]enyiwa do” fa biribi anaa obi ho a, ekyir no ihun dɛ afom a? Bia na idzii biribi a nna ɔnnyɛ papa dɛ mbrɛ nna ihu no no. Anaa bia emmbua obi atsɛn yie.

Mber a nna Samuel rohwhwɛ ɔhen fofor ama Israel no, Ewuradze kyerɛkyerɛɛ no kwan a oye. Kenkan ho asɛm wɔ 1 Samuel 16:6–7 mu, na hwɛ kyerɛw akwan horow a nkorɔfo bu binom atsɛn a wogyina “dza opue enyiwa do” do. Ibotum enya fasusu binom wɔ Elder Christophe G. Giraud-Carrier n’asɛm “We Are His Children” mu (Liahona, Ɔberɛfɛw 2023, 114–16). Ebɔhwɛ “akoma mu” dɛ mbrɛ Ewuradze yɛ no n’asekyerɛ nye dɛn? (1 Samuel 16:7). Ibotum ehu iyi ne fasusu, so, wɔ Elder Giraud-Carrier n’asɛm mu. Bia ibotum adwen mber bi so ho a Agyenkwa no hwɛe traa dza opue enyiwa do wɔ nyimpa bi ho. (Hwɛ, mfatoho, Mark 12:41–44; Luke 5:1–11; 19:1–9; John 4:5–30; Moses 6:31–36.) Ebɛnadze na isũa fi mfatoho yinom mu?

Ibesi dɛn botum edzi Agyenkwa ne fasusu do wɔ kwan a ehwɛ binom mu—na wankasa wo ho mu? Ereyɛ dɛm no besi dɛn benya nsunsuando wɔ ɔwo nye binom hɔn nkitahodzi mu? Hwɛ dɛ ebɛkã papa a ihu no wɔ obi n’akoma mu akyerɛ no.

Hwɛ Ulisses Soares, “Brothers and Sisters in Christ,” Liahona, Ɔberɛfɛw 2023, 70–73 so.

• Ber a enye wo mbofra kenkan 1 Samuel 8 no, boa hɔn ma wɔnhwehwɛ siantsir a Samuel kãa kyerɛɛ Israelfo no dɛ wobenya ɔhen no yɛ adwen bɔn. Ebɛnadze ntsi na oye dɛ yebenya Jesus Christ dɛ hɛn hen? Bia hom botum abɔ mu ayɛ ahenkyɛw na obiara enya kwan ahyɛ bi na hom akyɛ biribi a yebotum ayɛ dze akyerɛ dɛ yɛpɛ dɛ Jesus yɛ hɛn Hen. (Hwɛ Jeremiah 23:5; Nkyerɛkyerɛ na Ahyɛmudzi 45:59 so.)

• Nyankopɔn resan mu eyi Saul na David ma wɔayɛ Ahemfo ho asɛm no botum aboa wo mbofra no ma wɔatse mbrɛ wosi dua nyikyerɛ do frɛ nkorɔfo ma wɔsom wɔ Asɔr no mu ndɛ ase. Ama aakyerɛkyerɛ hɔn nsɛm yinom no, ibotum akyerɛw dza osisii fi nsɛm no wɔ nkrataafa ntsẽantsẽa do, na wo mbfra no botum ahyehyɛ hɔn esiado esiado ber a wɔbɔ mu kenkan kyerɛwsɛm nsɛnsin no (hwɛ “Young David” wɔ Old Testament Stories mu, 110–11 so). Nkyii ibotum akã mber a Nyankopɔn dze sunsum mu tum hyiraa wo ma edze hyɛɛ dwumadzi anaa ɔfrɛ bi mã ho asɛm (hwɛ 1 Samuel 10:9–10).

  

  1:16

• Iyi so botum ayɛ mber pa dɛ ebɛkyerɛkyerɛ wo mbofra gyedzi ho nsɛmpɔw a otsia enum no. Kã mbrɛ isii nyaa wo ɔfrɛ wɔ Asɔr no mu. Isi dɛn hu dɛ Nyankopɔn na ɔfrɛɛ wo?

• Adzesũadze adze bi botum aboa wo mbofra no ma wɔaatse fapem a ɔwɔ 1 Samuel 16:7 no ase. Mfatoho, ibotum dze edziban anaa buukuu bi a wɔakyekyer ho anaa wɔahata ho wɔ adze mu a ɔnnye dza ɔwɔ mu ankasa no nnsaa akyerɛ. Ebɛnadze na 1 Samuel 16:7 na adzesũadze adze yi susu fa mbrɛ ɔsɛ dɛ yɛhwɛ hɛnho na binom so? Tow ndwom a osi fapem yi do tse dɛ “Love One Another” (Children’s Songbook, 136).

  Fa adzesũa ndzɛmba dzi dwuma. Sɛ wo mbofra wɔ biribi a wɔbɔhwɛ na woesuo mu a ɔfa asɛmpa fapem bi ho a, wɔbɛkaa no yie. Mfatoho, ber a enye hɔn kenkan 1 Samuel 16:7 no, ibotum ama wɔaboa wo ma ahwehwɛ mfatoho fa dza wɔdze hɔn enyiwa hu a ɔnntse dɛm dze akyerɛkyerɛ asɛm mu dɛ ɔwɔ dɛ yɛbɔ mbɔdzen hwɛ dɛ mbrɛ Ewuradze hwɛ—ber a yɛhwɛ “akoma mu’’—kyɛn atsɛmbu a ogyina dza “opue enyiwa do” do.

• Ɔwo na wo mbofra botum akyɛ sũahu horow a isũaa siantsir a ɔwɔ dɛ “ehwɛ akoma mu,” na nnyɛ “dza opue enyiwa do” ara (nyiyimu 7). Hom botum so ama obiara akã su papa a hom hu no wɔ hom mu biara n’akoma mu no akyerɛ hom ho.