Ruthit; 1 Samuelit 1–7

Jeta është e vështirë për një të ve në çfarëdo epoke. Por kur vdiq bashkëshorti i Ruthit, gjendja e saj ishte veçanërisht e rëndë. Në kulturën izraelite në atë kohë, një grua pa bashkëshort ose bij nuk kishte të drejtë prone dhe kishte shumë pak mënyra për të siguruar jetesën. Ndërsa lexoni historinë e Ruthit, vini re se si Zoti e ktheu tragjedinë në bekime të mëdha. Çfarë vini re te Ruthi që mund ta ketë ndihmuar atë? Si e shpengoi Boazi Ruthin nga gjendja e saj e dëshpëruar? (Shihni te Ruthit 4:4–10.) Si ishin Ruthi dhe Boazi të ngjashëm me Jezu Krishtin?

Shihni edhe te “Rri Qet’, O Shpirt”, Himne, nr. 64.

Ndoshta ju keni pësuar një humbje të madhe, siç i ndodhi Ruthit dhe Naomit (shihni te Ruthit 1:1–5). Apo ndoshta, ashtu si Ana, ju dëshironi fort bekime që nuk i keni marrë ende (shihni te 1 Samuelit 1:1–10). Si e treguan këto gra besimin e tyre te Perëndia? Çfarë mësoni nga shembujt e tyre?

Sigurisht, jo çdo njeri që lutet për një fëmijë e merr një fëmijë dhe jo çdo njeri që i vdes gruaja apo burri, martohet përsëri. Por çdo njeri që kthehet te Shpëtimtari, e merr ndihmën dhe udhërrëfimin e Tij. Merreni parasysh se si keni arritur t’i mirëbesoni Zotit (shih te Ruthit 2:12) gjatë kohëve tuaja të vështira.

Shihni edhe tek Emi A. Rajt, “Qëndrojini Ditës në Krisht”, Liahona, nëntor 2023, f. 9–11.

Kur i sulmuan armiqtë e tyre, izraelitët me sa duket menduan se thjesht zotërimi i arkës së besëlidhjes do t’i mbronte. Ndërsa lexoni te 1 Samuelit 4–6, mendoni se përse ajo nuk funksionoi. (Vini re gjithashtu veprimet e padrejta të bijve të Elit, të cilët shërbenin si priftërinj në tabernakull, te 1 Samuelit 2:12–25.) Çfarë mendoni se po përpiqej Zoti t’i mësonte popullit të Tij? Çfarë mësoni nga ajo që u ndodhi filistejve pasi e morën arkën? (Shihni kapitujt 5–6.) Çfarë mësoni nga përpjekjet e Izraelit për të fituar mbrojtjen e Zotit te 1 Samuelit 7?

Mund të frymëzoheni nga leximi i poemës së lavdërimit nga Ana te 1 Samuelit 2:1–10. Çfarë gjeni te fjalët e saj që mund t’i ndihmonte bijtë e Elit dhe pjesën tjetër të izraelitëve?

Me raste mund të ndiheni si Samueli, i cili e dëgjoi zërin e Zotit por nuk e dalloi atë. Si të gjithë ne, Samuelit iu desh të mësonte se si ta dallonte zërin e Zotit. Ndërsa studioni te 1 Samuelit 3, çfarë mësoni nga ky djalosh rreth dëgjimit dhe bindjes ndaj zërit të Zotit? Gjithashtu mund të hetoni këto shkrime të tjera të shenjta dhe të bëni një listë të udhëzimeve që mund ta ndihmojnë një person të dallojë zërin e Zotit: 1 Mbretërve 19:11–12; Lluka 24:15–32; 3 Nefi 11:3–7; Doktrina e Besëlidhje 6:22–23; 8:2–3; 9:7–9.

Në raste të tjera, mund të ndieni se qiejt janë të mbyllur dhe se Perëndia nuk dëshiron të komunikojë me ju. Presidenti Rasëll M. Nelson tha: “A do Perëndia vërtet të flasë me ju? Po!” (“Zbulesë për Kishën, Zbulesë për Jetën Tonë”, Liahona, maj 2018, f. 95). Ndërsa e studioni mesazhin e Presidentit Nelson, çfarë gjeni që ju frymëzon ta dëgjoni dhe t’i bindeni zërit të Zotit? Çfarë ju fton Presidenti Nelson të bëni dhe çfarë bekimesh premton ai? Gjithashtu mund të gjeni ftesa dhe bekime të premtuara rreth zbulesës tek “Ecni në dritën e Perëndisë” (Për Forcën e Rinisë: Një Udhëzues për Bërjen e Zgjedhjeve, f. 16–20). Merreni parasysh të zgjidhni një gjë që mund të bëni që ta “rritni aftësinë tuaj shpirtërore për të marrë zbulesë”.

• Teksa u tregoni fëmijëve tuaj historinë e Ruthit (mund të përdorni mësimin “Ruthi dhe Naomi” tek Tregime nga Dhiata e Vjetër, f. 100–103), ftojini të ngrenë duart sa herë të dëgjojnë një vepër dashamirësie në atë ngjarje. Ata gjithashtu mund të tregojnë se si ndihen kur të tjerët janë dashamirës me ta ose kur ata janë dashamirës ndaj të tjerëve. Si ka qenë Shpëtimtari dashamirës ndaj nesh? Si mund ta ndjekim shembullin e Tij? (Shihni te “Mir’sia Fillon tek Ti”,Libri i Këngëve të Fëmijëve, f. 83.)

  

  2:0

• Ngjarjet e Ruthit dhe të Anës mund t’i frymëzojnë fëmijët tuaj që të qëndrojnë besnikë gjatë kohëve të vështira. Merreni parasysh t’i ndihmoni ata të krijojnë një tabelë të thjeshtë me titujt Sprovat, Veprimet dhe Bekimet. Më pas mund të lexoni së bashku vargjet te Ruthit 1:3–5, 8, 16; 2:1–3, 8–12; 4:13–17; 1 Samuelit 1:1–18 dhe të shkruani poshtë titujve atë që gjejnë te këto vargje. Si e treguan Ruthi dhe Ana besimin e tyre te Zoti? Ju ose fëmijët tuaj mund të tregoni më pas shembuj se si Zoti ju ka bekuar gjatë kohëve të vështira.

• Për të mësuar rreth Anës, fëmijët tuaj mund të lexojnë te 1 Samuelit 1:1–18 ose “Ana” tek Tregime nga Dhiata e Vjetër (104–105) apo të shohin “Hannah’s Faith” [“Besimi i Anës”] (material filmik, Gospel Library [Biblioteka e Ungjillit]). Mund të jetë argëtuese që t’i hidhni një top një fëmije dhe ta ftoni të tregojë pjesë të tregimit përpara se t’ia kalojë topin dikujt tjetër. Çfarë mësojmë rreth lutjes nga shembulli i Anës?

  

  1:15

  

  3:9

• Ndoshta një interpretim i thjeshtë me role mund t’i ndihmojë fëmijët tuaj që të mësojnë nga përvoja e Samuelit me zbulesën. Një fëmijë mund të hiqet sikur është Samueli dhe një tjetër të hiqet sikur është Eli teksa lexoni te 1 Samuelit 3:1–10 (shihni edhe mësimin “Samuel, Profeti” tek Tregime nga Dhiata e Vjetër, f. 106–109 ose materialin filmik “Samuel and Eli” [“Samueli dhe Eli”], Gospel Library [Biblioteka e Ungjillit]). Çfarë mësojmë nga Samueli rreth mënyrës se si ta dëgjojmë zërin e Zotit? Si e tregojmë se jemi të gatshëm të dëgjojmë kur Zoti na flet?

  

  2:10

  

  1:58

• Pyetini fëmijët tuaj se si do t’ia shpjegonin dikujt mënyrën se si Zoti u flet atyre. Mund t’i ndihmoni të kërkojnë përgjigje te Doktrina e Besëlidhje 6:22–23; 8:2–3; 9:7–9.