Josue 1–8; 23–24

K’oxla li kireek’a laj Josue naq kib’oqe’ chi k’anjelak sa’ xna’aj laj Moises. K’e reetal k’a’ru kixye li Qaawa’ sa’ Josue 1:1–9 re xwaklesinkil xch’ool. K’oxlaheb’ laa ch’a’ajkilal; k’a’ru nakawil sa’eb’ li raqal a’in li naxk’e xkawilal aach’ool?

Li k’ab’a’ej Josue (Yehoshua malaj Yeshua sa’ Hebreo) naraj naxye “li Jehova nakolok.” Ut li k’ab’a’ej Jesus nachal rik’in Yeshua. Chi jo’kan, naq nakawil resil laj Josue, k’oxla lix k’anjel re xb’eresinkileb’ li ralal xk’ajol laj Israel chixjunpak’al li nima’ Jordan toj sa’ li yeechi’inb’il ch’och’. Chan ru naq lix k’anjel a’an chanchan li naxb’aanu li Kristo choq’ qe?

Naq kixkawresi xch’ool laj Josue, li Qaawa’ kixk’e xna’leb’ sa’ Josue 1:8 chirix li loq’laj hu malaj “xhuhil li chaq’rab’.” Rik’in naq jwal kaw li teneb’anb’il sa’ xb’een laj Josue, k’a’ut naq chaab’il li na’leb’ a’in choq’ re?

Naq li Qaawa’ nokoxb’oq chirilb’aleb’ li loq’laj hu, naroksiheb’ li aatin moko yal ta neke’aatinak chirix li ilok ru hu. Naxyeechi’i ajwi’ ninqi osob’tesink. Li kaaxukuut rub’el a’in naru nakatxtenq’a chixk’eeb’al reetaleb’ li b’oqok a’in ut li osob’tesink yeechi’inb’ileb’:

Chan ru naq li Qaawa’ ak xtz’aqob’resi ru li yeechi’ihom a’in sa’ laa yu’am? A’inaq raj jun chaab’il hoonal re xtz’ilb’al rix chan ru naq yookat chi tzolok sa’eb’ li loq’laj hu. K’a’ru yoo chi k’anjelak chi us? K’a’ru nakaweek’a naq tento taab’aanu re xchaab’ilob’resinkil laa tzolb’al chirix li raatin li Dios?

Chi’ilmanq ajwi’ “Naq nintzol li loq’laj hu,” Eb’ li B’ich, 179.

Eb’ laj Kristiano sa’ li Ak’ Chaq’rab’ ke’ril li xRahab jo’ reetalil lix wankilal li paab’ank ut li k’anjelak (chi’ilmanq Hebreos 11:31; Santiago 2:25). Naq nakawil Josue 2, k’oxla chan ru naq lix paab’aal ut lix k’anjel xRahab ke’xkol a’an, lix junkab’al, ut eb’ laj muqmuukil k’ehol eetal aj Israelita. K’a’ru naxk’ut a’in chawu chirix lix wankilal laa paab’aal chirix li Kristo ut laa k’anjel sa’ laa yu’am ut sa’ xyu’ameb’ laa was aawiitz’in?

Li Qaawa’ kixk’anjela k’iila sachb’a-ch’oolej sa’ xyanq lix tenamit naq kixb’eresiheb’ toj sa’ li yeechi’inb’il ch’och’, ut naru ajwi’ naxk’anjelaheb’ sa’ laa yu’am. Eb’ li patz’om naru nakate’xtenq’a naq yooqat chirilb’al Josue 3–4:

• K’a’ut naq ki’ajman naq eb’ laj Israelita te’xsantob’resi rib’ naq maji’ neke’xq’ax ru li nima’ Jordan? (chi’ilmanq Josue 3:5).

• K’e reetal naq li nima’ ka’ajwi’ kixjach rib’ chirix naq “li roqeb’ laj tij ke’xch’e’ li ha’ chire li nima’” (Josue 3:13, 15). K’a’ut naq kik’ulman chi jo’kan?

• Ke’k’ulman xkomoneb’ chik li na’leb’ ninqeb’ xwankil aran chire li nima’ Jordan—chi’ilmanq 2 Reyes 2:6–15; 5:1–14; ut Markos 1:9–11. Chan ru naq neke’xchapi rib’ li numsihom a’an?

• Chan ru naq li Qaawa’ ak xb’aanu “sachb’a-ch’oolej” sa’ laa yu’am? (Josue 3:5). Chan ru naru nakak’ul—malaj nakak’e reetal—eb’ li sachb’a-ch’oolej a’in chi kok’ aj xsa’ chik? (chi’ilmanq Josue 3:17).

Sa’ Josue 6–8 wan resileb’ li pleet re reechaninkileb’ li tenamit Jeriko ut Ay. Naq nakawileb’ li ch’ol a’in, k’oxla chan ru naq nakatz’eqtaana li aaleek sa’ laa yu’am (chi’ilmanq Josue 7:10–13). K’a’ru nakatzol chirix li Dios, chirix lix tenq’ choq’ aawe, ut chirix roksinkil lix wankilal? K’a’ru nawulak chawu chirix li raatin li Qaawa’ chirix reechaninkil Jeriko? (chi’ilmanq Josue 6:1–5). Maare li seraq’ sa’ Josue 7 tatreek’asi chixtz’ilb’al rix ma wan “li tz’i’b’eetalil” sa’ laa yu’am li tento taawisi (Josue 7:13).

Naq raqe’k re xyu’am laj Josue sa’ Josue 23–24, a’an kixq’useb’, kixk’e xna’leb’eb’, ut kixyeechi’i rosob’tesinkileb’ laj Israelita. Maare naru nakatz’iib’a resil li na’leb’ nakataw. Rik’in chixjunil li ke’xnumsi eb’ laj Israelita, k’a’ut naq laj Josue kiraj xyeeb’al li k’a’aq re ru a’in reheb’ sa’ xraqik lix yu’am? K’a’ru nakataw li nareek’asi aach’ool “chi jilok rik’in li Qaawa’”? (Josue 23:8).

Chi’ilmanq ajwi’ Dale G. Renlund, “Sik’omaq ru anajwan,” Jolomil ch’utub’aj-ib’ re octubre 2018.

• Naru nakab’aanu a’in re xtenq’ankileb’ laa kok’al “chixyalb’aleb’ xq’e ut chi kawuuk xch’ooleb’” (Josue 1:6) rik’in li Jesukristo. Patz’ reheb’ naq te’xtaw jun ch’ol aatin ka’sutinb’il sa’ Josue 1:6, 9, ut 18, ut naq te’xtz’iib’a malaj te’xk’e a’an sa’ xch’ooleb’. Tenq’aheb’ laa kok’al chixk’oxlankil jo’q’e te’raj raj ru li na’leb’ a’in, jo’ kiraj ru laj Josue. Naru ajwi’ neketz’ileb’ rix li seraq’ sa’ Josue 1–4; 6 (chi’ilmanq ajwi’ “Li profeet aj Josue” ut “Li xRahab ut eb’ laj muqmuukil k’ehol eetal” sa’ Eb’ li Esilal sa’ li Najter Chaq’rab’, 85–91). Chan ru ke’xk’ut li kristiaan sa’eb’ li seraq’ a’an naq kaweb’ xch’ool rik’in li Jesukristo?

  

  2:59

  

  1:39

• Rilb’al Josue 1:8 naru naxwaklesi xch’ooleb’ laa kok’al chirilb’aleb’ li loq’laj hu xjuneseb’ rib’. Tenq’aheb’ chixtawb’aleb’ li aatin sa’ li raqal a’in li neke’xk’ut chiruheb’ chan ru ut k’a’ut naq tento taqileb’ li loq’laj hu. Naru ajwi’ neke’xsik’ li na’leb’ a’an sa’ 1 Nefi 15:23–24; 2 Nefi 31:20; 32:3; Jakob 4:6; Helaman 3:29–30. Naru ajwi’ nakatenq’aheb’ chixk’uub’ankil xna’leb’eb’ chirix rilb’aleb’ li loq’laj hu.

• Naru nakawoksi li seraq’ chirixeb’ laj Israelita naq ke’xq’ax ru li nima’ Jordan jo’ reetalil li kub’iha’—xkanab’ankil li qayu’am q’eel sa’ li yamyookil ch’och’ ut xtikib’ankil jun yu’am ak’ sa’ sumwanjik rik’in li Dios. Naq yooqex chirilb’al Josue 3–4 (malaj “Li profeet aj Josue” sa’ Eb’ li Esilal sa’ li Najter Chaq’rab’, 85–89), naru ajwi’ teeril xjalam-uuch li Jesukristo naq kikub’e xha’ ut taach’olob’ naq li nima’ kikub’e wi’ xha’ li Jesus, a’an ajwi’ li nima’ ke’xq’ax ru laj Israelita. Chirix a’an naru nekeb’icha jun li b’ich jo’ “Li kub’iha’” (B’ichleb’aal choq’ reheb’ li Kok’al, 54–55). Wotzomaq cherib’il eerib’ chan ru naq li kub’iha’ chanchan xtikib’ankil jun yu’am ak’ sa’ lix awa’b’ejihom li Jesukristo.

  

  2:59

• K’a’ru naru nakab’aanu re xtenq’ankileb’ laa kok’al chixtaaqenkil li Jesukristo, jo’ kixpatz’ laj Josue reheb’ laj Israelita? Naru nakapatz’ reheb’ naq:

  • Te’xkanab’ sa’ xch’ooleb’ jun ch’ol aatin re Josue 24:15. Yal xb’aanunkil li k’a’ru tixsahob’resi xch’ooleb’ laa kok’al. A’ yaal jarub’ chihab’ wan reheb’ a’anaq xk’ihaleb’ li aatin te’xkanab’ sa’ xch’ooleb’.

  • Te’xtaweb’ li seraq’ chirixeb’ li kristiaan li ke’xsik’ ru k’anjelak chiru li Jesukristo. Naru te’xtaw a’an sa’ li hu Amigos, li Hu reheb’ li Jalam-uuch re li Evangelio, malaj Eb’ li Esilal sa’ li Najter Chaq’rab’ ut xkomoneb’ chik li hu chirix li loq’laj hu.

  • Te’xk’oxla hoonal te’ruuq wi’ chixsik’b’al ru xtaaqenkil ut k’anjelak chiru li Kolonel.