Exodo 35–40; Levitico 1; 4; 16; 19

Sa’ Exodo 25–31 nayeeman resil lix yalb’aleb’ xq’e laj Israelita re xyiib’ankil li loq’laj muheb’aal, b’ar wi’ te’santob’resiiq li tenamit xb’aan li santil k’ojob’anb’il k’anjel. Naq yooqat chirilb’aleb’ li ch’ol a’in, k’e reetaleb’ li k’a’aq re ru kixpatz’ li Qaawa’ naq lix tenamit te’xk’e sa’ li loq’laj muheb’aal. K’a’ru neke’reetali li k’a’aq re ru a’an? K’a’ru neke’xye chirix li k’iik sa’ santilal? K’oxla ajwi’ chan ru neke’xjayali laa k’a’uxl rik’in li Kolonel. Jun kaaxukuut jo’ a’in maare tatxtenq’a:

Yaal naq moko santob’resinb’ilo ta yal xb’aan li wank sa’ jun santil na’ajej. Sa’ Levitico 19 wankeb’ li chaq’rab’ ut taqlahom kixk’e li Qaawa’ reheb’ laj Israelita re te’tamq xsantilaleb’. K’a’ru nakataw sa’eb’ li taqlahom a’in li naru tatxtenq’a chixsik’b’al li santilal rik’in li Qaawa’? K’a’ru nakaweek’a naq tento taab’aanu re xyu’aminkileb’ li taqlahom a’an?

Chi’ilmanq ajwi’ Henry B. Eyring, “Li santilal ut li k’uub’anb’il na’leb’ re sahil ch’oolejil,” Jolomil ch’utub’aj-ib’ re octubre 2019, 100–103; “El tabernáculo” (video), Biblioteca del Evangelio.

7:19

Jun chihab’ chirix relikeb’ sa’ Egipto, ink’a’ jwal chaab’il li komonil ke’wan wi’ laj Israelita rik’in li Jehova. A’ut, naq nakawil Exodo 35:4–35 ut 36:1–7, k’e reetal chan ru naq eb’ laj Israelita ke’xpaab’ li taqlahom re xyiib’ankil li loq’laj muheb’aal. K’a’ru nakatzol rik’ineb’ laj Israelita li naru tatxtenq’a chi k’anjelak chiru li Qaawa’?

Maare ink’a’ naxpatz’ aawe li ch’iich’, li t’ikr, ut li che’ tertookeb’ xtz’aq re xyiib’ankil jun loq’laj muheb’aal. K’a’ru xk’e li Qaawa’ aawe, ut k’a’ru naxpatz’ naq taak’e laa’at? Ma wan hoonal naq laa ch’ool “xatreek’asi … chixb’aanunkil [li] k’anjel”?

Chi’ilmanq ajwi’ Temas y preguntas, “Sacrificio,” Biblioteca del Evangelio.

Sa’ Exodo 40:12–14 nayeeman resileb’ li najteril k’ojob’anb’il k’anjel li neke’k’anjelaman ajwi’ sa’ li kutan a’in sa’ li rochoch li Qaawa’. Eb’ li raqal a’in naru tate’xtenq’a chixtzolb’al chan ru naq li k’ojob’anb’il k’anjel a’in neke’xch’olob’ xyaalal li Jesukristo:

• Li ch’ajok: Salmos 51:2; Esekiel 36:25–27

• Li tiqib’ank-ib’ sa’ li loq’laj t’ikr: Isaias 61:10; Mateo 22:11–14; Apokalipsis 19:7–8

• Li yuluk: Lukas 4:18–19; Hechos 10:38

Maare jwal jalan choq’ qe lix k’ihal li hu Levitico—eb’ li k’atb’il mayej, eb’ li santil k’anjel rik’in kik’ ut ha’, ut eb’ li chaq’rab’ chirix chixjunil li tento te’xb’aanu wulaj wulaj. A’b’anan, eb’ li santil k’anjel ut chaq’rab’ a’in ke’wan re xk’utb’aleb’ li na’leb’ li naqanaw laa’o—li jalb’a-k’a’uxlej, li santilal, ut lix tojb’al rix li maak xb’aan li Kolonel. Re xtawb’aleb’ li na’leb’ a’in naq yooqat chirilb’al Levitico 1:1–9; 4; 16, k’oxlaheb’ li patz’om a’in:

• K’a’ chi aatin nintaw li naxk’e chinjultika li Jesukristo ut lix mayej re xtojb’al qix?

• K’a’ru nintzol rik’ineb’ li aatin a’in chirix lix mayej li Kolonel?

• Chan ru naq chanchanin li kristiaan li ke’xq’axtesi xmayej?

Li Qaawa’ ink’a’ chik naxpatz’ naq te’qamayeja li xul. A’b’an li mayejak toj nim xwankil sa’ li evangelio. Re xtawb’al k’a’ paay chi mayej naxpatz’ li Qaawa’, tz’il rix 3 Nefi 9:19–20; Tzol’leb’ ut Sumwank 64:34. Ma yookat chixq’axtesinkileb’ li mayej a’an? Jo’ naxye sa’ Moises 5:7, chan ru naq taawileb’ laa mayej?

Chi’ilmanq ajwi’ “Na’leb’ re xk’oxlankil: Li loq’laj muheb’aal ut li mayejak.”

• Sa’ xraqik li tusleb’ aatin a’in wan xjalam-uuch li loq’laj muheb’aal ke’xyiib’ laj Israelita sa’ li yamyookil ch’och’. Naru nakawil a’an rik’ineb’ laa kok’al ut nakapatz’ reheb’ k’a’ru ki’ajman re xyiib’ankil li loq’laj muheb’aal. Chirix a’an naru nekeril Exodo 35:20–29 re xtawb’al chan ru naq ke’xtaw li ki’ajman. K’a’ru naxpatz’ li Qaawa’ qe naq taqab’aanu re xwaklesinkil lix awa’b’ejihom?

• Naru nekeril Exodo 36:1 re xtawb’al k’a’ru kixk’e li Qaawa’ re laj Besalel ut laj Oholiab re naq te’ruuq chixyiib’ankil li loq’laj muheb’aal. Naru nakat-aatinak rik’ineb’ laa kok’al chirix li nakaweek’a naq li Dios naxk’e reheb’ re xwaklesinkil lix awa’b’ejihom. Chan ru naru naqoksi li xk’e qe re rosob’tesinkileb’ li qas qiitz’in?

• Sa’ Exodo 40:17–34 nayeeman resil li k’a’aq re ru ke’tawman sa’ lix loq’laj muheb’aaleb’ laj Israelita. Naru neketaw li k’a’aq re ru a’an sa’ li loq’laj hu ut sa’ xjalam-uuch li loq’laj muheb’aal sa’ xraqik li tusleb’ aatin a’in. Wotz chan ru naq chixjunileb’ lix cha’al li loq’laj muheb’aal naru neke’aatinak chirix li Kolonel malaj li qaChoxahil Yuwa’. Li arca re li xnawom ch’oolej naru naxjultika qe lix taqlahom li Dios, li altar naru naxjultika qe lix mayej li Jesukristo, ut chi jo’kan.

• B’ar wankeb’ li santil na’ajej li nokohe’xtenq’a chi jilok rik’in li Qaawa’ sa’ li kutan a’in? Naq yooqex chi aatinak chirix a’in, naru ajwi’ nekeril li video “Templos” (Biblioteca del Evangelio). Naru ajwi’ nekeb’icha jun li b’ich chirix li santil ochoch. Wotzomaq cherib’il eerib’ k’a’ru nekereek’a chirixeb’ li na’ajej sant, jo’ li santil ochoch.

5:41

• Lix mayejankileb’ li xul li kib’aanuman sa’ li Najter Chaq’rab’, a’an re xk’utb’al chiruheb’ li ralal xk’ajol laj Israel naq lix kuyb’al qamaak nachal rik’in li Jesukristo. K’oxla chan ru naq rilb’al resileb’ li mayej a’in naru tixb’aanu ajwi’ a’an choq’ reheb’ laa kok’al. Naru nakak’uteb’ xjalam-uuch li Jesukristo aran Getsemani ut chiru li krus (chi’ilmanq Hu reheb’ li Jalam-uuch re li Evangelio, 56, 57) naq yooqat chirilb’al Levitico 1:1–4 rik’ineb’ laa kok’al. Tenq’aheb’ chixtawb’al li aatin naxk’eheb’ chixjultika lix mayej li Jesukristo.

• Naru ajwi’ nekeril 3 Nefi 9:19–20 re xtawb’al k’a’ru nokotaqlaak chixmayejankil ruuchileb’ li xul. K’a’ru naraj naxye naq taqaq’axtesi jun ch’oolej yot’b’il ut jun musiq’ej tuulan re li Qaawa’? Chi’ilmanq K’utul Raqal reheb’ li Loq’laj Hu, “Yotʼbʼil chʼoolej” (Biblioteca del Evangelio) re xsumenkil li patz’om a’in.