5. Mósebók 6–8; 15; 18; 29–30; 34

Lögmál Móse hafði að geyma margar ytri helgiathafnir og helgisiði. Eins og þið sjáið í leiðsögn Móse í 5. Mósebók, þá lét Drottinn sig líka skipta innra ástand fólksins – andlegt ástand hjartna þess.

Gætið að orðinu hjarta í næstu köflum og íhugið hvað það gæti táknað. Þið gætuð hugsað um þessi ritningarvers sem eins konar andlega skoðun á hjarta ykkar. Hvernig mynduð þið greina ykkur sjálf? Hvaða meðferðum mynduð þið ávísa til að bæta andlegt heilbrigði hjarta ykkar? Skrifið hughrif ykkar:

• 5. Mósebók 6:4–7:

• 5. Mósebók 8:2–5:

• 5. Mósebók 8:11–17:

• 5. Mósebók 29:17–19:

• 5. Mósebók 30:6–10:

• 5. Mósebók 30:14–20:

Eitt sem þið gætuð gert til að koma reglu á hugsanir ykkar, er að teikna hjarta og rita á það það sem Drottinn segir að þið ættuð að hafa í hjarta ykkar. Þið gætuð síðan skrifað utan við það það sem þið ættuð ekki að hleypa inn í hjarta ykkar.

Hvernig sýnið þið að þið elskið Guð af öllu hjarta? Fyrir hugmyndir, sjá þá „Elska Guð, elska náunga þinn“ í Til styrktar ungmennum: Leiðarvísir að ákvarðanatökum, 10–12.

Sjá einnig M. Russell Ballard, „Elskar þú mig meira en þessir?,“ aðalráðstefna, október 2021.

Flestir Ísraelsmannanna sem myndu komast í fyrirheitna landið höfðu ekki orðið vitni að plágunum í Egyptalandi eða farið yfir Rauðahafið. Móse var ljóst að þeir – og komandi kynslóðir – þyrftu að hafa kraftaverk og lögmál Guðs hugföst, til að geta talist lýður Guðs áfram.

Hvaða leiðsögn finnið þið í 5. Mósebók 6:4–12, 20–25 sem gæti hjálpað ykkur að minnast alls þess dásamlega sem Guð hefur gert fyrir ykkur? Hvað eruð þið hvött til að gera til að orð Drottins verði ykkur „hugföst“ dag hvern? (vers 6).

Þið gætuð líka lært boðskap bróður Jan E. Newman „Varðveita rödd sáttmálsþjóðarinnar í hinni upprennandi kynslóð“ (aðalráðstefna, október 2023) og íhugað hvernig þið hyggist yfirfæra trú ykkar á Krist yfir á komandi kynslóðir.

Sjá einnig 5. Mósebók 11:18–21; Dale G. Renlund, „Íhugið gæsku og mikilleika Guðs,“ aðalráðstefna, apríl 2020; Bible Dictionary, „Frontlets or phylacteries.“

Enn er sá dagur ekki runninn upp að „enginn [ykkar] á meðal [eigi] að vera fátækur“ (5. Mósebók 15:4), af þeim sökum eru reglurnar til hjálpar fátækum í 5. Mósebók 15 enn gagnlegar, jafnvel þótt ákveðnar venjur hafi breyst. Gætið að því hvað vers 1–15 kenna um ástæðu þess að við hjálpum fólki í neyð og hvert viðhorf okkar ætti að vera.

Hver er merking þess að „upp ljúka hendi [sinni]“ fyrir hinum nauðstöddu? (vers 8, 11). Hvað lærið þið af fordæmi Drottins um að hjálpa fólki í neyð? (sjá vers 15).

Sjá einnig „Hef ég drýgt nokkra dáð?,“ Sálmar, nr. 91.

Pétur, Nefí, Moróní og frelsarinn sjálfur vitnuðu allir í spádóminn í 5. Mósebók 18:15–19 (sjá Postulasagan 3:20–23; 1. Nefí 22:20–21; Joseph Smith – Saga 1:40; 3. Nefí 20:23). Hvað lærum við um frelsarann af þessum versum? Hugsið um það sem þið hafið lesið um Móse undanfarnar vikur. Hvernig er Móse „slíkur sem“ Jesús Kristur?

Áhugavert gæti verið að gera samanburð á orðum Móse í 5. Mósebók 29:8; 30:15–20 og nokkrum af síðustu kenningum Lehís til fjölskyldu sinnar í 2. Nefí 2:26–29; 4:4. Á hvaða hátt jók Lehí við kennslu Móse? Hvað finnið þið í þessum ritningarhlutum sem innblæs ykkur til að „velja lífið“? (5. Mósebók 30:19).

• Til að hjálpa börnum ykkar að skilja 5. Mósebók 6:5, gætuð þið teiknað hjarta, útlínur af líkama og sterkan handlegg. Börn ykkar gætu bent á myndirnar þegar þið lesið orð eins og „hjarta“, „sálu“ og „mætti“. Hvernig sýnum við Drottni að við elskum hann af öllu hjarta, sálu og mætti?

• Lesið með börnum ykkar leiðsögn Drottins til Ísraelsmanna um að setja ritningarhluta þar sem þeir blasa við augum þeirra dag hvern (sjá 5. Mósebók 6:6–9). Það gæti hvatt ykkur og börn ykkar til að hugsa um leiðir til að tryggja að þið „gleymið ekki Drottni“ (vers 12) og minnist þess sem hann hefur gert fyrir ykkur.

• Þið gætuð bent á að 5. Mósebók 6:13, 16 og 8:3 hafi hjálpað frelsaranum á mikilvægri stund í lífi hans. Lesið saman Matteus 4:1–10 til að sjá hvernig. Þið gætuð síðan miðlað hvert öðru einhverjum ritningarhlutum sem hafa hjálpað ykkur á tíma neyðar.

• Þegar þið lesið saman 5. Mósebók 18:18, hjálpið þá börnum ykkar að skilja að spámaðurinn í þessu versum sem verður líkur Móse er Jesús Kristur. Þið gætuð ef til vill skoðað myndir af því sem Móse gerði og því sem Jesús Kristur gerði og látið börn ykkar tengja þær saman (sjá Trúarmyndabók, nr. 15, 16, 38,39). Hvað hefur spámaður okkar í dag kennt um frelsarann?

• Að ræða um 5. Mósebók 29:11–12 veitir börnum ykkar tækifæri til að ræða sáttmálana sem þau munu gera eða hafa gert við himneskan föður. Hvað felst í því að vera fólk Guðs? Hvernig gera loforðin okkur að fólki Guðs? (sjá vers 12; sjá einnig Mósía 18:8–10).

• Ef börn ykkar þurfa hjálp við að skilja hvað sáttmáli er, leggið þá til að þau finni skilgreiningu í „Sáttmáli“ í Leiðarvísi að ritningunum (Gospel Library). Hvaða loforð gáfu Guð og Ísraelsmenn sín á milli í 5. Mósebók 30:8–10? Hvaða loforð höfum við gefið Guði? (sjá Kenning og sáttmálar 20:37, 77). Hvernig tengja þessi loforð okkur við hann? Íhugið að syngja saman söng um sáttmála, t.d. „Standing on the Promises“ (Gospel Library).