4. Mósebók 11–14; 20–24; 27

Gætið að vandanum sem Móse glímdi við í 4. Mósebók 11:11–17, 24–29 og lausninni sem Guð lagði til. Hvað haldið þið að Móse hafi átt við er hann óskaði þess „að öll þjóð Drottins væri spámenn“? (vers 29). Þegar þið íhugið þessa spurningu, leitið þá mögulegra svara í boðskap Russells M. Nelson forseta „Opinberun fyrir kirkjuna, opinberun fyrir eigið líf“ (aðalráðstefna, apríl 2018).

Að segja að við getum öll hlotið opinberun merkir þó ekki að við getum öll leitt fólk Guðs á þann hátt sem Móse gerði. Atburðurinn í 4. Mósebók 12 varpar skæru ljósi á þetta. Hvaða aðvaranir finnið þið í þessum kafla? Hvað finnst ykkur að Drottinn vilji að þið skiljið um persónulega opinberun og að fylgja spámanninum?

Sjá einnig 1. Nefí 10:17; Kenning og sáttmálar 28:1–7; Dallin H. Oaks, „Samskiptarásirnar tvær,“ aðalráðstefna, október 2010.

Sumir verða hissa á því að komast að því að Móse, hinn mikli leiðtogi sem stóð frammi fyrir faraó og framkvæmdi undursamleg kraftaverk með krafti Drottins, hafi líka verið „hógvær“ (4. Mósebók 12:3). Hvað merkir að vera hógvær? Íhugið að kynna ykkur útskýringar öldungs Davids A. Bednar í „Hógvær og af hjarta lítillátur“ (aðalráðstefna, apríl 2018) eða í „Hógvær, hógværð“ í Leiðarvísi að ritningunum (Gospel Library).

Hvað lærið þið af fordæmi Móse um hógværð í 2. Mósebók 18:13–25; 4. Mósebók 11:26–29; 4. Mósebók 12; Hebreabréfinu 11:24–27; og HDP Móse 1:10–11? Þið gætuð líka íhugað hvernig frelsarinn sýndi hógværð (sjá Matteus 11:29; 27:11–14; Lúkas 22:41–42; Jóhannes 13:4–5). Hvað kenna þessi dæmi ykkur?

Þegar þið lesið 4. Mósebók 13–14, reynið þá að setja ykkur í spor Ísraelsmanna. Af hverju haldið þið að þeir hafi viljað „snúa aftur til Egyptalands“? (4. Mósebók 14:3). Hvernig mynduð þið lýsa því sem kallað var annar „andi“ sem Kaleb bjó yfir? (4. Mósebók 14:24). Hvað hrífur ykkur varðandi trú Kalebs og Jósúa og hvernig gætuð þið tileinkað ykkur fordæmi þeirra í aðstæðum ykkar?

Spámenn Mormónsbókar þekktu frásögnina sem skráð er í 4. Mósebók 21:4–9 og skildu andlegt mikilvægi hennar. Lesið kenningar þeirra um þessa sögu í 1. Nefí 17:40–41; Alma 33:18–22; og Helaman 8:13–15. Hér eru nokkrar spurningar til að hugleiða við það:

• Hvað gæti eirormurinn táknað?

• Hvað gætu snákabitin táknað?

• Ísraelsmenn urðu að „horfa til til eirormsins“ (4. Mósebók 21:9) til að læknast. Af hverju haldið þið að sumir hafi neitað að horfa til hans? Hefur eitthvað svipað nokkurn tíma komið fyrir ykkur?

• Hvað finnst ykkur þið hvött til að gera betur við að „líta … til Guðssonarins í trú“ og læknast? (Helaman 8:15).

Lestur þessara ritningarhluta gæti minnt ykkur um önnur tilvik í ritningunum þar sem fólk þurfti að einblína stöðugt á Krist. Dæmi: Berið saman boðskapinn í 4. Mósebók 21:4–9 og Matteusi 14:25–31 og 1. Nefí 8:24–28 (sjá einnig myndir aftast í lexíudrögum þessarar viku). Hvað hefur tilhneigingu til að draga okkur frá Kristi? Hvernig blessar hann fólk sem einblínir stöðugt á hann?

Sjá einnig „Alsælu fyllist öndin mín,“ (Sálmar, nr. 42).

Þegar Balak, konungur í Móab, frétti að Ísraelsmenn nálguðust, kallaði hann á Bíleam, mann sem var þekktur fyrir að lýsa yfir blessunum og bölvunum. Balak vildi að hann lýsti yfir bölvun á Ísraelsmenn. Gætið að því hvernig Balak reyndi að sannfæra Bíleam (sjá 4. Mósebók 22:5–7, 15–17) og íhugið mögulegar freistingar ykkar til að breyta gegn vilja Guðs. Hvað hrífur ykkur varðandi viðbrögð Bíleams í 4. Mósebók 22:18, 38; 23:8, 12, 26; 24:13? Því miður lét Bíleam að endingu undan þrýstingi og sveik Ísraelsmenn (sjá 4. Mósebók 31:16; Júdasarbréfið 1:11). Íhugið hvernig þið getið verið trúföst Drottni, þrátt fyrir þrýsting frá öðrum.

• Spyrjið börn ykkar að því hvort þau muni eftir einhverjum þeirra kraftaverka sem Drottinn gerði til að hjálpa Ísraelsmönnum (sjá „Plágur Egyptalands“ og „Páskahátíð Gyðinga“ í Sögur úr Gamla testamentinu, 67–74). Þið gætuð síðan gert samantekt fyrir þau á 4. Mósebók 11:4–10 og lagt áherslu á að Ísraelsmenn höfðu gleymt blessunum sínum og voru möglandi. Hvaða blessunum gleymum við stundum?

• Þegar þið syngið eða hlustið á söng um þakklæti, t.d. „Er í stormum lífs þíns“ (Sálmar, nr. 27), gætu börn ykkar teiknað myndir af blessunum sem Drottinn hefur veitt þeim.

• Til að kynna 4. Mósebók 12, gætuð þið sagt börnum ykkar að Drottinn var ekki ánægður með Aron og Mirjam, bróður og systur Móse. Bjóðið þeim að lesa 4. Mósebók 12:1–8 til að komast að ástæðunni. Íhugið að nota Trúarmyndabók til að hjálpa börnum ykkar að finna dæmi um fólk í ritningunum sem virti spámann Drottins og var blessað. Hvernig erum við blessuð þegar við fylgjum spámanni Drottins?

• Þið gætuð notað „Móse og eirormurinn“ í Sögur úr Gamla testamentinu, 83–84, til að hjálpa börnum ykkar að læra um það sem gerðist í 4. Mósebók 21:6–9. Hvernig er eirormurinn eins og Jesús Kristur? (sjá Jóhannes 3:14–15). Börn ykkar gætu haft gaman af því að búa til snák úr pappír og skrifa á hann nokkra einfalda hluti sem þau geta gert til að „líta til Guðssonarins í trú“ (Helaman 8:15).

  

  1:2

• Eldri börn gætu valið eitt af eftirfarandi ritningarversum og sagt frá hverju það eykur við skilning þeirra á sögunni: 1. Nefí 17:41; Alma 33:18–20; Helaman 8:13–15; Kenning og sáttmálar 6:36.

• Gerið samantekt á 4. Mósebók 22:1–18 fyrir börn ykkar og leggið áherslu á það hvernig Bíleam neitaði að setja bölvun á lýð Guðs, jafnvel þótt Balak, konungur í Móab, byði honum heiður og ríkidæmi. Þið gætuð síðan hjálpað börnum ykkar að leita í eftirfarandi versum að orðtökum sem þeim finnst sýna að Bíleam hafi viljað fylgja Guði: 4. Mósebók 22:18; 23:26; 24:13. Börn ykkar gætu ef til vill valið eitt orðtak sem höfðar til þeirra og skrifað það á spjald til að hjálpa þeim að muna eftir að hlýða Drottni.