Ẹ́ksódù 19–20;24; 31–34

Ààrẹ Russell M. Nelson kọ́ni: “Nínú Májẹ̀mú Láéláé, ọ̀rọ̀ náà Hébérù láti inú èyí tí a ti ṣe ìyírọ̀padà pàtàkì sí ni ségúllàh, èyí tí ó túmọ̀ sí ‘ohun-ìní oníyelórí,’ tàbí ‘ìṣúra.’ … Fún wa láti jẹ́ dídámọ̀ nípasẹ̀ àwọn ìránṣẹ́ Olúwa bí àwọn ènìyàn pàtàkì rẹ̀ ni oríyín ti èrò gígajùlọ” (“Àwọn Ọmọ ti Májẹ̀mú,” Ẹ́nsáìnì, Oṣù Karun 1995, 34). Báwo ni ọ̀rọ̀ Ààrẹ Nelson ti ṣe ní ipa sí ọ̀nà tí ẹ fi ní òye Ẹ́ksódù 19:3–6? Báwo ni Olúwa ti fi hàn yín pé ẹ jẹ́ ìṣúra sí I?

Olúwa wí fún Mósè pé àwọn ọmọ Ísráẹ́lì nílò láti múrasílẹ̀ ṣíwájú kí wọ́n lè “pàdé Ọlọ́run” (Ẹ́ksódù 19:10–11, 17) kí wọ́n sì pa májẹ̀mú kan mọ́ pẹ̀lú Rẹ̀ (wo Ẹ́ksódù 19:5). Báwo ni ẹ ṣe nmúrasílẹ̀ fún àwọn ìrírí ti-ẹ̀mí, pẹ̀lú àwọn ìlànà ti oúnjẹ́ Olúwa àti tẹ́mpìlì? Báwo ni ẹ ṣe lè ràn àwọn ẹlòmíràn lọ́wọ́ láti múrasílẹ̀? Kínni ẹ kọ́ nípa ìmúrasílẹ̀ láti inú Lúkù 6:12–13; Énọ́sì 1:2–6; Álmà 17:2–3?

Nígbàtí àwọn ọmọ Ísráẹ́lì kórajọ ní ìsàlẹ̀ Òkè Sínáì, wọ́n gbọ́ ohùn Ọlọ́run tí ó nfún wọn ní àwọn Òfin Mẹ́wa (wo Deuterónómì 4:12–13). Bẹ́ẹ̀ni, ìwọ̀nyí, nìkan kọ́ ni àwọn òfin Ọlọ́run—àwọn ọ̀pọ̀lọpọ̀ míràn wa nínú ìwé mímọ́. Nítorínáà bí ẹ ti nka Ẹ́ksódù 20:1–17, ẹ bi ara yín léèrè ìdí tí Ọlọ́run fi tẹnumọ́ àwọn mẹwa wọ̀nyí ní pàtàkì. Ní ìhìn ni àpẹrẹ tábìlì kan tí ẹ̀yin yíò lò bí ẹ ti njíròrò pàtàkì àwọn òfin Mẹ́wa nínú ayé yín.

• Báwo ni pípa àwọn òfin mẹwa wọ̀nyí mọ́ ṣe nràn yín lọ́wọ́ láti pa òfin méjì nlá tí Jésù fúnni nínu Matteu 22:34–40mọ́?

• Kínni àwọn ohun tí ẹ lè ti ní ìdánwò láti gbé síwájú Ọlọ́run? Àwọn ìbùkún wo ni ẹ ti rí láti inú fífi Ọlọ́run ṣíwájú?

• Báwo ni ẹ ṣe fèsì sí ẹnìkan tí ó wípé àwọn Òfin Mẹ́wa ni a fúnni ní ìgbà pípẹ́ sẹ́hìn àti pé kò wúlò fún ọjọ́ òní? Kínni àwọn àpẹrẹ láti inú ayé yín tí ẹ fẹ́ láti pín bí ara ìfèsì yín? Báwo ni orin ìsìn “Báwo ni àwọn Àṣẹ Ọlọ́run ti Rọ̀ Tó” (Àwọn Orin Ìsìn, nọ́mbà 125) ṣe lè ní ipa ní ọ̀nà tí ẹ fi nṣàlàyé àwọn òfin Ọlọ́run sí àwọn ẹlòmíràn?

• Báwo ni Olúwa ṣe nmú ìlérí Ẹ́ksódù 20:6 ṣẹ nínú ayé yín?

Bákannáà wo “Òfin Nlá—Fẹ́ràn Olúwa,” nínú Ìkọ́ni àwọn Ààrẹ Ìjọ: Ezra Taft Benson (2014), 37–45; Dallin H. Oaks, “Kò Sí Ọlọ́rún Míràn,” Làìhónà, Nov. 2013, 72–75; Àwọn Àkọlé àti Ìbèèrè, “Àwọn Òfin,” Ibi-ìkàwé Ìhìnrere.

Bí ẹ ti nka Ẹ́ksódù 24:3–8, ẹ yẹ àwọn májẹ̀mú tí ẹ ti dá pẹ̀lú Ọlọ́run wò. Nígbàtí májẹ̀mú Ísráẹ́lì wà pẹ̀lú àwọn ìlànà ìsìn tí ó yàtọ̀ kúrò ní ohun tí Ọlọ́run nfẹ́ ní òní, ẹ lè ṣe àkíyèsí àwọn ìbáramu. Fún àpẹrẹ, àwọn ẹsẹ 4, 5, àti 8 tí a mẹ́nuba pẹpẹ, àwọn ìrúbọ ohun-ọ̀sìn, àti ẹ̀jẹ̀. Kínni àwọn ohun wọ̀nyí rọ́pò, àti pé báwo ni wọ́n ṣe bá àwọn májẹ̀mú yín mu?

Ẹ gbìyànjú láti fi ara yín sí ipò àwọn ọmọ Ísráẹ́lì—ẹ wà nínú aginjù, Mósè ti lọ fún ogójì ọjọ́, tí ìdojúkọ pẹ̀lú àwọn ará Kénánì lórí ilẹ̀ ìlérí sì wà nínú ọjọ́ ọ̀là yín (wo Ẹ́ksódù 32:1–8). Kínni ìdí tí ẹ fi rò pé àwọn ọmọ Ísráẹ́lì nfẹ́ ère wúrà? Kínni ó mísí yín nípa ẹ̀bẹ̀ Mósè sí Olúwa nínú Ẹ́ksódù 33:11–17?

Nígbàtí ẹ̀ṣẹ̀ àwọn ọmọ Ísráẹ́lì le gidi, bákannáà ìtàn yí wà pẹ̀lú ọ̀rọ̀ Ọlọ́run ti àánú àti ìdáríjì. Kínni Ẹksódù 34:1–10 kọ́ọ yín nípa Olùgbàlà? (wo Ẹ́ksódù 32:30–32; Mòsíàh 14:4–8; 15:9; Ẹ̀kọ́ ati awọn Májẹ̀mú 45:3–5).

Ààrẹ Russell M. Nelson ṣe àlàyé: “Ní àwọn ọdún ti mo ṣì kéré ju báyi lọ, mo kọ́ iṣẹ́ àwọn ẹlòmiràn tí wọ́n ti ṣe àkójọ àwọn àtòsílẹ̀ àwọn ohun tí ó le jẹ́ ṣíṣe àti àwọn ohun tí kò le jẹ́ ṣíṣe ní Ọjọ́ Ìsinmi. Ní ìgbẹ̀hìn gbẹ́hín ni mo kọ́ láti inú àwọn ìwé mímọ́ pé ìṣe àti ìwà mi ní Ọjọ́ Ìsinmi jẹ́ àmì kan ní àárín èmi àti Baba mi Ọrun [wo Ẹ́ksódù 31:13; Èsèkíẹ́lì 20:12, 20]. Pẹ̀lú òye náà, èmi kò nílò àwọn àtòsílẹ̀ mọ́ nípa àwọn ṣíṣe àti àwọn máṣe. Nígbàtí mo bá níláti ṣe ìpinnu kan bóyá ìṣe kan dára tó fún Ọjọ́ Ìsinmi tàbí bẹ́ẹ̀kọ́, mo kàn máa nbi ara mi léèrè pé, ‘Irú àmì wo ni mo fẹ́ láti fifún Ọlọ́run?’ Ìbéèrè yi mú àwọn yíyàn mi nípa Ọjọ́ Ìsinmi ṣe kedere bíi kírísítà.” (“Ọjọ́ Ìsinmi Jẹ́ Adùn,” Làìhónà, Oṣù Karun 2015, 130). Ẹ jíròrò irú àmì tí ẹ fẹ́ láti fífún Ọlọ́run pẹ̀lú ṣíṣe àkíyèsí Ọjọ́ Ìsinmi.

Nígbàtí Mósè wá sísàlẹ̀ láti òkè, ó mú òfin kíkọ́ lórí àwọn wàláà òkúta wá. Lẹ́hìn ríri pé àwọn ọmọ Ísráẹ́lì ti já májẹ̀mú wọn, Mósè fọ́ àwọn wàláà náà (wo Ẹ́ksódù 31:18; 32:19). Lẹ́hìnnáà, Ọlọ́run pàṣẹ fún Mósè láti ṣe àwọn wàláà òkúta míràn (wo Ẹ́ksódù 34:1–4). Ìyírọ̀padà Jósẹ́fù Smith ti Ẹ́ksódù 34:1–2 (nínú àfikún Bíbélì) ṣe àrídájú pé àwọn wàláà òkútà ọ̀tọ̀ọ̀tọ̀ àkọ́kọ́ wà pẹ̀lú àwọn ìlànà ti Ọlọ́run “èrò mímọ́,” tàbí Oyè Àlùfáà Melkísédékì. Ìkejì ọ̀tọ̀ọ̀tọ̀ wà pẹ̀lú “àṣẹ ti òfin ara.” Èyí ni àṣẹ kíkéréjù tí a fi fúnni nípa “oyè àlùfáà kíkéréjù” (wo Ẹ̀kọ́ àti àwọn Májẹ̀mú 84:17–27), èyí tí ó túmọ̀ sí mímúra àwọn ọmọ Ísráẹ́lì sílẹ̀ fún àṣẹ gígajù àti oyè àlùfáà gígajù kí wọ́n lè wọ ọ̀dọ̀ Ọlọ́run.

• Báwo ni ẹ ṣe lè mú kíkọ́ni nípa àwọn òfin mẹ́wa jẹ́ ìgbádùn fún àwọn ọmọ yín? Bí a ti nka Ẹ́ksódù 20:3–17 papọ̀, ẹ jẹ́ kí àwọn ọmọ yín ràn yín lọ́wọ́ láti rí tàbí ya àwòrán kan láti rọ́pò ọ̀kọ̀ọ̀kan lára àwọn Òfin Mẹwa. Nígbànáà àwọn ọmọ yín lè yí yíyan àwòrán kan àti sísọ̀rọ̀ nípa bí wọ́n ti lè gbé òfin náà. Ẹ pín pẹ̀lú ara yín bí gbígbé òfin náà ṣe nmú ìnú dídùn wá fún yín.

• Bákannáà ẹ lè kọ orin kan bíi “Pa àwọn Òfin Mọ́” (Ìwé-orin àwọn Ọmọdé, 146–47). Ẹ ran àwọn omodé lọ́wọ́ láti rí àwọn ọ̀rọ̀ orin tí ó nkọ́ wọn ní ìdí tí Ọlọ́run fi fẹ́ kí a pa àwọn òfin Rẹ̀ mọ́.

• Ẹ ran àwọn ọmọ yín lọ́wọ́ láti kọ́ gbólóhùn “Bọ̀wọ̀ fún baba àti ìyá rẹ” (Ẹ́ksódù 20:12). Ẹ lè fẹ́ láti ṣe àlàyé pé láti “bọ̀wọ̀” fún ẹnìkan lè túmọ̀ sí fifi ọlá hàn fún wọn tàbí láti mú ìnú dídùn wá fún wọn. Kínni Jésù ṣe láti bọ̀wọ̀ fún ìyá ti ayé ikú Rẹ̀ àti Baba Ọ̀run? (wo Lúkù 2:48–51; Jòhánnù 19:26–27). Bóyá àwọn ọmọ yín lè yí ṣíṣe ìṣe ti àwọn ohun tí wọ́n nṣe ká láti bọ̀wọ̀ fún àwọn òbí wọn, nígbàtí àwọn ọmọ míràn bá ṣe àròsọ ohun tí wọ́n nṣe.

• Àwọn ọmọ yín lè gbádùn wíwo àwọn àpẹrẹ ti àwọn àmì—bí irú àwọn àmì òpópónà tàbí àwọn àmì ti kíkọ́lé. Kínni àwọn èrèdí ti àwọn àmì? Àwọn ọmọ yín lè rí ọ̀rọ̀ náà “àmì” ní Ẹ́ksódù 31:13, 16–17. Kínni Olúwa wípé ó jẹ́ àmì kan ní àárín wa àti Òun? Ẹ pín àwọn ọ̀nà tí ẹ̀yin àti ẹbí yín fi gbìyànjú láti fi ìfẹ́ yín hàn fún Olúwa ní Ọjọ́ Ìsinmi pẹ̀lú ara yín.

• Yẹ lílo “Mósè lórí Òkè Sínáì” (nínú Àwọn Ìtàn Májẹ̀mú Láéláé, 77–82) láti ran àwọn ọmọ yín lọ́wọ́ láti kọ́ ìtàn náà nínú Ẹ́ksódù 32:1–8, 19–24. Kínni ìdí tí kò fi tọ́ fún àwọn ọmọ Ísráẹ́lì láti jọ́sìn ère dípò Ọlọ́run?

  

  2:55

• Ó lè dùn láti dá ipa ọ̀nà kan sílẹ̀ lórí ilẹ̀ (tàbí rí ọ̀kan nítòsí ilé yín) sí ìjúwe àwọn ọ̀rọ̀ wọ̀nyí láti inú Ẹ́ksódù 32:8: “Wọ́n yípadà kánkán kúrò ní ipa-ọ̀nà.” Nígbàtí à nrìn lórí ipa-ọ̀nà, àwọn ọmọ wa lè sọ̀rọ̀ nípa àwọn ìdánwò tí a kọjúsí láti yípadà kúrò ní ọ̀dọ̀ Ọlọ́run. Kínni ó nràn wá lọ́wọ́ láti dúró lórí ipa-ọ̀nà Ọlọ́run—àti láti padà sí i bí a bá ṣákolọ? (wo Ẹ́ksódù 34:6–7).