Eksodosy 19–20; 24; 31–34

Ny Filoha Russell M. Nelson dia nampianatra hoe: “Ao amin’ny Testamenta Taloha, ny voambolana hebreo nandikana ny hoe rakitra soa dia ny segullah, izay midika hoe -fananana sarobidy,- na -harena sarobidy.- … Fandokafana tena lehibe ho antsika izany antsoin’ny mpanompon’ny Tompo hoe vahoaka izay rakitra soa ho azy izany” (“Children of the Covenant,” Ensign, May 1995, 34). Inona ny fiantraikan’ny tenin’ny Filoha Nelson eo amin’ny fomba fahatakaranao ny Eksodosy 19:3–6? Ahoana no nanehoan’ny Tompo taminao fa sarobidy aminy ianao?

Nilaza tamin’i Mosesy ny Tompo fa mila miomana ny zanak’i Isiraely mialoha ny hahafahan’izy ireo “[m]ihaona amin’ Andriamanitra” (Eksodosy 19:10–11, 17) ary sy hitandrina fanekempihavanana atao Aminy (jereo ny Eksodosy 19:5). Ahoana no fomba hiomananao hiaina zavatra ara-panahy, tafiditra ao anatin’izany ny fanasan’ny Tompo sy ireo ôrdônansin’ny tempoly? Ahoana no ahafahanao manampy ny hafa hiomana? Inona no ianaranao momba ny fiomanana ao amin’ny Lioka 6:12–13; Enôsa 1:2–6; Almà 17:2–3?

Raha tafavory teny am-pototry ny Tendrombohitra Sinay ny Isiraelita dia nandre ny feon’ Andriamanitra nanome ny Didy Folo izy ireo (jereo ny Deoteronomia 4:12–13). Mazava ho azy fa tsy ireo ihany no hany didin’ Andriamanitra, misy maro hafa ao amin’ny soratra masina. Noho izany rehefa mamaky ny Eksodosy 20:1–17 ianao dia manontania tena hoe nahoana Andriamanitra no nanamafy manokana ireo folo ireo. Ity misy tabilao iray izay azonao ampiasaina rehefa misaintsaina ny lanjan’ny Didy Folo eo amin’ny fiainanao ianao:

• Ahoana no anampian’ny fitandremana ireo didy folo ireo anao hitandrina ireo didy roa lehibe izay nomen’i Jesoa ao amin’ny Matio 22:34–40?

• Mety ho alaim-panahy hametraka inona sy inona alohan’ Andriamanitra ianao? Inona ireo fitahiana hitanao avy amin’ny fametrahana an’ Andriamanitra ho lohalaharana?

• Ahoana no hamalianao ny olona iray izay milaza fa ny Didy Folo dia nomena taloha ela be ka tsy manan-kery amin’izao fotoana izao? Ohatra inona teo amin’ny fiainanao no hozarainao ao anatin’ny valinteninao? Inona no mety ho fiantraikan’ilay hira hoe “Oui, tes commandements” (Cantiques, no. 66) eo amin’ny fomba hanazavanao ny didin’ Andriamanitra amin’ny hafa?

• Tamin’ny fomba ahoana no nanatanterahan’ny Tompo ny faminaniana ao amin’ny Eksodosy 20:6 teo amin’ny fiainanao?

Jereo koa ny “Le grand commandement : aimer le Seigneur,” ao amin’ny Enseignements des présidents de l’Église, Ezra Taft Benson (2014), 37–45; Dallin H. Oaks, “Tsy Manana Andriamani-kafa,” Liahona, nôv. 2013, 72–75; Lohahevitra sy fanontaniana, “Ireo didy,” Médiathèque de l’Évangile.

Rehefa mamaky ny Eksodosy 24:3–8 ianao dia eritrereto ireo fanekempihavanana nataonao tamin’ Andriamanitra. Na dia ahitana fombafomba izay tsy mitovy amin’ny zavatra takin’ Andriamanitra amin’izao fotoana izao aza ny fanekempihavanana nataon’i Isiraely, dia mety hahatsikaritra fitoviana vitsivitsy ianao. Ohatra, ny andininy 4, 5, ary 8 dia miresaka alitara, fanaovana sorona biby, ary ra. Mety maneho inona ireo zavatra ireo, ary inona no ifandraisan’izy ireo amin’ny fanekempihavanana nataonao?

Andramo apetraka eo amin’ny toeran’ny Isiraelita ny tenanao: Any an-tany foana ianao ary efa lasa nandritra ny 40 andro i Mosesy, ary ny fifanandrinana amin’ny Kananita momba ny tany nampanantenaina dia miandry anao (jereo ny Eksodosy 32:1–8). Nahoana araka ny eritreritrao no naniry hanana sampy volamena ireo Isiraelita? Inona no nanentana ny fanahinao tao anatin’ny fangatahana nataon’i Mosesy tamin’ny Tompo ao amin’ny Eksodosy 33:11–17?

Na dia goavana aza ny fahotan’ny Isiraelita, ity tantara ity dia ahitana koa hafatra momba ny famindram-pon’ Andriamanitra sy ny famelany heloka. Inona no ampianarin’ny Eksodosy 34:1–10 anao momba ny Mpamonjy? (jereo ny Eksodosy 32:30–32; Môzià 14:4–8; 15:9; Fotopampianarana sy Fanekempihavanana 45:3–5).

Nanazava ny Filoha Russell M. Nelson hoe: “Nandalina ireo lisitra nataon’ny olona hafa mikasika ireo zavatra atao na ireo zavatra tsy atao amin’ny andro Sabata aho tamin’ny fahatanorako. Taty aoriana aho vao nianatra avy tamin’ny soratra masina fa ny fitondrantenako sy ny fihetsiko amin’ny Sabata dia nandrafitra famantarana teo amiko sy ny Raiko any An-danitra [jereo ny Eksodosy 31:13; Ezekiela 20:12, 20]. Noho ny fahatakarana izany dia tsy nila ny lisitr’ireo zavatra atao sy tsy atao intsony aho. Rehefa nila nandray fanapahan-kevitra aho momba ny hoe mety sa tsy mety amin’ny Sabata ny zavatra atao iray dia nanontany fotsiny aho hoe, -Inona no famantarana tiako homena an’ Andriamanitra?- Izany fanontaniana izany dia nahatonga ireo safidy nataoko mikasika ny andro Sabata ho mazava tsara” (“Fahafinaretana ny Sabata,” Liahona, mey 2015, 130). Saintsaino izay famantarana tianao homena an’ Andriamanitra amin’ny fanajanao ny Sabata.

Rehefa nidina avy teny an-tendrombohitra i Mosesy dia nentiny ny lalàna izay voasoratra teo amin’ireo vato fisaka. Rehefa hitany fa nandika ny fanekempihavanana nataon’izy ireo ny Isiraelita dia novakiny ireo vato fisaka (jereo ny Eksodosy 31:18; 32:19). Taty aoriana dia nandidy an’i Mosesy Andriamanitra hanamboatra vato fisaka hafa ka hiverina hitondra izany any amin’ilay tendrombohitra (jereo ny Eksodosy 34:1–4). Ny Dikantenin’i Joseph Smith, Eksodosy 34:1–2 (ao amin’ny Torolalana ho an’ny Soratra Masina) dia manazava fa ireo vato fisaka voalohany dia nahitana ireo ôrdônansin’ny “lamina masin’” Andriamanitra, na ny Fisoronana Melkizedeka. Ireo vato fisaka faharoa dia nahitana “ny lalàn’ny didy ara-nofo.” Lalàna ambany kokoa notantanan’ny “fisoronana ambany” izany (jereo ny Fotopampianarana sy Fanekempihavanana 84:17–27), izay natao mba hanomanana ny Isiraelita amin’ny lalàna ambony kokoa sy ny fisoronana ambony mba hahafahan’izy ireo miditra eo anatrehan’ Andriamanitra.

• Ahoana no ahafahanao manao ny fianarana momba ny Didy Folo ho zavatra mahafinaritra ho an’ny zanakao? Rehefa miara-mamaky ny Eksodosy 20:3–17 ianareo dia avelao ny zanakao hanampy anao hitady na hanao sary mba hanehoana ny tsirairay amin’ireo Didy Folo. Avy eo dia afaka mifandimby misafidy sary iray ny zanakao ary miresaka momba ny fomba ahafahan’izy ireo miaina izany didy izany. Ifampizarao ny fomba hitondran’ny fiainana izany didy izany fahasambarana ho anareo.

• Ianareo koa dia afaka mihira hira iray toy ny “Hajao ireo didy” (Bokin-kiran’ny ankizy, 68). Ampio ny zanakao hitady teny ao amin’ilay hira izay mampianatra azy ireo ny antony hitiavan’ Andriamanitra ny hitandremantsika ny didiny.

• Ampio ny zanakao hianatra ilay andian-teny hoe “Manajà ny rainao sy ny reninao” (Eksodosy 20:12). Mety ho tianao ny hanazava fa ny hoe “manaja” olona iray dia mety midika hoe maneho fanajana azy na mitondra fifaliana ho azy. Inona no nataon’i Jesoa mba hanajany ny reniny tety an-tany sy ny Rainy any An-danitra? (jereo ny Lioka 2:48–51; Jaona 19:26–27). Azon’ny zanakao atao angamba ny mifandimby milalao an-tsehatra ireo zavatra azony atao mba hanajana ny ray aman-dreniny, ary ny ankizy hafa kosa mamantatra ilay zavatra ataony.

• Mety ho tian’ny zanakao ny hijery karazana famantarana, toy ny marika famantarana eny amin’ny arabe na marika famantarana eo amin’ny trano iray. Inona no tanjon’ireo marika famantarana? Avy eo ny zanakao dia afaka mitady ny teny hoe “famantarana” ao amin’ny Eksodosy 31:13, 16–17. Inona no nolazain’ny Tompo fa famantarana eo amintsika sy eo Aminy? Ifampizarao ny fomba sasany hanaovanao sy ny fianakavianao ezaka mba hanehoana ny fitiavanareo ny Tompo amin’ny andro Sabata.

• Hevero ny hampiasa ny “Mosesy eo amin’ny tendrombohitra Sinay” (ao amin’ny Tantara ao amin’ny Testamenta Taloha, 77–82) mba hanampiana ny zanakao hianatra ny tantara ao amin’ny Eksodosy 32:1–8, 19–24. Nahoana no fahadisoana ho an’ny Isiraelita ny nanompo sampy fa tsy nitsaoka an’ Andriamanitra?

  

  2:55

• Mety hahafinaritra ny mamorona lalana eo amin’ny tany (na mitadiava iray eo akaikin’ny tranonao) mba hanehoana ireto teny avy ao amin’ny Eksodosy 32:8 ireto: “Nalaky nivily niala tamin’ny làlana … izy.” Eo am-pandehanana eo amin’ilay lalana dia azon’ny zanakao atao ny miresaka momba ireo fakam-panahy atrehintsika izay mitarika antsika hivily hiala amin’ Andriamanitra. Inona no manampy antsika hitoetra eo amin’ny lalan’ Andriamanitra, ary hiverina eo amin’izany raha toa ka efa nivily lalana isika? (jereo ny Eksodosy 34:6–7).