Eksodosy 14–18

Rehefa mamaky ny Eksodosy 14:1–10 ianao dia alaivo sary an-tsaina ny zavatra mety ho tsapan’ny Isiraelita rehefa nahita ny miaramilan’i Farao nanatona azy ireo. Angamba mety ho mahatsapa ianao fa mila fahagagana mba hahatafavoahana velona amin’ny olana sarotra atrehinao. Inona no hitanao ao amin’ny Eksodosy 14:13–31 izay manosika anao hikatsaka ny herin’ Andriamanitra eo amin’ny fiainanao? Saintsaino ny fomba efa nahitanao ny heriny taloha. Inona no nianaranao momba Azy avy tamin’ireo zavatra niainana ireo?

Ny Eksodosy 15:1–19 dia hira fiderana izay nohirain’ny Isiraelita taorian’ny nanasarahan’ny Tompo ny Ranomasina Mena. Andian-teny inona ao amin’io hira io no hitanao fa manan-danja manokana? Angamba misy hira iray ao amin’ny fihirana izay tianao hohiraina rehefa nanao zavatra mahatalanjona ho anao ny Tompo, toy ny “Ry Mpanavotra” (Fihirana sy Hiran’ny ankizy, lah. 9). Hevero ny hihira na hihaino izany mandritra ny fitsaohana ataonao androany.

Jereo koa ny Fotopampianarana sy Fanekempihavanana 8:2–3.

Ny famakiana momba ny dian’i Isiraely dia mety hitarika anao hieritreritra momba ny zavatra teo amin’ny fiainanao izay toa “nangidy” tahaka ny ranon’i Mara (jereo ny Eksodosy 15:23–27). Tamin’ny fomba ahoana no nanovan’ny Tompo ho mamy ireo zavatra izay nangidy teo amin’ny fiainanao? Inona no lanja nananan’ireny zavatra niainana ireny teo amin’ny fiainanao?

Hahatsikaritra ohatra misimisy kokoa momba ireo toe-javatra nangidy ho an’ny Isiraelita ianao ao amin’ny Eksodosy 16 sy 17. Maha-te hitsikera ny fimonomononan’izy ireo na ny fitarainan’izy ireo, saingy rehefa mamaky ianao dia diniho raha toa ka efa nanao zavatra nitovy tamin’izany ianao na tsia. Inona no zavatra ianaranao avy amin’ireo zavatra niainan’ny Isiraelita izay afaka manampy anao tsy himonomonona firy sy hatoky an’ Andriamanitra kokoa? Inona no ampianarin’ireo andininy ireo anao mikasika an’ Andriamanitra?

Jereo koa ny 1 Nefia 2:11–12.

Satria mila misakafo avokoa isika rehetra dia matetika ny Tompo no mampitaha ireo zavatra ara-panahy amin’ny sakafo. Tadiavo ireo lesona ara-panahy avy aminy tao anatin’ny zavatra nianan’ny Isiraelita tamin’ny mana ao amin’ny Eksodosy 16. Ohatra, inona no hitanao ao amin’ny torolalan’ny Tompo ao amin’ny Eksodosy 16:16, 19, 22–26 izay azo ampiharina amin’ny sakafonao ara-panahy?

Mba hahitana lesona hafa izay mety ho tian’ny Tompo hianaranao avy amin’io fahagagana io dia saintsaino ny fanontaniana toy ireto:

• Inona no zavatra omen’ny Tompo ahy izay tahaka ilay mana isan’andro nomeny ny Isiraelita?

• Inona no zavatra azoko atao izay mitovy amin’ny fanangonana mana?

2:52

3:12

3:0

Mieritrereta zavatra hafa ankoatra ny misakafo, izay ataonao isan’andro. Nahoana ny zavatra sasantsasany no tsy maintsy atao isan’andro mba hahombiazany? Inona no zavatra tsapanao fa tokony hataonao mba hikatsahana traikefa ara-panahy isan’andro?

Jereo koa ny Dieter F. Uchtdorf, “Famerenana amin’ny laoniny isan’andro,” Liahona, nôv. 2021, 77–79.

5:27

Eritrereto ny Mpamonjy rehefa mamaky ny Eksodosy 17:1–7 ianao. Ahoana no maha-toy ny vatolampy an’i Jesoa Kristy aminao? (jereo ny Salamo 62:6–7; Helamàna 5:12). Ahoana no maha-toy ny rano Azy? (jereo ny Jaona 4:10–14; 1 Korintiana 10:1–4; 1 Nefia 11:25).

Mety hisy fotoana eo amin’ny fiainanao izay hahatsapanao ny tenanao ho toa an’i Mosesy, rehefa miankina aminao ny hafa, kanefa “vizana ny tana[nao]” (Eksodosy 17:12). Amin’ny fotoana hafa dia mety hitovy kokoa amin’i Arona sy i Hora ary i Jetro ianao, izay nanohana an’i Mosesy. Apetraho eo amin’ny toeran’ny tsirairay amin’ireo olona ireo ny tenanao eo am-pamakianao ny Eksodosy 17:8–16; 18:13–26, ary jereo ny zavatra ampianarin’ny Tompo anao momba ny asany.

Jereo ihany koa ny Môzià 4:27; 18:8–9.

• Rehefa nanasaraka ny Ranomasina Mena ny Tompo dia nahita ny herin’ny Tompo i Mosesy sy ny Isiraelita. Avelao ny zanakao hanampy anao hieritreritra fomba mahafinaritra hilalaovana an-tsehatra indray ilay tantara ao amin’ny Eksodosy 14:5–22 ((jereo koa ny “Ny Paska” ao amin’ny Tantara ao amin’ny Testamenta Taloha, 70–74). Azonao atao angamba ny maka seza na bodofotsy ary “manasaraka” azy ireo toy ny Ranomasina Mena. Avy eo dia afaka mifampizara ny fomba nahitanareo ny herin’ Andriamanitra teo amin’ny fiainanareo ianareo.

  

  2:54

• Inona no zavatra hanatevenan’ny Fotopampianarana sy Fanekempihavanana 8:2–3 ny fahatakarantsika ny tantara ao amin’ny Eksodosy 14? Hevero ny hitantara amin’ny zanakao ny zavatra niainana iray izay nilazan’ny Fanahy Masina anao zavatra tao an-tsainao na tao am-ponao, ary asao izy ireo hiresaka momba ny zavatra niainany. Azonareo atao ihany koa ny mihira hira iray momba ny Fanahy Masina, toy ny “Que l’Esprit soit avec nous” (Cantiques, no. 78).

• Angamba afaka misotro zavatra mamy sy zavatra mangidy ianao sy ny zanakao rehefa miara-mandalina ny Eksodosy 15:22–25. Tamin’ny fomba ahoana no nanovan’ny Mpamonjy ny toe-javatra “mangidy” teo amin’ny fiainantsika ho “mamy”?

• Rehefa mamaky ny Eksodosy 15:23–25; 16:14–15; 17:1–6 ianao sy ireo zanakao dia avelao izy ireo hanampy anao hitady zavatra mba hanampiana amin’ny fitantarana ny tantara tsirairay, toy ny sampan-kazo iray (hanasitrana ny rano ao Mara), tavoara na vilany (hasiana mana), ary vato (ho an’ny rano ao Horeba). Inona no ampahatsiahivin’ireo tantara ireo antsika momba ny zavatra nataon’i Jesoa Kristy ho antsika? Mety hamaky ny Matio 7:24–27; Jaona 4:10–14; 6:29–35, 48–51; Helamàna 5:12; Fotopampianarana sy Fanekempihavanana 20:77, 79 ianareo ao anatin’ny fifanakalozan-kevitra ataonareo.

• Eo am-pamakianao ny Eksodosy 17:8–16, dia azonao atao ny manasa ankizy iray mba hanangana ireo tanany. Rehefa reraka ilay ankizy dia afaka manampy ny ankizy hafa, amin’ny fomba nanampian’i Arona sy i Hora an’i Mosesy. Inona no ampianarin’ity tantara ity mikasika ny fomba ahafahantsika manampy ny fanjakan’ Andriamanitra mba hahomby? Azonao atao ihany koa ny mamaky ny Eksodosy 18:13–26 ary miresaka momba ireo andraikitra mavesatra iantsorohan’ny olona izay manompo ao amin’ny paroasinao. Inona no azontsika atao ankehitriny mba hanampiana an’ireo mpitarika ao amin’ny Fiangonantsika, toy ny nanampian’i Arona sy Hora ny mpaminany Mosesy?