Eksodosy 7–13

Enga anie ny sitraponao tsy hifanohitra velively amin’ny sitrapon’ Andriamanitra tahaka ny an’i Farao. Kanefa misy fotoana ny fontsika tsy malefaka araka ny tokony ho izy. Inona no nanaitra anao tamin’ny fihetsik’i Farao teo anatrehan’ireo loza ireo ao amin’ny Eksodosy 7:14–25; 8:5–32; 9:1–26; 10:12–29; 12:29–33? Jereo ny fanazavana ao amin’ny Dikantenin’i Joseph Smith ho an’ ny Eksodosy 7:3, 13; 9:12.

Nahoana ny hoe “mafy” no teny mamaritra tsara ny fon’i Farao? Eritrereto ny zavatra ianaranao avy amin’ireo andininy ireo momba ny fananana fo malefaka: 1 Nefia 2:16; Môzià 3:19; Almà 24:7–8; 62:41; Etera 12:27. Rehefa mamaky momba ny vokatry ny fahamafisan’ny fon’i Farao ianao dia saintsaino ny toetoetry ny fonao. Inona no fanovana tsapanao fa tokony hataonao?

Ilay hany fomba tsy nahatonga ny Isiraelita ho tratran’ilay loza fahafolo izay voafaritra ao amin’ny Eksodosy 11:4–5 dia ny fanarahana antsakany sy andavany ireo toromarika nomen’ny Tompo an’i Mosesy ao amin’ny Eksodosy 12, fomba iray fantatra amin’ny hoe Paska. Mampianatra antsika amin’ny alalan’ny tandindona ny Paska fa tahaka ny nanafahan’ny Tompo ny Isiraelita tamin’ny fanandevozana tany Egypta, dia afaka manafaka antsika amin’ny fanandevozan’ny ota ihany koa Izy. Mba hamakafakana io tandindona ao amin’ny Eksodosy 12:1–42 io, dia azonao atao ny mampiasa tabilao tahaka ity iray ity:

Inona koa no hitanao ao amin’ireo toromarika sy tandindon’ny Paska izay mampahatsiahy anao an’i Jesoa Kristy sy ny Sorompanavotana nataony? Inona no ambaran’ireo tandindona ireo anao momba ny fomba fandraisana fitahiana avy amin’ny Sorompanavotana nataony?

Nandidy ny Isiraelita ny Mpamonjy mba hanaja ny Paska isan-taona hanampiana azy ireo hahatsiaro fa nanafaka azy ireo Izy, na dia efa lasa fahatsiarovana efa ela aza ny fahababoan’izy ireo. Rehefa mamaky ny torolalana omeny ao amin’ny Eksodosy 12:14–17, 24–27; 13:1–16 ianao, dia eritrereto ny zavatra ataonao mba hahatsiarovanao ireo fitahiana avy amin’ Andriamanitra ho anao. Ahoana no ahafahanao mitahiry izany fahatsiarovana izany “[hatrany amin’ny taranaka] fara mandimby”? (jereo ny Eksodosy 12:14, 26–27).

Inona no zavatra mitovy hitanao eo amin’ny fankalazana ny Paska sy ny fanasan’ny Tompo? Inona no azonao atao mba “hahatsiarovana mandrakariva” ny Mpamonjy? (Môrônia 4:3; 5:2).

Afaka misaintsaina zavatra hafa tian’ny Tompo hotadidinao koa ianao; jereo ohatra ny Helamàna 5:6–12; Môrônia 10:3; Fotopampianarana sy Fanekempihavanana 3:3–5, 10; 18:10;52:40.

Jereo koa ny Kevin W. Pearson, “Mbola vonona ve ianareo?,” Liahona, nôv. 2022, 67–69; “En souvenir de Jésus-Christ,” Cantiques, no. 114.

5:27

• Ireo loza voafaritra ao amin’ny Eksodosy 7–11 dia nampiseho tamin’ny Egyptiana sy ny Isiraelita fa manana hery lehibe ny Tompo. Hanampy ny zanakao mandritra ny fiainany ny Tompo rehefa manam-pinoana ny heriny izy ireo. Mba hanampiana azy ireo hianatra avy amin’io tantara io dia azonao omena taratasy iray nozaraina ho fizarana miisa 10 ny ankizy tsirairay, ary asao izy ireo hanao ny sarin’ireo loza voafaritra ao amin’ireo andininy ireo: Eksodosy 7:17–18; 8:1–4; 8:16–17; 8:20–22; 9:1–6; 9:8–9; 9:22–23; 10:4–5; 10:21–22; 11:4–7 (jereo koa ny “Ireo loza tany Egypta” ao amin’ny Tantara ao amin’ny Testamenta Taloha, 67–69). Miaraha mamaky ny Eksodosy 7:5 sy 9:14 mba hanazavana ny antony nandefasan’ny Tompo ireo loza.

  

  2:3

• Zarao amin’ny ankizy ny fomba nanehoan’ny Tompo taminao “fa tsy misy tahaka [Azy] amin’ny tany rehetra” (Eksodosy 9:14). Avelao izy ireo hizara ny fomba ahafantarany fa mahery ny Tompo.

• Mba hanampiana ny zanakao haka sary an-tsaina ny dikan’ny hoe manana fo malefaka dia mety hahafinaritra ny hampiseho azy ireo zavatra iray izay mafy, toy ny vato, ary zavatra iray hafa izay malefaka sy mitroka zavatra, toy ny éponge. Azonao atao koa ny mandraraka rano eo amin’ireo zavatra ireo mba hanehoana fa mora mandray ny tenin’ny Tompo ny fo malefaka. Avy eo dia azonareo atao ny miara-mamaky andininy vitsivitsy izay mamaritra ny fihetsika nasehon’i Farao teo anatrehan’ireo loza nalefan’ny Tompo (jereo ny Eksodosy 8:28–32; 9:7). Iza amin’ireo zavatra ireo no tena maneho tsara ny fon’i Farao na ny fihetsik’i Farao? Inona no dikan’ny hoe manana fo malefaka? (jereo ny Môzià 3:19).

• Ianao sy ny zanakao dia afaka manao lisitra an’ireo fihetsika sasantsasany izay mety miseho rehefa manamafy fo isika (ohatra, mampiasa teny ratsy na tsy vonona ny hizara). Ahoana no ahafahantsika mampiseho amin’ny Tompo fa te hanana fo malefaka isika?

• Ny Paska dia nampianatra ny Isiraelita mba hiandrandra ny Mpamonjy sy ny sorona nataony ho antsika. Rehefa miara-mamakafaka ny Eksodosy 12:1–13 ianareo dia ampio ny zanakao hahita ireo fifandraisana misy eo amin’ny antsipiriany momba ny Paska sy ny Sorompanavotan’i Jesoa Kristy (jereo koa ny “Ny Paska” ao amin’ny Tantara ao amin’ny Testamenta Taloha, 70–74). Ohatra, inona no mampitovy an’i Jesoa amin’ilay zanak’ondry voalaza ao amin’ny andininy 5?

  

  2:54

• Amin’izao fotoana izao isika dia mandray ny fanasan’ny Tompo mba hahatsiarovana ny sorona nataon’i Jesoa. Afaka mampiseho ny sarin’ny fanasan’ny Tompo an’ny zanakao ianao sy miresaka momba ny fomba hanampian’io ôrdônansy io antsika hahatsiaro an’i Jesoa Kristy. Azonao atao ny manampy ny zanakao hitady ny teny hoe “mahatsiaro” ao amin’ny vavaky ny fanasan’ny Tompo (jereo ny Môrônia 4–5). Na miaraha mihira hira iray tena tiana momba ny fanasan’ny Tompo, ary ampio ny zanakao hahatsikaritra ilay fahatsapana fiadanana ananan’izy ireo rehefa mieritreritra momba ny Mpamonjy izy ireo. Ahoana no ahafahantsika mikatsaka izany fahatsapana izany rehefa mandray ny fanasan’ny Tompo isika?