“ວັນທີ 13–19 ເດືອນເມສາ. ‘ຕັ້ງໃຈໃຫ້ດີ, ແລະ ພວກເຈົ້າຈະໄດ້ເຫັນສິ່ງທີ່ພຣະຜູ້ເປັນເຈົ້າກະທຳ’: ອົບພະຍົບ 14–18,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)

“ວັນທີ 13–19 ເດືອນເມສາ. ‘ຕັ້ງໃຈໃຫ້ດີ, ແລະ ພວກເຈົ້າຈະໄດ້ເຫັນສິ່ງທີ່ພຣະຜູ້ເປັນເຈົ້າກະທຳ,’” ຈົ່ງຕາມເຮົາມາ: ພຣະຄຳພີເດີມ 2026

ວັນທີ 13–19 ເດືອນເມສາ: “ຕັ້ງໃຈໃຫ້ດີ, ແລະ ພວກເຈົ້າຈະໄດ້ເຫັນສິ່ງທີ່ພຣະຜູ້ເປັນເຈົ້າກະທຳ”

ອົບພະຍົບ 14–18

ຊາວອິດສະຣາເອນໝົດທາງໄປ. ທະເລແດງຢູ່ເບື້ອງໜຶ່ງ, ແລະ ອີກເບື້ອງໜຶ່ງ ກອງທັບຂອງຟາໂຣກຳລັງມຸ້ງໜ້າເຂົ້າມາໃກ້. ການໜີຈາກປະເທດເອຢິບຂອງພວກເຂົາ, ເບິ່ງແລ້ວ, ຄືວ່າຈະມີອາຍຸສັ້ນ. ແຕ່ພຣະເຈົ້າມີຂ່າວສານສຳລັບຊາວອິດສະຣາເອນ ທີ່ພຣະອົງປະສົງໃຫ້ພວກເຂົາລະນຶກເຖິງເປັນເວລາຫລາຍລຸ້ນຄົນວ່າ: “ຢ່າຢ້ານເລີຍ. … ພຣະຜູ້ເປັນເຈົ້າຈະສູ້ຮົບຕາງພວກເຈົ້າ” (ອົບພະຍົບ 14:13–14).

ນັບແຕ່ເວລານນັ້ນມາ, ເມື່ອຜູ້ຄົນຂອງພຣະເຈົ້າຕ້ອງການສັດທາ ແລະ ຄວາມກ້າຫານ, ພວກເຂົາໄດ້ເລົ່າເລື່ອງລາວນີ້. ເມື່ອນີໄຟຢາກດົນໃຈພວກອ້າຍຂອງເພິ່ນ, ເພິ່ນໄດ້ກ່າວວ່າ, “ຂໍໃຫ້ເຮົາຈົ່ງເຂັ້ມແຂງເໝືອນດັ່ງໂມເຊ; ເພາະເພິ່ນໄດ້ເວົ້າກັບນ້ຳທະເລແດງແທ້ໆ ແລະ ນ້ຳກໍໄດ້ແຍກອອກໄປທາງນັ້ນທາງນີ້, ແລະ ບັນພະບຸລຸດຂອງພວກເຮົາໄດ້ເດີນຜ່ານມາເທິງແຜ່ນດິນແຫ້ງອອກຈາກການເປັນຊະເລີຍ” (1 ນີໄຟ 4:2). ເມື່ອກະສັດລິມໄຮຢາກໃຫ້ຜູ້ຄົນຂອງເພິ່ນທີ່ເປັນຊະເລີຍ “ເງີຍໜ້າ [ຂອງພວກເຂົາ] ຂຶ້ນ, ແລະ ປິຕິຍິນດີ,” ເພິ່ນໄດ້ເຕືອນພວກເຂົາເຖິງເລື່ອງລາວດຽວກັນນີ້ (ໂມໄຊຢາ 7:19). ແອວມາກໍໄດ້ເຮັດເຊັ່ນກັນ, ເມື່ອເພິ່ນຢາກເປັນພະຍານຕໍ່ລູກຊາຍຂອງເພິ່ນເຖິງອຳນາດຂອງພຣະເຈົ້າ (ເບິ່ງ ແອວມາ 36:28). ແລະ ເມື່ອເຮົາຮູ້ສຶກວ່າໝົດທາງໄປ—ເມື່ອເຮົາຕ້ອງການສັດທາຕື່ມອີກໜ້ອຍໜຶ່ງເພື່ອຈະ “ໄດ້ເຫັນສິ່ງທີ່ພຣະຜູ້ເປັນເຈົ້າກະທຳ”—ເຮົາສາມາດນຶກເຖິງວິທີທີ່ “ໃນວັນນັ້ນ ພຣະຜູ້ເປັນເຈົ້າໄດ້ໂຜດຊ່ວຍປະຊາຊົນອິດສະຣາເອນໃຫ້ພົ້ນ” (ອົບພະຍົບ 14:13, 30).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ອົບພະຍົບ 14; ອົບພະຍົບ 15:1–21

ພຣະຜູ້ເປັນເຈົ້າສາມາດເຮັດ “ວຽກງານຍິ່ງໃຫຍ່” ໃນຊີວິດຂອງເຮົາ.

ຂະນະທີ່ທ່ານອ່ານ ອົບພະຍົບ 14:1–10, ໃຫ້ວາດພາບເຫັນວິທີທີ່ຊາວອິດສະຣາເອນ ອາດຮູ້ສຶກຂະນະທີ່ພວກເຂົາໄດ້ເຫັນກອງທັບຂອງຟາໂຣມຸ້ງໜ້າເຂົ້າມາໃກ້. ບາງທີທ່ານອາດຮູ້ສຶກວ່າ ທ່ານຕ້ອງການການມະຫັດສະຈັນເພື່ອຈະເອົາຊີວິດລອດຈາກຄວາມທ້າທາຍທີ່ຫຍຸ້ງຍາກ ທີ່ທ່ານກຳລັງປະເຊີນຢູ່. ທ່ານພົບເຫັນຫຍັງແດ່ຢູ່ໃນ ອົບພະຍົບ 14:13–31 ທີ່ດົນໃຈທ່ານໃຫ້ສະແຫວງຫາອຳນາດຂອງພຣະເຈົ້າໃນຊີວິດຂອງທ່ານ? ໃຫ້ໄຕ່ຕອງວິທີທີ່ທ່ານໄດ້ເຫັນອຳນາດຂອງພຣະອົງໃນອະດີດ. ທ່ານໄດ້ຮຽນຮູ້ຫຍັງແດ່ກ່ຽວກັບພຣະອົງຈາກປະສົບການເຫລົ່ານີ້?

ອົບພະຍົບ 15:1–19 ເປັນເພງສັນລະເສີນທີ່ຊາວອິດສະຣາເອນໄດ້ຂັບຮ້ອງຫລັງຈາກພຣະຜູ້ເປັນເຈົ້າໄດ້ແຍກທະເລແດງ. ມີວະລີໃດແດ່ໃນເພງນີ້ທີ່ທ່ານພົບເຫັນວ່າມີຄວາມໝາຍໂດຍສະເພາະ? ບາງທີຍັງມີເພງສວດທີ່ທ່ານຮູ້ສຶກຢາກຈະຮ້ອງ ເມື່ອພຣະຜູ້ເປັນເຈົ້າໄດ້ກະທຳບາງສິ່ງທີ່ໜ້າປະຫລາດໃຈສຳລັບທ່ານ, ເຊັ່ນ “ພຣະຜູ້ໄຖ່ແຫ່ງອິດສະຣາເອນ” (ເພງສວດ ແລະ ເພງຂອງເດັກນ້ອຍ, 5). ໃຫ້ພິຈາລະນາທີ່ຈະຮ້ອງ ຫລື ຟັງເພງເພື່ອເປັນສ່ວນໜຶ່ງຂອງການນະມັດສະການຂອງທ່ານໃນມື້ນີ້.

ເບິ່ງ ຄຳສອນ ແລະ ພັນທະສັນຍາ 8:2–3 ນຳອີກ.

ອົບພະຍົບ 15:23–27; 16:1–15; 17:1–7

ພຣະຜູ້ເປັນເຈົ້າສາມາດເຮັດໃຫ້ຄວາມຂົມກາຍເປັນຄວາມຫວານໄດ້.

ການອ່ານກ່ຽວກັບການເດີນທາງຂອງຊາວອິດສະຣາເອນ ອາດນຳທ່ານໃຫ້ຄິດກ່ຽວກັບສິ່ງທີ່ຢູ່ໃນຊີວິດຂອງທ່ານ ທີ່ເບິ່ງຄືວ່າ “ຂົມ” ຄືກັນກັບນ້ຳຢູ່ທີ່ດິນແດນມາຣາ (ເບິ່ງ ອົບພະຍົບ 15:23–27). ພຣະຜູ້ເປັນເຈົ້າໄດ້ເຮັດໃຫ້ສິ່ງທີ່ຂົມໃນຊີວິດຂອງທ່ານກາຍເປັນຫວານແນວໃດ? ປະສົບການເຫລົ່ານີ້ມີຄ່າແນວໃດໃນຊີວິດຂອງທ່ານ?

ທ່ານຈະສັງເກດເຫັນຫລາຍຕົວຢ່າງຂອງປະສົບການທີ່ຂົມຂື່ນສຳລັບຊາວອິດສະຣາເອນ ຢູ່ໃນ ອົບພະຍົບ 16 ແລະ 17. ມັນເປັນເລື່ອງລໍ້ລວງທີ່ຈະວິພາກວິຈານການເວົ້າຈົ່ມ ຫລື ການຮ້ອງທຸກ, ແຕ່ຂະນະທີ່ທ່ານອ່ານ, ໃຫ້ພິຈາລະນາວ່າ ທ່ານເຄີຍເຮັດແບບດຽວກັນນັ້ນຫລືບໍ່. ທ່ານຮຽນຮູ້ຫຍັງແດ່ຈາກປະສົບການຂອງຊາວອິດສະຣາເອນ ທີ່ສາມາດຊ່ວຍທ່ານເວົ້າຈົ່ມໜ້ອຍລົງ ແລະ ໄວ້ວາງໃຈພຣະເຈົ້າຫລາຍຂຶ້ນ? ຂໍ້ເຫລົ່ານີ້ສິດສອນທ່ານຫຍັງແດ່ກ່ຽວກັບພຣະເຈົ້າ?

ເບິ່ງ 1 ນີໄຟ 2:11–12 ນຳອີກ.

ຊາວອິດສະຣາເອນກຳລັງເກັບເອົາມານາ. ຮູບແຕ້ມນີໂອໂກຕິກ ເຟຣດໂກ, ເທີນາວາ (ລາຍລະອຽດ)

ອົບພະຍົບ 16

ພຣະຜູ້ເປັນເຈົ້າສະເໜີການບຳລຸງລ້ຽງທາງຝ່າຍວິນຍານໃຫ້ແກ່ເຮົາ.

ຍ້ອນວ່າເຮົາທຸກຄົນຕ້ອງກິນເຂົ້າ, ພຣະຜູ້ເປັນເຈົ້າຈຶ່ງມັກຈະປຽບທຽບສິ່ງຂອງທາງຝ່າຍວິນຍານກັບອາຫານ. ໃຫ້ຊອກຫາບົດຮຽນທາງຝ່າຍວິນຍານໃນປະສົບການຂອງຊາວອິດສະຣາເອນກັບມານາໃນ ອົບພະຍົບ 16. ຍົກຕົວຢ່າງ, ທ່ານພົບເຫັນຫຍັງແດ່ຢູ່ໃນຄຳແນະນຳຂອງພຣະຜູ້ເປັນເຈົ້າຢູ່ໃນ ອົບພະຍົບ 16:16, 19, 22–26 ທີ່ກ່ຽວພັນກັບການບຳລຸງລ້ຽງທາງຝ່າຍວິນຍານຂອງທ່ານ?

ເພື່ອຈະຄົ້ນພົບບົດຮຽນອື່ນໆທີ່ພຣະຜູ້ເປັນເຈົ້າອາດປະສົງໃຫ້ທ່ານຮຽນຮູ້ຈາກການອັດສະຈັນນີ້, ໃຫ້ໄຕ່ຕອງຄຳຖາມດັ່ງຕໍ່ໄປນີ້:

ພຣະຜູ້ເປັນເຈົ້າປະທານຫຍັງໃຫ້ເຮົາແດ່ ທີ່ຄ້າຍຄືກັນກັບມານາປະຈຳວັນ ທີ່ພຣະອົງໄດ້ປະທານໃຫ້ຊາວອິດສະຣາເອນ.
ເຮົາສາມາດເຮັດຫຍັງແດ່ທີ່ຄ້າຍຄືກັນກັບການເກັບມານາ?

ທ່ານອາດພົບເຫັນຄວາມຮູ້ເພີ່ມເຕີມຢູ່ໃນວິດີໂອໜຶ່ງ ຫລື ຫລາຍກວ່ານັ້ນ: “Daily Bread: Pattern,” “Daily Bread: Experience,” ແລະ “Daily Bread: Change” (ຫ້ອງສະໝຸດພຣະກິດຕິຄຸນ ນຳອີກ).

ໃຫ້ຄິດກ່ຽວກັບສິ່ງອື່ນໆ, ນອກເໜືອໄປຈາກການກິນເຂົ້າ, ທີ່ທ່ານເຮັດທຸກໆວັນ. ເປັນຫຍັງບາງສິ່ງໂດຍສະເພາະຕ້ອງເຮັດທຸກໆວັນເພື່ອໃຫ້ມັນມີປະສິດທິພາບ? ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດ ເພື່ອສະແຫວງຫາປະສົບການທາງວິນຍານທຸກໆວັນ?

ເບິ່ງ Dieter F. Uchtdorf, “Daily Restoration,” Liahona, Nov. 2021, 77–79; “Daily Restoration” (ວິດີໂອ), ຫ້ອງສະໝຸດພຣະກິດຕິຄຸນ.

ອົບພະຍົບ 17:1–7

ພຣະເຢຊູຄຣິດເປັນຫີນສີລາທາງວິນຍານ ແລະ ເປັນນ້ຳທີ່ປະກອບດ້ວຍຊີວິດຂອງເຮົາ.

ໃຫ້ຄິດກ່ຽວກັບພຣະຜູ້ຊ່ວຍໃຫ້ລອດຂະນະທີ່ທ່ານອ່ານ ອົບພະຍົບ 17:1–7. ພຣະເຢຊູຄຣິດເປັນເໝືອນຫີນສີລາຕໍ່ທ່ານແນວໃດ? (ເບິ່ງ ເພງສັນລະເສີນ 62:6–7; ຮີລາມັນ 5:12). ພຣະອົງເປັນເໝືອນນ້ຳແນວໃດ? (ເບິ່ງ ໂຢຮັນ 4:10–14; 1 ໂກຣິນໂທ 10:1–4; 1 ນີໄຟ 11:25).

ໃຫ້ຊອກຫາສິ່ງຂອງທີ່ເປັນພະຍານເຖິງພຣະຄຣິດ. ເມື່ອໃດກໍຕາມທີ່ພຣະຄຳພີບັນຍາຍສິ່ງທີ່ສາມາດເປັນສັນຍາລັກເຖິງພຣະເຢຊູຄຣິດ, ເຊັ່ນ ອົບພະຍົບ 17:1–7 ບັນຍາຍ, ນີ້ອາດເປັນໂອກາດສຳລັບບົດຮຽນທີ່ໃຊ້ສິ່ງຂອງ. ການເບິ່ງ ຫລື ການຈັບບາຍກ້ອນຫີນ ຫລື ນ້ຳ ສາມາດເຮັດໃຫ້ເຂົ້າໃຈງ່າຍຂຶ້ນວ່າ ສິ່ງຂອງເຫລົ່ານີ້ເປັນເໝືອນພຣະເຢຊູຄຣິດແນວໃດ. ຖ້າຫາກທ່ານສາມາດເອົາຄວາມຮູ້ສຶກຫລາຍຢ່າງເຂົ້າຮ່ວມໃນການຮຽນຮູ້, ມັນຈະເປັນທີ່ຊົງຈຳ ແລະ ມີຜົນກະທົບຫລາຍຂຶ້ນ.

ອົບພະຍົບ 17:8–16; 18:13–26

ສານຸສິດຊ່ວຍກັນ “ຮັບແບກພາລະ” ຂອງການເຮັດວຽກງານຂອງພຣະຜູ້ເປັນເຈົ້າ.

ອາດມີເວລາໃນຊີວິດຂອງທ່ານເມື່ອທ່ານເຂົ້າໃຈໂມເຊດີ—ເມື່ອຄົນອື່ນກຳລັງເພິ່ງພາທ່ານຢູ່, ແຕ່ “ແຂນຂອງທ່ານ [ຮູ້ສຶກວ່າ] ອ່ອນລົງ” (ອົບພະຍົບ 17:12). ໃນເວລາອື່ນໆ, ທ່ານອາດເປັນເໝືອນອາໂຣນ, ຮູເຣ, ເຢທະໂຣ, ຜູ້ທີ່ໄດ້ສະໜັບສະໜູນໂມເຊ. ໃຫ້ວາງຕົວທ່ານເອງຢູ່ໃນຕຳແໜ່ງຂອງແຕ່ລະຄົນເຫລົ່ານີ້ ຂະນະທີ່ທ່ານອ່ານ ອົບພະຍົບ 17:8–16; 18:13–26, ແລະ ເຫັນສິ່ງທີ່ພຣະຜູ້ເປັນເຈົ້າສິດສອນທ່ານກ່ຽວກັບວຽກງານຂອງພຣະອົງ.

ເບິ່ງ ໂມໄຊຢາ 4:27; 18:8–9 ນຳອີກ.

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ອົບພະຍົບ 14:5–22

ພຣະຜູ້ເປັນເຈົ້າສາມາດເຮັດ “ວຽກງານຍິ່ງໃຫຍ່” ໃນຊີວິດຂອງເຮົາ.

ເມື່ອພຣະຜູ້ເປັນເຈົ້າໄດ້ແຍກທະເລແດງ, ໂມເຊ ແລະ ຊາວອິດສະຣາເອນໄດ້ເຫັນວ່າພຣະອົງມີອຳນາດຂະໜາດໃດ. ໃຫ້ລູກໆຂອງທ່ານຊ່ວຍທ່ານຄິດຫາວິທີທີ່ມ່ວນຊື່ນເພື່ອສະແດງເລື່ອງລາວຄືນອີກຈາກ ອົບພະຍົບ 14:5–22 (ເບິ່ງ “ງານປັດສະຄາ” ໃນ ເລື່ອງພຣະຄຳພີເດີມ, 70–74 ນຳອີກ). ບາງທີທ່ານສາມາດຈັດຕັ່ງ ຫລື ຜ້າຫົ່ມ ແລະ “ແຍກ” ມັນຄືກັນກັບທະເລແດງ. ແລ້ວພວກທ່ານສາມາດແບ່ງປັນນຳກັນກ່ຽວກັບວິທີທີ່ພວກທ່ານເຄີຍໄດ້ເຫັນອຳນາດຂອງພຣະເຈົ້າໃນຊີວິດຂອງພວກທ່ານແນວໃດ.

2:54
The Passover
ຄຳສອນ ແລະ ພັນທະສັນຍາ 8:2–3 ຕື່ມຫຍັງແດ່ໃຫ້ກັບຄວາມເຂົ້າໃຈຂອງເຮົາເຖິງເລື່ອງລາວຢູ່ໃນ ອົບພະຍົບ 14? ໃຫ້ພິຈາລະນາທີ່ຈະບອກລູກໆຂອງທ່ານກ່ຽວກັບປະສົບການ ເມື່ອພຣະວິນຍານບໍລິສຸດໄດ້ບອກທ່ານບາງສິ່ງໃນຈິດໃຈ ຫລື ໃນໃຈຂອງທ່ານ, ແລະ ເຊື້ອເຊີນພວກເຂົາໃຫ້ເວົ້າລົມກ່ຽວກັບປະສົບການຂອງພວກເຂົາ. ພວກທ່ານສາມາດຮ້ອງເພງນຳກັນກ່ຽວກັບພຣະວິນຍານບໍລິສຸດນຳອີກ, ເຊັ່ນ “ພຣະວິນຍານພຣະເຈົ້າ” (ເພງສວດ ແລະ ເພງຂອງເດັກນ້ອຍ, 30).

ອົບພະຍົບ 15:22–25

ພຣະຜູ້ເປັນເຈົ້າສາມາດເຮັດໃຫ້ຂົມກາຍເປັນຫວານໄດ້.

ບາງທີທ່ານ ແລະ ລູກໆຂອງທ່ານສາມາດດື່ມບາງສິ່ງທີ່ຫວານ ແລະ ບາງສິ່ງທີ່ຂົມ ຂະນະທີ່ອ່ານ ອົບພະຍົບ 15:22–25 ນຳກັນ. ພຣະຜູ້ຊ່ວຍໃຫ້ລອດໄດ້ເຮັດໃຫ້ປະສົບການທີ່ “ຂົມ” ໃນຊີວິດຂອງທ່ານກາຍເປັນ “ຫວານ” ແນວໃດ?

ອົບພະຍົບ 15:23–25; 16:14–15; 17:1–6

ພຣະເຢຊູເປັນນ້ຳທີ່ປະກອບດ້ວຍຊີວິດຂອງເຮົາ, ເຂົ້າຈີ່ແຫ່ງຊີວິດຂອງເຮົາ, ແລະ ຫີນສີລາຂອງເຮົາ.

ຂະນະທີ່ທ່ານ ແລະ ລູກໆຂອງທ່ານອ່ານ ອົບພະຍົບ 15:23–25; 16:14–15; 17:1–6, ໃຫ້ພວກເຂົາຊ່ວຍທ່ານຊອກຫາສິ່ງຂອງທີ່ຈະຊ່ວຍເລົ່າແຕ່ລະເລື່ອງ—ເຊັ່ນງ່າໄມ້ (ເພື່ອປ່ຽນລົດຊາດຂອງນ້ຳທີ່ມາຣາ), ກະປຸກ ຫລື ໝໍ້ (ເພື່ອໃສ່ມານາ), ແລະ ກ້ອນຫີນ (ສຳລັບນ້ຳທີ່ໂຮເຣັບ). ເລື່ອງລາວເຫລົ່ານີ້ເຕືອນເຮົາຫຍັງແດ່ກ່ຽວກັບສິ່ງທີ່ພຣະເຢຊູຄຣິດໄດ້ກະທຳເພື່ອເຮົາ? ພາກສ່ວນໜຶ່ງໃນການສົນທະນາຂອງພວກທ່ານ, ພວກທ່ານອາດຈະອ່ານ ມັດທາຍ 7:24–27; ໂຢຮັນ 4:10–14; 6:29–35, 48–51; ຮີລາມັນ 5:12; ຄຳສອນ ແລະ ພັນທະສັນຍາ 20:77, 79.

ຮູບພາບທີ່ສະແດງເຖິງ ໂມເຊ, ອາໂຣນ, ແລະ ເຮຣູ — One Before God [ຜູ້ທີ່ຢູ່ຕໍ່ພຣະພັກຂອງພຣະເຈົ້າ], ໂດຍ ໂຈເຊັບ ບຣິກກີ (ລາຍລະອຽດ)

ອົບພະຍົບ 17:8–16; 18:13–26

ເຮົາສາມາດຊ່ວຍ “ຮັບແບກພາລະ” ຂອງການເຮັດວຽກງານຂອງພຣະຜູ້ເປັນເຈົ້າ.

ຂະນະທີ່ທ່ານອ່ານ ອົບພະຍົບ 17:8–16, ທ່ານສາມາດເຊື້ອເຊີນລູກຄົນໜຶ່ງໃຫ້ຍົກມືເຂົາຂຶ້ນສູງໃນອາກາດ. ເມື່ອລູກຄົນນັ້ນເມື່ອຍ, ລູກຄົນອື່ນໆສາມາດຊ່ວຍຍົກ, ຕາມວິທີທີ່ອາໂຣນ ແລະ ເຮຣູໄດ້ຊ່ວຍໂມເຊ. ເລື່ອງລາວນີ້ສິດສອນເຮົາຫຍັງແດ່ກ່ຽວກັບວິທີທີ່ເຮົາສາມາດຊ່ວຍໃຫ້ອານາຈັກຂອງພຣະເຈົ້າບັນລຸຜົນສຳເລັດ? ທ່ານຍັງສາມາດອ່ານ ອົບພະຍົບ 18:13–26 ນຳອີກ ແລະ ເວົ້າລົມກ່ຽວກັບໜ້າທີ່ຮັບຜິດຊອບທີ່ໜັກໜ່ວງຂອງຜູ້ຄົນທີ່ຮັບໃຊ້ໃນຫວອດຂອງທ່ານ. ເຮົາສາມາດເຮັດຫຍັງໄດ້ແດ່ໃນມື້ນີ້ເພື່ອຊ່ວຍຜູ້ນຳໃນສາດສະໜາຈັກຂອງເຮົາ, ດັ່ງທີ່ອາໂຣນ ແລະ ເຮຣູໄດ້ຊ່ວຍສາດສະດາໂມເຊ?

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ໂມເຊກຳລັງແຍກນ້ຳທະເລແດງ — Crossing the Red Sea [ການຂ້າມທະເລແດງ], ໂດຍ ອອດໂຕ ເຊັມເລີ

ໜ້າກິດຈະກຳປະຖົມໄວ: ພຣະຜູ້ເປັນເຈົ້າສາມາດເຮັດ “ວຽກງານຍິ່ງໃຫຍ່” ໃນຊີວິດຂອງເຮົາ — Crossing the Red Sea [ການຂ້າມທະເລແດງ], ໂດຍ ອອດໂຕ ເຊັມເລີ