Гэтлэл 7–13

Таны хүсэл Фараоныхтай адил хэзээ ч Бурханы тааллын эсрэг байхгүй гэдэгт найдаж байна. Гэсэн хэдий ч бидний зүрх сэтгэл байх ёстой шигээ зөөлөн биш байх үе бид бүхэнд тохиолддог. Гэтлэл 7:14–25; 8:5–32; 9:1–26; 10:12–29; 12:29–33 дээрх тахлууд дахь Фараоны хариу үйлдлүүдийн юу нь танд онцгой санагдсан бэ? Гэтлэл 7:3, 13; 9:12-ын Иосеф Смитийн орчуулга дахь тодруулгыг анхаар.

Яагаад “хатуу” гэдэг үг Фараоны зүрх сэтгэлийг сайн дүрсэлж чадаж байна вэ? Эдгээр шүлгээс зөөлөн зүрх сэтгэлтэй байх талаар юу сурч мэдсэнээ тунгаан бод: 1 Нифай 2:16; Мозая 3:19; Алма 24:7–8; 62:41; Ифер 12:27. Фараоны хатуу зүрх сэтгэлийн үр дагаврын тухай уншихдаа өөрийн зүрх сэтгэлийн байдлыг тунгаан бод. Танд юугаа өөрчилмөөр санагдаж байна вэ?

Гэтлэл 11:4–5-д дүрсэлснээр израилчуудын хувьд арав дахь тахлаас аврагдах цорын ганц арга зам бол Гэтлэл 12 дээр Их Эзэний Мосед өгсөн заавар болох Алгасал баяр хэмээх зан үйлийг ягштал дагаж мөрдөх явдал байв. Алгасал баяр нь бэлгэдлээр дамжуулан Их Эзэн израилчуудыг Египет дэх боолчлолоос чөлөөлсөнтэй адил биднийг нүглийн боолчлолоос чөлөөлж чадна гэдгийг бидэнд заадаг. Гэтлэл 12:1–42 дээрх энэ бэлгэдлийг судлахын тулд та дараах хүснэгтийг ашиглаж болно:

Есүс Христийг болон Түүний Цагаатгалыг танд сануулах өөр ямар заавар болон жишээнүүдийг та Алгасал баяраас олж болох вэ? Эдгээр бэлгэдэл нь Түүний Цагаатгалын адислалыг хэрхэн хүлээж авах талаар танд юу санал болгож байна вэ?

Израилчууд боолчлолоо санахаа больсон ч Аврагч өөрсдийг нь чөлөөлснийг санахад туслахын тулд Тэр тэдэнд Алгасал баярыг жил бүр тэмдэглэхийг зарлигласан. Гэтлэл 12:14–17, 24–27; 13:1–16 дээрх Түүний заавруудыг уншиж байхдаа танд өгсөн Бурханы адислалуудыг санахын тулд юу хийж байгаагаа эргэцүүлэн бод. Та хэрхэн “үе удмынхаа турш” (Гэтлэл 12:14, 26–27-г үзнэ үү) ингэж дурсан санасаар байх вэ?

Алгасал баяр, ариун ёслол хоёрын хооронд ямар ямар адил шинж байгааг та харж байна вэ? Есүс Христийг “үргэлж санахын” тулд та нар юу хийж чадах вэ? (Моронай 4:3; 5:2).

Их Эзэн таныг санаасай хэмээн хүсдэг бусад зүйлийг та бас бодож болох юм. Жишээлбэл: Хиламан 5:6–12; Moронай 10:3; Сургаал ба Гэрээнүүд 3:3–5, 10; 18:10; 52:40-ийг үзнэ үү.

Мөн Кэвин В.Пийрсоны “Та бэлэн хэвээрээ байна уу?” хэмээх захиасыг Лиахона, 2022 оны 11 сар, 67–69; “Always Remember Him” видеог Gospel Library-аас; “Цовдлогдсон Нэгэнийг саная,” дууллыг Дуулал 102-оос тус тус үзнэ үү.

5:27

• Гэтлэл 7–11-т дүрслэгдсэн тахлууд Их Эзэн агуу хүчтэйг египетчүүдэд болон израилчуудад харуулсан юм. Хүүхдүүд тань Их Эзэний хүчинд итгэсэн үед Их Эзэн тэдэнд амьдралынх нь турш туслах болно. Тэдэнд энэ түүхээс суралцахад нь туслахын тулд та хүүхэд бүрд 10 хэсэгт хуваасан цаас өгч, эдгээр шүлэгт дүрслэгдсэн тахлын зургуудыг зурахад урьж болно: Гэтлэл 7:17–18; 8:1–4; 8:16–17; 8:20–22; 9:1–6; 9:8–9; 9:22–23; 10:4–5; 10:21–22; 11:4–7 (мөн Хуучин Гэрээний Түүхүүд-ийн 67–69-р хуудсан дахь “Египетийн тахлууд”-ыг үзнэ үү). Гэтлэл 7:5 болон 9:14-ийг хамтдаа уншаад, Их Эзэн яагаад тахлуудыг илгээснийг тайлбарла.

  

  2:3

• Их Эзэн “бүх дэлхийд [Түүнтэй] адил хэн ч байхгүйг” (Гэтлэл 9:14) танд хэрхэн харуулсныг хүүхдүүдтэй хуваалц. Их Эзэн хүчирхэг гэдгийг хэрхэн мэддэгээ хуваалцах боломжийг тэдэнд олго.

• Хүүхдүүддээ зөөлөн зүрхтэй байна гэдэг нь юу гэсэн үг болохыг ойлгоход нь туслахын тулд чулуу шиг хатуу зүйлийг, мөн порлон шиг зөөлөн, шингээгч өөр зүйлийг үзүүлэх нь зугаатай байж болох юм. Мөн та зөөлөн зүрх сэтгэл Их Эзэний үгийг хэчнээн амархан хүлээн авдгийг харуулахын тулд эдгээр зүйлс дээр ус асгаж болно. Дараа нь та нар Их Эзэний илгээсэн тахлуудад Фараон хэрхэн хандсаныг харуулсан цөөн хэдэн шүлгийг хамтдаа уншиж болно (Гэтлэл 8:28–32; 9:7-г үзнэ үү). Эдгээрээс аль нь Фараоны зүрх сэтгэл буюу хандлагыг хамгийн сайнаар харуулж байна вэ? Зүрх сэтгэл зөөлөн байна гэдэг нь юу гэсэн үг вэ? (Мозая 3:19-ийг үзнэ үү).

• Та хүүхдүүдтэйгээ хамт, бид хатуу зүрх сэтгэлтэй байгааг харуулж болох (жишээлбэл, эелдэг бус үг хэрэглэх эсвэл хуваалцах хүсэлгүй байх гэх зэрэг) үйлдлүүдийн жагсаалтыг гаргаж болно. Бид Их Эзэнд зөөлөн зүрх сэтгэлтэй гэдгээ хэрхэн харуулж чадах вэ?

• Алгасал баяр Аврагчийг болон бидний төлөө хийсэн Түүний золиосыг тэсэн ядан хүлээхийг израилчуудад заасан. Гэтлэл 12:1–13-ыг хамтдаа судлахдаа Алгасал баяр, Есүс Христийн Цагаатгалын нарийн ширийн зүйлүүд хоорондоо холбоотой болохыг ойлгоход хүүхдүүддээ тусал (мөн Хуучин Гэрээний түүхүүдийн “Алгасал баяр” хэсгийг 70–74-р хуудаснаас үзнэ үү). Жишээлбэл: Есүс 5-р шүлэг дээрх хургатай юугаараа адил байна вэ?

  

  2:54

• Өнөөдөр бид Есүсийн золиослолыг санахын тулд ариун ёслолоос хүртдэг. Та хүүхдүүддээ ариун ёслолын зургийг үзүүлээд, энэ ёслол бидэнд Есүс Христийг санахад хэрхэн тусалдаг тухай ярилцаж болно. Та хүүхдүүддээ ариун ёслолын залбирлуудаас “санах” гэдэг үгийг олоход нь тусалж болно (Moронай 4–5-ыг үзнэ үү). Эсвэл ариун ёслолын дуртай нэг дууллыг нь хамтдаа дуулж, Аврагчийн тухай бодох үедээ мэдэрдэг амар амгалан мэдрэмжээ анзаарахад нь хүүхдүүддээ тусал. Бид ариун ёслолоос хүртэхдээ ийм мэдрэмжийг хэрхэн эрэлхийлж болох вэ?