Paseka

Ditemana tse dintsi mo Kgolaganong e Kgologolo di supa tirelo ya Mmoloki le setlhabelo sa tetlanyo. Lenaneo le le fa tlase le nankola dingwe tsa ditemana tse. Fa o bala ditemana tse, ke maikutlo afe a a tlang mo go wena ka ga Mmoloki?

Diperofeso tse di rutang ka ga Mmoloki di dintsi le go feta ebile di tlhamaletse mo Bukeng ya ga Momone. Akanya kafa tumelo ya gago e nonotshiwang ka gone ke ditemana tse di tshwanang le tseno: 1 Nifae 11:31–33; 2 Nifae 25:13; Mosaeya 3:2–11; Alema 7:10–13.

Baporofeti ba malatsi a bofelo ba tswelela go neela bosupi jo bo kgethegileng ka ga Jeso Keresete le thomo ya Gagwe ya tetlanyo. Jaaka o reetsa khonforense ya kakaretso mo mafelong a beke ano a Paseka, ela tlhoko bopaki jwa ga Keresete jo o bo utlwang. Di go ruta eng ka Ene?

Paseka ke nako ya boitumelo, ka gonne ke nako ya go keteka Tetlanyo le Tsogo ya Mmoloki. Mme le fa go ntse jalo, le ka nako ya Paseka, go na le batho ba le bantsi ba ba sa ikutlweng ba itumetse ka ntlha ya mabaka a a farologaneng. O ka dira eng go anamisa kagiso le boitumelo jwa Mmoloki mo Pasekeng eno?

Kakanyo nngwe ke go batla melaetsa mo dikwalong tse di boitshepo ka ga kagiso le boitumelo jo Jeso Keresete a bo nayang, jaaka tse: Pesalama 16:8–11; 30:2–5; Isaia 12; 25:8–9; 40:28–31; Johane 14:27; 16:33; Alema 26:11–22. Akanya ka fa o ka abelanang melaetsa eno le ba bangwe ka teng. Sekai, gongwe o ka dira dikarata tsa Paseka go di abelana, go ikaegilwe ka melaetsa eno. Rapela ka ga gore ke mang yo o tlhokang go amogela tumediso ya gago ya Paseka. Gape o ka nna wa tsaya tshwetso ya go abelana melaetsa ya gago mo metsweding ya dikgang, ko batho ba le bantsi ba ka e bonang gone.

Difela tse di buang ka ga Keresete le Tsogo, jaaka “He Is Risen!” (Hymns, no.199), gape di ka re thusa go utlwa re na le kagiso le boitumelo ka Paseka. Batla diele mo sefeleng, go ya ka kakanyo ya gago, tse di supang boitumelo jwa Paseka.

Bona le gone Jeffrey R. Holland, “Not as the World Giveth,” Liahona, Motsheganong 2021, 35–38; Mark S. Palmer, “Our Sorrow Shall Be Turned into Joy,” Liahona, May 2021, 88–90.

Tiro e e ka go thusang go bona masego a mantsi a a tlang ka Jeso Keresete le Tetlanyo ya Gagwe ke e. Bala dikwalo tse di fa tlase ka se Jeso Keresete a re thusang go se fenya. Leka go tlhaola ditemana ka ditlhopha tse: sebe, loso, diteko, le makoa (ditemana dingwe di ka tsena mo ditlhopheng tse di fetang bongwe). Fa o ntse o bala, ke ditlhotlheletso dife tse o nang le tsone ka thata ya Mmoloki?

• Isaia 61:1–3

• Esekiele 36:26–28

• Mathaio 11:28–30

• Luke 1:46–55

• Baroma 8:35–39

• Alema 7:10–13

• Alema 11:42–45

• Alema 58:11

• Moronae 10:32–33

• Dithuto le Dikgolagano 19:15–19

• Moshe 5:9–12

O ka tlhalosetsa jang tsala e e seng Mokeresete gore ke eng fa Jeso Keresete a le botlhokwa mo go wena? Molaetsa wa ga Mogolwane Ahmad S. Corbitt “Do You Know Why I as a Christian Believe in Christ? (Liahona, Motsheganong 2023, 119–21) o ka thusa.

Bona le gone Reyna I. Aburto, “The Grave Has No Victory,” Liahona, Motsheganong 2021, 85–87; Topics and Questions, “Atonement of Jesus Christ,” “Resurrection,” Motlobo wa Efangele.

O ithuta eng go tswa mo ditemaneng tse di latelang ka ga tlhwatlhwa e Jeso Keresete a e dueletseng poloko ya gago: Isaia 53:3–5; Mosia 3:7; Dithuto le Dikgolagano19:16–19? Rara wa Legodimo o ne a duela tlhwatlhwa efe? (bona Johane 3:16).

• Beke ya Paseka ke nako e ntle ya go ruta bana ba gago ka se Mmoloki a se re diretseng kwa Gethesemane le mo sefapanong. O ka simolola ka go ba bontsha ditshwantsho tse di fa tlase le go ba letla go bua ka se se diragalang mo ditshwantshong. Fa bana ba gago ba ntse ba lebile ditshwantsho, o ka bala ditemana tse di tlhalosang ditiragalo tse (bona Mathaio 26:36–46; 27:35–50; Luke 22:39–46; Johane 19:16–30). Bana ba gago ba ka supa dintlha tse di mo ditshwantshong tse ba di utlwang mo ditemaneng.

• Re segofadiwa jang ka ntlha ya setlhabelo sa ga Jeso mo go rona? Thusa bana ba gago go batla mafoko le dielana tse di arabang potso eno mo Isaia 53:4–12; Alema 7:11–13; le Dithuto le Dikgolagano 19:16–19. Abelanang gore lo ikutlwa jang ka Mmoloki morago ga go bala dikwalo tse.

• O ka dirisa tsebe ya tiro ya beke eno kgotsa ditshwantsho tse dingwe mo tshobokong eno go bolelela bana ba gago polelo ya Tsogo (bona gape “Jesus Is Risen,” mo New Testament Stories, 139–44). Go tswa foo, a bana ba gago ba go bolelele polelo eo gape.

• Akanya ka fa o tlaa thusang bana ba gago go bona boitumelo mo go Keresete mo Pasekeng eno. Sekai, lo ka opela mmogo sefela sa Paseka se lo se ratang, jaaka “Christ the Lord Is Risen Today” (Hymns, no. 200) kgotsa “Gethesemane” (Motlobo wa Efangele). Go bona dipina tse dingwe ka ga Tsogo, o ka leba mo tshupaneng ya ditlhogo tsa Hymns le Children’s Songbook. Wena le bana ba gago le ka bua ka dinako tse le neng le tlhoka go itshwarela mongwe le ka fa Mmoloki a le thusitseng ka teng. Dipina tse di re ruta eng ka Rara wa Legodimo le Jeso Keresete?

• Motlobo wa Efangele e na le kokoanyo ya Easter videos tseo bana ba gago ba ka di itumelelang. Gongwe o ka ba letla go tlhopha e le nngwe gore ba e lebelele. Ba botse gore ba ithuta eng ka ga Jeso Keresete go tswa mo setshwantshong sa motshikenyego. Gape o ka nna wa ba kopa gore ba soboke molaetsa wa setshwantsho sa motshekinyego ka seele se le sengwefela.

• Fa wena le bana ba gago le lebelela khonferense ya kakaretso mmogo mafelong a beke eno a Paseka, ba thuse go lemoga fa basupi ba ba kgethegileng ba Mmoloki ba neela bosupi jwa Tsogo. Gongwe o ka dira motshameko wa yone—ba kope gore ba eme ka dinao nako le nako fa ba utlwa mafoko a a tshwanang le Paseka kgotsa Tetlanyo kgotsa Tsogo. Abelanang gore ke eng lo lebogela bopaki jwa baperofeti ba ba tshedileng jwa Mmoloki.