“30 marzo–5 abril. “Tixsach chi junajwa xwankil li kamk”: Li Paswa,” Kim, Taaqehin—Choq’ re li ochoch ut li iglees: Li Najter Chaq’rab’ 2026 (2026)
“30 marzo–5 abril. “Tixsach chi junajwa xwankil li kamk,”” Kim, Taaqehin: Li Najter Chaq’rab’ 2026
Xjalam-uuch li muqleb’aal yamyo
30 marzo–5 abril: “Tixsach chi junajwa xwankil li kamk”
Li Paswa
A’ lix yu’am li Jesukristo “naxe’enk re chixjunil lix wanjikeb’ li winq” (“Li Yo’yookil Kristo, Lix Ch’olob’ahomeb’ li Apostol,” Biblioteca del Evangelio). K’a’ru naraj naxye a’an? Naraj naxye naq lix yu’am li Kolonel wan xwankil sa’ xb’een lix junelikil eechanihom chixjunileb’ li ak chalenaqeb’ malaj li toj te’chalq sa’ li ruchich’och’ a’in. Naru xyeeb’al naq lix waklijik li Jesukristo chi yo’yo, sa’ li xb’eenil domingo re li Paswa, naxjunaji chixjunileb’ li ralal xk’ajol li Dios chalen chaq xtiklajik: eb’ li ke’yo’la naq maji’ nawakli chi yo’yo ke’royb’eni rik’in paab’aal (chi’ilmanq Jakob 4:4), ut eb’ li ke’yo’la chirix neke’ilok chi ixb’ej rik’in paab’aal. Naq naqileb’ li seraq’ ut li profeetil aatin sa’ li Najter Chaq’rab’, ink’a’ naqataw lix k’ab’a’ li Jesukristo, a’b’anan naqil reetalil lix paab’aaleb’ ut royb’enihomeb’ li najter aj paab’anel chirix li Mesias ut laj Tojol rixeb’. Chi jo’kan, laa’o li b’oqb’ilo chi ilok chi ixb’ej naru taqeek’a qakomonil rik’ineb’ li ke’ilok chi uub’ej. Relik chi yaal, li Jesukristo kiriiqani “li qamaak chiqajunilo” (Isaias 53:6; tiqb’il xkawil li aatin), ut “chixjunileb’ te’wanq wi’chik xyu’am sa’ xk’ab’a’ li Kristo” (1 Korintios 15:22; tiqb’il xkawil li aatin).
Li na’leb’ re tzolok sa’ li ochoch ut sa’ li iglees
Eb’ li profeet re najter kutan ut sa’ li kutan a’in neke’xch’olob’ xyaalal lix mayej li Kolonel re xtojb’al qix.
K’iheb’ li raqal sa’ li Najter Chaq’rab’ li neke’xk’ut xyaalal lix k’anjel ut lix mayej li Kolonel. Arin wan junjunq reheb’ li raqal a’an. Naq nakawileb’ ru li raqal a’in, k’a’ru naxk’ut li Musiq’ej chawu chirix li Kolonel?
|
Li Najter Chaq’rab’ |
Li Ak’ Chaq’rab’ |
|---|---|
Li Najter Chaq’rab’ Sakarias 9:9 | Li Ak’ Chaq’rab’ Mateo 21:1–11 |
Li Najter Chaq’rab’ Sakarias 11:12–13 | Li Ak’ Chaq’rab’ Mateo 26:14–16; 27:3–8 |
Li Najter Chaq’rab’ Isaias 53:4 | Li Ak’ Chaq’rab’ Mateo 8:16–17; 26:36–39 |
Li Najter Chaq’rab’ Isaias 53:7 | Li Ak’ Chaq’rab’ Markos 14:60–61 |
Li Najter Chaq’rab’ Salmos 22:16 | Li Ak’ Chaq’rab’ Jwan 19:17–18; 20:25–27 |
Li Najter Chaq’rab’ Salmos 22:18 | Li Ak’ Chaq’rab’ Mateo 27:35 |
Li Najter Chaq’rab’ Salmos 69:21 | Li Ak’ Chaq’rab’ Mateo 27:34, 48 |
Li Najter Chaq’rab’ Salmos 118:22 | Li Ak’ Chaq’rab’ Mateo 21:42 |
Li Najter Chaq’rab’ Isaias 53:9, 12 | Li Ak’ Chaq’rab’ Mateo 27:57–60; Markos 15:27–28 |
Li Najter Chaq’rab’ Isaias 25:8 | Li Ak’ Chaq’rab’ Markos 16:1–6; Lukas 24:6 |
Li Najter Chaq’rab’ Daniel 12:2 | Li Ak’ Chaq’rab’ Mateo 27:52–53 |
Saqen wi’chik ru li profeetil aatin li nak’utuk chirix li Kolonel sa’ lix Hu laj Mormon. K’oxla chan ru naq kawob’resinb’il laa paab’aal xb’aaneb’ li raqal jo’eb’ a’in: 1 Nefi 11:31–33; 2 Nefi 25:13; Mosiah 3:2–11; Alma 7:10–13.
Eb’ li profeet sa’ roso’jikeb’ li kutan a’in toj neke’xch’olob’ xyaalal li Jesukristo ut lix k’anjel aj tojol-ix. Naq taawab’i li jolomil ch’utub’aj-ib’ chiru li Paswa a’in, k’e reetaleb’ li ch’olob’ahom chirix li Kristo taawab’i. K’a’ru neke’xk’ut chawu chirix a’an?
Li Jesukristo naxyeechi’i tuqtuukilal ut sahil ch’oolejil we.
Li Paswa a’an jun sahil hoonal, xb’aan naq a’an jun hoonal re xninq’ehinkil lix tojb’al rix li maak xb’aan li Kolonel ut lix waklijik chi yo’yo. A’ut, chiru ajwi’ li Paswa, wankeb’ naab’al li kristiaan ink’a’ neke’saho’ sa’ xch’ooleb’. K’a’ru naru taab’aanu re xjek’inkil lix tuqtuukilal ut lix sahilal li Kolonel chiru li Paswa a’in?
Maare taaruuq taataweb’ li aatin sa’ li loq’laj hu chirix li tuqtuukilal ut li sahil ch’oolejil naxyeechi’i li Jesukristo, jo’eb’ li raqal a’in: Salmos 16:8–11; 30:2–5; Isaias 12; 25:8–9; 40:28–31; Jwan 14:27; 16:33; Alma 26:11–22. K’oxla chan ru naru taawotzeb’ li aatin a’in rik’ineb’ laa was aawiitz’in. Qayehaq, maare naru taayiib’ ut taajek’i kok’ hu tz’iib’anb’il wi’ li aatin a’in chirix li Paswa. Tijon re xnawb’al ani taaraj ru xk’ulb’al laa waatin chiru li Paswa. Naru ajwi’ nakawotz sa’ internet li aatin xakawresi, re naq naab’aleb’ chik te’ruuq chi ilok re.
Eb’ li b’ich chirix li Kristo ut lix waklijik chi yo’yo, jo’ “Ak xwakli!” (Eb’ li B’ich, 121), naru ajwi’ neke’xk’e tuqtuukilal ut sahil ch’oolejil qe chiru li Paswa. Sik’eb’ li ch’ol aatin sa’ li b’ich li neke’reetali li sahil ch’oolejil re li Paswa choq’ aawe.
Chi’ilmanq ajwi’ Jeffrey R. Holland, “Moko jo’ ta naxk’e li ruchich’och’,” Jolomil ch’utub’aj-ib’ re abril 2022; Mark S. Palmer, “Li qarahilal taawulaq choq’ sahil ch’oolejil,” Jolomil ch’utub’aj-ib’ re abril 2021.
K’a’ naq nakatyaab’ak, xb’aan laj Simon Dewey (xraqalil)
Sa’ xk’ab’a’ naq kixtoj rix li maak, li Jesukristo wan xwankil re intenq’ankil chi numtaak sa’ xb’een li maak, li kamk, li yale’k-ix, ut li majelal.
Naru nakab’aanu a’in re xk’eeb’al reetal xk’ihaleb’ li osob’tesink neke’chal sa’ xk’ab’a’ li Jesukristo ut lix tojb’al rix li maak kixb’aanu. Ileb’ li raqal re li loq’laj hu rub’el a’in chirix li k’a’ru naru naqaq’ax ru chi tenq’anb’ilo xb’aan li Jesukristo. Yal xtusub’ankileb’ li raqal a’ yaaleb’ li na’leb’ a’in: li maak, li kamk, li yale’k-ix, ut li majelal (wankeb’ li raqal neke’aatinak chirix wiib’ oxib’ reheb’ li na’leb’ a’an). Naq yooqat chirilb’aleb’ a’an, k’a’ru li na’leb’ nakataw chirix lix wankil li Kolonel?
-
Isaias 61:1–3
-
Esekiel 36:26–28
-
Mateo 11:28–30
-
Lukas 1:46–55
-
Romanos 8:35–39
Chan raj ru taach’olob’ chiru junaq laa wamiiw li ink’a’ napaab’an chirix li Kristo k’a’ut naq nim xwankil li Jesukristo choq’ aawe? Naru nakataw aana’leb’ sa’ li raatin li Elder Ahmad S. Corbitt, “Ma nakanaw k’a’ut naq laa’in, jo’ aj Kristiano, ninpaab’ li Kristo?” (Jolomil ch’utub’aj-ib’ re abril 2023).
Chi’ilmanq ajwi’ Reyna I. Aburto, “Li muqleb’aal kamenaq maak’a’ xq’axom ru,” Jolomil ch’utub’aj-ib’ re abril 2021; Temas y preguntas, “Expiación de Jesucristo,” “Resurrección,” Biblioteca del Evangelio.
Li Jesukristo kixtoj xtz’aq lin kolb’al.
Sa’eb’ li raqal a’in, jo’ nimal kixtoj li Jesukristo choq’ re laa kolb’al: Isaias 53:3–5; Mosiah 3:7; Tzol’leb’ ut Sumwank 19:16–19? Jo’ nimal kixtoj laa Choxahil Yuwa’? (chi’ilmanq Jwan 3:16).
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Li na’leb’ re xtzolb’aleb’ li kok’al
Li Jesukristo kixk’ul li rahilal ut kikam sa’ ink’ab’a’ laa’in.
-
Li Paswa a’an jun chaab’il hoonal re xk’utb’al chiruheb’ laa kok’al k’a’ru kixb’aanu li Kolonel choq’ qe aran Getsemani ut chiru li krus. Naru nakatikib’ rik’in xk’utb’aleb’ li jalam-uuch wankeb’ rub’el a’in ut taakanab’eb’ chi aatinak chirix li neke’ril sa’eb’ li jalam-uuch. Naq yooqeb’ chirilb’aleb’ li jalam-uuch, naru taawileb’ li raqal neke’aatinak chirix li kik’ulman (chi’ilmanq Mateo 26:36–46; 27:35–50; Lukas 22:39–46; Jwan 19:16–30). Laa kok’al naru te’xye li k’a’aq re ru neke’ril sa’ li jalam-uuch naq neke’rab’i a’an sa’eb’ li raqal yookat chixyaab’asinkil.
Sa’ li tz’e: Li Kristo sa’ Getsemani, xb’aan laj Harry Anderson Sa’ li seeb’al: Li kamk chiru krus, xb’aan laj Harry Anderson
-
Chan ru naq noko’osob’tesiik xb’aan lix mayej li Jesus choq’ qe? Tenq’aheb’ laa kok’al chixsik’b’aleb’ li aatin ut ch’ol aatin neke’xsume li patz’om a’in sa’ Isaias 53:4–12; Alma 7:11–13; ut Tzol’leb’ ut Sumwank 19:16–19. Wotzomaq cherib’il eerib’ k’a’ru nekereek’a chirix li Kolonel chirix naq xeril li raqal a’in.
Li Jesus kiwakli chi yo’yo sa’ ink’ab’a’.
-
Naru nakawoksi li perel re kok’ k’anjel re li xamaan a’in malaj eb’ li jalam-uuch sa’ li tusleb’ aatin a’in re xyeeb’al reheb’ laa kok’al li seraq’ chirix li wakliik chi yo’yo (chi’ilmanq ajwi’ “Nawakli wi’chik chi yo’yo li Jesus,” sa’ Eb’ li Esilal sa’ li Ak’ Chaq’rab’, 139–144). Kanab’eb’ laa kok’al chixka’sutinkil aawe li seraq’.
-
K’oxla chan ru taatenq’aheb’ laa kok’al chixtawb’al xsahil xch’ooleb’ rik’in li Kristo chiru li Paswa a’in. Naru nekeb’icha jun li b’ich nawulak cheru chirix li Paswa, jo’ “Kristo anajwan xwakli” (Eb’ li B’ich, 122) malaj “Getsemani” (Biblioteca del Evangelio). Re xtawb’al xkomoneb’ chik li b’ich chirix li wakliik chi yo’yo, naru nakasik’eb’ sa’ li tusleb’aal na’leb’ sa’ Eb’ li B’ich ut B’ichleb’aal choq’ reheb’ li Kok’al. Laa’at ut eb’ laa kok’al naru nekewotz cherib’il eerib’ k’a’ut naq neke’wulak cheru li b’ich a’in ut k’a’ru nekereek’a naq yookex chixb’ichankileb’. K’a’ru neke’xk’ut li b’ich a’in chirix li qaChoxahil Yuwa’ ut li Jesukristo?
Eb’ li kok’al naru neke’reek’a li Musiq’ej a’b’an maare te’raj xtenq’ re xk’eeb’al reetal lix wanjik. “K’ut chiruheb’ li kok’al lix k’iila paayil nokoraatina wi’ li Musiq’ej. Tenq’aheb’ chirab’inkil lix xyaab’ xkux naq na’aatinak rik’ineb’. A’in taatenq’anq reheb’ rajlal xsik’b’al ut xb’aanunkil jo’ li k’utb’esinb’il na’leb’ xe’xk’ul chiru chixjunil lix yu’ameb’” (Li K’utuk jo’ li Kolonel, 32). Naq yooqat chi b’ichank chirix li Kolonel rik’ineb’ laa kok’al, ilomaqeb’ xjalam-uuch a’an, malaj li seraq’ chirix a’an, ut naru teewotz cherib’il eerib’ lee musiq’ejil eek’ahom.
-
Sa’ li Biblioteca del Evangelio wankeb’ li video chirix li Paswa li maare te’wulaq chiruheb’ laa kok’al. Naru nakasik’ ru junaq re naq te’ril. Patz’ reheb’ k’a’ru xe’xtzol chirix li Jesukristo sa’ li video. Naru ajwi’ nakapatz’ reheb’ naq te’xye rik’in yal jun ch’ol aatin li kik’ulman sa’ li video.
Eb’ li profeet neke’xch’olob’ xyaalal li Jesukristo ut lix tojb’al rix li maak li kixb’aanu.
-
Naq laa’at ut eb’ laa kok’al yooqex chirilb’al li jolomil ch’utub’aj-ib’ chiru li Paswa a’in, tenq’aheb’ chixk’eeb’al reetal hoonal naq eb’ laj yehol nawom sik’b’ileb’ ru xb’aan li Kolonel neke’xch’olob’ xyaalal li wakliik chi yo’yo. Naru naq a’anaq jun b’atz’unk—patz’ reheb’ naq te’xaqliiq rajlal sut naq te’rab’i li aatin Paswa malaj xtojb’al rix li maak malaj wakliik chi yo’yo. Wotzomaq cherib’il eerib’ k’a’ut naq nekeb’antioxi lix ch’olob’ahomeb’ li yo’yookil profeet chirix li Kolonel.
Re xtawb’al xkomon chik li na’leb’, chi’ilmanq li hu Amigos re li po a’in.