“6–12 abril. “Chijultiko’q eere li kutan a’in, li kex’el wi’ chaq aran Egipto”: Exodo 7–13,” Kim, Taaqehin—Choq’ re li ochoch ut li iglees: Li Najter Chaq’rab’ 2026 (2026)
“6–12 abril. “Chijultiko’q eere li kutan a’in, li kex’el wi’ chaq aran Egipto,”” Kim, Taaqehin: Li Najter Chaq’rab’ 2026
Xjalam-uuch laj Moises ut laj Aaron sa’ rochochil laj Farahon, xb’aan laj Robert T. Barrett
6–12 abril: “Chijultiko’q eere li kutan a’in, li kex’el wi’ chaq aran Egipto”
Exodo 7–13
Yoo chi tamk li rahilal aran Egipto, a’b’an laj Farahon toj ink’a’ kiraj rach’ab’ankileb’ laj Israelita. A’ut li Dios ink’a’ kixkanab’ xk’utb’al lix wankilal ut xq’unb’esinkil xch’ool laj Farahon “naq laa’in li Qaawa’” ut “maajun wan sa’ ruchich’och’ kama’ laa’in” (Exodo 7:5; 9:14). Laj Moises ut eb’ laj Israelita ke’ril lix k’utb’esinkil lix wankilal li Dios sa’ xk’ab’a’eb’ chi sachsookeb’ xch’ool. Relik chi yaal naq eb’ li eetalil a’in ke’xk’ut xyaalal lix paab’aaleb’ chirix li Dios ut kixkawob’resiheb’ xch’ool chixtaaqenkil lix profeet li Dios. Ak numenaqeb’ b’eleeb’ li ninqi rahilal ut maji’ ach’ab’anb’ileb’ laj Israelita, a’b’an li xlaje rahilal—lix kamikeb’ li xb’een yo’lajenaqeb’, jo’ ajwi’ li xb’een ralal laj Farahon—a’an kixk’e xraqik lix preexileb’. Maare kik’ulman chi jo’kan jo’ reetalil naq wanko sa’ musiq’ejil preexil, wan jun ajwi’ li b’e naru too’eeleliq wi’. Ka’ajwi’ lix mayej li Jesukristo, li Xb’een Yo’lajenaq—lix kik’el li Karneer li maak’a’ xmaak—naru tooxkol.
Li na’leb’ re tzolok sa’ li ochoch ut sa’ li iglees
Exodo 7–11
Naru ninsik’ xq’unob’resinkil li waam.
Maare maajun wa taatz’eqtaana li rajom li Dios jo’ kixb’aanu laj Farahon. A’b’an, wan naq moko q’un ta li qaam jo’ tento raj taawanq. K’a’ru nakawil rik’in lix sumehom laj Farahon chirixeb’ li rahilal sa’ Exodo 7:14–25; 8:5–32; 9:1–26; 10:12–29; 12:29–33?
K’a’ut naq wan xyaalal li aatin “kawujenaq” choq’ re lix ch’ool laj Farahon? K’oxla li na’leb’ nakatzol sa’eb’ li raqal a’in chirix jun ch’oolej q’un: 1 Nefi 2:16; Mosiah 3:19; Alma 24:7–8; 62:41; Eter 12:27. Naq yooqat chirilb’al k’a’ru kik’ulman xb’aan xkawil xch’ool laj Farahon, ut k’oxla xwanjik laa ch’ool laa’at. K’a’ru li nakaweek’a naq tento taajal?
Exodo 12:1–42
Li Jesukristo naru tinxkol sa’ xk’ab’a’ lix tojb’al rix li maak kixb’aanu.
Re te’kole’q laj Israelita chiru li xlaje rahilal, li yeeb’il resil sa’ Exodo 11:4–5, ki’ajman naq te’xtaaqe chi tz’aqal li na’leb’ li kixk’e li Qaawa’ re laj Moises sa’ Exodo 12, a’ jun santil k’anjel li nawb’il ru jo’ li Paswa. Chi eetalinb’il, li Paswa naxk’ut chiqu naq jo’ li Qaawa’ kixkoleb’ laj Israelita chiru li moosil aran Egipto, a’an naru ajwi’ tooxkol chiru xmoosil li maak. Re xtz’ilb’al rix li eetalink li natawman sa’ Exodo 12:1–42, naru nakawoksi jun tusulal jo’ li jun a’in:
|
Eetalil |
Li maare naraj naxye |
Li raatin li Dios choq’ we |
|---|---|---|
Eetalil Xtiklajik li chihab’ (raqal 2; li Qaawa’ kixtaqlaheb’ laj Israelita naq te’roksi li k’anjel a’in jo’ xtiklajik li chihab’). | Li maare naraj naxye A’inaq lix ak’ tiklajikeb’ laj Israelita. “Te’yo’laaq wi’chik.” | |
Eetalil Li karneer (eb’ li raqal 3–5). | Li maare naraj naxye Chi’ilmanq Jwan 1:29; 6:54; 1 Pedro 1:19. | |
Eetalil Lix kik’el li karneer chiru roqechal li okeb’aal (eb’ li raqal 7, 13, 23). | Li maare naraj naxye Chi’ilmanq Mosiah 4:2; Apokalipsis 12:11. | |
Eetalil Li wa ink’a’ yuub’il (eb’ li raqal 8, 15, 19–20). | Li maare naraj naxye Lix yu li qʼem a’an naru nareetali li po’ok xb’aan naq nach’amo’ sa’ junpaat. Chi’ilmanq Mateo 16:6–12; Jwan 6:35. | |
Eetalil Li k’ahil ichaj (raqal 8). | Li maare naraj naxye A’in nareetali lix k’ahil li maak ut li preexil. Chi’ilmanq Exodo 1:14; Moises 6:55. | |
Eetalil Wa’ak chi junpaat, ak tiqib’anb’il rib’ chi eelelik (raqal 11). | Li maare naraj naxye Jun reetalil li junpaatil re elk chiru xpreexil li maak. Chi’ilmanq Genesis 39:12; 2 Timoteo 2:22. | |
Eetalil Laj sachonel (eb’ li raqal 13, 23). | Li maare naraj naxye Chi’ilmanq Tzol’leb’ ut Sumwank 89:18–21. | |
Eetalil Ke’ach’ab’aak laj Israelita (eb’ li raqal 29–32). | Li maare naraj naxye Chi’ilmanq 2 Nefi 2:26; Tzol’leb’ ut Sumwank 138:15–19, 31. | |
K’a’ chik ru nakawil sa’ li na’leb’ ut eb’ li eetalil re li Paswa li nakatxk’e chixk’oxlankil li Jesukristo ut lix tojb’al rix li maak? K’a’ru neke’xk’ut li eetalil a’in chawu chirix xk’ulb’al li usilal li wan sa’ lix tojb’al rix li maak xb’aan li Jesukristo?
Chalqat rik’in li Kristo rik’in xk’eeb’al reetaleb’ li eetalil li neke’xch’olob’ xyaalal a’an. “Chixjunil li k’a’aq re ru,” chan li Qaawa’, “yo’ob’tesinb’il ut yiib’anb’il re xch’olob’ankil inyaalal” (Moises 6:63; chi’ilmanq ajwi’ 2 Nefi 11:4). Sa’ Exodo 12, eb’ li eetalil jo’ li karneer, li kik’, li wa ink’a’ yuub’il, li sachb’a-ch’oolej, ut li kole’k neke’xjayali li Kristo. “Naq naqak’e reetal chan ru naq li k’a’aq re ru a’in neke’xk’am rib’ rik’in li Kolonel, naru nokoh’extzol chirix lix wankilal ut lix chaab’ilal” (Li K’utuk jo’ li Kolonel, 7).
Re xnimankil injultikankil, xb’aan laj Walter Rane
Exodo 12:14–17, 24–27; 13:1–16
Li loq’laj wa’ak nikinxtenq’a chixk’oxlankil inkolb’al xb’aan li Jesukristo.
Li Kolonel kixtaqla reheb’ laj Israelita naq te’xninq’ehi li Paswa rajlal chihab’ re naq taajultiko’q reheb’ naq a’an kikolok reheb’, toj sa’ ajwi’ li kutan naq ink’a’ chik jultik reheb’ li preexil ke’wan wi’. Naq nakawil li kixye sa’ Exodo 12:14–17, 24–27; 13:1–16, k’oxla li k’a’ru yookat chixb’aanunkil re naq jultikaq aawe laa wosob’tesinkil xb’aan li Dios. Chan ru taak’uula li jultikahom a’an choq’ reheb’ laa walal aak’ajol? (chi’ilmanq Exodo 12:14, 26–27).
K’a’ru nakawil rik’in li ninq’e re li Paswa li chanchan li loq’laj wa’ak? K’a’ru naru nakab’aanu re naq “junelik taajultika” li Jesukristo? (Moroni 4:3; 5:2).
Naru taak’oxla ajwi’ xkomon chik li na’leb’ li naraj li Qaawa’ naq taajultiko’q aawe; chi’ilmanq Helaman 5:6–12; Moroni 10:3; Tzol’leb’ ut Sumwank 3:3–5, 10; 18:10; 52:40.
Chi’ilmanq ajwi’ Kevin W. Pearson, “Ma toj wan aach’ool?,” Jolomil ch’utub’aj-ib’ re octubre 2022; “Recordarle siempre” (video), Biblioteca del Evangelio; “Re xkʼoxlankil li Kʼajolbʼej,” Eb’ li B’ich, 115.
Always Remember Him
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Li na’leb’ re xtzolb’aleb’ li kok’al
Exodo 7–11
Li Qaawa’ wan xwankil sa’ xb’een chixjunil.
-
Eb’ li rahilal yeeb’ileb’ resil sa’ Exodo 7–11 ke’xk’ut chiruheb’ laj Egipto ut laj Israelita naq k’a’jo’ xnimal lix wankilal li Qaawa’. Li Qaawa’ tixtenq’aheb’ laa kok’al chiru lix yu’ameb’ wi wanqeb’ xpaab’aal chirix lix wankilal a’an. Re xtenq’ankileb’ chixtawb’al xna’leb’eb’ sa’ li seraq’ a’in, naru nakak’e re li junjunq jun hu lajeeb’ xraqalil, ut taapatz’ reheb’ naq te’xyiib’ xjalam-uuch chixjunileb’ li rahilal yeeb’ileb’ resil sa’eb’ li raqal a’in: Exodo 7:17–18; 8:1–4; 8:16–17; 8:20–22; 9:1–6; 9:8–9; 9:22–23; 10:4–5; 10:21–22; 11:4–7 (chi’ilmanq ajwi’ “Eb’ li rahilal sa’ Egipto” sa’ Eb’ li Esilal sa’ li Najter Chaq’rab’, 67–69). Ilomaq Exodo 7:5 ut 9:14 re xnawb’al k’a’ut naq li Qaawa’ kixtaqlaheb’ li rahilal.
2:3The Plagues of Egypt
-
Wotz rik’ineb’ laa kok’al chan ru naq li Qaawa’ naxk’utb’esi chawu “naq maajun wan sa’ ruchich’och’ jo’ a’an” (Exodo 9:14). Kanab’eb’ chixwotzb’al chan ru naq neke’xnaw naq li Qaawa’ nim xwankil.
Exodo 8:28–32; 9:7
Li Qaawa’ naru nikinxtenq’a chixq’unob’resinkil lin ch’ool.
-
Re xtenq’ankileb’ laa kok’al chixtawb’al ru k’a’ru jun ch’oolej q’un, naru nakak’ut chiruheb’ jun k’a’aq re ru kaw, jo’ jun pek, ut jun k’a’aq re ru q’un ut natz’ub’uk, jo’ jun esponj. Naru nakahoy li ha’ sa’ xb’eeneb’ a’an re xk’utb’al naq jun ch’oolej q’un naxk’ul chi seeb’ li raatin li Qaawa’. Chirix a’an naru nekeril wiib’ oxib’ li raqal li neke’xye chan ru naq laj Farahon kixk’uleb’ li rahilal ke’taqlaak xb’aan li Qaawa’ (chi’ilmanq Exodo 8:28–32; 9:7). B’ar wan reheb’ li k’a’aq re ru li nareetali lix ch’ool malaj lix na’leb’ laj Farahon? K’a’ru naraj naxye naq q’un xch’ool junaq? (chi’ilmanq Mosiah 3:19).
-
Laa’at ut eb’ laa kok’al naru neketz’iib’a b’aanuhom li neke’xk’ut naq kaw qach’ool (qayehaq, li hob’ok malaj li q’etq’eto’k). Chan ru naru naqak’ut chiru li Qaawa’ naq naqaj naq q’unaq li qaam?
Exodo 12:1–13
Li loq’laj wa’ak naru nikinxtenq’a chixjultikankil li Jesus.
-
Li Paswa kixk’ut chiruheb’ laj Israelita naq te’iloq chi uub’ej rik’in li Kolonel ut lix mayej choq’ qe. Naq yooqex chixtz’ilb’al rix Exodo 12:1–13, tenq’aheb’ laa kok’al chixk’eeb’al reetal chan ru naq neke’xk’am rib’ li na’leb’ re li Paswa rik’in lix tojb’al rix li maak xb’aan li Jesukristo (chi’ilmanq ajwi’ “Li Paswa” sa’ Eb’ li Esilal sa’ li Najter Chaq’rab’, 70–74). Chan ru naq li Jesus a’an chanchan li karneer yeeb’il resil sa’ li raqal 5?
2:54The Passover
-
Sa’ li kutan a’in naqatzeka li loq’laj wa’ak re xjultikankil lix mayej li Jesus. Naru nakak’ut chiruheb’ laa kok’al xjalam-uuch li loq’laj wa’ak ut taaye chan ru naq li k’ojob’anb’il k’anjel a’in nokoxtenq’a chixjultikankil li Jesukristo. Naru nakatenq’aheb’ laa kok’al chixtawb’al li aatin “jultikank” sa’eb’ li tij re li loq’laj wa’ak (chi’ilmanq Moroni 4–5). Malaj naru nekeb’icha jun b’ich chirix li loq’laj wa’ak li nawulak cheru, ut taatenq’aheb’ laa kok’al chixk’eeb’al reetal li tuqtuukilal neke’reek’a naq yookeb’ chixk’oxlankil li Kolonel. Chan ru naru naqasik’ li tuqtuukilal a’an naq naqak’ul li loq’laj wa’ak?
Re xtawb’al xkomon chik li na’leb’, chi’ilmanq li hu Amigos re li po a’in.