Exodo 14–18

Naq yooqat chirilb’al Exodo 14:1–10, k’oxla k’a’ru ke’reek’a laj Israelita naq ke’ril chi nach’ok lix teep aj pleet laj Farahon. Maare nakaweek’a naq taa’ajmanq jun li sachb’a-ch’oolej re tatruuq chixnumsinkil laa ch’a’ajkilal. K’a’ru nakataw sa’ Exodo 14:13–31 li nakatreek’asi chixsik’b’al lix wankil li Dios sa’ laa yu’am? K’oxla chan ru ak xawil lix wankil. K’a’ru xatzol chirix li Dios naq xawil lix wankil?

Exodo 15:1–19 a’an jun b’ich ke’xb’icha laj Israelita re xnimankil ru li Qaawa’ chirix naq kixjach ru li Kaqi Palaw. B’ar wankeb’ li ch’ol aatin sa’ li b’ich jwal neke’xtoch’ aach’ool? Maare wan junaq li b’ich nakawaj xb’ichankil naq li Qaawa’ naxk’anjela li sachb’a-ch’oolej sa’ laa yu’am, jo’ “At xDios Israel” (Eb’ li B’ich, 5). Naru nakab’icha malaj nakawab’i a’an jo’ xcha’al li loq’onink nakab’aanu anajwan.

Chi’ilmanq ajwi’ Tzol’leb’ ut Sumwank 8:2–3.

Rilb’al resil lix b’eenikeb’ laj Israel maare tixk’e chak’oxla k’a’aq re ru sa’ laa yu’am li “wan xk’ahil” jo’ li ha’ Mara (chi’ilmanq Exodo 15:23–27). Chan ru naq li Qaawa’ xk’e xki’il li k’a’ru k’a sa’ laa yu’am? K’a’ut naq nim xwankil li xb’aanu a’an sa’ laa yu’am?

Taak’e reetal xkomon chik li k’a’ru k’a ke’xnumsi laj Israelita sa’ Exodo 16 ut 17. Wan naq naqaj xjitb’aleb’ xb’aan xk’ihal li wechʼink ke’xb’aanu, a’b’an naq yooqat chirilb’al resileb’, k’oxla ma wan hoonal naq laa’at ajwi’ nakatwech’ok? K’a’ru nakatzol rik’ineb’ laj Israelita li naru nakatxtenq’a chixkanab’ankil li wech’ink ut chi ok b’an chixkanab’ankil aawib’ sa’ ruq’ li Dios? K’a’ru nakatzol sa’eb’ li raqal a’in chirix li Dios?

Chi’ilmanq ajwi’ 1 Nefi 2:11–12.

Chiqajunilo tento tootzekanq, jo’kan naq li Qaawa’ naxjuntaq’eeta li musiq’ejil na’leb’ rik’in li tzakemq. Sik’eb’ lix musiq’ejil na’leb’ sa’ lix numsihomeb’ laj Israelita rik’in li mana sa’ Exodo 16. K’a’ru nakataw sa’ li raatin li Qaawa’ sa’ Exodo 16:16, 19, 22–26 li na’aatinak chirix laa ch’oolaninkil sa’ musiq’ej?

Re xtawb’aleb’ xkomon chik li na’leb’ naraj li Qaawa’ naq taatzol rik’in li sachb’a-ch’oolej a’in, k’oxlaheb’ li patz’om jo’eb’ a’in:

• K’a’ru naxk’e li Qaawa’ we li chanchan li mana kixk’e reheb’ laj Israelita wulaj wulaj?

• K’a’ru naru tinb’aanu li chanchan xxokb’al li mana?

Maare taataw xkomon chik laa na’leb’ sa’eb’ li video a’in: “El pan de cada día: Modelos,” “El pan de cada día: Experiencia,” ut “El pan de cada día: Cambio” (Biblioteca del Evangelio).

2:52

3:12

3:0

K’oxla k’a’ chik ru nakab’aanu wulaj wulaj jo’ li tzekanq. K’a’ut naq wan li k’a’ru tento taab’aanumanq wulaj wulaj re naq taawanq xwankil? K’a’ru eek’asinb’ilat chixb’aanunkil re xsik’b’al li musiq’ejil na’leb’ wulaj wulaj?

Chi’ilmanq ajwi’ Dieter F. Uchtdorf, “Li ak’ob’resiik wulaj wulaj,” Jolomil ch’utub’aj-ib’ re octubre 2021; “Restauración diaria” (video), Biblioteca del Evangelio.

5:27

K’oxla li Kolonel naq yooqat chirilb’al Exodo 17:1–7. Chan ru naq li Jesukristo chanchan jun saqoonaq sa’ laa yu’am? (chi’ilmanq Salmos 62:6–7; Helaman 5:12). Chan ru naq chanchan li ha’? (chi’ilmanq Jwan 4:10–14; 1 Korintios 10:1–4; 1 Nefi 11:25).

Maare wankeb’ hoonal sa’ laa yu’am naq laa b’e chanchan xb’e laj Moises—naq wankeb’ li neke’taaqenk aawe, a’b’an “neke’lub’ laa wuq’” (Exodo 17:12). Wan chik hoonal naq laa b’e chanchan chik xb’e laj Aaron, laj Hur, ut laj Jetro, li ke’xxaqab’ xwankil laj Moises. K’e aawib’ sa’ xna’aj li junjunq chi kristiaan a’in naq yooqat chirilb’al Exodo 17:8–16; 18:13–26, ut k’e reetal k’a’ru naxk’ut li Qaawa’ chawu chirix lix k’anjel a’an.

Chi’ilmanq ajwi’ Mosiah 4:27; 18:8–9.

• Naq li Qaawa’ kixjach ru li Kaqi Palaw, laj Moises ut eb’ laj Israelita ke’ril xnimal xwankil. Kanab’eb’ laa kok’al chatenq’ankil chixk’oxlankil chan ru teek’utb’esi li seraq’ wan sa’ Exodo 14:5–22 (chi’ilmanq ajwi’ “Li Paswa” sa’ Eb’ li Esilal sa’ li Najter Chaq’rab’, 70–74). Maare naru neketusub’eb’ li chunleb’aal malaj li isb’ ut “teejacheb’ ru” jo’ chanru li Kaqi Palaw. Chirix a’an naru nekewotz cherib’il eerib’ chan ru naq eerilom lix wankil li Dios sa’ lee yu’am.

  

  2:54

• K’a’ru naxye Tzol’leb’ ut Sumwank 8:2–3 re xk’eeb’al xkomon chik li qana’leb’ chirix li seraq’ wan sa’ Exodo 14? Naru nakaseraq’i reheb’ laa kok’al junaq aanumsihom b’ar wi’ li Santil Musiq’ej kixk’e junaq na’leb’ sa’ laa k’a’uxl malaj sa’ laa waam, ut taapatz’ reheb’ naq te’xwotz ajwi’ li reheb’. Naru ajwi’ nekeb’icha jun li b’ich chirix li Santil Musiq’ej, jo’ “Chiqabʼi li Musiqʼej” (Eb’ li B’ich, 84).

• Maare laa’at ut eb’ laa kok’al naru nekeruk’ k’a’ruhaq ki’ ut k’a’ruhaq k’a naq yooqex chirilb’al Exodo 15:22–25. Chan ru naq li Kolonel ak xk’e “xki’il” li k’a’ru “k’a” sa’ li qayu’am?

• Naq laa’at ut eb’ laa kok’al yooqex chirilb’al Exodo 15:23–25; 16:14–15; 17:1–6, k’anab’eb’ chatenq’ankil chixtawb’al k’a’aq re ru re xseraq’inkil li junjunq chi seraq’—maare jun ruq’ che’ (re xk’irtesinkil li ha’ Mara), jun li kuk malaj sek’ (re xnujob’resinkil rik’in mana), ut jun li pek (choq’ re li ha’ aran Horeb). K’a’ru neke’xjultika li seraq’ a’in qe chirix li naxb’aanu li Jesukristo choq’ qe? Naq yooqex chi aatinak, naru teeril Mateo 7:24–27; Jwan 4:10–14; 6:29–35, 48–51; Helaman 5:12; Tzol’leb’ ut Sumwank 20:77, 79.

• Naq yooqat chirilb’al Exodo 17:8–16, naru nakapatz’ re jun reheb’ li kok’al naq tixtaqsiheb’ li ruq’ taqe’q. Naq taalub’q, anihaq chik reheb’ li kok’al naru naxtenq’a, jo’ chanru naq laj Aaron ut laj Hur ke’xtenq’a laj Moises. K’a’ru naxk’ut chiqu li seraq’ naq naru naqab’aanu re naq li rawa’b’ejihom li Dios taanume’q chi uub’ej? Naru ajwi’ nekeril Exodo 18:13–26 ut tex’aatinaq chirix li riiqeb’ li kristiaan li neke’k’anjelak sa’ lee teep. K’a’ru naru naqab’aanu sa’ li kutan a’in re xtenq’ankileb’ li neke’jolomink sa’ li Iglees, jo’ naq laj Aaron ut laj Hur ke’xtenq’a li profeet aj Moises?