Easter

Chommong porous non ewe Testamen Noom ra itingeni an ewe Chon Amanau angangen afanafan me asoren achasefan. Ewe tetten fan mi etettenatiw ekkoch ekkena porous. Nupwen ka anneani ekkei uwokisin, met memef ra feito ngonuk usun ewe Chon Amanau?

Osini mi osukuna usun ewe Chon Amanau ra kon chommong me fatoch me non ewe Puken Mormon. Ekieki ifa usun om nuku a pochokununo seni kewe porous usun ekkei: 1 Nifai 11:31–33; 2 Nifai 25:13; Mosaia 3:2–11; Alma 7:10–13.

Soufosun non Fansoun Soponon ra sopweno ne pwarata usun Jises Kraist me an misin fan iten achasefanin. Nupwen ka ausening ngeni mwichenap non ei soponon wiken Easter, esinna ekkewe kapasen pwarata usun Kraist ka rongorong. Met ra aituk usun I?

Easter eu fansoun pwapwa, pokiten a eu fansoun apwapwai an ewe Chon Amanau Achasefan me Manausefan. Iwe nge, pwan mwo fansoun Easter, mi chommong aramas kewe rese mefi pwapwa ren ekkoch popun. Met en mi tongeni fori om kopwe achowano an ewe Chon Amanau kinamwe me pwapwa non ei Easter?

Eu kokkot pwe kopwe kutta porous non ekkewe pukefel usun ewe kinamwe me pwapwa Jises Kraist a awora, usun ekkei Konupin 16:8–11; 30:2–5; Isaiah 12; 25:8–9; 40:28–31; John 14:27; 16:33; Alma 26:11–22. Ekieki ifa usun ka tongeni aporousa ekkei porous ngeni ekkoch. Ren awewe, menin ka tongeni fori katon Easter ne aea ngeni ekkoch, anongonong won ekkei porous. Kopwe uren iotek usun ion mi namot ngeni an epwe angei om kapongen Easter. Ka pwan tongeni finata ne aea ngeni ekkoch om porous won social media, ikewe chommong aramas ra tongeni kuna.

Kon mi fen usun Kraist me ewe Manausefan, usun ren “He Is Risen” (Kon mi fen, no. 199), a pwan tongeni anisi kich ne mefi kinamwe me pwapwa non Easter. Kutta ekkewe kapas non ewe kon mi fen minne, non om ekiek, a pwarano ewe pwapwan Easter.

Nengeni pwan Jeffrey R. Holland, “Not as the World Giveth,” Liahona, May 2021, 35–38; Mark S. Palmer, “Our Sorrow Shall Be Turned into Joy,” Liahona, May 2021, 88–90.

Iei eu urumot mi tongeni anisuk om kopwe kuna ekkewe chommong feioch mi feito seni Jises Kraist me An Achasefan. Anneani ekkewe wokisin fan usun met Jises Kraist a anisi kich ne akkufu. Sossot ne etetteni ekkewe porous non kinikinir: tipis, mano, sossot, me apwangapwang (ekkoch porous meni repwe masenong epwe nap seni eu kinikin). Nupwen ka annea, met memef a wor reom usun an ewe Chon Amanau manaman?

• Isaiah 61:1–3

• Ezekiel 36:26–28

• Matthew 11:28–30

• Luke 1:46–55

• Romans 8:35–39

• Alma 7:10–13

• Alma 11:42–45

• Alma 58:11

• Moronai 10:32–33

• Doctrine and Covenants 19:15–19

• Moses 5:9–12

Ifa usun kopwe awewei ngeni emon chienom ewe ese nuku non Kraist pwata Jises Kraist mi auchea ngonuk? An Elter Ahmad S. Corbitt porous “Do You Know Why I as a Christian Believe in Christ?” (Liahona, May 2023, 119–21) a tongeni aninisoch.

Nengeni pwan Reyna I. Aburto, “The Grave Has No Victory,” Liahona, May 2021, 85–87; Topics and Questions, “Atonement of Jesus Christ,” “Resurrection,” Gospel Library.

Met ka kaeo seni ekkewe uwokisin mi tettenitiw usun ewe niwin Jises Kraist a moni fan iten amanauom: Isaiah 53:3–5; Mosaia 3:7; Doctrine and Covenants 19:16–19? Met niwin Samach non Nang a moni? (Nengeni John 3:16).

• Ewe wikken Easter a eu fansoun mi och ne aiti noum kewe semirit usun met ewe Chon Amanau a fori fan itach non Gethsemane me won ewe irapenges. Ka tongeni poputa ren om pwar ngenir ekkewe sasing fan me mut ngenir repwe porous usun met mi fis non ekkewe sasing. Nupwen noum kewe semirit ra nennengeni ekkewe sasing, ka tongeni anneani uwokisin me awewei ekkei mettoch mi fis (nengeni Matthew 26:36–46; 27:35–50; Luke 22:39–46; John 19:16–30). Noum kewe semirit ra tongeni affatau ekkewe tichikin non ekkewe sasing ir mi rong me non ekkewe uwokisin.

• Ifa usun sia feioch pokiten an Jises asor fan itach? Anisi noum kewe semirit repwe kutta kapas me porous mi ponuweni ei kapaseis non Isaiah 53:4–12; Alma 7:11–13; and Doctrine and Covenants 19:16–19. Aporousa fengeni ifa usun oua mefi usun ewe Chon Amanau mwirin oua anneani ekkei uwokisin.

• Ka tongeni nounou peichen urumotun non ei wik ika ekkoch sasing non ei etetten ne ureni noum kewe semirit ewe porousen ewe Manausefan (nengeni pwan “Jesus Is Risen,” non Porousen Testamen Sofo, 139–44). Mwirin mut ngeni noum kewe semirit repwe aporousa sefani ewe porous ngonuk.

• Ekieki ifa usun om kopwe anisi noum kewe semirit ar repwe kuna pwapwa non Kraist non ei Easter. Ren awewe, oua tongeni konu echo kon mi fen usun Easter oua fokkun sani, usun ren “Christ the Lord Is Risen Today” (Kon mi fen, no. 200) ika “Gethsemane” (Gospel Library). Om kopwe kutta pwan ekkoch kon usun ewe Manausefan, ka tongeni nennengeni non ewe topical index ren Kon mi fen me Noun Semirit Puken Kon. En me noum kewe semirit oua tongeni aporousa fengeni pwata oua seni ekkei koon me ifa usun oua mefi nupwen oua konur. Met ekkei kon ra aiti kemi usun Samach non Nang me Jises Kraist?

• Gospel Library a wor eu ioien Fition Easter minne noum kewe semirit ra tongeni pwapwaiti. Meni ka tongeni mut ngenir repwe fini eu repwe katon. Eisinir met ra kaeo usun Jises Kraist seni ewe fitio. Ka pwan tongeni eisinir repwe mennapei ewe porousen ewe fitio non eu sengen kapas.

• Nupwen en me noum kewe semirit oua katon mwichenap fengen non ei soponon wik ren Easter, anisir repwe apareni nupwen noun ewe Chon Amanau kewe chon pwarata ra apasa ar kapasen pwarata usun ewe Manausefan. Meni oua tongeni fori eu urumwotun—tingorer repwe uta iteiten fansoun ra rong ekkewe kapas usun Easter ika Achasefan ika Manausefan. Aporousa fengeni pwata oua uren kinisou ren an ekkewe soufos mi manau kapasen pwarata usun ewe Chon Amanau.