“April 13–19. ‘Oupwe Mosonoson, me Kuna ewe Amanauen ewe Samon”: Exodus 14– 18,” Feito, Tapweto Mwiri—Ren Imw me Mwichefen: Testamen Noom 2026 (2026)
“April 13–19. ‘Oupwe Mosonoson, me Kuna ewe Amanauen ewe Samon,’” Feito, Tapweto Mwiri: Testamen Noom 2026
April 13– 19: “Oupwe Mosonoson, me Kuna ewe Amanauen ewe Samon”
Exodus 14–18
Ekkewe chon Israel ra mwech. Ewe Setipar a nom epek, me ewe mwichen sounfiu noun Pharaoh a mwitireto won ewe epek. Ar suno seni Egypt, usun, epwe chok mwochomwoch. Nge a wor an Kot porous ngeni ekkewe chon Israel I a mochen repwe chechemeni ren chommong mwirimwirin fansoun: “Ousap nuokus. … Ewe Samon epwe wisen fiu fan itemi” (Exodus 14:13–14).
Seni ena fansoun, nupwen noun Kot kewe aramas ra mochen nuku me tipe-pochokun, ra aporousa ei tutunap. Nupwen Nifai a mochen pesei pwin kewe, a apasa, “Sipwe pochokun usun chok Moses; pun i a ennetin kapas ngeni ekkewe konikin ewe Setipar me ra kinikin fesen epek ngen epek, iwe semach kewe ra tou seni ewe sat, tou seni fotek, won puun mi pwasapwas”(1 Nifai 4:2). Nupwen King Limai a mochen kewe aramas mi fotek ar repwe “echimwata [mokurer], me pwapwa,” i a achema ngenir usun ei pwan porous (Mosaia 7:19). Iwe pwan Alma, nupwen i a mochen pwarata ngeni noun we usun an Kot manaman (nengeni Alma 36: 28). Me nupwen sia mefi mwoch—nupwen a namot ngeni kich pwan ekis nuku ne “kuna ewe amanauen ewe Samon—sia tongeni chechemeni ifa usun “ewe Samon a angasa Israel non ena ran” (Exodus 14:13, 30).
Ekkoch ekiek ren Kaeo non Imw me non Mwichefen
Exodus 14; Exodus 15:1–21
Ewe Samon a tongeni fori eu “watten angang” non manauei.
Nupwen ka anneani Exodus 14:1–10, ekieki ifa usun ita ekkewe chon Israel ra mefi nupwen ra kun noun Pharaoh we mwichen soufiu ra arapeto. Meni ka mefi pwe a namot eu manaman om kopwe ngaseno seni eu aweiresin mettoch ka mesengeni. Met ka kuna non Exodus 14:13–31 mi amwasangok ne kutta an Kot manaman non manauom? Ekipwichi ifa usun ka fen kuna An manaman me akkom. Met ka kaeo usun I seni ekkei mettoch ra fis?
Exodus 15:1–19 eu konun mwareiti ekkewe chon Israel ra konu mwirin an ewe Samon eimufeseni ewe Setipar. Menni kapas non ei kon ka kuna pwe mi wesewesen auchea? Meni mi wor echo kon ka mefi kopwe konu nupwen ewe Samon fori och mettoch mi amwarar fan itom, usun “Redeemer of Israel” (Kon mi fen, no. 6). Ekieki kopwe konu ika ausenging ngeni usun pekin om fen ngeni ikenai.
Nengeni pwan Doctrine and Covenants 8:2–3
Exodus 15:22–27; 16:1–15; 17:1–7
Ewe Samon a tongeni fori mettoch mi kipwin epwe ngarangar.
Anneani usun an Israel sai meni epwe emweni om kopwe ekiek usun mettoch non manauom minne usun mi “kipwin” usun ekkewe konikin Marah (nengeni Exodus 15:23–27). Ifa usun ewe Samon a fen fori mettoch mi kipwin non manauach epwe ngarangar? Met auchean ekkei mettoch mi fis non manauom?
Kopwe apareni chommong pwan minen appiru usun mettoch mi kipwin ren ekkewe chon Israel non Exodus 16 me 17. A eu sossot ach sipwe apungu usun ar ngunungun ika anini, nge nupwen ka annea, ekieki ika pwe ka fen pwan fori ewe chok mettoch. Met ka kaeo seni met a fis ngeni ekkewe chon Israel minne a tongeni anisuk epwe kis om ngunungun me awatteno ne epinukunuku Kot? Met ekkei uwokisin ra aituk usun Kot?
Nengeni pwan 1 Nifai 2:11–12.
Ekkewe chon Israel ra ionfengeni manna. Neo-gothic fresco, Trnava (tichikin)
Exodus 16
Ewe Samon a ngeniei tumunun pekin ngun.
Pokiten mi namot kich meinisin sipw mwongo, ewe Samon a kan soun anonno fengeni mettochun ngun ngeni mwongo. Kutta An nesenin ngun non met mi fis ngeni ekkewe chon Israel ren manna non Exodus 16 Ren awewe, met ka kuna non an ewe Samon ourour non Exodus 16:16, 19, 22–26 minne mi wewe ngeni om tumunun pekin ngun?
Ne kuna pwan ekkoch nesen ewe Samon epwe mochen kopwe kaeo seni ei manaman, ekipwichi kapaseis usun ekkei:
-
Met ewe Samon a ngeniei minne mi usun ewe manna iteiten ran I a ngeni ekkewe chon Israel?
-
Met ua tongeni fori mi usun ionfengeni manna?
En mi tongeni kuna pwan ekkoch ekiek non eu ika nap seni non ekkewe fitio: “Daily Bread: Pattern,” “Daily Bread: Experience,” me “Daily Bread: Change” (Gospel Library).
Daily Bread: Pattern
Daily Bread: Experience
Daily Bread: Change
Ekieki usun ekkoch pwan mettoch, me nukun mwongo, minne ka fori iteiten ran. Pwata ekkoch mettoch repwe fis iteiten ran ar repwe fetanoch? Met pesepes ka mefi kopwe fori ne kutta mettochun ngun epwe fis iteiten ran?
Nengeni pwan Dieter F. Uchtdorf, “Daily Restoration,” Liahona, Nov. 2021, 77–79; “Daily Restoration” (video), Gospel Library.
Daily Restoration
Exodus 17:1–7
Jises Kraist I ai foun pekin ngun me konik mi manau.
Ekieki usun ewe Chon Amanau nupwen ka anneani Exodus 17:1–7. Ifa usun Jises Kraist a efou fau ngonuk? (nengeni Konupin 62:6–7; Ilaman 5:12). Ifa usun I a usun konik? (nengeni John 4:10–14; 1 Corinthians 10:1–4; 1 Nifai 11:25).
Kutta pisek kich mi tongeni kamoch minne ra pwarata usun Kraist. Inet chok ekkewe pukefel ra anapanapa mettoch ir mi tongeni repwe esisinen Jises Kraist, usun Exodus 17:1–7 mi fori, menin epwe eu tufichin eu pisekin nesen. Nennengeni ika attapa efou fau ika konik a tongeni amecheresi ne weweiti ifa usun ekkewe mettoch ra usun Jises Kraist. Ika ka tongeni apachanong chommong pekin memef non kaeo, epwe och mettoch esap monnukuno me epwe pochokun mwirimwirin.
Exodus 17:8–16; 18:13–26
Chon kuno ra aninis fengen “ne mwarei ewe choun” fori an ewe Samon angang.
Meni epwe wor fansoun non manauom nupwen ka tongeni wewe ngeni Moses—nupwen ekkoch repwe anongonong wom, nge “poum” [ra mefi] chou” (Exodus 17:12). Ekkoch pwan fansoun, meni kopwe kon usun Aaron, Hur, me Jethro, ekkewe ra anisi Moses. Wanong inisum non neien emon me emon ekkei aramas nupwen ka anneani Exodus 17:8–16; 18:13–26, me kuna met ewe Samon a aituk usun An angang.
Nengeni pwan Mosaia 4:27; 18:8–9.
Ren pwan ekkoch, nengeni minen ei maram ren ewe Liahona me Ren ewe Pochokunen Serafo magazines.
Ekkoch kokkot ren Osukuna Semirit
Exodus 14:5–22
Ewe Samon a tongeni fori eu “watten angang” non manauei.
-
Nupwen ewe Samon a eimufeseni ewe Setipar, Moses me ekkewe chon Israel ra kuna ifa usun unusen manamanan. Mut ngeni noum kewe semirit repwe anisuk ne ekieki usun eu apwapwan aanen pwomesefani ewe porous non Exodus 14:5–22 (nengeni pwan “The Passover” non Porousen Testamen Noom, 70–74). Menin ka tongeni etetteni ekkoch sea ika pananget me “eimufesenir” usun ewe Setipar. Mwirin oua tongeni aporousa fengeni ifa usun ami oua fen kuna an Kot manaman non manauom.
2:54The Passover
-
Met Doctrine and Covenants 8:2–3 a apacha ngeni ach weweiti ewe porous non Exodus 14? Ekieki om kopwe ureni noum kewe semirit usun eu fansoun mi fis ngonuk nupwen ewe Ngun mi Fel a uronuk och mettoch non om ekiek ika netipom, me tingorer repwe porous usun met mi fis ngenir. Ka tongeni konu echo kon usun ewe Ngun mi Fel, usun ren “Let the Holy Spirit Guide” (Kon mi fen, no. 143).
Exodus 15:22–25
Ewe Samon a tongeni fori mettoch mi kipwin repwe ngarangar.
-
Meni en me noum kewe semirit oua tongeni un mettoch mi ngar me mettoch mi kipwin nupwen oua kaeo Exodus 15:22–25 fengen. Ifa usun ewe Chon Amanau a fori “kipwin” non manauach epwe “ngarangar”?
Exodus 15:23–25; 16:14–15; 17:1–6
Jises i ai Konik mi Manau, ai Pinewan Manau, me ai Foun Fau.
-
Nupwen en me noum kewe semirit oua anneani Exodus 15:23–25; 16:14–15; 17:1–6, mut ngenir repwe anisuk ne kutta mettoch ne anisir repwe aporousa ewe porous—usun efoch panen ira (ne echikara ewe konikin Marah), eu rume ika nape (ne ourano ren manna), me efou fau (ren ewe konik non Horeb). Met ekkei porous ra achema ngeni kich usun met Jises Kraist a fori fan itach? Ren pekin ami aporous, ka tongeni anneani Matthew 7:24–27; John 4:10–14; 6:29–35, 48–51; Ilaman 5:12; Doctrine and Covenants 20:77, 79.
One Before God [Emon me Mwen Kot, seni Joseph Brickey (tichikin)
Exodus 17:8–16; 18:13–26
Ua tongeni aninis ne “mwarei ewe choun” fori an ewe Samon angang.
-
Nupwen ka anneani Exodus 17:8–16, ka tongeni tingorei emon semirit epwe eitieta me omuchu pour asan. Nupwen ewe semirit a pekus, ekkoch semirit ra tongeni aninis, usun Aaron me Hur ra anisi Moses. Met ei porous a aiti kich ifa usun sia tongeni anisi an Kot muu epwe fetanoch? Ka tongeni anneani Exodus 18:13–26 me kapas usun choun ekkewe wisen aramas ra angang non om we wart. Met sia tongeni fori ikenai ach sipwe anisi nouch souemwenin Mwichefen, usun chok Aaron me Hur ra anisi Moses?
Ren pwan ekkoch, nengeni minen ei maram ren ewe Friend magazine.