Ufɔk Israel

Ke ebiet kiet ke wilderness ke nkaŋ-usoputin eke Canaan, Jacob ke nnyekidem ada-ebet ndiso-bo ye amanaiba eyeneka eren esie, Esau. Akpatre ini emi Jacob okokutde Esau, ekperede isua Edip ke edem, Esau okoyom ndiwowot enye. Jacob ama abiat ofuri okoneyo kiet ke eŋwan, oyomde edidiɔŋ oto Abasi. Ke ntak mbuɔtidem, ediyire, ye ubiere eke Jacob, Abasi ama edibɔrɔ akam esie. Ema ekpuhɔ enyiŋ Jacob ke okoneyo oro edikot Israel, enyiŋ emi ɔwɔrɔde, ke otu mme ŋkpɔ efen ke, “enye amaŋwana ye Abasi” (Genesis 32:28, ikɔ ewetde ke-idak-isɔŋ b).

Emi edi akpa ini emi ekutde enyiŋ oro Israel ke Bible, ndien oro edi enyiŋ emi ɔsɔngde ada ke ofuri ŋwed oro ye ke ofuri mbuk-eset. Ikibighike ke esɔpde ndikot enyiŋ oro nnɔ mbon emi ewakde ekan owo kiet. Israel ekenyene nditɔ irenowo Duopeba, ndien ubon mmɔ ke ekenehede ediɔŋɔ ofuri-ofuri nte “ufɔk Israel,” mme “esien-ufɔk Israel,” “nditɔ Israel,” mme “ubon Israel.”

Ke ofuri mbuk, nditɔ Israel ekedian akwa idiɔŋɔ enɔ mme ndi-to kiet kotu ufɔk duopeba eke Israel. Ubon mmɔ ekedi ubak akpan-ŋkpɔ kiet eke idiɔŋɔ ediomi mmɔ. Apostle Paul ekenyime ke imɔ “idi eyen esien Benjamin” (Ŋwed Mbon Rome 11:1). Ntak kiet emi Lehi ɔkɔnɔde nditɔ irenowo esie ete eka man ekebɔ mme usan brass ekedi ke mme usan oro ekesine “mbuk ubon eke mme ete esie” (1 Nephi 5:14). Lehi edikut ke enye okoto ubon Joseph, ndien nsuhɔ-nditɔ esie edifiɔk ebuana mmɔ ye ufɔk Israel ekedi akpan-ŋkpɔ ɔnɔ mmɔ ke mme isua emi eketienede.

Ke Ufɔk Abasi mfin emi, mbufo emekeme edikop kabaŋa Israel ke mme ikɔ nte “editaŋ Israel mbok.” Nnyin imikwɔ kabaŋa “Andifak Israel,” eke “Idorenyin eke Israel,” ye “Mbufo mme Ebio-owo eke Israel.” Ke mme ndaha emi, nnyin itiŋke inyuŋ ikwɔgɔ kabaŋa obio-iduŋ Israel eke eset mme idut eke eyo emi ekotde Israel. Edi, nnyin itiŋ ibaŋa mbonowo emi eketaŋde-ebok eto ke mme idut eke ererimbot edisin ke Ufɔk Abasi Jesus Christ. Nnyin itiŋ ibaŋa mbonowo emi ekesɔngde eda ye Abasi, emi enehede eyom edidiɔŋ Esie, ye mbonowo emi, otode ke uduɔk-mmɔŋ, ema ekabare edi mbon ediomi Esie. Ke mme ikɔ eke President Russell M. Nelson ete, ndi-to Israel ɔwɔrɔ “ndiyak Abasi akan ke uwem nnyin, … ndiyak Abasi edi ata andinyene odudu ŋkan ke uwem nnyin.”

Edidiɔŋ eke patriarch fo eyetiŋ ebuana fo ɔnɔ kiet ke otu mme esien-ufɔk Israel. Oro okpon akan ubak inem ŋkpɔ kiet eke family history. Oro ŋko enyene ŋkpɔ ndinam ye uwem fo eke idahaemi ye eke ini-iso. Ndidi ubak eke ufɔk Israel ɔwɔrɔ ke mbufo emenyene ebuana ediomi ye Ete eke Enyɔŋ ye Jesus Christ. Oro ɔwɔrɔ ke mbufo, ukem nte Abraham, akana nte “edi edidiɔŋ” ɔnɔ nditɔ Abasi (Genesis 12:2; Abraham 2:9–11). Oro ɔwɔrɔ, ke mme ikɔ eke Peter ete, ke “mbufo edi ubon eke emekde; edi mme oku edidem, edi edisana obio, edi ikɔt eke Abasi onimde ɔnɔ Idem Esie, man mbufo eka eketaŋa mme utibe erinam Esie, emi okokotde mbufo osio ke ekim, esin ke utibe uŋwana esie” (1 Peter 2:9). Oro ɔwɔrɔ ke mbufo “ama eyak Abasi akan”—ke mbufo edi owo emi “ɔsɔngde ada ye Abasi” ke nte mbufo okponode ediomi fo ye Enye.