Chiv Keeb 12–17; Anplaham 1–2

Txwj Laug Neil L. Andersen qhia tias, “Peb txhua tus nyias muaj nyias tsev neeg [thiab] peb txoj kab lig kev cai uas hloov peb lub neej, thiab kuv ntseeg tias muaj ib qho chaw hauv peb txhua tus uas peb tswj hwm peb tus kheej thiab tsim tej yam khoom tshiab. … Thaum kawg, tej yam peb xav hauv peb nruab siab yuav muaj tiag vim pom tej ntawd nyob hauv tej yam uas peb xaiv thiab tej yam uas peb ua” (“Educate Your Desires, Elder Andersen Counsels,” ChurchofJesusChrist.org). Xav seb Anplaham 1:1–19 qhia txog qhov uas Txwj Laug Andersen qhia. Tej lus nug li no yuav pab tau koj:

• Anplaham xav tau dab tsi? Vim li cas peb paub tias nws xav li cas los ntawm tej yam nws ua? Vajtswv tau ua li cas kom txhawb nqa nws txoj kev xav?

• Koj xav tau dab tsi? Ua li cas pom tau tej kev xav ntawd nyob hauv tej yam uas koj ua? Vajtswv ua li cas kom txhawb nqa koj?

• Tej nqe no qhia dab tsi rau cov neeg uas lawv tsev neeg tsis xav ua ncaj ncees.

Twb tsis tau muaj raws li ib qho uas Anplaham thiab Xalas xav tau heev—xav muaj ib tug me nyuam (saib Chiv Keeb 15:1–6). Koj kawm dab tsi los ntawm Henplais 11:8–13 txog qhov uas Anplaham thiab Xalas ua dab tsi kom tiv tau kev sim siab ntawd. Tus Cawm Seej ua dab tsi kom pab koj “muab siab npuab” rau Nws tej lus cog tseg, txawm yog yuav muaj raws li tej lus ntawd puag thaum yav tom ntej?

Kuj saib “Deliverance of Abraham” (vidi-aus), Txoj Moo Zoo cov Ntawv.

1:38

Vim li cas koj yuav tsum paub txog txoj kev khi lus uas Vajtswv khi rau Anplaham? Yog vim Vajtswv xav nrog koj khi lus zoo ib yam li ntawd. Nws cog lus tias txoj kev khi lus no yuav khi rau Anplaham cov xeeb leej xeeb ntxwv, los sis cov “tub ki,” thiab “tag nrho cov uas yuav txais Txoj Moo Zoo no ces tus Tswv yuav … suav lawv ua koj cov tub ki” (saib Anplaham 2:10–11). Los yog hais tias, txoj kev khi lus tseem khi rau koj—thaum koj ua kev cai raus dej thiab tom qab koj khi lus hauv lub tuam tsev (saib Kalatias 3:26–29; Lus Qhuab Qhia thiab Kev Khi Lus 132:30–32).

Yog li ntawd, tej zaum koj yuav xav kawm Anplaham 2:6–11 thiab sau ntawv txog tej yam uas Vajtswv cog lus rau Anplaham thiab Xalas (kuj saib Chiv Keeb 12:1–3; 13:15–16; 15:1–6; 17:1–8, 15–22). Koj txais tau cov koob hmoov twg uas zoo li no?

Tej lus cog tseg no ib txhia yeej muaj tej yam uas kav mus ib txhis li. Yuav ua li cas kom muaj raws li tej yam uas koj tau txais kev cog lus kom tau ib thaj av ua koj ntiag tug los sis cov xeeb leej xeeb ntxwv coob? (saib Lus Qhuab Qhia thiab Kev Khi Lus 131:1–4; 132:20–24, 28–32).

Ntxiv rau kev cog lus nws yuav tau koob hmoov, Vajtswv qhia Anplaham kom “[nws] yuav ua rau lwm leej lwm tus tau txais koob hmoov” (Chiv Keeb 12:2; ntxiv qhov uas ntawv qaij). Koj xav hais tias qhov no txhais tau li cas? Koj yuav ua li cas kom ua rau lwm leej lwm tus txais koob hmoov? (saib Anplaham 2:11).

Kom pab qhia txog tej kev khi lus, Txwj Laug Dale G. Renlund hais txog tej dej ntas nyob hauv tus Dej Amazon, thiab Thawj Tswj Hwm Emily Belle Freeman tau hais txog kev taug ib txoj kev uas muaj pob zeb ntau thaum nws luj taw dam lawm (saib “Txais Tau Vajtswv lub Hwj Chim Dhau Los ntawm tej Kev Khi Lu,” Liyahaunas, Tsib Hlis Ntuj 2023, 35–37; “Taug Kev Ua Raws Li Kev Khi Lus nrog Khetos,” Liyahaunas, Kaum Ib Hlis Ntuj 2023, 76–79). Nrhiav ob zaj no seb puas muaj lus uas pab teb lo lus nug “Vim li cas Vajtswv xav kom kuv nrog Nws khi lus?”

Kuj saib Tej Ntsiab Lus thiab tej Lus Nug, “Anplaham txoj Kev Khi Lus,” Txoj Moo Zoo cov Ntawv; “Tej Yam Ntxim Xav Txog: Txoj Kev Khi Lus,” nyob hauv phau ntawv no.

Xav seb koj qhia txog Mekhixedes rau ib tug neeg uas tsis paub nws. Koj yuav hais li cas? Nrhiav tswv yim nyob hauv Joseph Smith Kev Txhais, Chiv Keeb 14:26–27, 33–38 (nyob hauv phau Npaivnpaum cov ntawv ntxiv tom kawg); Amas 13:13–19; Lus Qhuab Qhia thiab Kev Khi Lus 107:1–4. Koj nrhiav tau Khetos tej cwj pwm twg nyob hauv tej lus piav txog Mekhixedes? Tej yam uas koj kawm txog Mekhixedes lub neej puas hloov koj txoj kev saib lub Pov Thawj Hwj Mekhixedes?

Koj kawm dab tsi txog Anplaham txoj kev xav txog nyiaj txiag los ntawm Chiv Keeb 14:18–24 thiab Joseph Smith Kev Txhais, Chiv Keeb 14:36–40 (nyob hauv phau Npaivnpaum cov ntaub ntawv ntxiv tom kawg)? Piv txwv hais tias, xav seb nws hais li cas rau Xaudoos tus vaj ntxwv nyob hauv Chiv Keeb 14:23. Txoj kev ua raws li kev cai them ib feem kaum tau hloov koj txoj kev xav txog nyiaj txiag li cas?

Thaum koj nyeem Chiv Keeb 16, tej zaum koj yuav xav xav txog ib lub sij hawm thaum tib neeg uas tsis ncaj rau koj, ib yam li Hankas. Cia li nco qab tias “Ixama-ees” txhais tias “Vajtswv hnov.” Vajtswv tau ua li cas kom pab koj paub tias Nws twb hnov koj lus lawm?

Kuj saib “Txoj Kev Thov Vajtswv,” Cov Nkauj Qhuas Vajtswv, zaj 59.

• Thaum koj thiab koj cov me nyuam nyeem Anplaham 1:18 thiab 2:8, tej zaum koj yuav xav caw lawv mloog seb puas hnov ib feem ntawm lub cev uas hais nyob hauv ob nqe no. Tej zaum nej yuav xav ua si cia ib tug me nyuam qi qhov muag thiab koj tuav tes coj tus me nyuam rau ib qho chaw. Ces nej sib tham tau txog qhov uas peb xav li cas thaum Yexus Khetos coj peb mus los sis pov hwm peb.

• Tej zaum koj cov me nyuam yuav nyiam ua yeeb yam txog zaj dab neeg hauv Chiv Keeb 13:5–12, ua yeeb yam zoo li lawv yog Anplaham, Lauj, thiab cov neeg yug yaj. Peb yuav ua li cas kom coj raws li Anplaham tus yam ntxwv kom peb tsev neeg thiab cov phooj ywg sib haum xeeb? Sim ua yeeb yam ua raws li lawv teb.

• Xav seb puas muab ib lub phij xab uas muaj xuab zeb haud, cov hnub qub saum ntuj, los sis daim duab nyob hauv tus txheej txheem qhia no rau koj cov me nyuam saib. Tej zaum qhov no pab tau lawv to taub Vajtswv tej lus cog tseg nyob hauv Chiv Keeb 13:16; 15:1–6. Cia li sib tham seb nej tau ua li cas kom tso siab rau Vajtswv tej lus cog tseg, txawm yog ntshe xav tias yeej ua tsis taus li ntawd los.

• Kom qhia koj cov me nyuam txog tej kev khi lus, hais kom lawv qhia koj txog ib lub sij hawm thaum lawv tau cog lus los sis lwm tus cog lus rau lawv. Yog tias pab tau, cia li qhia txog tej yam los ntawm koj lub neej—tsis hais tej kev khi lus uas koj nrog Vajtswv khi thaum ua kev cai raus dej los sis nyob hauv lub tuam tsev. Koj tej kev khi lus puas tau hloov koj txoj kev nrog Vajtswv sib raug zoo? Xaiv ob peb lo lus los ntawm Chiv Keeb 15:1–6; 17:1–8; Anplaham 2:9–11 kom qhia txog cov koob hmoov uas Vajtswv cog lus rau Anplaham thiab Xalas.

• Kom pab koj cov me nyuam npaj nrog Vajtswv khi lus thaum lawv ua kev cai raus dej, tej zaum koj yuav xav siv tej yam ntxim ua nyob hauv ntaub ntawv ntxiv tom kawg A los sis ntaub ntawv ntxiv tom kawg B.

• Thaum Anplaham yuav raug xwm txheej ceev, nws tau thov Vajtswv. Thaum Hankas nyob nws ib leeg hauv roob moj sab qhua, nws kawm tias Vajtswv hnov nws tej lus thov. Xav seb puas qhia ob zaj dab neeg no rau koj cov me nyuam: “Anplaham thiab Xalas” thiab “Hankas” nyob hauv Cov Dab Neeg hauv Phau Qub, 28–31, 32–33. Peb kawm dab tsi txog Vajtswv los ntawm ob zag lus no? Ces tej zaum nej yuav xav sib tham txog lwm lub sij hawm thaum nej xav tias Vajtswv tau hnov nej. Tej zaum ib zaj nkauj xws li “A Child’s Prayer” (Children’s Songbook, 12–13) yuav pab qhia txog lub ntsiab cai no.

2:20

1:23