Txoj Kev Khi Lus

Anplaham “xav xyaum coj ncaj ncees dua” (Anplaham 1:2), ces Vajtswv thiaj caw nws los sib khi lus tseg. Anplaham tsis yog thawj tug neeg uas xav ua li no, thiab nws tsis yog thawj tug neeg uas tau txais kev khi lus. Vim hais tias, tiag tiag mas, yog ib txoj kev khi lus uas kav mus ib txhis. Anplaham xav tau “tej koob hmoov ntawm cov yawg koob” (Anplaham 1:2)—tej koob hmoov uas muab rau Adas thiab Evas thiab tom qab ntawd rau cov neeg uas rau siab nrhiav tej koob hmoov no.

Vajtswv txoj kev khi lus nrog Anplaham tau cog lus tseg hais tias yuav tau tej koob hmoov zoo kawg: yuav txais ib thaj av, yuav muaj tub ki coob kawg, yuav txais lub pov thawj hwj tej kab ke, thiab ib lub npe muaj koob muaj npe rau ntau tiam neeg tom ntej. Tiam sis qhov tseem ceeb tshaj ntawm txoj kev khi lus no tsis yog tej koob hmoov rau Anplaham thiab nws tsev neeg uas lawv yuav txais tiam sis yuav yog tej koob hmoov rau tag nrho Vajtswv cov me nyuam. Vajtswv hais tias “koj yuav ua rau lwm leej lwm tus tau txais koob hmoov, thiab kuv yuav foom koob hmoov ntawm koj mus rau txhua haiv neeg uas nyob thoob plaws ntiaj teb” (Chiv Keeb 12:2–3).

Txoj kev khi lus no puas tau muab koob muab npe zoo rau Anplaham, Xaliyas, thiab lawv cov xeeb leej xeeb ntxwv? Tsuas yog ib qho uas pab lawv foom koob hmoov rau lwm tus neeg. Anplaham tsev neeg yuav “coj txoj kev qhuab qhia thiab lub Pov Thawj Hwj no mus rau txhua haiv neeg,” thiab muab “tej koob hmoov ntawm txoj Moo Zoo, uas yog tej koob hmoov ntawm txoj kev cawm seej, uas yog txoj sia nyob mus ib txhis” (Anplaham 2:9, 11). Ua Vajtswv cov neeg khi lus tsis yog hais tias lawv yog neeg zoo dua; tsuas yog hais tias lawv muaj ntiag tug hauj lwm yuav pab lwm tus neeg ua zoo dua.

Txoj kev khi lus yog txoj koob hmoov uas Anplaham xav xav tau. Tom qab txais lawm, Anplaham hais hauv nws nruab siab tias, “Koj tus tub qhe tau mob siab nrhiav koj; nim no kuv nrhiav tau koj lawm” (Anplaham 2:12).

Tau muaj li no ntau txhiab xyoo tas los lawm, tiam sis tau rov qab muab kev khi lus ntawd hauv peb lub caij lub nyoog. Thiab tab tom muab rau Vajtswv cov neeg niaj hnub nim no. Txoj kev ua raws li kev khi lus ntawd pab ua rau Vajtswv txoj hauj lwm hauv lub caij nyoog kawg no loj hlob tuaj mus, thiab foom koob hmoov rau tej yim neeg thoob plaws ntiaj teb no. Thiab leej twg uas, zoo li Anplaham, xav ua ib tug neeg ncaj ncees—leej twg uas rau siab nrhiav tus Tswv—yeej koom tau kev khi lus no.

Koj yog ib tug me nyuam ntawm txoj kev khi lus. Koj nrog Vajtswv sib khi lus tseg thaum koj ua kev cai raus dej thiab koj noj lub cim nco txog. Thiab koj txais tag nrho txoj kev khi lus no thaum koj txais tej kab ke dawb ceev hauv lub tuam tsev.

Dhau ntawm tej kev khi lus thiab kab ke no, peb thiaj hloov los ua Vajtswv haiv neeg. Peb raug muab khi rau Nws “nrog tej hlua uas kav mus ib txhis.” Thawj Tswj Hwm Russell M. Nelson qhia hais tias “Thaum peb khi lus nrog Vajtswv, peb tso qhov nruab nrab tseg tas mus li. Vajtswv yeej yuav tsis tso cov uas tau nrog Nws khi lus tseg ib zaug li. Muaj tseeb tiag, tag nrho cov uas tau khi lus nrog Vajtswv lawv txais tau ib txoj kev hlub thiab lub siab hlub tshua yam tshwj xeeb. … Vim peb tau khi lus nrog Vajtswv, Nws yeej yuav siv zog pab peb tsis tu tsis tseg, thiab peb yeej yuav tsis ua rau Nws txoj kev hlub tshua peb tas lawm.” Koj yuav pom li no hauv zaj keeb kwm txog Vajtswv haiv neeg ntawm kev khi lus nyob rau hauv Phau Qub, thiab koj yuav pom li no hauv koj lub neej vim koj yog ib tug me nyuam hauv Nws txoj kev khi lus.

Nov yog ib yam uas peb to taub vim tus Yaj Saub Joseph Smith muab Anplaham txoj kev khi lus txum tim rov qab los. Ces thaum koj nyeem txog tej kev khi lus hauv Phau Qub, tsis txhob xav txog Anplaham, Ixaj, thiab Yakhauj txoj kev nrog Vajtswv sib raug zoo xwb. Koj kuj yuav tsum xav txog Nws txoj kev nrog koj sib raug zoo thiab. Thaum koj nyeem txog txoj kev cog lus hais tias yuav muaj xeeb leej xeeb ntxwv suav tsis txheeb, tsis txhob xav txog neeg coob kawg uas niaj hnub no hu Anplaham ua lawv txiv thiab. Cia li xav txog Vajtswv lo lus cog tseg rau koj hais tias yuav muaj tsev neeg nyob ua ke tas mus li thiab tau tub ki tas mus li. Thaum koj nyeem txog kev cog lus tias yuav txais ib thaj av, tsis txhob xav txog thaj av uas tau cog lus tseg rau Anplaham xwb. Cia li xav txog qhov uas lub ntiaj teb yuav tau yeeb koob xilethi-aus—ib qho chaw ua ntiag tug tau cov neeg uas “txo hwj chim” cov uas “tos ntsoov tus Tswv” (Mathais 5:5; Phau Ntawv Nkauj 37:9, 11). Thiab thaum koj nyeem txog cov lus cog tseg uas hais tias Vajtswv haiv neeg yuav foom koob hmoov rau “txhua yim neeg hauv ntiaj teb no” (Anplaham 2:11), tsis txhob xav txog Anplaham txoj kev qhuab qhia los sis cov yaj saub uas los tom qab nws xwb. Cia li xav txog txhua yam koj ua tau—vim koj yog ib tug neeg ntawm kev khi lus uas coj raws li Yexus Khetos—kom koj ua tau ib qho koob hmoov rau tej yim neeg uas nyob ib ncig koj.