Mauxes 7

Thaum tus Yaj Saub Joseph Smith kawm txog Enauj thiab nws lub Nroog Dawb Huv, nws txais kev tshoov siab. Nws “paub tias twb txog hnub uas tus Tswv yuav rov qab txhim tsa Xi-oos nyob hauv lub ntiaj teb” (Saints, 1:108–9), ces nws pib ua raws li nws lub hom phiaj kom txhim tsa Xi-oos. Kev nyeem Mauxes 7 pab tau koj ua txoj hauj lwm no niaj hnub no.

Tej zaum koj yuav xav pib xav txog tej lus nug xws li “Xi-oos yog dab tsi?” thiab “Xi-oos txawv lub ntiaj teb li cas?” Xav seb koj puas sau ntawv txog tej lus teb uas koj txais thaum koj kawm Mauxes 7, qhov tseem ceeb yog nyob hauv nqe 16–21, 27, 53, 62–69.

Tej zaum tej lus teb rau tej lus nug no yuav qhia koj paub meej tias peb tseem tshuav tes hauj lwm ntau heev kom txhim tsa Xi-oos. Peb yuav ua li cas thiaj ua tau? Tej zaum yuav pab koj yog koj xav txog tej lub sij hawm thaum koj nrog lwm tus “koom siab koom ntsws” (Mauxes 7:18). Tej zaum yog nyob hauv ib pawg ntseeg, koj tsev neeg, los sis ib pawg hauv tsev kawm ntawv los sis chaw ua hauj lwm. Tib neeg tau ua dab tsi kom tsim kev koom siab raws li kev ncaj ncees?

Nov yog tej yam ntxiv uas pab tau koj tawm tswv yim thiab kev tshoov siab ntxiv. Xaiv ib yam los sis ob peb yam rau koj kawm, ces sau ntawv txog tej kev tshoov siab uas koj txais kom txhim tsa Xi-oos:

• Filipis 2:1–4; 4 Nifais 1:15–18; Lus Qhuab Qhia thiab Kev Khi Lus 97:21; 105:5.

• Ulisses Soares, “Cov Kwv Tij thiab Muam uas Koom Nrog Khetos,” Liyahaunas, Kaum Ib Hlis Ntuj 2023, 70–73.

• D. Todd Christofferson, “Koom Ib lub Siab nrog Khetos,” Liyahaunas, Tsib Hlis Ntuj 2023, 77–80.

Qhov uas Yexus Khetos yog koj tus Vaj Ntxwv muaj nqis dab tsi rau koj? Cia li xav txog lwm lub npe ntawm Yexus Khetos nyob hauv nqe no. Nws tej lub npe qhia dab tsi rau koj txog Nws? Koj xav tias kev “nkag ntawm lub rooj vag los thiab nce mus los ntawm [Nws]” txhais li cas?

Kuj saib “Los, Vaj Ntxwv tus Vaj Ntxwv,” Cov Nkauj Qhuas Vajtswv, zaj 18.

Tib neeg ib txhia xav tias Vajtswv yog ib tug uas nyob deb xwb uas tsis xav li cas txog peb lub neej. Enauj twb kawm tias kev xav li no txog Vajtswv tsis muaj tseeb nyob hauv kev ua yog toog nyob hauv Mauxes 7. Nws tau kawm dab tsi txog Vajtswv—thiab koj kawm dab tsi—nyob hauv nqe 28–40? Vim li cas koj xav tias Enauj xav tsis thoob thaum nws pom Vajtswv quaj? Vim li cas yog ib qho tseem ceeb rau koj paub tias Nws quaj taus?

Thaum nws ua yog toog ntxiv, Enauj quaj thiab. Tiam sis Vajtswv kuj qhia nws txog tej yam uas yuav ua rau nws zoo siab thiab. Nrhiav tej no nyob hauv Mauxes 7:41–69. Koj kawm dab tsi los ntawm Enauj txoj kev ua yog toog uas pab tau koj “cia li zoo siab, thiab xyiv fab” txawm yog “muaj kev iab siab” hauv koj lub neej (nqe 44)?

Kuj saib Jeffrey R. Holland, “The Grandeur of God,” Liyahaunas, Kaum Ib Hlis Ntuj 2003, 70–73.

Enauj txoj kev ua yog toog, qhov tseem ceeb yog tej nqe uas sau hauv Mauxes 7:59–67, yog thawj zaug uas tau sau ntawv txog tus Cawm Seej txoj Kev Los Zaum Ob. Muaj dab tsi uas tshoov koj lub siab txog tej nqe no txoj kev piav txog hnub nyoog kawg? Piv txwv hais tias, cia li xav tias muaj dab tsi tshwm sim kom muaj raws li tej lus qhia txog tej uas yuav muaj los yav tom ntej hauv nqe 62. Tej lus no qhia dab tsi rau koj txog Vajtswv txoj hauj lwm hauv hnub nyoog kawg?

Kuj saib Henry B. Eyring, “Cov Viv Ncaus hauv Xi-oos,” Liyahaunas, Kaum Ib Hlis Ntuj 2020, 67–69.

• Kom pab koj cov me nyuam kawm txog Enauj thiab Xi-oos, tej zaum koj yuav xav siv “Tus Yaj Saub Enauj” nyob hauv Cov Dab Neeg hauv Phau Qub (19–21) los sis nqe ob ntawm zaj nkauj “Follow the Prophet” (Children’s Songbook, 110–11). Ces koj hais tau kom koj cov me nyuam pab koj rov qab qhia zaj dab neeg no. Cov duab txog Enauj hauv tus txheej txheem qhia no los tej zaum yuav pab.

• Nov yog ib txoj kev pab koj cov me nyuam to taub tias kev “koom siab koom ntsws” lub ntsiab yog dab tsi (Mauxes 7:18): Txiav ntawv ua ib lub plawv ntawv thiab muab txiav ua tej daim me, txaus kom muab tau ib daim rau txhua tus me nyuam Cia lawv nyias sau nyias lub npe rau nyias daim ces ua hauj lwm ua kom tso lub plawv ntawv rov qab los ua ke. Thaum lawv ua li ntawd, tej zaum koj yuav xav hais txog tej yam uas koj nyiam txog txhua tus me nyuam.

• Pab koj cov me nyuam suav pes tsawg zaus pom lo lus “Xi-oos” nyob hauv Mauxes 7:18–21, 62–63, 68–69. Txhua zaus lawv nyeem lo lus ntawd, pab lawv kawm tias nqe ntawd qhia dab tsi txog Xi-oos (kuj saib Phau Qhia txog Vaj Lug Kub, “Xi-oos,” Txoj Moo Zoo cov Ntawv). Peb yuav ua li cas kom ua neeg zoo li cov neeg hauv tej nqe no?

• Kom pab koj qhia txog Mauxes 7:32–33 rau koj cov me nyuam, tej zaum koj yuav xav nrog lawv tham txog ib yam uas lawv yuav tsum xaiv. Ces koj nyeem tau tej nqe no ua ke kom kawm tias Leej Txiv Saum Ntuj Ceeb Tsheej xav kom peb xaiv dab tsi. Peb xaiv tau dab tsi kom qhia tias peb xaiv Nws? Tej zaum koj cov me nyuam yuav xav ua yeeb yam txog tej kev xaiv no thaum lwm tus twv seb lawv ua yeeb yam txog dab tsi.

• Nyob hauv Mauxes 7:59, Enauj thov tus Tswv txog ib lo lus nug. Caw koj cov me nyuam nrhiav lo lus nug no, ces hais kom lawv nrhiav lus teb nyob hauv nqe 60. Tej zaum koj kuj yuav xav nrog lawv thaum txog ib lub sij hawm thaum lawv xav tias ib tug neeg yuav rov qab los tsev. Nug lawv seb lawv xav li cas thiab lawv tau ua li cas kom npaj rau nws los. Peb yuav ua li cas npaj siab rau Yexus txoj kev rov los?

• Xav seb puas muab daim duab rau lawv saib txog tej lub sij hawm thaum tus Cawm Seej tshwm sim rau neeg (xws li Phau Muaj Duab txog Txoj Moo Zoo, najnpawb 60, 82, 83, thiab 84). Tib neeg ua dab tsi hauv tej daim duab no? Tib neeg xav li cas thaum lawv ntsib Yexus? Tej zaum nej yuav xav hu ib zaj nkauj txog tus Cawm Seej txoj Kev Los Zaum Ob, xws li “When He Comes Again” (Children’s Songbook, 82–83), thiab hais kom cov me nyuam seb lawv xav tias yuav zoo li cas thaum Yexus rov qab los. Cia cov me nyuam qhia tias lawv xav li cas txog qhov uas lawv yuav pom Yexus thaum Nws rov qab los.