“Februari 9–15. ‘Bikpela i Amamas Long Noa’: Stat 6–11; Moses 8,” Kam, Bihainim Mi—Bilong Haus na Sios: Olpela Testamen 2026 (2026)
“Februari 9–15. ‘Bikpela i Amamas Long Noa’,” Kam, Bihainim Mi: 2026
Jehovah Keeps a Promise, Sam Lawlor i mekim
Februari 9–15: “Bikpela i Amamas Long Noa”
Stat 6–11; Moses 8
Nau yumi stap long ol las de, na yumi gat bikpela as long ritim na skelim stori bilong Noa. Taim Jisas Krais bin skulim yumi wanem samting bai soim Kam Bek bilong Em i klostu, Em tok, “Kain pasin ol i bin mekim long taim bilong Noa, ol bai mekim wankain pasin tasol long taim Pikinini Bilong Man i kamap” (Josep Smit—Matyu 1:41). Na tu, ol toktok i tokaut moa long taim bilong Noa, kain olsem “pait na bikhet” na “pasin nogut i kamap long olgeta hap,” i tokaut tu long ol samting i kamap long taim bilong yumi long nau (Stat 6:12–13; Moses 8:28). Yumi ken lukim olsem stori bilong taua ol sanapim long wanpela hap long ples Babilonia em kamap long taim bilong yumi tu. Ol i gat pasin bilong apim nem bilong ol yet, bihain ol i paul nabaut na buruk i go i kam.
Ol dispela stori bilong bipo i gutpela tru, long wanem, ol soim yumi olsem ol pasin nogut na pasin doti i save kamap long bipo i kam olsem. Antap long olgeta, ol dispela stori i skulim yumi wanem long mekim bilong abrusim dispela samting. “Bikpela i Amamas Long Noa” (Moses 8:27). Na famili bilong Jaret na brata bilong em lukluk long Bikpela na Em banisim ol taim ol manmeri i paul nabaut, na buruk i go i kam long Babilonia (lukim Ita 1:33–43). Sapos yumi tingting long wanem rot bai yumi banisim yumi yet na famili bilong yumi long ol kainkain pasin nogut na pasin doti, ol dispela stori ken skulim yumi planti samting.
Ol Sampela Tingting bilong Lainim long Haus na long Sios
Stat 6; Moses 8
Spirit bilong yumi bai kisim banis sapos yumi bihainim profet bilong Bikpela.
Yu lukim olsem ol samting i kamap long taim bilong Noa i wankain long taim bilong yumi, o nogat? Lukim Moses 8:15–24, 28. Wanem ol samting yu lukim i kamap long bipo na i kamap gen long nau?
Wanpela bikpela samting yu bai lukim em God makim Noa long kamap olsem profet, na Em makim tu wanpela profet long nau. Raitim go daun ol sampela tok tru long ol profet yu lainim long Moses 8:13–30. Profet bilong yumi long nau em wankain olsem Noa olsem wanem? Profet bilong Bikpela long nau i no autim tok lukaut long bikpela tait bai kamap, o askim yumi long helpim long mekim wanpela sip. Tasol em givim tok lukaut long wanem samting? Na em askim yumi long mekim wanem samting? Long helpim yu ansarim ol dispela askim, yu ken ritim wanpela sapta bilong Teachings of Presidents of the Church insait long Gospel Library, na ritim gut dispela hap i tok “Invitations and Promised Blessings” Yu ken makim na ritim wanpela tok lukaut na wanpela toktok bilong mekim samting we i dia tumas long yu.
Elda Allen D. Haynie i tok, “Wanpela gutpela Papa long Heven i laikim yumi tru, na em save soim ol tok tru bilong em long yumi ol pikinini bilong Em long maus bilong ol profet” (“A Living Prophet for the Latter Days,” Liahona, Mei 2023, 25). Ritim na skelim toktok bilong Elda Haynie, na painim ol as bilong wanem na taim yumi gat wanpela profet, em mak olsem Papa long Heven laikim yumi tumas. Taim yu bihainim tok bilong profet bilong Bikpela, em banisim yu long taim bilong las de olsem wanem?
Lukim tu Topics and Questions, “Prophets,” Gospel Library; “Why do we have prophets?” (vidio), Gospel Library.
Why Do We Have Prophets?
Stat 6:5–13
God i mekim kamap bikpela tait long soim marimari bilong Em.
Sampela manmeri i save tingting sapos God skelim gut samting taim em mekim bikpela tait kamap long “pinisim olgeta manmeri” (Stat 6:7). Elda Neal A. Maxwell i tok moa olsem long taim bilong bikpela tait, “pasin nogut na pasin doti i karamapim laik bilong olgeta pinis na ol spirit i no inap, wantaim gutpela skel bilong God, moa long kam daun” (We Will Prove Them Herewith [1982], 58). Yu ken tingim tu olsem God soim marimari bilong Em taim Em mekim kamap dispela bikpela tait. Wanem ol samting insait long Stat 6:5–13 i soim marimari na laikim bilong God long ol manmeri?
Stat 9:8–17
Ol mak o ol sain i save helpim mi tingim kontrak bilong mi wantaim Bikpela.
Long Stat 9:8–17, renbo bai mekim yu tingim wanem samting? Joseph Smith Translation, Genesis 9:21–25 (long Bible appendix) i givim yu wanem moa tingting? Yu ken raitim go daun nem bilong ol narapela samting (kain olsem ol sain, ol samting yumi save long en, o ol narapela samting) God givim yu bilong mekim yu tingim kontrak bilong yu. Ol dispela samting skulim yu long wanem samting? Ol dispela samting i helpim yu long tingim kontrak bilong yu olsem wanem?
Lukim tu Gerrit W. Gong, “Always Remember Him,” Liahona, Mei 2016, 108–11; “Reverently and Meekly Now,” Hymns, no. 185.
The Tower of Babel, David Green i mekim
Stat 11:1– 9
Wanpela rot tasol bilong go long Papa long Heven em yumi mas bihainim Jisas Krais.
Skelim stori bilong ol lain bilong Babilonia i sanapim taua wantaim stori bilong Enok wantaim ol manmeri bilong em sanapim Saion yu ritim long wik i go pinis. Tupela lain wantaim laik go antap long heven, tasol ol i bihainim ol narapela rot. Ol manmeri bilong Saion go antap long heven olsem wanem? (see Moses 7:18–19, 53, 62–63, 69). Yu lainim wanem samting long ol manmeri bilong Babilonia, long Stat 11:1–9 na Hilaman 6:26–28 ? Dispela i skulim yumi wanem samting, long taim yumi laik go bek long God wantaim strong bilong yumi yet? God givim yumi wanem samting bilong helpim yumi “i go antap inap long [heven]”? (Stat 11:4; lukim tu Jon 3:16).
Amamas long lainim samting. Pasin bilong lainim samting em moa long yu ritim o harim tasol. Kain olsem, taim yu na famili bilong yu, o klas, i lainim stori bilong taua long Babilonia, yupela ken raitim ol samting i save rausim yumi go longwe long God long ol liklik hap pepa. Na long ol narapela liklik hap pepa, yupela ken raitim ol samting i save kisim yumi go klostu long God. Mekim ol pepa long paslain grup i luk olsem wanpela taua, na namba 2 grup i luk olsem tempel.
Long kisim sampela moa tingting, lukim Liahona na For the Strength of Youth megesin bilong dispela mun.
Ol Sampela Tingting bilong Lainim ol Pikinini
Stat 6:14–22; 7–8; Moses 8:16–24
Taim mi harim na bihainim profet bilong Bikpela, Bikpela bai blesim mi na famili bilong mi.
-
Planti ol pikinini save laikim stori bilong Noa na sip em mekim. Yu ken larim ol pikinini bilong yu toktok long wanem samting ol save long dispela. Long helpim ol, yu ken yusim ol piksa stap insait long dispela ol toktok, “Noah and His Family” long Old Testament Stories (22–25), na namba 3 ves bilong “Follow the Prophet” (Children’s Songbook, 110–11). Ol pikinini bilong yu ken mekim liklik drama bilong wan wan hap bilong dispela stori—kain olsem, ol ken soim pasin bilong yusim wanpela samting bilong ol kamda long sanapim sip, o ol ken wokabaut olsem ol animal go insait long sip.
-
Taim yupela toktok wantaim long Noa, helpim ol pikinini bilong yu long luksave olsem em wanpela blesing long gat wanpela profet bilong God long taim bilong yumi. Helpim ol pikinini bilong yu long ritim Moses 8:16--24 long painim ol samting Noa bin skulim ol manmeri long taim bilong em, we ol profet bilong Bikpela i skulim yumi tude. Yumi bai kisim blesing taim yumi harim na bihainim ol dispela tokskul olsem wanem?
Stat 9:15–16
God bai inapim ol promis Em mekim wantaim mi.
-
Ol pikinini bilong yu i ken droim o kalarim wanpela renbo taim yu toktok long wanem samting renbo i makim (lukim Joseph Smith Translation, Genesis 9:21–25 [long Bible appendix]). God laikim Noa wantaim famili bilong em long tingim wanem samting taim ol lukim renbo?
-
Yu ken soim ol pikinini bilong yu wanpela samting yu gat, we i mekim yu tingim wanpela samting i dia tru long laip bilong yu, kain olsem ring bilong marit, wanpela piksa, ol wanpela buk yu save raitim ol tingting bilong yu. Larim ol pikinini bilong yu toktok long ol wankain samting tu. Dispela i ken bringim yupela i go long toktok bilong ol samting i save helpim yumi tingim ol kontrak bilong yumi, kain olsem sakramen i save helpim yumi tingim kontrak yumi mekim long bihainim Jisas Krais taim yumi kisim baptais (see Doktrin na ol Kavanen 20:75–79).
God tokim famili bilong Noa olsem renbo bai stap olsem “mak bilong dispela kontrak bilong oltaim mi mekim pinis wantaim yupela” (Stat 9:12).
Stat 11:1–9
Wanpela rot tasol bilong go long heven em yumi mas bihainim Jisas Krais.
-
Yu wantaim ol pikinini ken sanapim wanpela taua wantaim ol blok bilong pilai o ol narapela samting. Taim yupela mekim olsem, yu toktok na soim ol olsem ol manmeri bilong Babilonia ting ol ken sanapim wanpela longpela taua bilong go long heven. Yupela ken lukim wanpela piksa bilong Jisas Krais na askim ol pikinini bilong yu Em save helpim yumi long go long heven olsem wanem. Bihain yupela i ken toktok i go i kam long ol samting yupela i ken mekim long bihainim Jisas Krais.
-
Yupela ken ritim Hilaman 6:28 bihain long yupela ritim stori bilong taua long Babilonia long Stat 11:1–9. Long dispela ves, bilong wanem na ol manmeri bilong Babilonia i sanapim dispela taua? Bilong wanem na dispela rot bilong go long heven i kranki? Bihain yupela ken ritim 2 Nifai 31:20–21 and Hilaman 3:28 long painim stretpela rot bilong go long heven. Wanem tokstia bai yumi givim long ol manmeri bilong Babilonia?
Long kisim sampela moa tingting, lukim Friend piksa buk bilong dispela mun.