“Februari 2–8. ‘Bikpela i Kolim Ol Manmeri Bilong Em Saion’: Moses 7,” Kam, Bihainim Mi—Bilong Haus na Sios: Olpela Testamen 2026 (2026)
“Februari 2–8. ‘Bikpela i Kolim Ol Manmeri Bilong Em Saion’,” Kam, Bihainim Mi: 2026
Enoch Sees the Meridian of Time, Jennifer Paget i mekim
Februari 2–8: “Bikpela i Kolim Ol Manmeri Bilong Em Saion”
Moses 7
Long bipo i kam olsem, ol manmeri i laik mekim wanem Enok na ol manmeri bilong em i mekim: kirapim wanpela hap we ol manmeri i no sot long ol samting o i nogat kros namel long ol. Yumi manmeri bilong God, olsem na yumi laikim wankain tu. Yumi kolim dispela wok bilong kirapim Saion, na dispela em—long wankain taim, yumi lukautim ol manmeri i sot na kirapim bel isi—yumi mekim ol kontrak, stap wantaim insait long stretpela pasin, na stap wanpela wantaim yumi yet na Jisas Krais, “King bilong Saion” (Moses 7:53). Sapos ples graun, komuniti bilong yu, o famili bilong yu i no olsem yu laik em mas stap olsem wanem, yu ken askim, Enok na ol lain bilong em mekim dispela olsem wanem? Ol kamap “wanpela bel na wanpela tingting” (Moses 7:18) olsem wanem, namel long ol hevi raunim ol? Namel long ol samting Moses 7 i tok long Saion, wanpela bikpela samting bilong yumi ol Bilipman bilong Las De em dispela: Saion em i no wanpela biktaun tasol. Nogat. Saion em makim bel na spirit bilong yu i mas stap olsem wanem. Saion, olsem Bikpela i skulim yumi, em husat “bel bilong em i klin” (Doktrin na ol Kavanen 97:21). Olsem na ating gutpela rot bilong kirapim Saion em yumi mas stat long bel bilong yumi na haus bilong yumi.
Ol Sampela Tingting bilong Lainim long Haus na long Sios
Moses 7:16–21, 27, 53, 62–69
Mi ken helpim long kirapim Saion
Taim Profet Josep Smit i save long Enok na Biktaun Holi bilong em, bel bilong em i kirap. Em “save olsem dispela de bilong God kirapim Saion antap long dispela graun gen i kamap pinis” (Saints, 1:108–9), na long laip bilong em em i mekim wok bilong sanapim Saion. Taim yu ritim Moses 7, dispela i ken kirapim bel bilong yu long mekim wankain wok long nau.
Long stat, yu ken askim. “Saion em wanem?” na “Em narakain long olgeta hap long graun olsem wanem?” Yu ken mekim lista bilong ol ansa i kam long yu taim yu ritim Moses 7, long ves 16–21, 27, 53, 62–69.
Ol bekim bilong yu long ol dispela askim ken soim olsem yumi gat bikpela wok long mekim, long kirapim Saion. Olsem na yumi bai mekim dispela olsem wanem? Yu ken tingim wanpela taim yu pilim olsem yu stap “wanpela bel na wanpela tingting” wantaim narapela (Moses 7:18). Ating em long wanpela wod, famili, o wanpela grup long wok o skul. Ol manmeri i mekim wanem long kirapim stretpela pasin bilong bung wantaim?
Hia em sampela ol samting yu ken ritim long kisim sampela tingting. Makim wanpela ol planti na ritim, na raitim wanem yu pilim bel bilong yu i kirap long mekim, long kirapim Saion:
-
Filipai 2:1–4l 4 Nifai 1:15–18; Doktrin na ol Kavanen 97:21; 105:5.
-
Ulisses Soares, “Brothers and Sisters in Christ,” Liahona, Nov. 2023, 70–73.
-
D. Todd Christofferson, “One in Christ,” Liahona, Mei 2023, 77–80.
God i laik olsem ol manmeri bilong em mas stap wantaim “wanpela bel na wanpela tingting” (Moses 7:18).
Moses 7:53
Jisas Krais em “King bilong Saion.”
Wanem as bilong Jisas Krais i stap King bilong yu? Lukim ol narapela taitel bilong Jisas Krais insait long dispela ves. Ol skulim wanem samting long Em? Yu ting wanem as bilong kam “insait long dua na [go antap] long [Em]”?
See also “Come, O Thou King of Kings,” Hymns, no. 59.
Moses 7:28–69
God i save krai—na amamas—long ol pikinini bilong Em.
Sampela lain i save lukim God olsem wanpela man i stap longwe tru na em i no save wari long samting i kamap long yumi. Enok i kisim narapela lukluk long God long driman long Moses 7. Em lainim wanem long God—na yu lainim wanem—long ves 28–40? Bilong wanem yu ting Enok i kirap nogut long lukim God i krai? Bilong wanem na em bikpela samting long save olsem Em i save mekim olsem?
Taim dispela driman i go het, Enok tu i krai. Tasol God soim em planti as long amamas. Painim ol long Moses 7:41–69. Yu lainim wanem long driman bilong Enok bilong helpim yu “kirapim bel bilong yu, na amamas moa,” wankain long taim yu gat “samting i no gutpela” insait long laip bilong yu tu (ves 44)?
Lukim tu Jeffrey R. Holland, “The Grandeur of God,” Liahona, Nov. 2003, 70–73.
Moses 7:59–67
Jisas Krais bai kam bek gen long las de.
Driman bilong Enok, insait long Moses 7:59–67, em namba wan tok profet bilong Namba Tu Kam Bek bilong Jisas Krais. Wanem gutpela tingting i kamap long yu long rot ol dispela ves i stori long ol las de? Kain olsem, skelim yu pilim ol tok profet long ves 62 i kamap tru olsem wanem. Ol dispela toktok i skulim yu wanem long wok bilong God long ol las de.
Lukim tu Henry B. Eyring, “Sisters in Zion,” Liahona, Nov. 2020, 67–69.
Long kisim sampela moa tingting, lukim Liahona na For the Strength of Youth megesin bilong dispela mun.
Ol Sampela Tingting bilong Lainim ol Pikinini
Moses 7:18–21, 62–63, 68–69
God i laikim yumi long stap wantaim “wanpela bel na wanpela tingting.”
-
Long helpim ol pikinini bilong yu lainim stori bilong Enok na Saion, yu ken yusim “Enoch the Prophet” insait long Old Testament Stories (19–21) or namba tu ves bilong “Follow the Prophet” (Children’s Songbook, 110–11). Bihain yu ken askim ol pikinini bilong yu long stori long dispela long toktok bilong ol yet. Ol piksa bilong Enok insait long hia ken helpim.
-
Hia em wanpela rot bilong helpim ol pikinini bilong yu save long as bilong stap “wanpela bel na wanpela tingting” (Moses 7:18). Mekim wanpela lewa long pepa, na katim go liklik, bilong wan wan pikinini bai holim. Larim ol raitim nem bilong ol antap long pepa ol holim na wok wantaim long putim dispela lewa i go bek wantaim. Taim ol mekim olsem, yu ken toktok long ol samting yu save laikim long wan wan bilong ol pikinini.
-
Helpim ol pikinini bilong yu kaunim amaspela taim dispela tok “Saion” i kamap long Moses 7:18–21, 62–63, 68–69. Taim ol i painim wanpela, helpim ol painimaut dispela ves i tok wanem long Saion (lukim tu Guide to the Scriptures, “Zion,” Gospel Library). Yumi bai kamap moa olsem ol manmeri ol dispela ves i toktok long en olsem wanem.
Toktok long wan wan i mas ritim tok bilong God. Yu skulim ol famili bilong yu long haus o wanpela klas long Sande, wanpela gutpela rot bilong helpim ol narapela strongim bilip bilong ol long Jisas Krais, em long helpim ol kamapim pasin bilong ritim tok bilong God ol yet. Toktok long wanem i kamap long yu taim yu ritim tok bilong God, na askim ol famili o ol memba bilong klas long toktok tu long dispela. Taim yumi harim wanem rot pasin bilong ritim tok bilong God i blesim ol narapela, em i save kirapim bel bilong yumi long kisim wankain blesing kam long Bikpela. (Lukim Teaching in the Savior’s Way, 25.)
Moses 7:32–33
Papa long Heven i laikim mi, mi mas laik long bihainim Em.
-
Long statim Moses 7:32–33 long ol pikinini bilong yu, yu ken toktok long wanpela samting ol i laikim long mekim. Bihain yu ken ritim wantaim ol dispela ves long painimaut wanem Papa long Heven i laik yumi mas laikim long en. Wanem ol samting yumi ken laikim na mekim long soim olsem yumi makim Em? Ating ol pikinini bilong yu ken mekim drama bilong ol dispela samting taim ol narapela i ges em i mekim wanem.
Moses 7:59–67
Jisas bai kam bek gen long graun.
-
Long Moses 7:59, Enok i askim God wanpela askim. Askim ol pikinini long painim, na bihain askim ol long painim bekim bilong em long ves 60. Yu ken toktok tu wantaim ol long wanpela taim ol weitim wanpela long kam bek long haus. Askim ol ol pilim olsem wanem na ol i mekim wanem long redim ol yet. Yu bai redim yumi yet long kam bek bilong Jisas olsem wanem?
-
Yu ken soim ol piksa bilong ol taim Jisas Krais i kamap long ol manmeri (kain olsem long Gospel Art Book, nos. 60, 82, 83, and 84). Ol manmeri i mekim wanem insait long ol dispela piksa? Yu ting ol pilim olsem wanem taim ol bungim Jisas? Yupela i ken singim wanpela song i toktok long Namba Tu Kam bek bilong Jisas Krais, olsem “When He Comes Again” (Children’s Songbook, 82–83), na askim ol pikinini ol ting bai wanem i kamap taim Jisas kam bek gen. Larim ol pikinini bilong yu toktok long ol bai pilim olsem wanem taim ol lukim Jisas i kam bek gen.
Long kisim sampela moa tingting, lukim Friend piksa buk bilong dispela mun.