Genesis 6–11; Moises 8

May nakikita ka ba sa paglalarawan sa panahon ni Noe na tila katulad ng mga kalagayan sa ating panahon? Tingnan, partikular na, sa Moises 8:15–24, 28. Anong mga tema ang nakikita mong inuulit-ulit?

Ang isang mahalagang pagkakatulad na makikita ninyo ay na tinawag ng Diyos si Noe na maging propeta, at tumawag din Siya ng propeta ngayon. Isiping ilista ang mga katotohanang matutuhan mo tungkol sa mga propeta mula sa Moises 8:13–30. Paano naging katulad ni Noe ang ating buhay na propeta? Siyempre, ang propeta ng Panginoon ngayon ay hindi nagbababala tungkol sa isang Baha o nag-aanyaya sa atin na tumulong sa pagbubuo ng isang arka. Ngunit tungkol saan ang babala niya sa atin? At ano ang hinihikayat niyang gawin natin? Para masagot ang mga tanong na ito, maaari mong rebyuhin ang isang kabanata mula sa Mga Turo ng mga Pangulo ng Simbahan sa Gospel Library, lalo na ang bahaging “Mga Paanyaya at mga Pangako.” Marahil maaari kang pumili ng isang babala at isang paanyaya na tila mahalaga lalo na sa iyo.

Itinuro ni Elder Allen D. Haynie, “Ang perpekto at mapagmahal na Ama sa Langit ang pumili ng huwaran ng paghahayag ng katotohanan sa Kanyang mga anak sa pamamagitan ng isang propeta” (“Isang Buhay na Propeta para sa mga Huling Araw,” Liahona, Mayo 2023, 25). Isiping pag-aralan ang mensahe ni Elder Haynie, na naghahanap ng mga dahilan kung bakit ang pagkakaroon ng propeta ay tanda ng pagmamahal ng Ama sa Langit. Paano nagpadama sa iyo ang pagsunod sa propeta ng Panginoon na ligtas kang namumuhay sa mga huling araw?

Tingnan din sa Mga Paksa at mga Tanong, “Mga Propeta,” Gospel Library; “Why Do We Have Prophets?” (video), Gospel Library.

1:38

Nag-iisip ang ilang tao tungkol sa katarungan ng Diyos sa pagpapadala ng Baha para “[lipulin] ang tao” (Genesis 6:7). Ipinaliwanag ni Elder Neal A. Maxwell na noong panahon ng Baha, “napakalala na ng katiwalian at nilimitahan nito ang kalayaan ng mga tao na maging matwid kaya hindi makatarungang magsugo ng mga espiritu para mamuhay rito sa lupa” (We Will Prove Them Herewith [1982], 58). Maaari mo ring isipin kung paanong naging pagpapakita ng awa ang Baha. Ano ang nakikita mo sa Genesis 6:5–13 na nagpapakita ng magiliw na awa at pagmamahal ng Panginoon sa mga tao?

Ayon sa Genesis 9:8–17, ano ang maaaring ipaalala sa iyo ng isang bahaghari? Ano ang idinaragdag ng Pagsasalin ni Joseph Smith, Genesis 9:21–25 (sa Gabay sa mga Banal na Kasulatan) sa iyong pang-unawa? Maaari mo ring isiping gumawa ng listahan ng iba pang mga bagay (tulad ng mga simbolo, bagay, o anumang iba pa) na naibigay sa iyo ng Diyos para ipaalala sa iyo ang iyong mga tipan. Ano ang itinuturo sa iyo ng mga bagay na ito? Paano ka tinutulungan ng mga ito na makaalala?

Tingnan din sa Gerrit W. Gong, “Lagi Siyang Alalahanin,” Liahona, Mayo 2016, 108–11; “Mapitagan at Aba,” Mga Himno, blg. 109.

Ang salaysay tungkol sa pagtatayo ng mga tao ng Babel sa isang tore ay nagbibigay ng kawili-wiling pagkakaiba sa salaysay tungkol sa pagtatayo ni Enoc at ng kanyang mga tao sa Sion, na pinag-aralan mo noong nakaraang linggo. Ang dalawang grupong ito ng mga tao ay nagsikap na makarating sa langit sa magkaibang paraan. Paano natamo ng mga tao ng Sion ang langit? (tingnan sa Moises 7:18–19, 53, 62–63, 69). Ano ang natututuhan mo mula sa Genesis 11:1–9 at Helaman 6:26–28 tungkol sa mga tao ng Babel? Ano ang itinuturo nito sa atin tungkol sa sarili nating mga pagsisikap na makabalik sa piling ng Diyos? Ano ang nailaan ng Diyos para tulungan tayong “[makaabot] hanggang sa langit”? (Genesis 11:4; tingnan din sa Juan 3:16).

• Bakit isinumpa ni Noe si Canaan?

• Ano ang mali sa pagtatayo ng Tore ng Babel?

• Ano ang kabuluhan ng talaangkanan ni Sem?

Iklik para makita ang iba pa.

• Karamihan sa mga bata ay gustung-gusto ang kuwento ni Noe at ng arka. Isiping bigyan ng mga oportunidad ang iyong mga anak na ibahagi ang nalalaman nila tungkol dito. Para matulungan sila, maaari mong gamitin ang mga larawan sa outline na ito, “Si Noe at ang Kanyang Pamilya” sa Mga Kuwento sa Lumang Tipan (22–25), at ang pangatlong talata ng “Propeta’y Sundin” (Aklat ng mga Awit Pambata, 58–59). Maaaring masiyahan ang iyong mga anak na iakto ang mga bahagi ng kuwento—halimbawa, sa pagkukunwaring gumamit ng isang kagamitan sa pagbubuo ng arka o paglalakad na parang mga hayop na pumapasok sa arka.

• Habang sama-sama ninyong pinag-uusapan si Noe, tulungan ang iyong mga anak na makita kung gaano tayo pinagpala na magkaroon ng isang propeta ng Diyos ngayon. Tulungan ang iyong mga anak na saliksikin ang Moises 8:16–24 para maghanap ng mga bagay na itinuro ni Noe na itinuturo pa rin ng mga propeta ng Panginoon ngayon. Paano tayo pinagpapala kapag sinusunod natin ang mga turong ito?

• Maaaring masiyahan ang iyong mga anak na magdrowing o magkulay ng isang bahaghari habang pinag-uusapan ninyo kung ano ang kinakatawan nito (tingnan sa Pagsasalin ni Joseph Smith, Genesis 9:21–25 [sa Gabay sa mga Banal na Kasulatan]). Ano ang nais ng Diyos na isipin ni Noe at ng kanyang pamilya kapag nakakita sila ng bahaghari?

• Maaari mo ring ipakita sa iyong mga anak ang isang bagay na mayroon ka na nagpapaalala sa iyo ng isang bagay na mahalaga sa iyong buhay, tulad ng isang singsing sa kasal, isang larawan, o isang journal. Hayaan ang iyong mga anak na magbahagi ng sarili nilang mga halimbawa. Maaari itong mauwi sa isang pag-uusap tungkol sa mga bagay na nagpapaalala sa atin ng ating mga tipan, tulad ng sakramento, na nagpapaalala sa atin ng ating tipan sa binyag na sundin si Jesucristo (tingnan sa Doktrina at mga Tipan 20:75–79).

• Maaaring masayang magtayo ng isang tore gamit ang mga block o iba pang mga bagay kasama ang iyong mga anak. Habang ginagawa ninyo ito, ipaliwanag na inakala ng mga tao ng Babel na makararating sila sa langit sa pagtatayo ng isang mataas na tore. Pagkatapos ay maaari ninyong sama-samang tingnan ang isang larawan ng Tagapagligtas at itanong sa iyong mga anak kung paano Niya tayo tinutulungang makarating sa langit. Pagkatapos ay maaari kayong mag-usap-usap tungkol sa mga bagay na magagawa ninyo para masunod ang Tagapagligtas.

• Bukod pa sa pagbabasa ng kuwento tungkol sa tore ng Babel sa Genesis 11:1–9, maaari ninyong basahin ng iyong mga anak ang Helaman 6:28. Ayon sa talatang ito, bakit itinayo ng mga tao ng Babel ang tore? Bakit hindi tamang paraan ang pagtatayo ng toreng ito para makarating sa langit? Pagkatapos ay maaari ninyong saliksikin ang 2 Nephi 31:20–21 at Helaman 3:28 para hanapin ang tamang landas para makarating sa langit. Ano ang maipapayo natin sa mga tao ng Babel?