Jenesis 6–11; Moses 8

Kwoj ke lo jabdewōt ilo kōmeļeļein raan ko an Noa me āinwōt eitin jekjek ko an raan kein ad? Lale Moses 8:15–24, 28. Unin tōl rōt ko kwoj loe elōn̄ katten?

Juon men eaorōk kwonaaj lo ej bwe Anij ekar kūr Noa bwe en juon rikanaan, im E ekar bar kūr juon rikanaan rainin. Ļōmņak in kōm̧m̧ane juon laajrak in m̧ool ko kwoj katak kake rikanaan ro jān Moses 8:13–30. Elmen an rikanaan eo ad emour āinwōt Noa? Em̧ool, rikanaan eo an Irooj rainin ejjab kakkōl kōj kōn juon Ibwijleplep ak kipel kōj bwe jen jipan̄ jek juon wa. Ak ta eo ej kakkōl kōj kake? Im ta eo ej karuwanene kōj bwe jen kōm̧m̧ane? N̄an jipan̄ uwaake kajjitōk kein, kwomaron̄ etale juon jebta jān Teachings of Presidents of the Church ilo Gospel Library, eļaptata jekjōn in “Invitations and Promised Blessings”. Bōlen kwomaron̄ kāālet juon kakōlkōl im juon karuwainene me eaorōk n̄an kwe.

Elder Allen D. Haynie ekar katakin, “Jemedwōj Ilan̄ eaar kāālet jon̄ak in n̄an kwaļo̧k m̧ool eo n̄an ro Nejin kōn juon rikanaan” (“Juon Rikanaan Emour n̄an Raan Ko Āliktata,” Liaona, Māe 2023, 25). Ļōmņak in ekkatak ennaan eo an Elder Haynie, kappukot unin an wōr rikanaan etke ej juon kakōļļe in iakwe an Jemedwōj Ilan̄ Elmen ļoor rikanaan eo an Irooj kar jipan̄ eok en̄jake mour in jokne ilo raan kein āliktata?

Bar lale Unin Kōnono ko im Kajjitōk, “Rikanaan ro,” Gospel Library; “Why Do We Have Prophets?” (pijaan alooj), Gospel Library.

1:37

Jet armej raar ļōmņak bwe ejim̧we an Anij kar jilkintok Ibwijleplep eo n̄an “jeorļo̧k armej” (Jenesis 6:7). Elder Neal A. Maxwell ekar kōmeļeļe bwe ilo iien Ibwijleplep eo, “Tarpok kar tōpar jekjek eo n̄an kakkure anemkwoj in kāālet me jetōb ko rejjab maron̄, ilo jim̧we, tōpar ijin” (We Will Prove Them Herewith [1982], 58). Kwomaron̄ bar ļōmņake elmen an Ibwijleplep eo juon jerbal in tūriam̧o. Ta eo kwoj loe ilo Jenesis 6:5–13 me ej kwaļo̧k tūriam̧o im iakwe eo an Irooj n̄an armej ro?

Ekkar n̄an Jenesis 9:8–17, ta eo juon iia emaron̄ bōktok n̄an kōļmenļo̧kjeņ eo am̧? Ta eo Ukook eo an Josep Smith, Jenesis 9:21–25 (in Baibōļ appendix eo) ej lewaj n̄an kōļmenļo̧kjeņ eo am̧? Kwomaron̄ bar ļōmņak in kōm̧m̧an laajrak in men ko jet (āinwōt kakōļļe, ak men ko jet) me Anij ekar lewaj n̄an kwe n̄an kakeememej eok kōn bujen ko am̧. Ta ko men kein rej katakin eok? Elmen aer jipan̄ eok keememej?

Bar lale Gerrit W. Gong, “Keememej E Iien Otemjej,” Liaona, Māe 2016, 108–11; “Reverently and Meekly Now,” Hymns, no. 185.

Bwebwenato in an armej ro in Babel kalōk juon tawōr ej letok juon oktak kōtaan bwebwenato eo an Inōk im armej ro an rej kalōk Zaion, me kwaar katak kake wiik eo ļo̧k. Kurup in armej rein jim̧or rekar kajjieon̄ tōparļo̧k lan̄ ilo wāween ko reoktak jān doon. Elmen an kar armej ro an Zaion tōpar lan̄ (lale Moses 7:18–19, 53, 62–63, 69). Ta eo kwoj ekkatak jān Jenesis 11:1–9 im Hilamōn 6:26–28 kōn armej in Babel ro? Ta eo men in ej katakin kōj kōn kijejeto ko ad make n̄an jepļaakļo̧k n̄an im̧aan mejān Anij? Ta eo Anij ekar letok n̄an jipan̄ kōj n̄an “tōparļo̧k lan̄”? (Jenesis 11:4; bar lale Jon 3:16).

• Eitōn aolep ajri em̧m̧an ippāer bwebwenato in Noa im wa eo. Ļōmņak in leļo̧k iien em̧m̧an n̄an ajri ro bwe ren kwaļo̧k ta ko rejeļā kake. N̄an jipan̄ er, kwomaron̄ kōjerbal pija eo ilo laajrak in “Noa im Baam̧le eo An” ilo Bwebwenato ko jān Kallim̧ur M̧okta (22–25), im eoon eo kein kajilu in “Follow the Prophet” (Children’s Songbook, 110–11). Ajri ro nejum̧ remaron̄ kōņaan āinwōt bwebwebnato eo—n̄an waanjon̄ak, ilo aer kōjerbal juon kein jerbal n̄an jek juon wa ak etetal āinwōt mennin mour ko ilo wa eo.

• Ilo ami kōnono ippān doon kōn Noa, jipan̄ ajri ro nejum̧ lo jon̄an ad jeraam̧m̧an bwe ewōr ad rikanaan an Anij rainin. Jipan̄ ajri ro nejum̧ lale Moses 8:16–24 n̄an pukot men ko Noa ekar katakin bwe rikanaan ro an Anij rej wōt kwaļo̧k rainin. Elmen ad jeraam̧m̧an n̄e jej pokake katak kein?

• Ajri ro nejum̧ remaron̄ m̧ōņōņō in jin̄a ak kōļare juon iia ilo am̧ kōnono kōn ta eo ej jutak kake (lale Josep Smith Ukook, Jenesis 9:21–25 [in the Bible appendix]). Ta eo Anij eaar kōņaan bwe Noa im baam̧le eo an ren ļōmņake n̄e reloe juon iia?

• Kwomaron̄ bar kwaļo̧k n̄an ajri ro juon men me ej kakeememej eok kōn juon men eaorōk ilo mour eo am̧, āinwōt juon riin̄ in m̧are, juon pija, ak juon jōnōļ. Kōtļo̧k bwe ajri ro nejum ren kwaļo̧k make waanjon̄ak ko aer. Men in emaron̄ tōl n̄an juon kōmeļeļe kōn men ko me rej jipan̄ kōj keememej bujen ko ad, āinwōt kwojkwoj eo, eo me ej jipan̄ kōj keememej bujen peptaij eo ad n̄an ļoor Jisōs Kraist (lale Katak im Bujen 20:75–79).

• Emaron̄ limo n̄an kalōk juon tawōr ippān ajri ro nejum̧ jān block ko ak men ko jet. Ilo ami kōm̧m̧ane, kōmeļeļeik bwe armej in Babel ro raar ļōmņak remaron̄ kar etal n̄an lan̄ n̄e renaaj kalōk juon tawōr eutiej. Kom̧ maron̄ ippān doon lale pijain Rilo̧mo̧o̧r im kajjitōk ippān ajri ro nejum̧ elmen An jipan̄ kōj n̄an lan̄. Innām kom̧ maron̄ kōnono ippān doon kōn men ko kom̧ maron̄ kōm̧m̧ani n̄an ļoor Rilo̧mo̧o̧r.

• N̄an kakobaba n̄an riitii bwebwenato in tawōr eo ilo Babel ilo Jenesis 11:1–9, kwe im ajri ro nejum̧ maron̄ riiti Hilamōn 6:28. Ekkar n̄an eoon in, etke armej in Babel ro raar kalōk juon tawōr? Etke ebōd kilen kalōk tawōr in n̄an lan̄? Innām kwomaron̄ etale 2 Nipai 31:20–21 im Hiļamōn 3:28 n̄an pukot lukkuun iaļ eo ejim̧we n̄an tōpar lan̄. Ta kapilōk eo jenaaj kar leļo̧k n̄an armej in Babel?