Moses 7

Jinoin an kar Rikanaan Josep Smith ekkatak kōn Inōk im Bukwōn eo Ekwojarjar an, ekar im̧we. E “kar jeļā raan eo ear itok me Irooj enaaj bar ejaake Zaiōn ioon laļin” (Armej ro Rekwojarjar, 1:108–9), im ekar jino juon jibadbad in kalōk Zaiōn ilo mour eo an. Riiti Moses 7 emaron̄ un̄ūr eok n̄an wōnm̧aanļo̧k wōt kōn kijejeto eo rainin.

Kwomaron̄ jinoe ilo am̧ etale kajjitōk kein “Ta in Zaiōn?” im “Elmen an oktak jān aolepen laļin?” Ļōmņak in laajraki uwaak ko rej itok n̄an kwe ilo am̧ ekkatak Moses 7, eļaptata eoon 16–21, 27, 53, 62–69.

Uwaak ko am̧ n̄an kajjitōk kein remaron̄ kalikkar bwe ej ļap wōt ad jerbal n̄an kalōk Zaiōn Kōn menin, elmen ad kōm̧m̧ane men in? Emaron̄ jipan̄ n̄an ļōm̧ņak kōn iien ko kwoj en̄jake ke kwaar “juon wōt ilo bōro im juon wōt ilo ļōmņak,” ippān juon armej (Moses 7:18). Bōlen ekar ilo juon ward, ilowaan baam̧le eo, ak kurup in jerbal ak ilo jikuuļ. Ta ko armej rej kōm̧m̧ani n̄an ejaake juon ippān doon erreo?

Erkein bar jet kein jipan̄ ko me kwomaron̄ lali n̄an pukot ļōmņak im im̧we. Kāālet juon ak elōn̄ļo̧k n̄an ekkatak, innām je ta eo kwoj en̄jake n̄an kōm̧m̧ane n̄an kalōk Zaiōn.

• Pilipai 2:1–4; 4 Nipai 1:15–18; Katak im Bujen Ko 97:21; 105:5.

• Ulisses Soares, “Ro Jeiū im Jatū ilo Kraist,” Liaona, Nob. 2023, 70–73.

• D. Todd Christofferson, “Juon Wōt ilo Kraist,” Liaona, Māe 2023, 77–80.

Ta meļeļein n̄an kwe ke Jisōs Kraist ej am̧ Kiin̄? Keememej taitōļ ko jet an Jisōs Kraist ilo eoon in. Ta ko rej katakin kake E? Kwoļak ļōm̧ņak ta meļeļein n̄an itok “ilo kōjām eo im tallōn̄ tok [Iturun]”?

Bar lale “Come, O Thou King of Kings,” Hymns, no. 59.

Jet armej rej lo Anij āinwōt juon armej eo ettoļo̧k eo ejjeļo̧k an en̄jake in būrom̧ōj kōn ta ko rej waļo̧k n̄an kōj. Inōk ekar bōk juon meļeļe eoktak kōn Anij ilo visōn eo kar jeiki ilo Moses 7. Ta eo ekar katak kōn Anij—im ta eo kwoj ekkatak—ilo eoon 28–40? Etke ke kwoj ļōmņak Inōk ekar ilbōk ke ej lo an Anij jan̄? Etke eaorōk n̄an kwe bwe kwon jeļā ta eo Ej kōm̧m̧ane?

Ilo an wōnm̧aanļo̧k visōn eo, Inōk ekar bar jan̄. Ak Anij ekar bar kwaļo̧k n̄an e un ko n̄an lan̄lōn̄. Pukoti ilo Moses 7:41–69. Ta eo kwoj ekkatak jān visōn eo an Inōk me emaro̧n̄ jipan̄ “kotak būruōm, im kwōn m̧ōņōņō,” mekarta “metak” ilo mour eo am̧ (eoon 44)?

Bar lale Jeffrey R. Holland, “The Grandeur of God,” Liahona, Nov. 2003, 70–73.

Visōn eo an Inōk, eļaptata eo kar jeiki ilo Moses 7:59–67, ej juon iaan kanaan ko jinoin ilo bwebwenato kōn Itok eo Kein Karuo an Rilo̧mo̧o̧r. Ta eo ej un̄ūr eok kōn wāween an eoon kein kōmeļeļe kōn raan ko āliktata? N̄an waajon̄ak, ļōm̧ņak ekōjkan am̧ en̄jake elmen an kanaan ko jān eoon 62 kūrm̧ool. Ta eo jentōj kein rej katakin eok kōn jerbal eo an Anij ilo raan ko āliktata?

Bar lale Henry B. Eyring, “Sisters ro ilo Zaion,” Liaona, Nob. 2020, 67–69.

• N̄an jipan̄ ajri ro ekkatak kōn Inōk im Zaiōn, komaron̄ kōjerbal “Rikanaan Inōk” ilo Bwebwenato ko jān Kallim̧ur M̧okta (19–21) ak eoon ruo in “Follow the Prophet” (Children’s Songbook, 110–11). Innām kwomaron̄ kajjitōk ippān ajri ro bwe ren jipan̄ eok bwebwenato kōn bwebwenato eo ilo naan ko aer make. Pija ko pijaan Inōk ilo unin tōl in remaron̄ jipan̄.

• En̄iin ej juon iaļ n̄an jipan̄ ajri ro meļeļe ta meļeļein n̄an “juon wōt ilo bōro im juon wōt ilo ļōmņak” (Moses 7:18): Kōm̧m̧an juon annan̄ in bōro jān pepa im ajeeje ilo elōn̄ m̧ōttan, bwe en bwe n̄an aolep ajri ro. Kōtļo̧k bwe ren je etaer ioon pepa jidikdik eo aer im jerbal ippān doon n̄an bajōļe annan̄ in bōro eo. Ilo aer kōm̧m̧ane, kwomaron̄ kōnono kōn men ko rem̧m̧an ippam̧ ke kwaar ajri.

• Kajjitōk bwe ajri ro ren bwine jete katten an naan eo “Zaion” waļo̧k ilo Moses 7:18–21, 62–63, 68–69. Kajjojo iien rej lo naan eo, jipan̄ er lo ta eo eoon eo ej ba kōn Zaion (bar lale Unin Tōl n̄an Jeje ko Rekwojarjar, “Zaion,” Gospel Library). Ekōjkan ad maron̄ erom̧ eļapļo̧k āinwōt armej ro kar kōmeļeļeik er ilo eoon kein?

• N̄an kwaļo̧k kadkadin Moses 7:32–33 n̄an ajri ro nejum̧ kwomaron̄ kōnono ippāer kōn juon kāālet raar kōm̧m̧ane jet iien remootļo̧k. Innām kwomaron̄ bar riiti eoon ko ippān doon n̄an pukot ta eo Jemedwōj Ilan̄ ekōņaan bwe jen kāālete. Ta kāālet ko jemaron̄ kōm̧m̧ani n̄an kwaļo̧k ke jej kāālet E? Bōlen ajri ro remaron̄ juon ilok juon kōm̧m̧ane kāālet kein ilo an ro jet kwaļo̧k ta eo m̧akūtkut eo ej kwaļo̧k.

• Ilo Moses 7:59, Inōk ej kajjitōk ippān Irooj juon kajjitōk. Karuwaineneik ajri ro bwe ren pukote, innām kajjitōk bwe ren pukot uwaak eo ilo eoon 60. Kwomaron̄ bar kōnono ippāer kōn juon iien me raar kōtmāne ke juon armej en kar jepļaaktok. Kajjitōk ippāer elmen aer kar en̄jake im ta eo raar kōm̧m̧ane n̄an keppopo. Elmen ad pojak n̄an jepļaaktok eo an Jisōs?

• Ļōmņak in kwaļo̧k pijaan iien ko me Rilo̧mo̧o̧r eaar waļo̧k n̄an armej ro (āinwōt Bok in Gospel Pija, nō. 60, 82, 83, im 84). Ta eo armej ro rej kōm̧m̧ane ilo pija ko? Ekōjkan an armej ro maron̄ kar en̄jake ke rekar ioon Jisōs? Kwomaron̄ bar al juon al kōn Itok eo Kein Karuo an Rilo̧mo̧o̧r, āinwōt “When He Comes Again” (Children’s Songbook, 82–83), im kajjitōk ippān ajri ro ta eo rej ļōmņak enaaj āinwōt n̄e Jisōs ebar itok. Kōtļo̧k bwe ajri ro ren kwaļo̧k aer en̄jake kōn aer naaj ioon Jisōs n̄e Ej bar itok juon alen.