Genesis 6-11; Moses 8

Ana ihu biribi wɔ Noah ne nda a wɔakã ho asɛm no mu a ɔyɛ dɛ ɔnye hɛn nda mu ne tsebew sɛ a? Tsitsir ara, hwɛ Moses 8:15–24, 28 mu. Ebɛn nsɛngyinado na ihu dɛ woesi do?

Dza ɔnye no sɛ kor a ohia a ibohu nye dɛ Nyankopɔn frɛɛ Noah dɛ ɔnyɛ nkɔnhyɛnyi, na Ɔafrɛ nkɔnhyɛnyi ndɛ so. Hwɛ dɛ ebɛkyerɛw no nkorkor, nokwar horow a isũa fa nkɔnhyɛfo ho fi Moses 8:13–30 mu. Hɛn nkɔnhyɛnyi tseasefo si dɛn tse dɛ Noah? Nokwar, ndɛ Ewuradze no nkɔnhyɛnyi rommbɔ hɛn Nsuyirii ho kɔkɔ anaa ɔronnto nsa mmfrɛ hɛn dɛ yɛmpam hɛn. Naaso ebɛnadze na ɔrobɔ hɛn ho kɔkɔ? Na ebɛnadze na ɔroto nsa frɛ hɛn dɛ yɛnyɛ? Ama aaboa eyiyi nsɛmbisa yinom ano no, ibotum abobɔ tsir bi fi Teachings of Presidents of the Church do wɔ Asɛmpa Nwoma Korabea, nkanka “Invitations and Promises” no ɔfã no. Bia ibotum eyi kɔkɔbɔ kor na nsato kor a tsitsir ara ohia ma wo.

Elder Allen D. Haynie kyerɛkyerɛɛ dɛ, “Egya dɔfo a ɔwɔ Sor na Odzi mu eyi nokwar ho nyikyerɛ nhwɛdo dze edua No nkɔnhyɛnyi do ama Ne mba” (“A Living Prophet for the Latter Days,” Liahona, Esusow Aketseaba 2023, 25). Hwɛ dɛ ibosũa Elder Haynie n’asɛm, a erohwehwɛ siantsir a yɛwɔ nkɔnhyɛnyi no yɛ Ɔsor Egya no dɔ ho sɛnkyerɛdze. Ereka Ewuradze no nkɔnhyɛnyi do esi dɛn aboa wo ma enya ahotɔ dɛ etse nda a odzi ekyir no mu?

Hwɛ Topics and Questions, “Prophets,” Asɛmpa Nwoma Korabea; “Why Do We Have Prophets?” (video), Asɛmpa Nwoma Korabea so.

1:37

Ɔyɛ nkorɔfo binom nwanwa dɛ Nyankopɔn ne pɛrpɛr ho no Ɔdze Nsuyirii bae dze “sɛɛ nyimpa” (Genesis 6:7). Elder Neal A. Maxwell kyerɛkyerɛɛ mu dɛ Nsuyirii ne mber no, “nna ɔsɛɛ no edu nyimpa-ne-pɛ-ɔsɛɛ mpɛnpɛndo dɛ, wɔ pɛrpɛrdzi mu, wonnkotum ama esunsum mu mba abɛtsena ha” (We Will Prove Them Herewith [1982], 58). Ibotum so ahwɛ mbrɛ Nsuyirii no sii yɛɛ ehumbɔbɔr ho nyɛe. Ebɛnadze na ihu wɔ Genesis 6:5–13 mu a ɔkyerɛ Ewuradze n’ayamuyie na dɔ ma nkorɔfo no?

Dɛ mbrɛ Genesis 9:8–17 kã no, ebɛnadze na nyankontɔn kaa wo wɔ ho? Ebɛnadze na Joseph Smith Nkyerɛase, Genesis 9:21–25 dze kã wo ntseasee ho? Ibotum so ahwɛ dɛ ebɛkyerɛw ndzɛmba bi so nkorkor (tse dɛ nsɛnkyerɛdze, ndzɛmba, anaa biribi so) a Nyankopɔn dze ama wo dɛ w’ahyɛmudzi horow ho nkaadze. Ebɛnadze na ndzɛmba yinom kyerɛkyerɛ wo? Wosi dɛn boa wo ma ekaa?

Hwɛ Gerrit W. Gong, “Always Remember Him,” Liahona, Esusow Aketseaba 2016, 108–11; “Reverently and Meekly Now,” Asɔr Ndwom, nkanee 185 so.

Nkorɔfo a nna wɔwɔ Babel a worisi abantsentsen ho asɛm no yɛ Enoch na no nkorɔfo a wɔrekyekyer Zion ho asɛm ebirabɔdze, a hom sũaa no dapɛn a ɔabasen no. Nna nkorɔfo ekuwekuw ebien no nyina robɔ mbɔdzen afow sor na mbom ɔson akwan a wɔrefa do. Nkorɔfo a wɔwɔ Zion no sii dɛn nyaa sor fae? (Hwɛ Moses 7:18–19, 53, 62–63, 69). Ebɛnadze na isũa fi Genesis 11:1–9 na Helaman 6:26–28 mu a ɔfa Babel nkorɔfo no ho? Ebɛnadze na iyi kyerɛkyerɛ hɛn fa hɛnara hɛn mbɔdzembɔ ho dɛ yɛbɛsan akɔ Nyankopɔn n’enyim hɔ ho? Ebɛnadze na Nyankopɔn dze ama hɛn a ɔboa hɛn “ma yebodu sor”? (Genesis 11:4; hwɛ John 3:16 so).

• Mbofra dodow pɛ asɛm no a ɔfa Noah na hɛn no ho no. Hwɛ dɛ ebɛma wo mbofra no akwanhorow ma wɔakyɛ dza wonyim fa ho. Ama aaboa wo mbofra no, ibotum dze mfonyin a ɔwɔ n’apɔwdo n’apɔwdo yi mu edzi dwuma, “Noah and His Family” wɔ Old Testament Stories (22–25) mu, na “Follow the Prophet” ne nyiyimu a otsĩa ebiasa no (Children’s Songbook, 110–11). Wo mbofra no hɔn enyi botum agye dɛ wɔreyɛ asɛm no ne fã bi ho ɔyɛkyerɛ—mfatoho, ber a wɔrepetuw dɛ wɔdze edwindze bi repam hɛn no anaaa wɔrenantsew tse dɛ mbowa a wɔrekɛhɛn hɛn mu no.

• Ber a wɔbɔ mu kã Noah no ho asɛm no, boa wo mbofra ma wonhu mbrɛ osi yɛ nhyira ma hɛn dɛ yɛwɔ Nyankopɔn no nkɔnhyɛnyi ndɛ. Boa wo mbofra ma wɔnhwehwɛ Moses 8:16–24 mfa nhu ndzɛmba a Noah kyerɛkyerɛe a Ewuradze no nkɔnhyɛfo da ho kyerɛkyerɛ no ndɛ. Nhyira bɛn na yenya ber a yedzi nkyerɛkyerɛ yinom do?

• Wo mbofra enyi bɛgye dɛ wɔrodorɔw anaa wɔrekekã nyankontɔn mu ber a ekã dza ogyina hɔ dze ma ho asɛm (hwɛ Joseph Smith Nkyerɛase, Genesis 9:21–25 [wɔ Bible mbɔekyir no mu). Nna ebɛnadze na Nyankopɔn pɛ dɛ Noah na n’ebusua dwendwen ho aber biara a wobohu nyankontɔn no?

• Ibotum so akyerɛ wo mbofra adze bi a ewɔ a ɔbɔ wo adze bi a ɔwɔ w’abrabɔ mu ho nkaa, tse dɛ ayefor mpɛtsea, mfonyin bi, anaa journal bi. Ma wo mbofra no nkyɛ hɔnara hɔn mfatoho horow. Iyi botum abɛyɛ nkɔmbɔdzi wɔ ndzɛmba bi a wɔboa hɛn ma yɛkaa hɛn ahyɛmudzi horow ho, tse dɛ sacrament no, a ɔboa hɛn ma yɛkaa hɛn enuma ahyɛmudzi dɛ yɛbɛka Jesus Christ do no (hwɛ Nkyerɛkyerɛ na Ahyɛmudzi 20:75–79).

• Ɔbɛyɛ enyigye dɛ enye wo mbofra no dze brɔks anaa ndzɛmba bi besi abantsentsen no. Ber a hom yɛ no, kyerɛkyerɛ mu dɛ nna Babel nkorɔfo no dwen dɛ wobotum esi abantsentsen tsentsen dze akɔ sor. Nkyii wobotum abɔ mu ahwɛ Agyenkwa no no mfonyin na ebisa wo mbofra no mbrɛ Osi boa hɛn ma yɛkɔ sor. Nkyii hom botum nye homho akyɛ ndzɛmba bi a hom botum ayɛ dze aka Agyenkwa no do ho asɛm.

• Hom rekenkan Babel abantsentsen ho asɛm wɔ Genesis 11:1–9mu no, ɔwo na wo mbofra no botum akenkan Helaman 6:28 akã ho. Dɛ mbrɛ nyiyimu yi kã no, ebɛnadze ntsi na Babel nkorɔfo no sii abantsentsen no? Dɛn ntsi na abantsentsen yi ne nsii no yɛ mfom kwan a wɔdze bodu sor? Nkyii wobotum ahwehwɛ 2 Nephi 31:20–21 na Helaman 3:28 mu dze ehu kwan a ɔtsen a wɔdze bodu sor. Ebɛn afotu na yebotum dze ama nkorɔfo a wɔwɔ Babel no?